Digidigi o na Marau Kina

“KEU a cakava ga oya!” Sa vakavica nomu cavuta na malanivosa oqori? Eda sega ni via cakava na digidigi eda na veivutunitaka e muri, vakauasivi ni na cakayaco ena noda bula. Na digidigi cava ena vakamarautaki keda?

Taumada, e bibi meda muria na ivakatagedegede e nuitaki. Ia, era sega ni vakabauta e levu ni tiko na ivakatagedegede vaka oqori. E laurai ena vakadidike a caka mai Mereke ni 75 na pasede vei ira na vuli torocake era vakabauta ni sega ni dua na ka e dodonu, sega tale ga ni dua na ka e cala. Era vulica tale ga ni ivakavuvuli e vauca na veika vinaka kei na veika ca e vakatau ena “duidui itovo ni tamata kei na veimataqali itovo vakavanua.”

E ka vakayalomatua beka me nanumi ni ivakatagedegede savasava e vauci ga kina na noda rai yadua se na rai e sa ciqomi raraba tu? Sega. Ena yaco na leqa ke vakatarai mera dui caka nodra ga na tamata. O cei ena via bula ena vanua e sega kina na lawa, sega na mataveilewai kei na ovisa? E sega ni dau nuitaki na noda rai na tamata, baleta nida rawa ni cakava na ka eda nanuma ni dodonu, ia e muri e qai kilai ni cala. Sa vakadinadinataki ena bula taucoko ni kawatamata ni dina na ka e kaya na iVolatabu: “Sa sega ni vu mai vua na tamata sa lako tu me lewa na nonai lakolako.” (Jeremaia 10:23) Na cava gona e rawa ni dusimaki keda ena kena vakatulewataki na veika bibi ena noda bula?

E donu na nona lai kere ivakasala vei Jisu na iliuliu gone a vakamacalataki ena imatai ni ulutaga. A vakayagataka o Jisu na Lawa ni Kalou me sauma kina na nona taro, baleta e vakadinata, ni o Jiova e ivurevure duadua ga ni kilaka kei na vuku qai kila tale ga na veika ena yaga vei keda na nona ibulibuli. A vakamatatataka oqori o Jisu ena nona kaya: ‘Sa sega ni noqu na ivakavuvuli, sa nona ga a talai au mai.’ (Joni 7:​16) Io, e idusidusi nuitaki na Vosa ni Kalou meda vakatulewa vakayalomatua kina ena noda bula. Meda dikeva sara mada e so na ivakavuvuli yaga vakaivolatabu ena vakavu marau ke bulataki.

iVunau Koula

Eda na vakatulewataka vakayalomatua na veika e vauca na noda veimaliwai kei ira na tani, ke da muria na ivakavuvuli i Jisu ena nona iVunau rogo ena Ulunivanua. A kaya: “O koya, na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira.” (Maciu 7:​12) Na ivakavuvuli oya e dau vakatokai me iVunau Koula.

E duatani na kena icavucavuti na ivakavuvuli oqori vei ira e so: “Kua ni cakava vei ira na tani na veika o sega ni vinakata me caka vei iko.” Me kilai na kedrau duidui na icavucavuti e rua oqori, dikeva mada na vosa vakatautauvata a vakayagataka o Jisu baleta na kai Samaria dauloloma. E laumoku qai biu matemate tu e batinisala e dua na Jiu. Rau raici koya e dua na bete kei na Livai, ia erau sega ni vukea. Kena irairai ni rau muria tiko na le rua oqori na rai cala me baleta na iVunau Koula. Ia, a veivuke e dua na turaga ni Samaria, a vadretitaka na nona mavoa na Jiu qai kauti koya ina dua na burenivulagi. E cakava vua na Jiu na veika sara ga e vinakata me na caka tale ga vua. A bulataka dina na iVunau Koula na turaga ni Samaria​—qai donu nona digidigi.​—Luke 10:​30-​37.

Levu na sala eda rawa ni vakayagataka kina na ivunau oya, qai rawati kina na marau. Kaya mada ke ratou se qai toki yani e dua na vuvale, ina vanua o vakaitikotiko kina. Vakacava mo vakaliuliu ena nomu kidavaki iratou? De na vinakati mo vakamacalataka na ituvaki ni vanua, sauma na nodratou vakatataro se vukei ratou ena veika eratou gadreva. Ena vinaka na nomu veimaliwai kei ira oni tiko veitikivi ke o dau vakaliuliu ena nomu dau kauaitaki ira. O na lomavakacegu tale ga ena nomu kila ni o cakava tiko na veika e vakamarautaki Jiova. Sega beka ni vakatulewa vakayalomatua oqori?

