Na Vuravura Ca Nikua

OMARÍA e yabaki 64, e tiko duadua voli ga. A laurai ni sa davo matemate tu ena nona vale ni a mokulaki qai kunati ena waya.

E dua na ilala dauvakacaca era mokulaka e tolu na ovisa, ra beitaki ratou ni ratou kauta vakavesu e rua na itabagone. Sa ra qai vakama e rua vei ratou ena waiwai, rau mani tini mate kina. Ia, a drobula na kedratou ikatolu.

Dua a qirita na Tabacakacaka ni Veilewai, e sega ga ni kilai se o cei. Mani lai tini kune kina e dua na ka vakadomobula. A keli mai na dua na lomanibai na ivovo ni yagodratou e va na turaga eratou a gade voli ena vanua oya. A vesu tu na matadratou kei na ligadratou. Dikevi gona ena veisele a caka vei ratou ni ratou a bulu bulabula.

E sega ni talanoataki tiko e ke na veivakalolomataki e dau saravi ena iyaloyalo voravora qai vakadomobula. Oqo na veika sara ga e yaco dina, qai dua na gauna lekaleka sa oti a yaco me ulu ni itukutuku ena dua na vanua e Sauca Amerika. Ia, sa yaco tale tu ga na veika oqo ena so tale na vanua.

Sa ka ni veisiga na veivakalolomataki. Na vakacabote gasaukuro, laba, veivakamavoataki, veivanavanai, na kucu, kei nodra vakacaca na batikadi, oqo e dua na iwase lailai ga ni veivakalolomataki. Era dau vakaraitaka se kaburaka vakalevu na tabana ni itukutuku na leqa vaka oqori, sa ra sega gona ni kurabui e levu nira rogoca se sarava.

O na rairai lomatarotarotaka: ‘Na cava beka sa yacovi vuravura tiko nikua? Sa yali beka na kena kauaitaki na nodra nanuma na tani kei na dokai ni bula?’ Na cava eda bula tu kina ena vuravura vaka oqo?

Vakasamataki Harry mada, e yabaki 69 qai tauvi kenisa. E tauvi watina tale tiko ga na multiple sclerosis, na mate oqo e dau tini paralasi kina e dua na iwase ni yago se taucoko, ra qai dau vukei rau ga o ira na tiko tikivi rau kei ira na nodrau itokani. E kaya o Harry: “Ke ra a sega o ira oqo, sega ni macala na cava ena yacovi keirau.” E vakaitikotiko o Harry e Kenada, e laurai gona ena dua na vakadidike a caka e kea ni 50 na pasede na kedra iwiliwili na dauqaravi ira na itabaqase ena vanua oqo, era qarava tiko e dua era sega ni veiwekani. Oni na rairai kilai ira tale ga e so era vakaraitaka ena veisiga nodra dau lomani ira era tiko veitikivi ra qai veikauaitaki. Io, e rawa nira dauloloma ra qai veikauaitaki tale ga na tamata, ra qai sega ni dau veivakalolomataki.

Ke dina oqori, na cava e yaco tiko ga kina na veivakalolomataki? Cava era dau veivakalolomataki kina na tamata? E rawa beka nira veisau na dau veivakalolomataki? Ena oti beka na ivakarau oqori? Ke vaka kina, ena rawati vakacava, ena gauna cava?

[iTaba ni Credit Line ena tabana e 3]

Sitimanivanua: CORDON PRESS