Vakamalumalumu Vei Ira na iVakatawa Dauloloma

“Dou talairawarawa vei ira sa liutaki kemudou, ka mo dou vakamalumalumutaki kemudou.”​—IPERIU 13:17.

1, 2. Na tikinivolatabu cava era dusia ni rau iVakatawa dauloloma o Jiova kei Jisu Karisito?

ERAU iVakatawa dauloloma na Kalou o Jiova kei na Luvena, o Jisu Karisito. A parofisaitaka o Aisea: “Raica, ena lako vakaukauwa mai na Turaga ko Jiova, ia na ligana ena lewa e na vukuna: . . . ena vakani ira na nona qele ni sipi me vaka nai vakatawa; ena keveti ira na luve ni sipi e na ligana, ka kauti ira voli e na lomaserena; ko ira era vakasucuma tiko na luvedra ena tubera voli vakamalua ko koya.”​—Aisea 40:10, 11.

² A vakayacori taumada na parofisai ni veivakatikori tale oya nira sa lesu i Juta ena 537 B.S.K. e dua na ivovo ni Jiu. (2 Veigauna 36:22, 23) A vakayacori tale na parofisai oya ena 1919 nira sa vakabulai mai ‘Papiloni na Ka Levu’ na ivovo ni lumuti. A vakabulai ira o Sairusi Levu Cake, o Jisu Karisito. (Vakatakila 18:2; Aisea 44:28) O koya na ‘liga’ ni veiliutaki i Jiova, e kumuni ira na sipi qai karoni ira. A kaya sara ga o Jisu: “Oi au nai vakatawa vinaka: ia ka’u sa kilai ira sa noqu, ia ko ira sa noqu era sa kilai au.”​—Joni 10:14.

3. E vakaraitaka vakacava o Jiova ni kauaitaki ira dina nona sipi?

³ E parofisaitaki ena Aisea 40:10, 11 ni o Jiova e dau vakatawani ira nona tamata ena dela ni loloma. (Same 23:1-6) Ena nona cakacaka vakavunau e vuravura, o Jisu e dau kauaitaki ira tale ga nona tisaipeli kei ira na lewenivanua. (Maciu 11:28-30; Marika 6:34) Rau cata sara ga o Jiova kei Jisu nodra itovo ca na ivakatawa se o ira na iliuliu kei Isireli, nira vakawaletaka na qelenisipi ra qai vakalolomataki ira. (Isikeli 34:2-10; Maciu 23:3, 4, 15) A yalataka o Jiova: “Ka’u na vakabulai ira kina na noqu qele ni sipi, ka ra na sega ni tokitaki tale; ia ka’u na dui veilewayaka na sipi eso kei na sipi eso. Ia ka’u na lesia e dua me nodrai vakatawa, ia ena vakani ira ko koya, io, na noqu tamata ko Tevita; ena vakani ira ko koya, ena lesi talega ko koya me nodrai vakatawa.” (Isikeli 34:22, 23) Ena iotioti ni veisiga oqo, o Jiova e sa lesi Tevita Levu Cake, o Jisu Karisito me nodra ‘ivakatawa dua bau’ na nona tamata kece e vuravura, oqo o ira na lotu Vakarisito lumuti kei ira na ‘so tani tale na sipi.’​—Joni 10:16.

iSolisoli i Jiova ina iVavakoso

4, 5. (a) Na isolisoli talei cava e solia o Jiova vei ira nona tamata e vuravura? (b) Na cava na isolisoli i Jisu vei ira na nona ivavakoso?

