Ra iTabagone, ni Nanumi Koya na Dauveibuli Lagilagi ena Gauna Qo

“Mo nanumi koya ka Buli iko ni ko sa cauravou tiko.”​—DAUV. 12:1.

1. E nuitaki ira vakacava na itabagone era sokaloutaki koya o Jiova?

ERA ka talei vei Jiova na itabagone lotu Vakarisito, ra qai veivakabulabulataki me vaka na tegu. Io, e parofisaitaka nira na “via vakacabori ira mei madrali” na itabagone ena siga ni ‘kaukaua’ i Luvena. (Same 110:3) Ena vakayacori na parofisai qo ena gauna sara ga era sega ni via qaravi Jiova kina e levu, ra kauaitaki ira ga kei na ilavo, ra qai talaidredre. Ia, e kila o Jiova nira na sega ni va ya na itabagone era sokaloutaki koya. E nuitaki kemuni gona vakalevu na cauravou kei na goneyalewa!

2. Na cava e vauci ena noda nanumi Jiova?

² Vakasamataka mada nona marau na Kalou ni raici ira na itabagone nira nanumi koya tiko​—na Dauveibuli Lagilagi. (Dauv. 12:1) Ia, na noda nanumi Jiova e sega ni okati ga kina noda dau vakasamataki koya. E vauci kina noda cakava na ka ena vakamarautaki koya, na noda muria e veisiga na veidusimaki ni nona lawa kei na ivakavuvuli. Kena ibalebale tale ga oya nida vakararavi vei Jiova, eda vakabauta ni kauaitaka keda. (Same 37:3; Aisea 48:​17, 18) Oqori beka na nomu rai me baleti koya na Dauveibuli Lagilagi?

“Mo Vakararavi Vei Jiova e na Vu ni Yalomu”

3, 4. Vakaraitaka vakacava o Jisu ni vakararavi vei Jiova, na cava e bibi kina meda vakararavi vei Jiova nikua?

³ E ivakaraitaki vinaka duadua o Jisu Karisito ena nona dau vakararavi vua na Kalou. E bulataka na ivakasala ena Vosa Vakaibalebale 3:​5, 6: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” Ni oti ga nona papitaiso, a temaki koya o Setani me veiliutaki e vuravura, me nona tale ga na lagilagi. (Luke 4:​3-​13) A sega ni rawai o Jisu. A kila o koya ni “sau ni yalomalumalumu kei na rerevaki Jiova nai yau, kei na vakarokoroko, kei na bula.”​—Vkai. 22:4.

⁴ Na kocokoco kei na nanumi koya ga e rua na itovo sa laurai levu tu nikua. Ena ituvaki va qo, e ka vakayalomatua meda muria na ivakaraitaki i Jisu. Meda nanuma tale ga ni o Setani ena vakayagataka na veimataqali ivadi me temaki ira kina na dausokaloutaki Jiova mera biuta na sala qiqo e basika ina bula tawamudu. E vinakata me vakamuai ira na tamata kece mera muria na sala rabailevu e tini ina rusa. Meda kua sara ni vakacalai! Ia, meda nanumi koya dei tiko ga na Dauveibuli Lagilagi. Meda vakararavi vua mai vu ni lomada, da qai taura dei na “bula dina,” sa voleka sara ni vakavatukanataki.​—1 Tim. 6:​19.

Ra iTabagone, ni Yalomatua!