Digidigi e Yavutaki ena Noda Lomani Ira na Tani

Me ikuri ni ivakavuvuli me baleta na iVunau Koula, a veidusimaki o Jisu ena so tale na ka ena yaga ena noda digidigi donu. A kaya me baleta na ivakaro levu duadua ena Lawa i Mosese: “ ‘Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.’ Ai matai ni vunau oqo, ka levu: a sa tautauvata na kenai karua, Mo lomana na kai nomu me vaka ko lomani iko. Sa vu ni vunau taucoko kei ira na parofita na vunau e rua oqo.”​—Maciu 22:​36-​40.

Ni bera nona mate, a solia o Jisu vei ratou na nona tisaipeli “e dua na i vakaro vou,” me ratou dau veilomani. (Joni 13:​34, VV) Na cava e vakatoka kina o Jisu me ivakaro vou? Sega beka ni tukuna vei ratou ena dua na gauna, ni nodratou lomani ira na tani e dua na ivakaro e yavutaki kina na Lawa? Era vakaroti na Isireli ena Lawa i Mosese: “Mo lomani koya ga na kai nomu me vaka ko sa lomani iko.” (Vunau ni Soro 19:18) Ia, a kaya o Jisu vei ratou na nona tisaipeli ni sa mai vauci ena ivakaro oqori e so tale na ka. Ena bogi ni bera nona mate, e tukuna vei ratou ni sa vakarau cabora na nona bula ena vukudratou. E tomana: “Sa noqu vunau oqo, Mo dou veilomani, me vaka ka’u sa lomani kemudou. Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.” (Joni 15:​12, 13) Io, e vou na ivakaro oqo baleta ni vakarota me vakaliuci na nodra gagadre na tani, sega ni noda gagadre ga.

E levu na sala e rawa nida vakaraitaka kina na loloma dina, oya ena noda sega ni kauaitaka ga na veika e yaga vei keda. Kaya mada ke o vakaitikotiko ena dua na tabavale, o qai dau taleitaka me toka sara e cake na rorogo ni nomu ivakatagi, ia o kila ni na vakacudrui koya drau tiko veitikivi. O na yalorawarawa beka mo yalana na nomu marau, me rawa ni bau vakacegu kina na nomu itokani drau tiko veitikivi oqori? O na vakaliuca na veika ena yaga vua, sega ni veika ena yaga ga vei iko?

Dikeva mada e dua tale na ituvaki oqo. E Canada, rau a sikova e dua na turaga e rua na iVakadinadina i Jiova ena dua na siga batabata e lutu tiko kina na ucacevata. Ni sa vakacagau tiko na veitalanoa, e tukuna sara o itaukeinivale ni sega ni kauta laivi rawa na ucacevata ena nona matanivale baleta ni leqa na nona uto. Se qai oti toka beka ga e dua na aua na nodratou veitalanoa, e vaka me sa rogoca tale o itaukeinivale na vakayagataki ni isivi e tautuba. Io, rau sa sivita laivi tiko na tagane iVakadinadina na ucacevata e vakaosooso tu ena gaunisala kei na ikabakaba ni nona vale. Mani vola ena valenivolavola ni tabana ni iVakadinadina i Jiova e Canada, “Au sa qai vakadinadinataka nikua na loloma dina vakarisito.” E tomana “Sa vaka me seavu na noqu yalolailai qai veisautaka na noqu rai me baleta na veika e yaco tu e vuravura. E vaqaqacotaka tale ga na noqu doka na nomuni cakacaka e vuravura raraba.” Io, na veika lalai cava eda digia meda veivuke kina, ena yaga ena nodra bula na tani. E dau vakavu marau dina na noda vakuai keda ena so na ka e vauci kina noda digidigi!

Digidigi e Yavutaki ena Noda Lomana na Kalou

E bibi me yavutaki tale ga na noda digidigi ena ivakaro levu duadua a vakamacalataka o Jisu​—oya na noda lomana na Kalou. A cavuta na vosa oqori o Jisu vei ira na Jiu, era lewe ni matanitu sa veiyalayalati oti kei Jiova. Ia, a se vinakati ga vei ira na Isireli mera digia mera lomana na Kalou, me vu tale ga mai lomadra na nodra qaravi koya.​—Vakarua 30:​15, 16.