⁴ A solia o Jiova ina ivavakoso Vakarisito e dua na isolisoli talei ena gauna e lesia kina na ‘dua bau na ivakatawa,’ o Jisu Karisito me liutaki ira nona tamata e vuravura. Na isolisoli oqo, ni na dua na Turaga mai lomalagi, a parofisaitaki ena Aisea 55:4: “Raica, ka’u sa soli koya me nodra dautukutuku na veimataqali, me nodra turaga ka vu-ni-vunau na veimataqali.” O ira na lotu Vakarisito lumuti kei ira tale ga “nai soqosoqo levu” era kumuni mai na veimatatamata, duiyavusa, veimatanitu, kei na duivosavosa. (Vakatakila 5:​9, 10; 7:9) Era vaka ga e dua na ivavakoso e roboti vuravura, ra qai vaka na “dua bau na qele ni sipi” e liutaki ira na “dua bau nai vakatawa,” o Karisito Jisu.

⁵ O Jisu tale ga e solia e dua na isolisoli talei ina nona ivavakoso e vuravura. E soli ira mai na ivakatawa yalodina era ucui rau vinaka kei Jiova ena nodra karona na qelenisipi. A kauta cake mai o Paula na isolisoli oqo ena nona ivola vei ira na lotu Vakarisito mai Efeso. E vola: “Ni sa lako ki cake ko koya, sa vakabobulataki ira e lewe vuqa me ra bobula, a sa solia nai solisoli eso vei ira na tamata. Ia sai koya sa solia eso, me rai apositolo; ka so, me ra parofita; ka so, me ra tamata dauvunau voli; ka so, me rai vakatawa kai vakavuvuli: me ra vakavinakataki kina ko ira sa lotu, me ia na cakacaka ni talatala, me vakatataki cake nai vavakoso nei Karisito.”​—Efeso 4:8, 11, 12.

6. Na cava e tukuni ena Vakatakila 1:16, 20 me baleti ira na ivakatawa lumuti era veiqaravi ena ilawalawa qase? Na cava eda rawa ni kaya me baleti ira na qase ni ivavakoso era lewe ni so tani tale na sipi?

⁶ O ira “nai solisoli” oqo era ivakatawa, se qase ni ivavakoso, e lesi ira o Jiova kei na Luvena ena cakacaka ni yalo tabu, mera karoni ira na sipi. (Cakacaka 20:28, 29) Ni se qai tekivu na ivavakoso Vakarisito, o ira kece era lesi mera ivakatawa era tagane lotu Vakarisito lumuti. Ena Vakatakila 1:16, 20 (VV), o ira na qase era veiqaravi ena ivavakoso era lewena na lumuti, era tukuni nira vaka na “kalokalo” se “agilosi” ena liga imatau i Karisito, kena ibalebale e lewai ira o koya. Ia ena iotioti ni veisiga oqo, sa lutu sobu tiko ga na kedra iwiliwili na ivakatawa lumuti e vuravura. Na iwiliwili levu ga ni qase ni ivavakoso nikua era lewe ni so tani tale na sipi. O ira oqo e lesi ira o ira na matataka na iLawalawa Dauvakatulewa ena veidusimaki ni yalo tabu. E rawa tale ga ni kainaki ni o ira oqo era tiko ena ruku ni liga imatau (se veidusimaki) i koya na iVakatawa Vinaka, o Jisu Karisito. (Aisea 61:5, 6) Sa dodonu ga meda tokoni ira na qase ena noda ivavakoso nira vakamalumalumutaki ira vei Karisito, na Ulu ni ivavakoso.​—Kolosa 1:18.

Talairawarawa kei na Vakamalumalumu

7. Meda raici ira vakacava na ivakatawa lotu Vakarisito me vaka e veivakasalataki kina o Paula?

⁷ Rau vinakata na noda iVakatawa mai lomalagi o Jiova kei Jisu Karisito meda talairawarawa da qai vakamalumalumu vei ira na ivakatawa erau lesia mera veiqaravi ena ivavakoso. (1 Pita 5:5) E vola na yapositolo o Paula ni uqeti koya na yalo tabu: “Dou nanumi ira era a liutaki kemudou, era a tukuna vei kemudou na vosa ni Kalou; vakadamurimuria na nodra vakabauta, ka nanuma nai otioti ni nodrai valavala. Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakataki ira era na tukuni ira kina, me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.”​—Iperiu 13:7, 17.