5. Na cava na nomu rai me baleta na vanua sa mua tiko kina na vuravura qo?

⁵ O ira na itabagone era nanumi koya na Dauveibuli Lagilagi era yalomatua sara ni vakatauvatani kei na nodra icaba. (Wilika Same 119:​99, 100.) Ni tu vei ira na rai ni Kalou, era kila vinaka ni na vakarusai na vuravura qo. Ena gauna lekaleka oni bula tiko kina na itabagone, sega ni vakabekataki ni oni sa raica na nodra sa qai rere tiko ga vakalevu na tamata, ra nuiqawaqawa tale ga. Ke oni se vuli tiko, macala ga ni oni sa rogoca na itukutuku ni kena vagagai na vuravura, na kena katakata tiko ga na vuravura, na musu ni veikau loa, kei na so tale na leqa va ya. Era kauai vakabibi kina e levu, ia eda kila vinaka na iVakadinadina i Jiova ni vakatakila sara tiko ga qori ni sa voleka ni rusa o Setani kei ira na nona ilala.​—Vkta. 11:18.

6. Era vakacalai vakacava e so na itabagone?

⁶ Ia, ka ni rarawa nira sega ni qaqarauni e so na itabagone qaravi Kalou, era sa guilecava kina ni sa lekaleka na gauna e soli tu ina vuravura qo. (2 Pita 3:​3, 4) So era sa vecei ena ivalavala tawakilikili ena vuku ni vakailala ca kei na veika vakasisila era rogoca, wilika, se sarava. (Vkai. 13:20) Sa na bau vakaloloma dina me sega ni vakadonui keda na Kalou ni sa voleka qo na icavacava! Meda vulica mada na ka e yacovi ira na Isireli ena 1473 B.S.K. nira keba tiko ena Buca o Moapi, ena gauna era sa voleka sara tu ga kina ni butuka na Vanua Yalataki. Na cava a yaco e kea?

Rawai Nira sa Voleka Yani

7, 8. (a) Na ivadi cava e vakayagataka o Setani ena vanua Buca o Moapi? (b) Na ivadi cava e vakayagataka tiko o Setani ena gauna qo?

⁷ Ena gauna ya, e macala ni a saga sara ga o Setani mera kua ni rawata na Isireli na ivotavota a yalataki vei ira. Ni sega ni yaco na lomana me vosavakacacataki ira na Isireli na parofita o Pelami, a vakayagataka o Setani e dua na ivadi qaseqase; a saga me kua ni vakadonui ira o Jiova. A vakayagataki ira na yalewa ni Moapi dau veitemaki mera coriti kina na Isireli, marau kina o Setani ni sa bau rawa na nona inaki. Era veiyacovi kei ira na yalewa ni Moapi ra qai lai tini sokalou vei Peali-piori! Dina nira sa voleka ni taura nodra ivotavota ena Vanua Yalataki, ia era qai vakamatei e rauta ni 24,000. Sa bau vakaloloma dina!​—Tiko 25:​1-3, 9.

⁸ Nikua, eda sa volekata tiko yani na vanua yalataki e uasivi sara​—na ituvaki vou. Me vaka ga nona ivalavala, e vakayagataka tale o Setani na ivalavala tawakilikili ni veiyacovi me vakadukadukalitaki ira kina na dausokaloutaki Jiova. Sa sega ni taleitaka o vuravura na ivakarau ni bula savasava, sa sega mada ga ni okati me ivalavala ca na veidauci, qai raici na veimoceri vakamataqali vata me digidigi ga ni tamata yadua. E kaya e dua na yalewa lotu Vakarisito, “Ratou qai mai kila ga e vale kei na Kingdom Hall na luvequ ni sega ni vakadonuya na Kalou na veiyacovi ena taudaku ni vakawati.”

