‘Moni Qarauna na iTavi e Soli Vei Kemuni ena Cakacaka ni Turaga’
“Mo qarauna mo qarava vakaoti sara na i tavi ka sa soli vei iko e na cakacaka ni Turaga.”—KOLO. 4:17, VV.
1, 2. Na cava na noda itavi na lotu Vakarisito me baleti ira na kawatamata?
EDA vakacolati ena dua na itavi bibi me baleti ira na tiko wavoliti keda. Nodra vakatulewa nikua ena vakatau kina na nodra bula se mate ena “veivakararawataki levu.” (Vkta. 7:14) Tukuna o koya e uqeti vakalou me vola na Vosa Vakaibalebale: “Vakabulai ira era sa yarataki me mate, kei ira era sa voleka me ra moku.” Vosa bibi dina oqori! Io, ena tarogi vei keda na nodra dra na tamata ke da sega ni vakasalataki ira ena vakatulewa mera na cakava. Tomani ena tikinivolatabu oya: “Kevaka ko kaya, raica, keitou a sega ni kila; sa sega li ni nanuma kina ko koya sa dikeva na yalo? Sa sega beka ni kila ko koya sa maroroya na yalomu? Ka na sega beka ni sauma ko koya na tamata yadua me vaka na nona cakacaka?” Era na sega gona ni vakaiulubaletaka na qaravi Jiova nira ‘sega ni kila’ na ka ena yacovi ira na kawatamata.—Vkai. 24:11, 12.
2 E talei vei Jiova na bula. Uqeti ira gona na dauqaravi koya mera vunau ena kena levu era rawata mera bula kina e levu. E nodra itavi na italatala kece ni Kalou mera tukuna na itukutuku ni bula ena nona Vosa. Noda itavi e vaka sara ga na nona itavi e dua na yadra, ni veivakasalataki ena gauna e raica kina ni sa vakarau yaco na leqa. Eda sega gona ni vinakata meda beitaki ena nodra mate e so. (Isik. 33:1-7) E bibi kina meda dau vosota, da qai gumatua na ‘vunautaka tiko ga na Vosa’!—Wilika 2 Timoci 4:1, 2, 5.
3. Na cava ena veivosakitaki ena tolu na ulutaga veitaravi oqo?
3 Ena veivosakitaki ena ulutaga oqo na ka meda cakava meda vosota kina na veika dredre ena cakacaka vakaitalatala e veivakabulai, kei na noda rawa ni tuberi ira e levu. Ia, oni dusimaki ena ulutaga e tarava ena ka moni cakava moni dauveivakavulici maqosa kina ena ka dina. E volaitukutukutaki ena ikatolu ni ulutaga e so na irogo marautaki me baleti ira na daukacivaka na itukutuku vinaka ni Matanitu ni Kalou e vuravura raraba. Ia, ni bera nida dikeva oqori, de vinaka meda raica na vuna e sa rui ca kina na gauna eda bula tiko kina oqo.
Vuna e Sega Kina Nodra iNuinui e Levu
4, 5. Na cava eda vakila tiko na kawatamata, cava era qai cakava e levu?
4 Na veika sa yaco tiko e vuravura e dusia nida bula donuya tu na “ivakataotioti ni veika vakavuravura,” sa voleka tale ga ni cava. E kaya o Jisu kei ira nona tisaipeli ni veika era vakila tiko na kawatamata sa ivakatakilakila sara tiko ga ni “iotioti ni veisiga” eda bula donuya tiko. Na “ka rarawa” era vakila tiko na kawatamata e okati kina na ivalu, lauqa, uneune, kei na so tale na leqa. Takalevu na basulawa, dui nanumi koya ga kei na itovo tawavakalou. O ira mada ga na via muria na ivakatagedegede vakaivolatabu era vakila tale ga ni “gauna cacamatua, lewalewai dredre.”—Maciu 24:3, NW; 6-8, 12; 2 Tim. 3:1-5, NW.
5 Ia, e levu era sega tu ni kila na ibalebale dina ni veika sa yaco tu oqo e vuravura. Era leqataka ga kina na nodra bula vaka kina nodra dui vuvale. Levu era dau lomabibi ni takali e dua era dau lomana se ni yacovi ira e dua na ka rarawa. Nira sega ni kila na vuna dina e yaco kina na veika oya kei na kena iwali, e sega gona ni dua na ka era vakanuinui kina.—Efeso 2:12.
