‘Moni Vakatovolei Au Jiova’

“SA VAKATOVOLEA na yalo ko Jiova.” (Vosa Vakaibalebale 17:3) Dodonu me na uqeti keda sara vakalevu na vosa oqori. Ena vuku ni cava? Eda dau raica ga na tamata na ka e taudaku, ia na Tamada vakalomalagi e “raica na yalo [se “loma ni tamata,” NW].”​—1 Samuela 16:7.

Eda sega ni kila mada ga na ka e tu e lomada. Cava na vuna? Ni “dauveivakaisini duaduaga na yalo ni tamata, ka sa dredre ni vinaka: ko cei me kila rawa?” Ia, na Kalou ga e kila, ni kaya: “Koi au ko Jiova ka’u sa dikeva na loma ni tamata, ka’u sa vakatovolea na kenai ivi.” (Jeremaia 17:​9, 10) Io, o Jiova e kila vinaka ‘na lomada,’ wili kina na noda gagadre kei na noda “ivi,” na veika eda vakanananu kina kei na malele ni lomada.

Cava Eda Vakatovolei Kina na Lotu Vakarisito?

Sa rauta me tukuna o Tui Tevita ena gauna makawa vua na Kalou: “Mo ni vakadikevi au, Jiova, ka vakatovolei au; vakatovolea na noqu ivi kei na yaloqu.” (Same 26:2) A dodonu tu beka ga na ivakarau i Tevita me sega ni rerevaka kina e dua na ka ni vakatovolei koya o Jiova? Sega sara! Vakataki keda ga, a tamata ivalavala ca o Tevita, qai sega ni rawata na ivakatagedegede ni Kalou. Ena vuku ni nona malumalumu, a vakayacora kina e so na cala bibi, ia a ‘yalodina tiko ga.’ (1 Tui 9:4) Rawa vakacava oqo? Ni a ciqoma na veivunauci kei na nona vakadodonutaka na nona sala. A vakaraitaka oqo na nona lomani Jiova dina. E maucokona nona qaravi Kalou.

Vakacava o keda ena gauna oqo? O Jiova e kila vinaka nida tamata ivalavala ca, eda dau cala ena noda vosa kei na ka eda cakava. Sega ni kena ibalebale oya ni sa lewa oti tu na noda bula ena nona sa raica rawa tu na noda gauna se bera mai. E solia vei keda na galala ni digidigi, e doka tale ga na noda vakatulewa​—nona isolisoli vakayalololoma vei keda.

Ia, so na gauna ena via vakatovolea o Jiova na ka e tu e lomada, vaka kina na veika eda veinanuyaka. Ena cakava oqo ni vakalaiva meda vakaraitaka na ituvaki ni lomada. Ena vakatara tale ga e so na ituvaki se na veika dredre me yacovi keda da qai vakaraitaka kina na noda gagadre. Ena raica tale ga kina o Jiova ni vu dina mai lomada na noda veiqaravi. Nona vakatara meda vakatovolei ena laurai kina na qaqaco ni noda vakabauta, ena kilai kina nida ‘vinaka ena ka taucoko qai sega ni dua na ka e yali.’​—Jemesa 1:​2-4.

iVakaraitaki ni Gauna Makawa

Sega ni ka vou vei ira na dauveiqaravi nei Jiova na vakatovolei ni nodra vakabauta kei na lomadra. Dikeva mada na peteriaki o Eparama. “Sa qai vakatovolei Eparaama na Kalou.” (Vakatekivu 22:1) Sa vakatovolei oti na vakabauta nei Eparama ena gauna a cavuti kina na vosa oya. Ena vicasagavulu na yabaki yani e liu, a tukuna o Jiova vei Eparama me tokitaki ratou na nona vuvale mai na vanua vutuniyau o Uri ina dua tale na vanua eratou sega ni kila. (Vakatekivu 11:31; Cakacaka 7:​2-4) De a taukena tu o Eparama e dua na vale mai Uri, ia a sega ga ni volia e dua na nona tikiniqele e Kenani, na vanua a bula kina me vicasagavulu na yabaki. (Iperiu 11:9) Ni dau veitokiyaki o Eparama kei ratou nona vuvale, eratou donuya kina e so na ka rerevaki. Eratou sotava na dausiga, ira na batikadi, kei ira na iliuliu lotu butobuto ena vanua oya. Vakadinadinataki ena ituvaki kece oqo na qaqaco ni vakabauta nei Eparama.