9. Na cava ena rawa ni yaco ena “gauna vakaitabagone,” era na taqomaki ira vakacava na itabagone?

⁹ Era kila na itabagone era nanumi koya na Dauveibuli Lagilagi, ni veiyacovi e dua na isolisoli talei e vauci kina na bula kei na vakatubu kawa. Era kila gona ni dodonu me qai marautaki ga na veiyacovi ena sala e tuvanaka na Kalou​—oya ena loma ni bula vakawati. (Iper. 13:4) Ia, e dredre sara mera savasava tiko ga ena “gauna vakaitabagone”​—na gauna e dau kaukaua kina na gagadre vakayago qai rawarawa sara ga na kena vakacalai na nona vakasama e dua na itabagone. (1 Kor. 7:​36, NW) Na cava mo cakava ni o sa tekivu vakasamataka na veika tawakilikili? Masu vagumatua vei Jiova me vakamuai kina nomuni vakasama ina veika e kilikili. Dau rogoci ira na masu vua mai vu ni lomadra o Jiova. (Wilika Luke 11:​9-​13.) Rawa tale ga ni mua donu tale na vakasama ke veivosakitaki na ka e savasava qai tara cake na noda vakabauta.

Digia Vakayalomatua na Nomu iSausau!

10. Na rai cala cava meda biuta laivi, kei na taro cava meda vakasamataka?

¹⁰ Dua na vuna levu era dau cakava ga kina na itabagone na ka era vinakata ra qai vakaliuca na marau, oya nira sega ni “raiyawa”​—ra sega ni muria na veidusimaki ni Kalou se sega nodra inuinui dei me baleta na veigauna e se bera mai. (Vkai. 29:​18, NW) Era vakataki ira na Isireli ena gauna i Aisea, era sega ni muria na veidusimaki ni Kalou ra qai “ia na reki kei na marau, . . . na kana manumanu, kei na gunu waini.” (Aisea 22:13) Meda kua ni vuvutaki ira tiko na va qo, vakacava meda vakasamataka ga vakabibi na inuinui talei e dulaka o Jiova vei ira na yalodina vua? Ke o itabagone dauqaravi Jiova, o sa nanamaki tiko mo bula ena vuravura vou? Vakacava, o dau saga vagumatua mo ‘ia na ivalavala yalomatua . . . mo nuitaka na veivakalougatataki’ e vakarautaka tu o Jiova? (Taito 2:​12, 13) Na nomuni isaunitaro ena uqeti kemuni ena isausau mo ni tekia kei na ka mo ni vakabibitaka.

11. Na cava mera gumatua kina na vuli na itabagone lotu Vakarisito?

¹¹ E vinakata o vuravura mera vakabibitaka na itabagone na isausau vakavuravura. Ia, mo ni gumatua sara ena vuli ke oni se vuli tiko. Me nomuni isausau mo ni qara e dua na cakacaka veiganiti, mo ni yaga ina ivavakoso, ni qai gumatua na kacivaka na Matanitu ni Kalou. Mo ni rawata qori, e bibi me matata na veika oni tukuna, mo ni vakasamataka vinaka na ka, mo ni qai walia na leqa ena sala malumu kei na veidokai. Ia, o ira na itabagone era vulica na iVolatabu, ra qai gumatua na bulataka na kena ivakavuvuli era sa rawata sara tiko ga na vuli uasivi duadua, ra qai yavutaka vinaka kina na nodra bula tawamudu ena veisiga se bera mai.​—Wilika Same 1:​1-3.a

12. Na ivakaraitaki cava mera vakadamurimuria na vuvale lotu Vakarisito?

¹² E bibi dina e Isireli na nodra vakavulici ira na luvedra na itubutubu. Na veivakavulici qori e kovuti kina na veika kece e vauca na bula, vakauasivi na veika vakayalo. (Vkru. 6:​6, 7) O koya gona, nira vakarorogo o ira na itabagone ni Isireli vei ira na itubutubu kei ira na itabaqase era qaravi Jiova, era kila kina e levu na ka, kena ikuri na vuku, yalomatua, kei na kila​—na veika qo e rawati ga ena veivakavulici vakalou. (Vkai. 1:​2-4; 2:​1-​5, 11-​15) Mera kauaitaka tale ga vakabibi na matavuvale vakarisito na vuli.

