Ra iTabagone​—Era Vakila Nomuni iTubutubu na Ka Oni Cakava

“E SEGA tale ni dua na ka me’u rekitaka vakalevu cake mai na ka oqo: me’u rogoca ni ra sa muria tiko ga na dina ko ira na luvequ,” e vola na yapositolo sa kena turaga, o Joni. (3 Joni 4, VV) Dina ga ni o ira na luvequ e cavuta o Joni ena tikinivolatabu oqo e dusi ira na tisaipeli lotu Vakarisito, na itubutubu e rerevaka na Kalou e rawa ni kila na veika e tukuni tiko oqo. Me vaka ni cakayaco ina nodra bula na gone na nodra ivalavala na itubutubu, ena vakatale ga kina na kena cakayaco vei ira na itubutubu na nodra ivalavala na gone.

E raica rawa o Tui Solomoni e Isireli ni tarai ira vakabibi na itubutubu na ivalavala i luvedra. E vola: “A gone vuku sa vu ni reki vei tamana: ia na gone lialia sa vu ni rarawa vei tinana.” (Vosa Vakaibalebale 10:1) O koya gona, na gone kece​—wili kina o ira na qase cake​—mera vakasamataka vinaka na kena dau cakayaco vei nodra itubutubu na ka era cakava. Na cava e veiganiti kina oqo?

Vakasamataka mada na nodrau susugi iko na nomu itubutubu dau rerevaka na Kalou! Ni o se bera ni sucu rau sa dau kauaitaki iko qai masulaki iko. Ni o sa sucu, erau marau na nomu itubutubu ni dou sa veivolekati, rau qai vakavinavinakataka na Kalou ena itavi marautaki qai bibi​—na itavi kei na icolacola vakaitubutubu. Sa nodrau itavi na karona e dua na gonedramidrami, ia rau raica vakabibi na itavi oqo baleta ni rau qaravi Jiova.

Ni rau itubutubu lotu Vakarisito dina, rau na nuitaka me dusimaki rau na iVolatabu kei na ivola era yavutaki vakaivolatabu, rau qai kere ivakasala vei ira era matau ena veisusu. Erau dau masulaka tale ga vei Jiova na nodrau kauaitaki iko. (Dauveilewai 13:8) Ni o tubu tiko, rau sa kila na veika o vinaka kina, ia rau sega tale ga ni lecava na nomu malumalumu. (Jope 1:5) E basika e so na veika dredre ni o yabaki tini vakacaca. Rairai o dau be ena so na gauna, oqo e vakavuna me rau masu kina vakalevu na nomu itubutubu, vakekeli vakalevu ena so na ivola, rau qai dau veivosakitaka na sala mo vukei kina mo qarava tiko ga na Tamamu vakalomalagi, o Jiova.

Erau na tomana tiko ga na nodrau itavi vakaitubutubu. Ni o sa qase cake, erau na kauaitaka tiko ga na nomu bula vakayago, na ka o dau vakasamataka, na veika e tu e lomamu kei na nomu bula vakayalo. Ia, ena gauna kece oqo, e matata tu vei rau ni tu vei iko na galala mo vakatulewa, rau qai sega ni kila se na vakacava na nomu ivalavala ena vo ni nomu bula. Ena yaco na gauna mo na vakatulewataka sara ga na sala o na muria.

E donu vinaka na kena tukuni ni ‘sega tale ni dua na ka mera rekitaka vakalevu cake’ na itubutubu mai na nodra rogoca ni o ira na luvedra era “sa muria tiko ga na dina.” Ena donu tale ga na kena veibasai. Era na rarawa na itubutubu ni ca na nodra ivalavala na luvedra. Kaya o Solomoni: “Sa ka ni rarawa vei tamana na gone sesewa; kei na ka gaga vua ka vakasucuma.” (Vosa Vakaibalebale 17:25) Era lomabibi sara na itubutubu ni sa biuta na Kalou dina e dua na luvedra!

Matata e ke, ni tarai iratou e vale kei ira na tani na nomuni ivalavala na gone. Erau na vakila dina na nomu itubutubu na veika o cakava. Kevaka o vakanadakuya na Kalou kei na nona ivakavuvuli, erau na rarawa kina. Ia, na kena veibasai ena dina tale ga. Erau na reki kevaka o yalodina qai talairawarawa tiko ga vei Jiova. Vakadeitaka mo vakamarautaka na lomadrau na nomu itubutubu! E sega tale ni dua na isolisoli talei o rawa ni solia vei rau na qaravi iko, rau qai dau lomani iko.