6. Cava e sega ni vakacegui ira kina nona imuri o “Papiloni na Ka Levu”?
6 E sega ni vakaceguya na kawatamata o “Papiloni na Ka Levu” na lotu lasu kece e vuravura. Na kena veibasai ga, era vakamatenitaki e levu ena “waini ni nona dautagane” mera yawaka vakalevu na Kalou. E vaka voli na yalewa dautagane ni veivakacalai qai lewai ira na “tui kei vuravura,” ena nona uqeta e dua na iwase levu ni kawatamata mera talairawarawa vei ira na veiliutaki tiko ena nodra matanitu. E cakava oqo ena ivakavuvuli lasu kei na vakatevoro. E veivakamuai qai kaukaua o lotu lasu, na gauna vata oqori e cakitaka kina na vakabauta dina.—Vkta. 17:1, 2, 5; 18:23.
7. Na cava ena yacovi ira e levu? Era na veisau vakacava e so?
7 Vakatavulica o Jisu ni levu era muria tiko na sala rabailevu ena tini ina rusa. (Maciu 7:13, 14) So era sa muria sara tiko ga na sala rabailevu nira nakita nodra beca na ivakavuvuli vakaivolatabu. Ia e levu tale era lako kina nira vakacalai se vakamatabokotaki tu mera kua ni kila na ka e vinakata o Jiova. De dua era na veisau e so ke ra vakavulici vakavinaka ena iVolatabu. O ira na sega ni muduka nodra vakamuri Papiloni na Ka Levu, se ra beca tiko ga na ivakatagedegede vakaivolatabu, era na sega sara ga ni bula ena “veivakararawataki levu.”—Vkta. 7:14.
Kua ni “Mudu” na Vunau
8, 9. Na cava era cakava na lotu Vakarisito ena imatai ni senitiuri nira tusaqati, cava na vuna?
8 Tukuna o Jisu nira na vunautaka na itukutuku vinaka ni Matanitu ni Kalou na nona imuri, era na tuberi ira tale ga e so mera tisaipeli. (Maciu 28:19, 20, VV) Ra kila kina na lotu Vakarisito dina nira vakavotuya ena nodra cakacaka vakavunau na nodra yalodina vua na Kalou, ra kila tale ga ni oqo e tiki bibi ni nodra vakabauta. Era vosota gona na imuri taumada i Jisu na veitusaqati nira cakacaka vakavunau. Ra nuitaka na veivakaukauataki i Jiova, ra qai masuta me vakayaloqaqataki ira ‘mera doudou vakalevu ni tukuna na nona Vosa.’ Mani vakalougatataki ira o Jiova ena yalona tabu, ra doudou kina na vunautaka na nona vosa.—Caka. 4:18, 29, 31.
9 E tarova beka nodra vunautaka na itukutuku vinaka na imuri i Jisu na voravora ni veitusaqati? Sega sara ga! Era cata na iliuliu ni lotu vakaJiu na nodra vunau tiko na yapositolo, ra qai vesuki ira, ra vakarerei, ra mokulaki tale ga. Ia, “era sa sega ni mudu ni vakatavuvuli ka vunautaki Jisu ni sai koya na Karisito.” Matata vinaka tu vei ratou ni kilikili me ratou “talairawarawa vua na Kalou, me kakua ga vei ira na tamata.”—Caka. 5:28, 29, 40-42.
10. Na ka ni bolebole cava era vakatovolei kina na lotu Vakarisito nikua, ia na cava ena rairai yaco ena vuku ni nodra itovo vinaka?
10 Levu na dausokaloutaki Jiova nikua era sega ni mokulaki se biu e valeniveivesu ena vuku ni nodra cakacaka vakavunau. Ia sa tu ga na ka era dau vakatovolei kina na lotu Vakarisito dina. Me kena ivakaraitaki, de na uqeti kemuni na nomuni lewaeloma e vakavulici ena iVolatabu moni kua ni muria na ivakarau ni bula sa takalevu tu edai, se moni duidui vei ira e so tale. Era nanuma kina nomuni itokani vakacakacaka se icaba e koronivuli, se o ira oni tiko veitikivi ni oni leqa tiko, baleta ni oni yavutaka nomuni vakatulewa kece ga ena ivakavuvuli vakaivolatabu. Ia me kua sara ni vakayalolailaitaki kemuni na vakalelewa vaka oya. E lomoci tu o vuravura ena butobuto vakayalo, ia era ‘cila tiko ga me vaka na cina’ na lotu Vakarisito dina. (Fpai. 2:15) De dua era na raica e so, ra taleitaka tale ga na nomuni itovo vinaka, ra qai vakalagilagi Jiova kina.—Wilika Maciu 5:16.
11. (a) Cava era cakava e so me baleta noda cakacaka vakavunau? (b) Vakatovolei vakacava na yapositolo o Paula, cava e qai cakava?