8. E sureti keda o Paula meda ‘vakananuma’ na cava, ia meda na “talairawarawa” vakacava?

⁸ E sureti keda o Paula meda “nanuma,” se meda vakasamataka vinaka nodra yalodina na qase, da qai vakatotomuria na nodra vakabauta. Vakasalataki keda tale ga meda talairawarawa da qai vakamalumalumu ina nodra veidusimaki na tagane oqo era lesi mera veiqaravi. Vakamacalataka e dua na vuku e dau dikeva na iVolatabu, o R. T. France ni vosa taumada vaKirisi e vakadewataki e ke me “talairawarawa” e “via rabailevu toka na kena ibalebale, e dusia na noda ‘ciqoma,’ se na noda vinakata dina meda muria na nodra veidusimaki.” Eda talairawarawa vei ira na qase baleta ni tukuna vei keda na Vosa ni Kalou, da qai vakadinata ni o ira na qase era kauaitaka dina na veika e vauca na Matanitu ni Kalou ra qai kauaitaki keda tale ga. Eda na marau dina ke da ciqoma na nodra veidusimaki ena yalo e vinakata.

9. Na cava e bibi kina meda kua wale ga ni dau talairawarawa, ia meda dau ‘vakamalumalumu’ tale ga?

⁹ Ia vakacava ke da nanuma ni sega soti ni vinaka e dua beka na ka era veidusimaki kina na qase? Sa qai yaga e keri na vakamalumalumu. E sega ni dredre na talairawarawa ke sa matata tu vei keda na ka e tukuni da qai duavata tale ga kina, ia ke mani buawa na vuna e kerei tiko kina e dua na ka meda cakava, na noda vakamalumalumu ena uqeti keda meda talairawarawa ga. O Pita, a qai yapositolo e muri, e kune vua na yalo ni vakamalumalumu oqo.​—Luke 5:​4, 5.

Va na Vuna Meda Dau Veitokoni Kina

10, 11. Era ‘tukuna vakacava na vosa ni Kalou’ na ivakatawa vei ira na tacidra Vakarisito ena imatai ni senitiuri, vaka kina nikua?

¹⁰ Ena Iperiu 13:​7, 17 e lavetaki mai cake, e va na vuna e cavuta o Paula e dodonu meda talairawarawa da qai vakamalumalumu kina vei ira na ivakatawa lotu Vakarisito. Na kena imatai, nira sa ‘tukuna vei keda na vosa ni Kalou.’ Nanuma tiko ni o ira na tamata e soli ira mai o Jisu ina ivavakoso e nodra itavi mera “vakavinakataki kina ko ira sa lotu.” (Efeso 4:11, 12) A vakayagataki ira na ivakatawa yalodina o koya mera vakavinakataka nodra vakasama kei na nodra itovo na lotu Vakarisito ena imatai ni senitiuri, qai so vei ira era uqeti vakalou mera volavola ina veivavakoso. O Jisu a vakayagataki ira tale ga na ivakatawa era lesi ena yalo tabu ena gauna oya mera veidusimaki ra qai veivakauqeti.​—1 Korinica 16:15-18; 2 Timoci 2:2; Taito 1:5.

¹¹ E dusimaki keda nikua o Jisu ena nona vakayagataka na “dauveiqaravi yalo dina ka vuku.” E matataki koya na dauveiqaravi oqo na iLawalawa Dauvakatulewa kei ira na qase ni ivavakoso. (Maciu 24:45, VV) Nida dokai koya “nai Vakatawa levu,” eda taura kina vakabibi na ivakasala i Paula: “Mo ni dokai ira era cakacaka tiko e na kemuni maliwa, ko ira sa digitaki ira na Turaga me ra liutaki kemuni ka dau vakatavulici kemuni.”​—1 Pita 5:4; 1 Cesalonaika 5:12, VV; 1 Timoci 5:17.

