Vakacegui Ira na Rarawa Voli

“Sa lumuti au ko Jiova, me’u . . . vakacegui ira kecega era sa tagi.”​—AISEA 61:​1, 2.

1, 2. O cei meda vakaceguya, ena vuku ni cava?

E VAKAVULICI keda o Jiova, na Kalou ni veivakacegui meda dau kauaitaki ira na sotava voli na veika rarawa. E vakavulici keda meda “vakacegui ira era sa yalolailai,” kei ira na rarawa voli. (1 Cesalonaika 5:​14) Oqori sara ga na ka meda cakava vei ira eda sokalou vata nira sotava na ituvaki dredre. Eda lomani ira tale ga ena saula ni ivavakoso, o ira mada ga era sega ni dau taleitaki keda.​—Maciu 5:​43-​48; Kalatia 6:​10.

² O Jisu a wilika qai vagolea vua na ibalebale ni vosa vakaparofisai e kaya: “Sa tu vei au na Yalo ni Turaga ko Jiova, ni sa lumuti au ko Jiova, me’u vunautaka nai rogorogo vinaka vei ira era sa yalomalumalumu; sa talai au mai me’u vakabulai ira sa ramusu na yalodra, . . . me vakacegui ira kecega era sa tagi.” (Aisea 61:​1, 2; Luke 4:​16-​19) Era sa kila dede tu mai na lotu Vakarisito lumuti ena gauna oqo ni oqo tale ga e nodra ilesilesi, ra qai tomani ira kina ena marau na ‘so tale na sipi.’​—Joni10:16.

3. Ke ra taroga e so se cava e vakatara tu kina na veika rarawa na Kalou, eda na vukei ira vakacava?

³ Ni so e yacovi ira na leqa qai tuburi ira na lomabibi, era dau taroga sara se cava e vakatara kina na veika vaka oya na Kalou. Na kena isau e macala vinaka tu ena iVolatabu. Ia ena taura na gauna vei koya a sega ni dau vulica na iVolatabu me qai matata vua oqori. Ena veivuke kina na ivola era tabaka na iVakadinadina i Jiova.a Ia e so mada ga, e vakacegui ira na imatai ni tikinivolatabu era wilika me vaka na Aisea 61:​1, 2, baleta ni vakaraitaka ni gadreva dina na Kalou meda vakacegui na tamata.

4. A vukea vakacava e dua na gonevuli e lomararawa e dua na iVakadinadina mai Poladi, ia ena yaga vakacava vei iko na ivakaraitaki oya mo na vukea kina e so tale?

⁴ O ira na tamata gone kei ira na itabaqase era dau gadreva na veivakacegui. E yalolailai e dua na goneyalewa mai Poladi, mani kere ivakasala vua na nona itokani, e iVakadinadina i Jiova. Vakatarogi koya vakamalua na nona itokani, mani siqema ni vakaleqa vakalevu na lomana e so na ka e dau lomatarotarotaka: “Na cava e sa rui levu kina na ca? Na cava eda rarawa tu kina na tamata? Na cava e sotava voli kina na ka mosimosi o koya e gone vei au e paralasi tu? Na cava e leqa kina na noqu uto? Era kaya na italatala ni oqori sa lewa ga ni Kalou. Ia ke dina oqori, au bese sara ga ni qai via vakabauti koya tale!” E masu lo vei Jiova na iVakadinadina qai kaya: “Kila na cava, au marau sara ga ni o taroga vei au qori. Au na saga meu vukei iko kina.” E talanoataka sara nona dau vakatitiqa tale ga ni se gone ra qai vukei koya na iVakadinadina i Jiova. E vakamacalataka: “Au mai vulica ni Kalou e sega ni vakavuna noda rarawa na tamata. E lomani keda, e nona gagadre me vinaka na noda bula, qai voleka na gauna me na veisautaka kina na vuravura. Sa na oti na tauvimate, na qase, kei na mate, era na bula tawamudu na tamata talairawarawa​—ena vuravura sara ga qo.” E cega vua na nona itokani na Vakatakila 21:​3, 4; Jope 33:25; Aisea 35:​5-7 kei na 65:​21-​25. Oti nodrau veitalanoa, kaya sara ena lomavakacegu na goneyalewa oya: “Au sa qai kila tu qo na inaki ni noqu bula. Kerekere, me daru qai veitalanoa tale.” Tekivu vakavulici sara o koya ena iVolatabu, vakarua ena dua na macawa.

