Na Cava e Vakatara Tiko Kina na Kalou na Ca?

EDA raica ena veivanua kece ga na levu ni ca kei na rarawa. Era mate ena ivalu na lewenivanua kei ira na sotia. E takalevu na basulawa kei na itovo voravora. De dua o vakaduiduitaki se vakalolomataki. Mai na ka o sa raica se sotava, de dua o na taroga lo tu, ‘Cava na vuna e vakatara tiko kina na Kalou na ca?’

Sega ni ka vou na taro oqo. Rauta na 3,600 na yabaki sa oti, e taroga na dauveiqaravi yalodina ni Kalou o Jope: “A cava era sa bula tiko kina nai valavala ca?” (Jope 21:⁠7) Ni vakaleqai na lomana ena nodra ivalavala ca na kainona, a taroga kina o Jeremaia na parofita ena ikavitu ni senitiuri B.S.K.: “A cava era sa dauyaco kina ko ira na tamata ca, ka sa tiko vinaka ko ira kecega era ia vakalevu na veivakaisini?” (Jeremaia 12:⁠1) Rau kila o Jope kei Jeremaia ni yalododonu na Kalou. Ia, erau se vaqaqa ga na vuna e levu tiko kina na ca. De vakavu veilecayaki tale ga oqo vei iko.

Era beitaka na Kalou e so na tamata ena vuku ni ca kei na rarawa. So tale era kaya: ‘Ke tu vua na Kalou na kaukaua, lewadodonu, qai dauloloma, cava ga na vuna e sega kina ni muduka na ca kei na rarawa? Cava ga e se vakatara tiko kina na ca me yacova mai na gauna oqo?’ Eda na dikeva na isaunitaro oqori kei na so tale na taro bibi ena ulutaga e tarava.

[iTaba ni Credit Line ena tabana e 3]

AP Photo/Adam Butler