Rogoci Ira na Lomani Iko

13. Na cava era dau vakasalataki kina e so na itabagone, cava mera qarauna?

¹³ Levu era dau vakasalataki ira na itabagone​—okati kina o ira na daunivakasala mai koronivuli​—ena bibi ni rawaka. Ni vakasamataka vinaka na ivakasala va qori salavata kei na nomuni masulaka, ni qai raica vata kei na ivakasala ni Vosa ni Kalou kei na ivola e vakarautaka na dauveiqaravi yalodina, qai vuku. Oni kila ena veika oni vulica mai na iVolatabu ni taketetaki kemuni sara tiko ga kei ira na lecaika o Setani. Me kena ivakaraitaki, ena were o Iteni a vakarorogo vei Setani ena lecaika o Ivi, dina ni a sega sara ga ni bau lomani koya. Ia ena duatani sara na talanoa ke a vakarorogo ga vei Jiova, na Kalou a lomani koya dina!​—Vkte. 3:​1-6.

14. Na cava mera rogoci Jiova kina kei ira na itubutubu qaravi Kalou na itabagone?

¹⁴ E lomani kemuni tale ga na itabagone mai vu ni lomana na Dauveibuli Lagilagi. E vinakata mo ni marau ena gauna qo, me tawamudu tale ga! O koya gona, me vaka ga e dua na itubutubu dauloloma, e tukuna vei kemuni vaka kina o ira kece na sokaloutaki koya: “Oqo na sala, dou mai lako tu ga kina.” (Aisea 30:21) E ikuri ni veivakalougatataki ke rau qaravi Jiova tale ga na nomuni itubutubu, rau qai lomani koya dina. Rogoca ena veidokai na nodrau ivakasala ni oni vakatulewataka tiko na ka mo ni vakaliuca. (Vkai. 1:​8, 9) Bibi dina qo baleta ni rau vinakata mo ni rawata na bula, e uasivi sara mai na iyau kei na rogo ena vuravura qo.​—Maciu 16:26.

15, 16. (a) Na cava eda nuidei kina ni na cakava o Jiova? (b) Na cava eda vulica ena ka a yaco vei Peruki?

¹⁵ O ira na nanumi koya na Dauveibuli Lagilagi era na bula rawarawa ga, nira nuidei ni na “sega sara ni biuti” ira “se vakalaivi” ira o Jiova. (Wilika Iperiu 13:5.) Ni veicalati na rai qo kei na rai ni vuravura, meda qaqarauni gona me kua ni vakamuai keda na yalo ni vuravura. (Efeso 2:2) Vakasamataka mada na ivakaraitaki i Peruki, na vunivola i Jeremaia. A bula donuya na gauna dredre ena korolevu o Jerusalemi ni bera ni vakarusai ena 607 B.S.K.

¹⁶ De dua a vinakata o Peruki me levu nona iyau. E raica qo o Jiova qai vakasalataki koya vakayalovinaka me kua ni dauqara “na ka levu” me nona. A yalomalumalumu qai yalomatua o Peruki, laurai sara ga ena nona rogoca na ivakasala i Jiova, mani bulata kina na kena vakarusai o Jerusalemi. (Jere. 45:​2-5) Ena yasana adua, era vakaliuca “na ka levu” vakayago o ira na bula vata kei Peruki, qai muri nodra qaravi Jiova, ia e rusa kece nodra iyau ena gauna era kabakoro kina na kai Kalitia (kai Papiloni). Levu tale ga era a mate. (2 Vei. 36:​15-​18) Na ka a yacovi Peruki eda vulica kina ni bibi sara na veiwekani vinaka kei Jiova, ni vakatauvatani kei na iyau kei na rogo ena vuravura qo.