Ena Vakacegu ni Kalou

5. Na cava e yavu ni vakacegu dina nida lai vosa vua e dua e lolosi tu?

⁵ E gadrevi na vosa e tau vakayalovinaka nida gole meda lai vakaceguya e dua. Eda na saga kina meda vakacegui koya e lolosi tiko ena vosa eda tauca kei na ivalavala eda tauca kina, me vakila nida kauai dina. E sega ni vosa ni veivakabekabei oqo. Na iVolatabu e kaya ni na rawa ni noda na inuinui e yavutaki ena vakacegu e vu mai na iVolatabu kei na noda vosota. (Roma 15:4) Nida vakasamataka tiko oqori, de dua ena vinaka meda vakamacalataka ena gauna veiganiti se cava na Matanitu ni Kalou, da qai dusia vakaivolatabu vua na iwali ni leqa ena vakarautaka. Oti, da rawa ni vakamacalataka sara vua na vuna e rawa ni nuitaki kina oya. Mai na noda cakava oqo, eda sa ia tiko kina na veivakacegui.

6. Me rawa ni yaga vei ira na rarawa tu na vakacegu e kune ena Vosa ni Kalou, e dodonu meda vukei ira mera kila na cava?

⁶ Me yaga noda veivakacegui, ena vinakati vei koya eda via vakaceguya me kila na Kalou dina, kila nona ivalavala, kei na dei ni nona dau vosa yalayala. Nida sa via vakacegui koya e se sega ni qaravi Jiova, e vinaka meda vakamacalataka vua na vica na tikina oqo. (1) Na vosa ni veivakacegui e kune ena iVolatabu e lako mai vei Jiova, na Kalou dina. (2) O Jiova e Kalou dau loloma, e Kaukaua Duadua, e buli lomalagi kei vuravura qai uasivi ena yalololoma kei na dina. (3) Eda na vakaukauataki meda vosota na ituvaki cava ga e basika ke da toro volekata na Kalou ena noda vulica na ka dina mai na nona Vosa. (4) E tiko na tikinivolatabu e sota sara ga kei na ituvaki eda dui sotava na tamata.

7. (a) Na cava beka na vinaka ni noda vakabibitaka na ‘veivakacegui levu i Karisito’ me vaka e solia mai na Kalou? (b) O na vakaceguya vakacava e dua e liaca na ca ni nona ivalavala?

⁷ E so na tacida era vakacegui ira na lolosi voli era kila na iVolatabu, ena nodra wilika vei ira na 2 Korinica 1:​3-7. Nira cakava oqori, era vakabibitaka na tikina e kaya, “sa vakacegui keitou vakalevu sara vakakina na Karisito.” (Neitou na matanivola kala.) De dua, ena liaca mai na tikinivolatabu oqo o koya eda vosa vua ni kune ga na vakacegu ena iVolatabu, qai dodonu me wilika vakalevu. E rawa tale ga ni yavu ni noda veivosaki kei koya ena so tale na gauna. Ke nanuma e dua ni vu ni nona leqa na veika ca a dau cakava e liu, de vinaka meda kua ni veivakalewai, ia meda kaya ga vua ni rawa ni veivakacegui na 1 Joni 2:​1, 2 kei na Same 103:​11-​14. Ena sala oqori, eda vakacegui ira kina ena vakacegu ni Kalou.

Ni Vakaleqai Noda Bula ena iTovo Kaukaua se Leqa Vakailavo

8, 9. Era na vakacegui vakacava ena sala matau na tamata era vakalolomataki ena itovo kaukaua?

