Mo Qaravi Jiova ni O se Gone

“Mo tu dei e na ka ko a vakatavulici kina, a ka sa vakadinadinataki vei iko.”​—2 TIM. 3:​14.

1. E raica vakacava o Jiova nodra veiqaravi na itabagone?

E BIBI vei Jiova nodra sokalou na itabagone. Sa rauta me uqeta na volai ni parofisai qo me baleti ira: “O ira na nomuni tamata era na via vakacabori ira mei madrali e nai ukuuku ni yalosavasava e na siga ni nomuni kaukauwa,” e lagata na daunisame. “Era na lewe vuqa na nomuni cauravou ka lailai na mata ni tegu mai na kete ni mataka.” (Same 110:3) Era ka talei dina vei Jiova na itabagone era via qaravi koya.

2. Na cava era dau uqeti kina na itabagone nira vakasamataka tiko na ka mera cakava ena veisiga se bera mai?

² Kemuni na itabagone ena ivavakoso vaKarisito, oni sa yalataki kemuni oti beka vei Jiova? Ena rairai dredre mera vakatulewataka e levu na itabagone mera qarava na Kalou dina. Era dau uqeti ira sara ga vakalevu na itabagone na daunibisinisi kei ira na qasenivuli mera tekia na isausau vakavuravura, so na gauna era uqeta tale ga qori na wekadra kei na nodra itokani. Sa rauta mera dau vakalewai vakaca ena levu na gauna o ira na itabagone era tekia na isausau vakayalo. Ia, sega ni vakabekataki ni bula vinaka duadua na nomuni qarava na Kalou dina. (Same 27:4) E bibi gona mo ni vakadeuca mada e tolu na taro qo: Na cava mo ni qaravi Jiova kina? Se mani vakacava sara na ka e tukuni se caka vei kemuni, oni na yalodina tiko ga vakacava ena nomuni yalayala vei Jiova? Na tabana ni veiqaravi cava vei Jiova oni na rawa ni vakaitavi kina?

Dodonu ga Meda Qaravi Jiova

3. E dodonu me uqeti keda vakacava na ibulibuli i Jiova?

³ Na cava mo ni qarava kina na Kalou Dina, na Kalou Bula? Vakamacalataki ena Vakatakila 4:​11,VV na vuna bibi me caka kina qori: “Sa ganiti kemuni, na neimami Turaga ka neimami Kalou [“Jiova,” NW], me cabo vei kemuni na neimami veivakalagilagi kei na vakarokoroko kei na kaukauwa. Ni ko ni a bulia na veika kece; era sa buli ka ra sa tu dei tu e na nomuni lewa.” E bulia na ka kece o Jiova, na Dauveibuli vakatubuqoroqoro. Sega li ni totoka vakaoti na vuravura? Era ibulibuli kece i Jiova na vunikau, na senikau, na manumanu, na wasawasa, na ulunivanua, kei na savu. “Sa roboti vuravura na nomuni yau [“ibulibuli ni Kalou,” NW],” e kaya na Same 104:24. Eda vakavinavinaka ni bulia o Jiova na yagoda kei noda vakasama meda rawa ni marautaka kina na bula kei na veika vivinaka ena vuravura qo. Sega li ni uqeti keda meda qaravi Jiova na noda marautaka na ibulibuli vakatubuqoroqoro i Jiova mai vu ni lomada?

4, 5. Na cava e raica sara ga o Josua ni cakava o Jiova qai vakavuna me toro volekati koya?

⁴ E dua tale na vuna meda qaravi Jiova kina e laurai ena nona vosa e dua na iliuliu ni Isireli o Josua. A kaya o Josua vei ira na tamata ni Kalou ena gauna sa voleka kina ni mate: “Dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni.” Cava e kaya kina qori o Josua?​—Josua 23:14.