Vuli Vei Ira Era iVakaraitaki Vinaka

17. Na cava ratou ivakaraitaki vinaka kina o Jisu, Paula, kei Timoci vei ira na dausokaloutaki Jiova ena gauna qo?

¹⁷ E volai ena Vosa ni Kalou e levu na ivakaraitaki vinaka meda vuli kina meda rawata na bula tawamudu. Kena ivakaraitaki o Jisu, e levu sara nona taledi ia a vakabibitaka vei ira na lewenivanua na ka ena yaga tawamudu​—“nai tukutuku-vinaka ni matanitu ni Kalou.” (Luke 4:​43) A sega ni tomana na yapositolo o Paula na cakacaka ena rogo kina, ia a vakayagataka nona gauna kei na nona kaukaua me vunautaka na itukutuku vinaka baleta ni via qaravi Jiova ena nona vinaka taucoko. A vakatotomuria na ivakaraitaki vinaka i Paula o Timoci, ‘na gone dina ni vakabauta.’ (1 Tim. 1:2) Ratou a veivutunitaka beka o Jisu, Paula, kei Timoci na ka ratou vakaliuca? Sega sara ga! A tukuna sara mada ga o Paula nira vaka na “de-ni-manumanu walega” na veika e dulaka tu o vuravura, ni vakatauvatani kei na nona itavi dokai me qaravi Jiova.​—Fpai. 3:​8-​11.

18. Na veisau levu cava a vakayacora e dua na cauravou, na cava e sega ni veivutunitaka kina?

¹⁸ Levu na itabagone lotu Vakarisito nikua era vakaraitaka na vakabauta e laurai vei Jisu, Paula, kei Timoci. Me kena ivakaraitaki, a vola e dua na cauravou papitaiso a cakacaka vinaka tu e liu: “A totolo ga na kena tosoi cake na noqu itutu baleta niu dau bulataka na ivakavuvuli ena iVolatabu. Dina niu vakailavo kina, ia au vakila ni ka ni oca wale ga. Niu tukuna vei ratou na vakailesilesi ni kabani niu sa via cakacaka vakavunau vakatabakidua, e totolo ga nodratou vakatututaka me vakalevutaki na kequ isau. Ratou nuitaka niu na tiko ga. Ia au dei ina noqu vakatulewa. Levu era sega ni kila na vuna au biuta kina na cakacaka isaulevu oya, meu lai veiqaravi kina vakatabakidua. Na vuna niu vinakata meu vakayacora sara vakavinaka noqu yalayala vua na Kalou. Ni sa vakatabakidua sara ga ena gauna qo na noqu bula ena veika vakayalo, au marau qai lomavakacegu kina. Na ka qo e sega ni solia rawa vei au na ilavo se na itutu.”

19. Na vakatulewa vakavuku cava era uqeti mera cakava na itabagone?

¹⁹ E veiyasa i vuravura, e udolu na itabagone era sa cakava tale ga na vakatulewa e via tautauvata kei na kena qori. Koya gona, ra itabagone, ni vakasamataka tiko na siga i Jiova ena gauna oni vakatulewataka kina na veika oni vakasamataka tiko mo ni cakava ena veisiga se bera mai. (2 Pita 3:​11, 12) Kua ni vuvutaki ira era rawaka tiko vakalevu e vuravura. Mo ni vakarogoci ira ga na lomani kemuni dina. Na nomuni kumuna na “[i]yau mai lomalagi” ena yaga, e dei, qai tawamudu. (Maciu 6:​19, 20; wilika 1 Joni 2:​15-​17.) Mo ni nanumi koya gona na Dauveibuli Lagilagi. Ena vakalougatataki kemuni kina o Jiova.

[iVakamacala e ra]

O se Nanuma Tiko?

• Eda vakaraitaka vakacava nida vakararavi vua na Kalou?

• Na cava na vuli vinaka duadua?

• Na cava eda vulica vei Peruki?

• O cei eratou ivakaraitaki vinaka, na vuna?

[iYaloyalo ena tabana e 13]

Vakarautaka o Jiova na veivakavulici vinaka duadua

[iYaloyalo ena tabana e 15]

A vakarorogo vei Jiova o Peruki mani bulata na vakarusai i Jerusalemi. Na cava oni vulica kina?