11 E vinakati meda doudou me vunautaki tiko ga kina na itukutuku ni Matanitu ni Kalou. Era na vakalialiai keda se ra saga meda yalolailai, okati kina o ira na wekada. (Maciu 10:36) A mokulaki vaka vica na yapositolo o Paula ni yalodina tiko ena cakacaka vakaitalatala. Dikeva na ka e cakava ena vuku ni veitusaqati vaka oqo: “Keitou a vakararawataki mada eliu, ka vakacacani sara,” e vola, “keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.” (1 Ces. 2:2) Ka ni bolebole dina vei Paula me vunautaka tiko ga na itukutuku vinaka ni oti nona vesu, luva nona isulu, warolaki, qai biu e valeniveivesu. (Caka. 16:19-24) Cava mada e vu ni nona doudou me vunau tiko ga? Ni vu sara ga mai lomana nona qarava tiko nona itavi lesi vakalou, oya me vunautaka na itukutuku vinaka.—1 Kor. 9:16.
12, 13. Era vakatovolei vakacava e so, ra saga mera walia vakacava?
12 Dau ka ni bolebole tale ga na lai vunau ena yalava e dau lala tu ga kina na vale, se vei ira na sega ni dau taleitaka na itukutuku ni Matanitu ni Kalou. Cava meda cakava ena ituvaki vaka oqo? De vinaka meda sa na doudou ga na vunau tawalokuci. Ena rairai vinaka tale ga meda veisautaka noda ituvatuva meda vunau ena vanua era dau tu kina vakalevu na tamata.—Vakatauvatana Joni 4:7-15; Caka. 16:13; 17:17.
13 Levu tale sa yalani na nodra vunau ena vuku ni bula vaqase kei na tautauvimate. Moni kua vakadua ni yalolailai ke nomuni leqa oqori. E kila vinaka tu o Jiova na kemuni ituvaki qai marautaka na ka oni cakava rawa. (Wilika 2 Korinica 8:12.) Se mani leqa cava oni vakila tiko—veitusaqati, vakalewai, se tautauvimate—cakava tiko ga na ka oni rawata ena nomuni tukuna vei ira e so tale na itukutuku vinaka.—Vkai. 3:27; vakatauvatana Marika 12:41-44.
‘Qarauna Moni Qarava Vakavinaka na Cakacaka ni Turaga’
14. iVakaraitaki cava i Paula mera muria na lotu Vakarisito, kei na ivakasala cava a tauca?
14 E bibi vua na yapositolo o Paula na nona cakacaka vakaitalatala, uqeti ira tale ga nona itokani vakabauta me vaka oya na nodra rai. (Caka. 20:20, 21; 1 Kor. 11:1) O Paula gona e dau uqeti Akipo vakalevu, e dua na lotu Vakarisito ena imatai ni senitiuri. Vola o Paula vei ira mai Kolosa: “Kaya tale ga vei Akipo, Mo qarauna mo qarava vakaoti sara na i tavi ka sa soli vei iko e na cakacaka ni Turaga.” (Kolo. 4:17, VV) Eda sega ni kilai Akipo se na kena ituvaki, ia a ciqoma na veisureti me cakacaka vakaitalatala. Ke oni lotu Vakarisito yalayala, macala ni oni sa ciqoma na veisureti moni cakacaka vakaitalatala. Vakacava oni kauaitaka tiko na cakacaka vakaitalatala oqori moni qarava vinaka sara?
15. Na cava e vauci ena noda yalayala vakarisito? Taro cava meda taroga?
15 Ni bera nida papitaiso eda yalataki keda mada vei Jiova ena masu e vu mai lomada. Kena ibalebale oqo nida sa vakadeitaka meda cakava na lomana. Vinaka gona meda dui taroga ena gauna oqo, ‘Bibi beka vei au na vakayacori ni loma ni Kalou?’ Ena rairai so na itavi e vinakata o Jiova e dodonu ga meda cakava—vaka noda qarava noda vuvale. (1 Tim. 5:8) Ia eda na vakayagataka vakacava na noda gauna galala kei na noda kaukaua? Cava eda na vakaliuca?—Wilika 2 Korinica 5:14, 15.
16, 17. Na cava oni rawa ni vakasamataka na lotu Vakarisito e tu donu nomuni yabaki ni bula, se sega ni levu nomuni icolacola?
16 Ke oni itabagone, oni sa vakaotia beka se vakarau vakacavara tiko nomuni vuli? Macala ni oni se sega ni vakavuvale moni vakaicolacola kina. Cava gona oni sa lalawataka tu? Vakatulewa cava ena yaga ina nomuni vakayacora nomuni yalayala moni cakava na loma i Jiova ena nomuni vinaka kece? Sa ra tuvanaka e levu mera painia, ra qai marautaka vakalevu, ra lomavakacegu tale ga kina.—Same 110:3; Dauv. 12:1.
