E Titobu Qai Dede na Lomabibi

A VIA kila e dua na daunivakadidike se tarai ira vakacava na rarawataka voli na nona takali e dua era dau lomana na toso ni gauna. A vakataroga e so na itubutubu a mate ena vica na yabaki sa oti na luvedra. E so ga era sauma mai. E kaya e dua na tama o Vladimir, ni dau mositi koya dina ni talanoataki luvena, a se leqa sara ena lima na yabaki sa oti.a

Levu na itubutubu e dau dede ga vaka oqori na nodra lolositaka na takali ni luvedra. A luvu na luvenatagane o William ena tini na yabaki sa oti ni se qai yabaki 18. E vola o William: “Ena mositi au tu ga na nona takali, ena sega ni seavu.” Ni oti e lima na yabaki na leqa ni luve i Lucy ena tauvimate, e vola: “Ena imatai ni vica na siga au kaya tiko ga, ‘E sega ni dina.’ Au nanuma de a dua na tadra ca oya, oti ga au na qai yadra. Dede vakalailai au sa qai vakabauta, ni sa na sega ni lesu mai vale o koya. Se leqa sara na luvequ ena lima na yabaki sa oti, ia au dau tagici koya ena so na gauna niu tiko taudua.”

Cava mada e titobu kina vaka oqori na nodra rarawa qai dede nodra lolosi e so na itubutubu me vakataki Vladimir, William, kei Lucy? Meda dikeva mada e so na vuna.

Cava Era sa Rui Rarawa Kina?

Ni sucu e dua na gone, e sega ni tukuni rawa na marau erau vakila na itubutubu. Nodrau keveti koya, rau vakaraici koya ni moce no, vaka kina nodrau marau kei na lomavakacegu ni dredre vei rau. Sa macala ga nira isolisoli talei na gone vei ira na itubutubu dau loloma. Era vakavulici luvedra mera itovo vinaka ra qai dau veidokai. (1 Cesalonaika 2:​7, 11) Kevaka mera qai talairawarawa kina na gone, era na sakitaki ira kina nodra itubutubu, ra qai namaka tale ga mera na cakava e levu na ka vinaka na luvedra.

O ira na itubutubu dau loloma era na cakacaka vakaukaua mera vakarautaka vei luvedra na veika era gadreva. Era na rairai biuta vakatikitiki e dua na iwase ni ilavo se iyau me vukei luvedra nira sa tauyavutaka nodra vuvale. (2 Korinica 12:14) E dua ga na ka e vakaraitaka tiko na veika era cakava oqo na itubutubu vei luvedra ena nodra lomani ira, ra vakayagataka nodra gauna, ilavo vaka kina na nodra sasaga, oya era susugi luvedra mera bula mera kua ni mate. Na gauna ga e takali kina e dua na gone sa na tinidole na veisusu, sa oti tale ga kina na ka kece era nuitaka tu na itubutubu me baleti koya. Sa yalana koso o mate na nodrau loloma kei na veikauaitaki vakaitubutubu. Rau sa na galili dina ni sa yali na luvedrau. Dau titobu na lomabibi era vakila na itubutubu qai dredre na kena seavu.

E kaya tale ga na iVolatabu nira dau rarawataka vakalevu na itubutubu na takali ni luvedra qai titobu na lolosi era vakila. Na gauna e rogoca kina na peteriaki o Jekope ni sa mate na luvena o Josefa, e kaya na iVolatabu: “A sa dresulaka nonai sulu ko Jekope, ka vauca nai sulu taqarotu ki na tolona, ka tagicaka na luvena bogi vuqa. A ratou sa ia kece na luvena tagane kei na luvena yalewa kecega, me vakacegui koya; a sa bese ni vakacegui; a sa kaya, Au na lako sobu ki bulu ki na luvequ ka tagi tiko!” Ni oti tale e vica na yabaki e se lolositaki luvena tiko ga o Jekope, a nanuma ni sa mate dina. (Vakatekivu 37:​34, 35; 42:​36-​38) Dua tale na ivakaraitaki ena iVolatabu e baleta e dua na yalewa yalodina o Neomai, a mate e rua na luvenatagane. Na levu ni nona rarawa e vinakata sara ga me veisau na yacana, me sa kua ni Neomai e kena ibalebale “Marau,” ia me sa Mara e kena ibalebale “Rarawa.”​—Ruci 1:​3-5, 20, 21.

Ia e sega wale ga ni volatukutukutaka na iVolatabu na nodra lolosi na itubutubu. E vakamacalataka tale ga nona dau vakaukauataki ira na lolosi o Jiova. Eda na dikeva ena ulutaga e tarava e so na sala e vakacegui ira kina na lolosi na Kalou.

[iVakamacala e ra]