⁸ Sa vakaleqai na nodra bula e vica vata na milioni ena itovo kaukaua​—mai na nodra vakacaca na daubasulawa, se na vakacaca e yaco ena vuku ni ivalu. Eda na vakacegui ira vakacava?

⁹ Era qarauna na lotu Vakarisito dina mera kua ni veitovaki ena veileti vakavuravura ena ka era tukuna se cakava. (Joni 17:16) Ia era vakayagataka vakamatau na iVolatabu mera vakatakila kina ni na mudu na ituvaki ca e yaco tu edaidai. De ra na via wilika na Same 11:5 mera vakaraitaka kina se cava e loma i Jiova me baleti ira na guta na itovo kaukaua se na Same 37:​1-4 mera dusia kina ni Kalou e uqeti keda meda kua ni veisausaumitaka na ca, ia meda nuitaki koya ga. E vakatakila na Same 72:​12-​14 na loma i Solomoni Levu Cake, o Jisu Karisito, sa veiliutaki tiko ena gauna oqo, me baleti ira na tamata tawacala era vakalolomataki ena itovo kaukaua.

10. Vei ira na bula tu ena vanua e sa yaco dede kina na veivaluvaluti, ena vakacegui ira vakacava na tikinivolatabu era volai ena parakaravu?

¹⁰ E so e sa ivakarau tu ni bula ena vanua era tiko kina na ivalu kei na veiqedravu. Na ka oqo era lai nanuma kina ni sa na nodra ivotavota tu ga ni bula na ivalu kei na kena revurevu. Na ka ga era bau vakanuinuitaka tu ni na vinaka cake nodra bula ke ra dro ina dua tale na vanua. Ia e levu era sega ni cakava rawa oya, qai dua na iwiliwili vinaka era tini mate sara ena nodra sasaga dro. Dua na ka era dau liaca o ira na dro ina dua tale na vanua, ni leqa era drotaka yani e dau tiko na kena isosomi ena vanua era dro kina. E rawa ni vakayagataki na Same 146:​3-6 meda vukei ira na lewenivanua vaka oya mera vakanuinuitaka e dua na ka e dei cake mai na via toki ina dua tale na vanua. De na vukei ira na parofisai ena Maciu 24:​3, 7, 14 se 2 Timoci 3:​1-5 mera raica na ibalebale dina ni veika e yaco tiko kei na ituvaki dredre era sotava voli, ni oya e dusia nida sa bula tiko ena ivakataotioti ni ituvaki makawa oqo. Na tikinivolatabu me vaka na Same 46:​1-3, 8, 9 kei na Aisea 2:​2-4 ena rawa tale ga ni yaga mera kila kina ni tu dina na inuinui dei me baleta na kena vinaka na bula mai muri.

11. Na tikinivolatabu cava soti e vakaceguya e dua na marama mai na Ra kei Aferika? Ena vuku ni cava?

¹¹ Donuya e dua na gauna ni veivaluvaluti mai na Ra kei Aferika, e drobula e dua na marama ni sa vanalaki na nona vale. E tuburi koya na rere, na rarawa, kei na lomabibi. E muri ni ratou sa lai tiko vakavuvale ena dua tale na vanua qai bukete levu tu ena gauna oya, sa loma i watina me vakama na nodrau ivola ni vakamau, me vakatalai koya laivi tale ga kei na luvedrau yabaki tini, baleta me rawa kina ni lai cakacaka vakabete. Ni sa wiliki qai vakamacalataki vua na marama oya na Filipai 4:​6, 7 kei na Same 55:​22, vaka kina e so tale na ulutaga vakaivolatabu mai Na Vale ni Vakatawa kei na Yadra!, e vakila sara o koya na vakacegu dina, e liaca tale ga ni sa qai vakainaki na nona bula.

12. (a) E veivakacegui vakacava na iVolatabu vei ira na sotava tu na bula dredre sara vakailavo? (b) E vukea vakacava e dua na dauvolivoli e dua na iVakadinadina mai Esia?