12. Era ‘yadrava tiko vakacava na yaloda’ na ivakatawa?

¹² Na ikarua ni vuna meda tokoni ira kina na ivakatawa lotu Vakarisito oya nira ‘yadrava na yaloda.’ Ke ra raica vei keda na itovo se ivalavala ena rawa ni vakaleqa noda bula vakayalo, era na vukitotolo mera vakasalataki keda ena ka meda na vinaka ga kina. (Kalatia 6:1) Na vosa vaKirisi e vakadewataki e ke me “yadrava,” e kena ibalebale “sega na moce.” E kaya e dua na vuku e dau dikeva na iVolatabu ni vosa oqori “e dusia nona dau yadrayadravaki na ivakatawa ni sipi.” Era sega wale ga ni yadrayadravaki vakayalo na qase, so na gauna era sega sara ga ni moce nira lomaleqataka na keda ituvaki vakayalo. Sega li ni kilikili meda dau tokoni ira na ivakatawa yalololoma mai vu ni lomada, nira saga ena nodra vinaka kece mera vakatotomuri Jisu Karisito, ‘na ivakatawa levu ni sipi’ e dau veikaroni?​—Iperiu 13:20.

13. Era na saumitaro vei cei na ivakatawa kei ira kece na lotu Vakarisito? Ena sala cava?

¹³ Na ikatolu ni vuna meda tokoni ira kina na ivakatawa mai vu ni lomada oya nira yadravi keda “me vakataki ira era na tukuni ira kina.” Era kila vinaka tu na ivakatawa nira veiqaravi tiko ena rukudrau na iVakatawa mai lomalagi, na Kalou o Jiova kei Jisu Karisito. (Isikeli 34:22-24) O Jiova na iTaukei ni sipi, e ‘voli ira ena dra i Luvena.’ Ena tarogi ira gona na ivakatawa ke ra “sega ni lomani” ira na qelenisipi. (Cakacaka 20:28, 29) O keda tale ga eda na saumitaro vei Jiova ena ka eda cakava se sega ena nona veidusimaki. (Roma 14:10-12) Na noda vakamalumalumu vei Karisito, na Ulu ni ivavakoso ena laurai ena noda talairawarawa vei ira na qase ni ivavakoso.​—Kolosa 2:19.

14. Na cava ena vakavuna mera veiqaravi kina ena “vutugu” na ivakatawa? Na cava eda na vakila ke da sega ni veitokoni?

¹⁴ Tukuna o Paula na ikava ni vuna meda na vakamalumalumu kina vei ira na ivakatawa lotu Vakarisito. E vola: “Me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.” (Iperiu 13:17) Na icolacola levu era colata na qase, e tu nodra itavi bibi mera veivakavulici, veivakatawani, liutaka na cakacaka vakavunau, era vakavuvale, qai tu na leqa mera qarava ena loma ni ivavakoso. (2 Korinica 11:28, 29) Eda na vakuria ga na bi ni nodra icolacola ke da sega ni dau veitokoni. Na ka oqori ena vakavuna mera “vutugu.” Ena sega ni marautaki keda o Jiova ke da sega ni dau veitokoni, eda na vakila tale ga na kena ca. Ia ke tiko vei keda na yalo ni veidokai kei na veitokoni, ena uqeti ira na qase oqori mera qarava nodra itavi ena marau, qai vakilai kina ena keda maliwa na duavata. Eda na cuqena tale ga ena marau na vunautaki ni Matanitu ni Kalou.—Roma 15:5, 6.

