Toro Voleka Vua na Kalou
Na Tama Tawavakatauvatani Rawa
“TAMAQU.” So na vosa e uqeta sara ga na lomada. Na tama e lomani ira na luvena ena vukei ira mera rawaka. Sa rauta me vakatokai ena iVolatabu o Jiova me “Tama.” (Maciu 6:9) E Tama vakacava o koya? Dikeva na vosa a tukuna vei Jisu ena gauna a papitaiso kina, ni dau kilai ena nona itautau ni vosa e dua na tama se itubutubu vakacava.
Ena Okotova 29 S.K., a gole o Jisu ina uciwai na Joritani me papitaiso. E vakamacalataka na iVolatabu na veika a yaco: “Ni lamata mai wai o Jisu ni papitaiso oti e qai yaco e dua na ka veivakurabuitaki, e tadola na lomalagi, qai raica o koya na yalo ni Kalou ni lako sobu mai vua me vaka na ruve. E qai rogo tale ga mai lomalagi e dua na domo e kaya: ‘Oqo na Luvequ lomani, au vakadonuya.’”a (Maciu 3:16, 17, NW) Na vosa ni veivakamenemenei oqori i Jiova e vakaraitaka sara ga se Tama vakacava. Dikeva e tolu na ka e vakaraitaka o Jiova vei luvena.
Taumada, ni cavuta “oqo na Luvequ,” e vaka me tukuna tiko o Jiova, ‘Au marau niu vakatokai meu Tamamu.’ Na tama dauloloma ena kauaitaki ira na luvena, ena dau nanumi ira tale ga. Ra vinakata na gone me vakaraitaki vei ira nira ka talei ena vuvale. Vakasamataka mada na marau i Jisu ena nona kila ni se kauaitaki koya tiko ga o Tamana, gauna mada ga sa uabula tu kina!
iKarua, nona cavuta vei Luvena na vosa “lomani,” e vakaraitaka sara ga o Jiova e matanalevu na nona lomani Jisu. Vaka e tukuna tiko vei luvena, ‘Au lomani iko.’ Na tama vinaka e dau tukuna vei ira na luvena ni lomani ira vakalevu. Na vosa vaka oqori—kei na kena vakaraitaki sara ga ena sala rakorako—ena vakamarautaki ira na gone. Sa wacava na nona uqeti o Jisu ni rogoca na nona tukuna vua o Tamana ni lomani koya!
Kena ikatolu, ena nona tukuna “au vakadonuya,” e vakaraitaka kina o Jiova ni vakadonui Luvena. Vaka ga ni tukuna tiko o Jiova, ‘Luvequ, au marautaka na veika o cakava.’ Na tama dauloloma ena saga me vakaraitaka vei ira na luvena ni marautaka na veika vinaka era tukuna se cakava. Era na lomavakacegu qai vakayaloqaqataki na gone, ke ra kila nira vakadonui vei ira na nodra itubutubu. Sega ni vakabekataki ni a vakauqeti Jisu sara ga nona rogoca ni vakadonui koya o Tamana!
E Tama tawavakatauvatani rawa o Jiova. O taleitaka me dua na tamamu vaka oqori? E veivakacegui ni rawa mo veiwekani voleka kei Jiova. E marau mo drau veitokani ke o vulica na veika me baleti koya qai cakava na lomana mai vu ni lomamu. E tukuna na iVolatabu: ‘Toro voleka vua na Kalou, ena toro voleka mai vei iko o koya.’ (Jemesa 4:8) Cava tale ena vakataudeitaki iko, ni vakatauvatani kei na nomu veiwekani voleka kei Jiova, na Tama tawavakatauvatani rawa?
[iVakamacala e ra]
a Me baleta na itukutuku vata ga oya, a vola o Luke ena nona Kosipeli ni cavuta o Jiova “iko,” ena nona kaya: “O iko na noqu Gone ni toko; au sa dauvinakati iko vakalevu.”—Luke 3:22.