¹² Vica vata na milioni era sotava na bula dredre sara ni leqa na bula vakailavo ni vanua era vakaitikotiko kina. Rawa ni vu oya mai na ivalu se na kena revurevu. So tale na gauna, na nodra lewa ca ga na veiliutaki se na nodra kocokoco kei na nodra sega ni dau dina, e lai lusi wale kina na ilavo era maroroya tu e so se ra vakasaurarataki kina mera veikalikali kei na veika era taukena. E so tale era sega tu ga ni taukena e levu na iyau ni vuravura oqo. O ira kece vaka oqori e rawa nira vakacegui ena yalayala ni Kalou nira na vukei o ira era nuitaki koya, qai yalataki tu ena vukudra na vuravura uasivi era na dui marautaka kina na lewena na cakacaka ni ligadra. (Same 146:​6, 7; Aisea 65:​17, 21-​23; 2 Pita 3:​13) A rogoca e dua na iVakadinadina i Jiova mai na dua na vanua e Esia ni lomaocaocataka voli na ituvaki vakailavo ni matanitu e dua na dauvolivoli, mani vakamacalataka vua ni oya e tiki ga ni veika lelevu e yaco tiko ena vuravura taucoko. Ni rau veivosakitaka oti na Maciu 24:​3-​14 kei na Same 37:​9-​11, sa makutu sara na marama oya me vulica na iVolatabu.

13. (a) Ke ra rarawataka e so na nodra lasutaki beka vei ira na veiliutaki, eda na vakayagataka vakacava na iVolatabu meda vukei ira? (b) Ke ra nanuma e so ni veika ca e yaco tu e dusia ni sega ni bula na Kalou, o na vukei ira vakacava?

¹³ Ke sa vakayabaki na nodra vakararawataki e so ena veika dredre se baleta beka nira lasutaki tu, sa rawa nira vakataki ira na Isireli era sa sega ni vakarorogo “ni ra sa yalo lekaleka” se yalolailai. (Lako Yani 6:9) Ena ituvaki vaka oqori, ena vinaka meda vakabibitaka na sala ena vukei ira kina na iVolatabu mera walia na leqa era sotava tiko kei na ka mera cakava mera drotaka kina na veika e dau vakaleqa na nodra bula e levu. (1 Timoci 4:8b) E so era na kaya ni ituvaki ca e yaco tu e dusia ni sega ni bula na Kalou, se sega ni kauaitaki ira. De o rawa ni sereka vei ira e so na tikinivolatabu veiganiti mera kila ni sa dau vakarautaka na veivuke na Kalou, ia e levu era bese ni ciqoma.​—Aisea 48:​17, 18.

Ni Yaco na Cagilaba kei na Uneune

14, 15. Era vakaraitaka vakacava na iVakadinadina i Jiova na yalo ni veikauaitaki nira sa veilecayaki tu e levu ni oti e dua na vakacaca?

¹⁴ Dau yaco na leqa levu ena cagilaba, uneune, na kama, se kacabote ni dua na ka. Levu sara era dau rarawa kina. Na cava me caka mera vakacegui kina na bula?

¹⁵ Ena vinakati mera kila na tamata nira se kauaitaki tiko ga. E levu e veilecayaki sara ga na yalodra ena dua na vanua ni oti nodra vakacaca e dua na ilala. Levu vei ira e mate e so na lewe ni nodra vuvale, nodra ulunivale, kei na nodra itokani. Mai sega tale ga nodra cakacaka se so tale na ka era vakanuinuitaka tu kina na nodra bula. Era sasaga na iVakadinadina i Jiova mera tarai ira na lewenivanua, mera kaya kina na levu ni nodra rarawataka na leqa e yaco, mera tauca tale ga e so na vosa ni veivakacegui mai na iVolatabu. Levu era vakavinavinakataka na nodra veikauaitaki.