Vakaraitaka Noda Vakamalumalumu

15. Eda na vakaraitaka vakacava noda talairawarawa kei na vakamalumalumu?

¹⁵ Levu na ka eda rawa ni cakava meda tokoni ira kina na ivakatawa. Era na veisautaka beka na siga kei na gauna me caka kina na sota ni cakacaka vakavunau, me salavata kei na veiveisau ni ituvaki ena yalava me tarai. Meda tokona mada ga na ituvatuva vou oqori. Ena yaco beka e dua na ka vinaka eda sega ni namaka, oya ni sikova noda Vulivola ni iVavakoso na ivakatawa ni cakacaka. Meda tokona mada ga na cakacaka vakavunau ena tuvanaki ena macawa oqori. Sa soli beka e dua noda itavi ena Koronivuli ni Vuli Vunau? Meda kua sara ni calata. Sa kacivaka beka na ivakatawa ni noda Vulivola nida na samaka tiko na Kingdom Hall? Se da qase se gone, se ituvaki ni bula cava eda tu kina, e se rawa ga nida veitokoni. Ena veika oqo kei na so tale na ka eda rawa ni cakava, eda sa vakaraitaka tiko kina nida vakamalumalumu vei ira na tagane e lesi ira o Jiova kei na Luvena mera karona na qelenisipi.

16. Ke sega ni cakava e dua na qase na ka e dodonu me vakayacora, na cava ena cala kina vei keda meda vakaduduile?

¹⁶ So na gauna, ena sega ni muria beka e dua na qase na veika e veidusimaki kina na dauveiqaravi yalodina kei na iLawalawa Dauvakatulewa e matataki koya. Ke sega ni veisau, ena qai saumitaro ga vei Jiova, ‘na ivakatawa sa vakaraica na yaloda.’ (1 Pita 2:25) Ia ke mani cala e dua na qase, oqori e sega ni solia vei keda na dodonu meda sa tekivu beci koya. E cata o Jiova na talaidredre kei na vakaduduile.​—Tiko Voli mai na Lekutu 12:1, 2, 9-11.

Vakalougatataka o Jiova na Yalo ni Veitokoni

17. Meda raici ira vakacava na noda ivakatawa?

¹⁷ E kila o Jiova nira sega ni uasivi o ira na tamata e lesi ira mera ivakatawa. Ia e vakayagataki ira ga, qai uqeti ira ena yalona tabu mera vakatawani ira nona tamata e vuravura. E dina sara ni o ira na qase kei keda kece eda dau vakila ni ‘sa nona na Kalou na kaukaua levu, e sega ni noda.’ (2 Korinica 4:7, VV) Dodonu kina meda vakavinavinakataki Jiova ena ka e sa cakava tiko ni vakayagataki ira na noda ivakatawa yalodina, qai vinaka tale ga meda vakaraitaka vei ira na yalo ni veitokoni.

18. Ke da vakamalumalumu vei ira noda ivakatawa, eda sa dokai cei tiko?

¹⁸ Era saga ena nodra vinaka kece na qase mera ucui ira na ivakatawa e tukuna o Jiova ni na lesi ira mera vakatawa nona qelenisipi ena iotioti ni veisiga, me vaka e sereki ena Jeremaia 3:15: “Ka’u na solia vei kemudou nai vakatawa era sa vaka na yaloqu, era na vakani kemudou vakavuku ka vakayalomatua.” Io, sa dua dina na itavi totoka era qarava na qase ena nodra tubera ra qai taqomaki ira na sipi i Jiova. Meda vakavinavinakataka mada ga na nodra veiqaravi vagumatua ena noda dau veitokoni, talairawarawa, kei na noda dau vakamalumalumu. Nida vakayacora oqori, eda sa dokai rau tiko kina na noda iVakatawa mai lomalagi, na Kalou o Jiova kei Jisu Karisito.

Railesuvi

• Erau iVakatawa dauloloma vakacava o Jiova kei Jisu Karisito?

• Na cava e gadrevi kina na talairawarawa, vaka tale ga kina na dau vakamalumalumu?

• Na cava e so na sala eda na vakaraitaka kina na noda dau vakamalumalumu?

[iYaloyalo ena tabana e 27]

Era vakamalumalumutaki ira ina veiliutaki i Karisito na qase ni ivavakoso

[iYaloyalo ena tabana e 29]

Levu na sala eda rawa ni vakaraitaka kina nida vakamalumalumu vei ira na ivakatawa e lesia o Jiova