Dua tale na veivakatovolei levu e cakava o Jiova vei Eparama. “Mo kauta mada na luvemu, na luvemu e dua bauga, ko Aisake ko sa lomana, . . . ka vakacabori koya kina mei soro kama.” (Vakatekivu 22:2) Sega ni okati Aisake o Eparama me luvenatagane wale ga. E luvedrau duabulu o Eparama kei na watina o Sera. E gone yalataki o Aisake, na inuinui duadua ga nei Eparama ni na taukena na nona “kawa” na vanua o Kenani mera qai kalougata kina e lewelevu me vaka ga na vosa ni yalayala ni Kalou. Kena ilutua, ni o Aisake e luvetagane namaki nei Eparama qai sucu ni oti na cakamana ni Kalou!​—Vakatekivu 15:​2-4, 7.

Vakasamataka mada na kena dredre vei Eparama me katuma rawa na ivakaro oqo. Ena vinakata beka o Jiova me cabori vua e dua na tamata? Cava e vakatara kina o Jiova me marautaka o Eparama na vakaluveni ni sa kala sobu na nona matanisiga, oti qai kerea me cabora na luvena oya?a

E talairawarawa o Eparama dina ga ni a sega ni kila na isau kece ni taro. Rauta ni tolu na siga me yaco ina ulunivanua. E tara e dua na icabocabonisoro qai tuvana e delana na buka. Yacova mai oqo na tikina e vakatovolei kina. Sa taura tu na isele o Eparama, ia ena gauna sara ga me vakamatei luvena kina, a qai vakayagataka nona agilosi o Jiova me tarovi koya ena nona kaya: “Ni’u sa qai kila ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga.” (Vakatekivu 22:​3, 11, 12) Vakasamataka mada na nona vakaicovitaki vakalevu o Eparama ni rogoca na vosa oya! Donu vinaka na nanuma taumada i Jiova me baleta na nona vakabauta. (Vakatekivu 15:​5, 6) Mani cabora e dua na sipi tagane o Eparama me sosomitaki Aisake. Sa qai vakadeitaka o Jiova na vosa ni yalayala me baleta na kawa i Eparama. Sa rauta me kilai o Eparama me itokani nei Jiova.​—Vakatekivu 22:​13-​18; Jemesa 2:​21-​23, VV.

Vakatovolei Tale ga Noda Vakabauta

Eda sega ni drovaka na tamata ni Kalou ena gauna oqo na veivakatovolei. Ena rairai levu cake na ka e vakatara o Jiova meda vakatovolei kina mai na ka e tukuna meda cakava.

E vola na yapositolo o Paula: “[O] ira kecega era na via lotu dina vei Karisito Jisu, era na vakacacataki.” (2 Timoci 3:​12) Rawa ni vakacacani keda o ira noda icaba mai koronivuli, noda itokani, ira na wekada, ira eda tiko veitikivi, se na kena tukuni na itukutuku lasu me baleti keda vei ira na iliuliu vakamatanitu. Rawa ni okati kina na vosa kei na veivakamavoataki vaka kina na vakadredretaki ni veika me bula kina e dua na lotu Vakarisito. Era sotava tale ga na lotu Vakarisito dina na leqa e tara tu na kawatamata​—na tauvimate, rarawa kei na lewa vakatawadodonu. E vakatovolei kece e ke na nona vakabauta e dua na tamata.

E tukuna na yapositolo o Pita na vinaka ni kena vakatovolei na noda vakabauta: “Dou sa vakararawataki e na dauvere e vuqa: me sa kune kina na nomudou vakabauta ni sa vakatovolei, me talei vakalevu sara ka talei vakalailai na koula sa caca rawa ni sa vakatovolei e na bukawaqa, me ka ni vakavinavinaka, ka me dokai ka me vakacaucautaki, ni na rairai mai ko Jisu Karisito.” (1 Pita 1:​6, 7) Io, na vinaka ni veivakatovolei e vaka na vakasavasavataki ni koula ena bukawaqa. Na veivakasavasavataki ena vakaraitaka na ka savasava qai kauta laivi na veika tawayaga. Ena vaka tale ga oqo na vakatovolei ni noda vakabauta.

Me kena ivakaraitaki, ni dua e vakila e so na ka dredre ena vuku ni coqa se leqa tubukoso. O ira na qaqaco na nodra vakabauta era na sega ni soro koso ena nuiqawaqawa. Era na lomavakacegu ga ni vakadeitaka vei ira o Jiova: “Au na sega sara ni biuti iko, se vakalaivi iko.” (Iperiu 13:5) Era na vakaliuca tiko ga na veika vakayalo, ra qai nuidei ni na vakalougatataki ira o Jiova ena nodra sasaga ni vakarautaka na veika era gadreva dina. Na nodra vakabauta ena vakaukauataki ira ena gauna era vakila kina na veika dredre, ena sega ni vakavu leqa tale mera lomaocaoca tu kina vakasivia.