Io, na nomu digidigi ena vakaraitaka na nomu rai me baleta na Kalou. Me kena ivakaraitaki, ni toso cake tiko na nomu kila na yaga ni iVolatabu, ena gadrevi mo na vakatulewa tale ga. O na via vulica na iVolatabu, mo dua tale ga na imuri i Jisu? Nomu digia mo cakava oqori ena vakamarautaki iko dina, ni a kaya o Jisu: “Era marau o ira era kauaitaka nodra bula vakayalo.”​—Maciu 5:​3, NW.

Eda sega ni kila se a veivutunitaka na nona digidigi na iliuliu gone oya. Eda kila ga na rai ni yapositolo o Pita me baleta na nona digitaka me muri Jisu ena vica vata na yabaki. Rauta na 64 S.K., ni vakarau cava na nona bula, a uqeti ira na nona itokani ena vakabauta o Pita: “Dou gumatua kina me kunei kemudou ko koya [Kalou] e na vakacegu, ni dou sa sega ni tauvi-duka, ka sega ni cala.” (2 Pita 1:​14; 3:​14) Io, a sega ni veivutunitaka o Pita na digidigi a cakava ena 30 na yabaki yani e liu, a uqeti ira na so tale mera dei ena nodra digidigi.

Na muri ni ivakasala i Pita e okati kina na muri ni ivakaro ni Kalou, vaka kina na kena digi me vakayacori na itavi e vakacolati vei ira na tisaipeli i Jisu. (Luke 9:​23; 1 Joni 5:3) Ena dredre toka oqori, ia e vakadeitaka vei keda o Jisu: “Dou lako mai vei au, koi kemudou vakaadua ga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqui vua, ka mamada na noqui colacola.”​—Maciu 11:​28-​30.

Dikeva mada na ivakaraitaki i Arthur. A tekivu vulica na qiri vaiolini ni se qai yabaki tini, nona inaki me na rogo se kenadau ena tabana oqori. Ni sa yabaki 14, sa dua sara toka na dauqiri vaiolini rogo, ia e sega ga ni marau. A lomatarotarotaka tu o tamana na inaki ni bula, e dau sureti ira kina na ivakavuvuli ni lotu i nodratou vale; ia a sega ga ni lomavakacegu ena nodra ivakamacala. Eratou dau veitalanoataka vakavuvale ke bula dina tiko na Kalou kei na vuna e vakatara tu kina na veika ca. Tekivu me veitalanoa o tama i Arthur kei ira na iVakadinadina i Jiova. A taleitaka na veika e vakamacalataki vua, ratou lai vulica sara kina vakavuvale na iVolatabu.

Ni toso na gauna, sa kila o Arthur na veika e kaya na iVolatabu me baleta na inaki ni bula, vakakina na vuna e vakatara tiko kina na Kalou na veika ca. Me vakataki ratou ga na tolu tale na lewe ni nona vuvale, e sega ni bau veivutunitaka o Arthur na nona digia me yalataka nona bula vei Jiova. “Au marautaka dina na nona vakalougatataki au o Jiova meu kila na ka dina. Au galala tale ga mai na nodra veiqati na daunivakatagi, nira dau cakacaka vakailawaki se veivakaisini mera rawaka kina.”

Se qiri vaiolini tiko ga o Arthur vei ira na nona itokani voleka, ia sa sega ga ni vakaliuca ena nona bula. Sa vakaliuca ga na nona qarava na Kalou. Ena gauna oqo sa veiqaravi tiko o Arthur ena dua na nodra vale ni tabana na iVakadinadina i Jiova. Ni vakatauvatani kei na iliuliu gone vutuniyau, o rawa ni vakatotomuri Arthur kei na le milioni tale ena nomu digia mo vakayacora na ka o na marau kina vakalevu​—oya na nomu ciqoma na veisureti i Jisu mo nona imuri.

[iYaloyalo ena tabana e 6]

Na nomu digidigi ena rawa ni yaga ena nodra bula na tani

[iYaloyalo ena tabana e 7]

O na vulica beka na iVolatabu, mo dua tale ga na imuri i Jisu?