⁵ Sega ni vakabekataki ni a vulica o Josua ena gauna a tubu cake tiko kina e Ijipita, na nona yalataka o Jiova vei ira na Isireli e dua na vanua vinaka me nodra ivotavota. (Vkte. 12:7; 50:​24, 25; Lako 3:8) Qai raica sara ga o Josua nona yavala o Jiova me totogitaki Ijipita ena Tini na Kuita me vakayacora kina nona vosa ni yalayala, kei na nona laivi ira na Isireli ena voraki o Fero. Bau dua tale ga vei ira na vakabulai ena Wasa Damudamu o Josua, qai raica sara ga nona luvu kina o Fero kei nona mataivalu. Ena gauna balavu ra veilakoyaki tiko kina “e loma ni vanua liwa ka rerevaki” qai dravuisiga e Saineai, a raica o Josua nona vakarautaka o Jiova na ka kece ra gadreva na Isireli. Sega sara ga ni dua e mate ena viagunu se na viakana. (Vkru. 8:​3-5, 14-​16; Josua 24:​5-7) Ena gauna era qai valuta kina na veimatanitu kaukaua ni Kenani na Isireli me nodra kina na Vanua Yalataki, a raica sara ga o Josua ni tokoni ira na Isireli o Jiova.​—Josua 10:​14, 42.

6. Cava ena uqeti kemuni mo ni qarava na Kalou?

⁶ Kila vinaka o Josua ni a dina o Jiova ina nona vosa ni yalayala. Sa rauta me kaya: “Koi au kei ira na noqu lewe-ni-vale, keitou na qaravi Jiova.” (Josua 24:15) Vakacava o kemuni? Ni oni vakasamataka na vosa ni yalayala e sa vakayacora oti na Kalou dina, kei na kena e se bera, e uqeti kemuni beka mo ni qaravi koya me vakataki Josua?

7. Na cava e bibi kina na papitaiso?

⁷ Nomuni vakasamataka vakabibi na ibulibuli i Jiova kei na nona vosa ni yalayala talei qai nuitaki, e dodonu me uqeti kemuni mo ni yalayala vei Jiova, me qai vakadinadinataki qori ena nomuni papitaiso. O ira na via qarava na Kalou e bibi mera papitaiso. E macala qori nida vulica na ka e cakava o Jisu, na noda iVakaraitaki. Ni bera ni cakava nona itavi vakamesaia, a gole vei Joni na Dauveipapitaisotaki me papitaisotaki koya. Na vuna? Qai vakamacalataka o Jisu ena dua na gauna e muri: “Ni’u sa sega ni lako sobu mai lomalagi me’u kitaka na lomaqu, me’u kitaka ga na loma i koya sa talai au mai.” (Joni 6:​38) A papitaiso gona o Jisu me vakaraitaka na nona sa soli koya me cakava na loma i Tamana.​—Maciu 3:​13-​17.

8. Cava a vakatulewataka kina o Timoci me qarava na Kalou, kei na cava beka sa qai vo mo ni cakava?

⁸ Vakasamataka tale ga na ivakaraitaki i Timoci, e dua na itabagone lotu vaKarisito. A lesia vua o Jiova e levu na cakacaka kei na itavi dokai. Na cava a vakatulewataka kina o Timoci me qarava na Kalou dina? E kaya na iVolatabu ni a ‘vulica qai vakadinadinataki vua me vakabauta.’ (2 Tim. 3:​14) Ke oni vulica na Vosa ni Kalou qai vakadinadinataki vei kemuni mo ni vakabauta na kena ivakavuvuli, ena via vaka na ka a yaco vei Timoci. Sa qai vo ga mo ni vakatulewa. Vakacava mo ni veitalanoataka kei ira na nomuni itubutubu na ka oni sa lalawataka tiko? Era na dusimaki kemuni na qase ni ivavakoso kei ira na nomuni itubutubu mo ni kila na veika e gadrevi vua e dua e via papitaiso, me vaka ga e volai ena iVolatabu.​—Wilika Cakacaka 8:​12.

9. Na cava era na rairai nanuma e so me baleta na nomuni papitaiso?

⁹ Na nomuni papitaiso e itekitekivu vinaka duadua ni nomuni qarava na Kalou dina. Ni oni cakava qo, e vaka sara ga oni sa tekivu veitaucici ena dua na cici balavu. E icovi ni veitaucici qori na bula tawamudu kei na marau oni na vakila ena gauna qo ena nomuni cakava na loma ni Kalou. (Iper. 12:​2, 3) Oni na vakamarautaki ira tale ga na wekamuni kei na nomuni itokani era lewe ni ivavakoso vaKarisito. Kena e bibi duadua, ena marau kina o Jiova. (Wilika Vosa Vakaibalebale 23:15.) E dina ni na tiko e so era na rairai sega ni kila na vuna oni vakatulewataka kina mo ni qaravi Jiova. De dua era nanuma ni oni vakatulewa cala. Era na rairai tusaqati kemuni sara ga. Ia oni rawa ni vosota na veika qori.