16. Na cava e laulau kina na nodra cakacaka vakavunau na iVakadinadina i Jiova mai El Salvador ni oti na leqa mai kea?

¹⁶ Dua na iwiliwili levu era mate mai El Salvador ena 2001 ni oti na uneune kei na sisiniqele levu mai kea. E mate na luvenatagane yabaki 25 e dua na iVakadinadina i Jiova kei na rua na goneyalewa, erau taci koya na yalewa erau sa veimusumusuki tu kei gonetagane. Sega tale ni wawa na tina i cauravou kei na nona itau yalewa ni rau sa vakaogai rau ena cakacaka vakavunau. Levu era kaya vei rau ni kauti iratou na mate na Kalou, se sa nona lewa ga me yaco oya. Erau cavuqaqataka na iVakadinadina na Vosa Vakaibalebale 10:22 me rau vakaraitaka kina ni sega ni loma ni Kalou meda sotakaya na rarawa. Erau wilika na Roma 5:​12 me rau vakaraitaka ni vu ni mate na ivalavala ca ni tamata, sega ni ka e lewa na Kalou. Erau kauta cake tale ga mai na itukutuku veivakacegui e kune ena Same 34:​18, Same 37:​29, Aisea 25:​8, kei na Vakatakila 21:​3, 4. Totolo nira vakarorogo na lewenivanua baleta ni o rau mada ga erau lolositaka na mate ni wekadrau ena leqa e yaco. Levu sara era vuli iVolatabu kina.

17. Rawa nida veivuke vakacava ni yaco na vakacaca levu?

¹⁷ Ni yaco e dua na vakacaca levu, o na sotava beka e dua e mavoa vakaca. De na vinakati mo kaciva totolo e dua na vuniwai, se mo vukei koya e mavoa me lako ina valeniwai, se vakarautaka vua na kakana kei na vanua me vakaruru kina. Donuya e dua na vakacaca levu mai Itali ena 1998, e kaya e dua na dauvolaitukutuku ni o ira na iVakadinadina i Jiova “e dau maqosa na nodra veivuke, era dodoliga yani vei ira kece na vakaleqai veitalia se lotu cava era lewena.” Ena so na vanua, e vakavuna na rarawa levu na yaco ni veika sa parofisaitaki tu me baleta na iotioti ni veisiga. Ena veivanua oqori, era vakamacalataka kina na iVakadinadina i Jiova ni sa vakayacori tiko na parofisai vakaivolatabu, ra qai vakacegui ira na lewenivanua ena ka e yalataka tu na iVolatabu, ni Matanitu ni Kalou ena kauta mai na bula vakacegu dina vua na kawatamata.​—Vosa Vakaibalebale 1:​33; Maika 4:4.

Ke sa Takali e Dua na Wekada Voleka

18-20. Na cava beka o rawa ni cakava se tukuna mo vakacegui ira kina era lolositaka na mate ni wekadra voleka?

¹⁸ E veisiga, era lolositaka na takali ni wekadra lomani e vica vata na milioni. De o na sotava e so ni o cakacaka voli vakavunau se sotavi ira ena so tale na gauna. Na cava mo kaya se cakava mo vakacegui ira kina?