Ena rawa ni yaga tale ga na vakatovolei ni noda vakabauta baleta nida na kila na noda malumalumu kei na veika meda vakavinakataka. Ena vinaka meda liaci keda ena so na taro oqo: ‘Au na vaqaqacotaka vakacava na noqu vakabauta? Gadrevi beka na gauna meu na masu wasoma qai vakabibitaka na vulici ni Vosa ni Kalou? Au sa vakayagataka vinaka tiko beka na isolisoli kece meu soqoni vakawasoma kei ira noqu itokani vakabauta vata? Au dau nuitaki au ga ena gauna e dodonu kina meu masu vua na Kalou o Jiova?’ Ia, na noda liaci keda vaka oqo e se qai kena itekitekivu ga.

Kena qaqaco nona vakabauta e dua ena rairai gadrevi kina nona vakavinakataka nona kania na kakana vakayalo, me na vakaraitaka ni “gadreva nai vakavuvuli sa vaka na wai-ni-sucu dina.” (1 Pita 2:2; Iperiu 5:​12-​14) Meda vakataki koya mada ga na turaga e vakamacalataka na daunisame: “Sa marau tiko e na vunau i Jiova; a sa vakananuma tiko na nona vunau e na siga kei na bogi.”​—Same 1:2.

Sega ni vinakati me wiliki wale ga na iVolatabu. E bibi meda vakananuma na Vosa ni Kalou da qai bulataka na kena ivakasala. (Jemesa 1:​22-​25) Kena itinitini, nida na lomana vakalevu na Kalou, eda na kila na ka meda masulaka kei na ka e baleti keda ga, ena qaqaco tale ga kina na noda vakabauti koya.

Yaga ni Vakatovolei na Vakabauta

Noda kila na bibi ni noda vakabauta me vakadonui keda kina na Kalou ena uqeti keda meda vaqaqacotaka tiko ga. E tukuna vei keda na iVolatabu: “Kevaka sa sega na vakabauta, sa dredre sara me da vinakati: o koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6) Meda vakataki koya mada ga na turaga a kerei Jisu: “Ni vukei au mada e na lailai ni noqu vakabauta!”​—Marika 9:​24, VV.

Na vakatovolei ni noda vakabauta e rawa ni vukei ira tale e so. Me kena ivakaraitaki, ni mate na wekana voleka e dua na lotu Vakarisito, ena vukei koya na qaqaco ni nona vakabauta na vosa ni yalayala ni Kalou me baleta na veivakaturi. Ena lolosi, ia ena sega ga ni “yasovaka, me vakataki ira na tani sa sega na nodrai nuinui.” (1 Cesalonaika 4:​13, 14) O ira na raica na qaqaco ni nona vakabauta era na mai kila ni taukena e dua na ka e yaga dina. Ena rawa ni uqeti ira mera na taukena tale ga na mataqali vakabauta vaka oya, qai yavalati ira mera vulica na Vosa ni Kalou ra qai tisaipeli i Jisu Karisito.

E kila o Jiova ni yaga dina na vakabauta e vakatovolei. Eda na raica tale ga kina se qaqaco dina tiko noda vakabauta se sega. Eda na kila na vanua e malumalumu kina na noda vakabauta kei na veika meda na vakavinakataka. Kena itinitini, na noda vosota na veivakatovolei ena vukei ira na so mera mai tisaipeli i Jisu. Meda solia gona noda vinaka kece ena kena vaqaqacotaki noda vakabauta, ni sa vakatovolei oti vakavica ena yaco “me ka ni vakavinavinaka, ka me dokai ka me vakacaucautaki, ni na rairai mai ko Jisu Karisito.”​—1 Pita 1:7.

[iVakamacala e ra]

[iYaloyalo ena tabana e 13]

Na qaqaco ni vakabauta i Eparama e yaco kina me itokani nei Jiova

[iYaloyalo ena tabana e 15]

Vakadinadinataki na qaqaco ni noda vakabauta ni vakatovolei

[iTaba ni Credit Line ena tabana e 12]

From the Illustrated Edition of the Holy Scriptures, by Cassell, Petter, & Galpin