Cava o Vakaliuca ena Nomu Bula?

E CAKACAKA o Kenny ena dua na kabani rogo e dau veivosakitaki kina na veika e voli se volitaki, dua nona motoka sau levu, qai vakaitikotiko ena vale cecere era dau tawana ga na vutuniyau. E kenadau ena vakalutulutu mai macawa, se dau taleitaka me lade ena vica na udolu na fute mai macawa. Ia, a marautaka beka nona bula? A volai ena The Wall Street Journal, ni a kaya: “Au sa yabaki 45, ia e sega ni dua na ka au vakanuinui tu kina . . . E sega ni vakainaki noqu bula.”

O Elyn a sasaga vakaukaua me kenadau ena vakatasisisi ena waicevata. A qai rawata na ka sara ga a diva tu, oya me rogo. “Ia, e vei na marau a dodonu meu vakila?” e taroga. “Au vakila ga na galili. Sega ni dede sa na yaco mai na bula vaqase, dina ni levu na noqu ilavo, ena tawayaga na bula ke sa vakaliuci ga na ka oya.”

E kilai o Hideo ena maqosa ni nona vakayagataka na roka, qai nona bula sara ga na droini. A sega ni via volitaka na nona droini; e nanuma ni na beci kina na ivakatagedegede ni nona droini kei na kena ivakavuvuli. Ni vakarau cava na 98 na yabaki ni nona bula, a qai solia vakailoloma na nona droini ina dua na valeniyayamaroroi. A vakayagataka vakatabakidua o Hideo na nona bula ena droini. Ia, a sega ni marau, a nanuma ni na sega ni yacova na kena ivakatagedegede vinaka duadua na nona droini.

E so era ogaoga vakalevu ena nodra vukei na tani. Kena ivakaraitaki, e dua na turaga e vakaitutu torocake ena vanua ni caka iyaloyalo mai Hollywood. Ni ivukevuke ni peresitedi ena dua na kabani rogo ni caka iyaloyalo e Mereke, e dau veimaliwai kina kei ira na tamata kilai levu qai vakaitikotiko kei ira na vutuniyau. Ena nona gade i Cambodia, a lai kere ilavo yani vua e dua na goneyalewa ni vakayakavi tiko ena dua na valenikana e Phnom Penh. A marau na goneyalewa oya ni soli vua e dua na dola kei na wainimoli. Ia, a gole tale yani ena bogi tarava me lai kerekere. A siqema rawa na turaga oya, ni levu tale na ka e vauci ena nodra vukei o ira era vaka na goneyalewa oya.

Ni oti e dua na yabaki, a vakatulewataka na turaga oya me sa veisau nona cakacaka​—mai na caka iyaloyalo ina nodra vukei na dravudravua e Cambodia. A tauyavutaka e dua na koronivuli e vakarautaki kina na icili, kakana, kei na vuli. Ia, se veilecayaki ga na yalona​—e marautaka na veika sa cakava tiko, ia e rarawa qai vuturi ni tubu cake tiko ga na leqa me walia.

Eratou nanuma na le va e cavuti mai cake ni ratou kila na inaki ni nodratou bula. Ia, ratou sega mada ga ni lomavakacegu ni sa rawati na isausau ratou a sasaga kina vakaukaua. Cava na inaki ni nomu bula? Na cava o dau vakaliuca? O sa vakadeitaka ni o na sega ni veivutunitaka na ivakarau ni nomu bula ena gauna oqo?