¹⁹ E vusolo beka vakalevu na loma i koya e rarawa tiko? Era oso tu beka e vale na wekana era lolosi tale tiko ga? De tu e levu na ka o na via kaya, ia e bibi mo lewa vakavinaka. (Dauvunau 3:​1, 7) De dua, ena vinaka meda vakaraitaka nida duavata kei ira ena nodra lolosi, oti, meda solia toka e dua na ivola vakaivolatabu veiganiti (na brochure, ivoladraudrau, se ivolacebaceba), da qai lesu ni sa sivi e vica na siga meda raica se veivuke cava tale e gadrevi. Ke sa veiganiti na kena gauna, wasea vei ira e so na vakasama veivakauqeti mai na iVolatabu. E rawa ni veivakacegui qai veivakabulabulataki oqori. (Vosa Vakaibalebale 16:24; 25:11) E sega ni tu vei iko na kaukaua mo vakabula na tamata sa mate me vakataki Jisu. Ia e rawa ni o wasea na ka e kaya na iVolatabu me baleta na kedra ituvaki na mate, dina ga ni na sega ni gauna veiganiti oqori mo vakacala kina na rai cala beka e tiko vei ira. (Same 146:4; Dauvunau 9:​5, 10; Isikeli 18:4) E rawa ni wili na vosa ni yalayala vakaivolatabu me baleta na nodra vakaturi na mate. (Joni 5:​28, 29; Cakacaka 24:15) De rawa ni veivosakitaki na ka e vauci kina, qai kau cake mai na itukutuku vakaivolatabu ni nona vakaturi e dua e sa mate. (Luke 8:​49-​56; Joni 11:​39-​44) Vakabibitaka tale ga na itovo i koya na Kalou dau loloma e vakarautaka tu vei keda na inuinui totoka oya. (Jope 14:​14, 15; Joni 3:​16) Vakamacalataka se yaga vakacava vei iko na ivakavuvuli oqori kei na vuna o nuitaki ira kina.

²⁰ Nomu sureti koya e lolositaka na mate ni wekana me lakova na soqoni ena vakavolekati koya vei ira na tamata era dau veikauaitaki dina qai nodra ivalavala na veivakayaloqaqataki. Vakadinadinataka e dua na marama mai Suwiteni ni oya sara ga na ka a vakasaqara voli ena nona bula taucoko.​—Joni 13:35; 1 Cesalonaika 5:​11.

21, 22. (a) Na cava e vinakati meda qai rawa ni veivakacegui kina? (b) O na vakaceguya vakacava e dua e sa kila rawa tu na iVolatabu?

²¹ Dua beka o iko o sega ni kila na ka mo tukuna se cakava vei koya e rarawa voli ena loma se na taudaku ni ivavakoso? Na vosa vakirisi e dau vakadewataki me “veivakacegui” ena iVolatabu e dusia na “noda kaciva e dua me mai salavata kei keda.” Kena ibalebale, ke o dau veivakacegui dina, o na soli iko vakarawarawa mo vukei koya e rarawa tu.​—Vosa Vakaibalebale 17:17.

²² Vakaevei ke sa kila rawa tu o koya o via vakaceguya na ivakavuvuli vakaivolatabu me baleta na mate, na ivoli, kei na veivakaturi? Ni duavata ga na ka eda vakabauta, na noda tiko mada ga e rawa ni veivakacegui vua. Ke lomana mai me vosa, tovolea mo rogoci koya vinaka. Kua ni nanuma ni dodonu me dua sara na nomu vosa. Ke wili e so na tikinivolatabu, okata oqori me vosa ni Kalou e kena inaki me vakataudeitaka na lomamudrau. Drau dui veivosakitaka ena nuidei na ka drau vakabauta deivaki me baleta na veika era yalataki kina. Mai na nomu loloma dina kei na nomu wasea na ivakavuvuli talei ni Vosa ni Kalou, o iko tale ga o rawa ni vukei ira na rarawa voli mera vakila na vakacegu kei na veivakaukauataki e lako mai vei koya “na Kalou ni veivakacegui kecega,” o Jiova.​—2 Korinica 1:3.

[iVakamacala e ra]

Vakamacalataka Mada

• O cei era beitaka e levu ni vakavuna na leqa? Eda na vukei ira vakacava?

• Na cava meda cakava meda vukea kina e so mera vakila na vakacegu e dulaka tu na iVolatabu?

• Na ituvaki cava soti ena nomu vanua e vakavuna tiko na rarawa levu vei ira e so? O na vakacegui ira vakacava?

[iYaloyalo ena tabana e 23]

Wasea na itukutuku ni veivakacegui dina ena gauna ni rarawa

[Credit Line ena tabana e 23]

Keba ni isenivalu: UN PHOTO 186811/J. Isaac

[iYaloyalo ena tabana e 24]

Na nona tiko mada ga e dua na noda itokani e rawa ni veivakacegui dina