17 De se tu donu nomuni yabaki ni bula, oni cakacaka saumi, qai lailai sara nomuni icolacola ni oni qaravi kemuni duadua tiko ga. Oni tiko taudua beka, qai marautaka tiko nomuni vakaitavi ena cakacaka ni ivavakoso ni veiganiti kei na nomuni ituvatuva. Vakacava, oni vinakata moni marau sara vakalevu? Bau vakasamataka tu moni vakarabailevutaka nomuni cakacaka vakaitalatala? (Same 34:8; Vkai. 10:22) Levu era tu ena so na vanua era se bera sara ga ni rogoca na itukutuku e veivakabulai. Rawa beka ni oni veisautaka nomuni ituvatuva moni veiqaravi ena vanua era gadrevi kina vakalevu na dautukuna na itukutuku vinaka?—Wilika 1 Timoci 6:6-8.
18. Na veisau cava rau cakava e dua na veiwatini gone, cava rau vakila kina?
18 Vakasamataka mada nodrau ivakaraitaki o Kevin kei Elena mai Mereke.a Rau nanuma me rau volia e dua na vale, ni ivakarau ga ni nodra bula na vakamau vou ena vanua rau tiko kina. Rau rawata vinaka nodrau bula ni rau cakacaka saumi ruarua. Ni rau oga vakalevu ena cakacaka kei na qaravi ni veika e vale, sa lailai kina na gauna ni nodrau cakacaka vakavunau. Rau liaca ni sa vakatabakidua ga nodrau gauna kei na kaukaua ina veika rau taukena tu. Ia, ena gauna vata oya rau raica na nodrau mamarau e dua na veiwatini painia erau bula rawarawa ga. Rau vakatulewataka kina o Kevin kei Elena me veisau na ka rau vakaliuca. Ni rau masuta oti na veidusimaki i Jiova, rau volitaka sara na nodrau vale, rau qai toki ina dua ga na rumu saumi. Vakalailaitaka o Elena na gauna ni nona cakacaka saumi, qai painia. Uqeti Kevin na veika vivinaka sa marautaka tiko o watina, mani biuta nona cakacaka saumi me painia tale ga. Dua na gauna e muri, rau lai veiqaravi ena dua na vanua e Sauca Amerika era gadrevi tu kina vakalevu na dautukutuku ni Matanitu ni Kalou. “Keirau dau marautaka na neirau bula vakawati,” e kaya o Kevin, “ia na gauna keirau vakarabailevutaka kina na neirau veika vakayalo, keirau marau sara ga vakalevu.”—Wilika Maciu 6:19-22.
19, 20. Na cava e cakacaka bibi kina nikua na vunautaki ni itukutuku vinaka?
19 Na vunautaki ni itukutuku vinaka e cakacaka bibi duadua e vakayacori tiko e vuravura nikua. (Vkta. 14:6, 7) E vakalagilagi tale ga kina na yaca i Jiova. (Maciu 6:9) E vakavinakataka na nodra bula e vica vata na udolu na nodra ciqoma na itukutuku ni iVolatabu e veiyabaki, e rawa tale ga nira bula tawamudu kina. Ia, “a ra na rogoca vakacava, kevaka e sega e dua me tukuna?” a taroga na yapositolo o Paula. (Roma 10:14, 15) Era na sega ga ni rogoca ni sega ni dua e tukuna vei ira! Koya gona, saga sara ena nomuni igu kece moni qarava vinaka na nomuni cakacaka vakaitalatala.
20 Dua tale na sala oni na vakavulici ira kina e levu mera kila na bibi ni gauna lewalewai dredre eda sa bula tiko kina oqo kei na ka era na sotakaya ena vuku ni nodra vakatulewa, oya na nomuni vakavinakataka na nomuni iwalewale ni veivakavulici. Ena veivosakitaki oqori ena ulutaga e tarava.
[iVakamacala e ra]
a So na yaca sa veisau.
O na Sauma Vakacava?
• Na cava na noda itavi na lotu Vakarisito me baleti ira na kawatamata?
• Meda vosota vakacava na veika e vakalatilati ena noda cakacaka vakavunau?
• Eda na qarava vinaka vakacava na cakacaka vakaitalatala eda sa ciqoma?
[iYaloyalo ena tabana e 5]
Gadrevi meda vunau ena doudou nida tusaqati
[iYaloyalo ena tabana e 7]
Cava moni cakava ke oni vunau tiko ina yalava e dau lala tu ga kina na vale?