Ni Oni Vakatarogi se Tusaqati

10, 11. (a) Na cava era na rairai taroga e so me baleta nomuni vakatulewataka mo ni qarava na Kalou? (b) Cava oni vulica ena nona dau sauma o Jisu na taro me baleta na sokalou dina?

¹⁰ De dua era na lomatarotarotaka na wekamuni, na tiko tikivi kemuni, kei ira oni vuli vata na nomuni vakatulewataka mo ni qaravi Jiova. De dua era na vakatarogi kemuni, ra qai via kila tale ga nomuni vakabauta. Mo ni sauma vakacava? Ena vinakati mo ni vakasamataka mada se cava a va kina ya na nomuni rai, kei na lomamuni, mo ni rawa ni vakamacalataka kina na vuna oni vakatulewa kina va qori. Ena yaga sara ga mo ni muria na ivakaraitaki vinaka i Jisu ni oni sauma na taro me baleta nomuni vakabauta.

¹¹ Ena gauna era vakatarogi Jisu kina o ira na Jiu era iliuliu ni lotu me baleta na veivakaturi, a cavuta e dua na tikinivolatabu era sega ni bau vakasamataka tu. (Lako 3:6; Maciu 22:​23, 31-​33) Ni tarogi koya e dua na Vunivola me baleta na ivakaro levu duadua, a vakamacalataka vua o Jisu e so na tikinivolatabu veiganiti. A qai vakavinavinakataki Jisu. (Vunau 19:18; Vkru. 6:5; Mari. 12:​28-​34) Dua na gauna, “a ra sa veiletitaki koya na lewe vuqa” ena maqosa ni nona veivakavulici kei nona vakayagataka na iVolatabu, ra sega kina ni cakava rawa vua e dua na ka na nona meca. (Joni 7:​32-​46) Mo ni vakayagataka gona na iVolatabu ni oni sauma na taro me baleta nomuni vakabauta, qai vakamacala “ena yalomalumalumu kei na veidokai.” (1 Pita 3:​15, NW) Ke oni sega ni kila na isaunitaro, tukuna ga vakadodonu qai kaya ni oni na lai vakekeli kina. Mo ni qai vakayagataka na Watch Tower Publications Index se na Watchtower Library ena CD-ROM ni oni vakekeli ena ulutaga ya. Ke oni vakavakarau vinaka, oni na ‘kila na ka mo ni kaya.’​—Kolo. 4:6.

12. Na cava mo ni kua ni yalolailai kina ni oni vakacacani?

¹² Oni na sega wale ga ni tarogi me baleta na nomuni vakabauta kei na nomuni vakatulewa mo ni qarava na Kalou. Kua ni guilecava ni lewa tu na vuravura qo o Setani na Tevoro, na meca ni Kalou. (Wilika 1 Joni 5:​19.) Ena tiko ga e so era na sega ni taleitaka se vakacaucautaki kemuni ena nomuni vakatulewa, era na tusaqati kemuni tale ga. So era na ‘vosavakacacataki kemuni,’ qai kena irairai nira na cakava tiko ga. (1 Pita 4:4) Ia mo ni nanuma tiko ni levu tale ga era dau vakacacani. Qori tale ga na ka a caka vei Jisu Karisito. A sega tale ga ni vulagi kina o Pita, ni a vola: “Oi kemudou sa lomani, kakua ni kidacala e na vuku ni rarawa katakata sa yaco me vakatovolei kemudou, me vaka sa yacovi kemudou na ka tani: ia dou reki ga, ni dou sa vakaivotavota talega e na veivakararawataki i Karisito; mo dou reki talega kina, e na reki vakaidina, ni na vakaraitaki ko koya e nai ukuuku.”​—1 Pita 4:​12, 13.

13. Cava meda marau kina na lotu vaKarisito ke da vakacacani?

¹³ E dodonu meda marau na lotu vaKarisito nida vosota na veivakacacani kei na veitusaqati. Na vuna? Ke da muria tiko na ivakatagedegede ni vuravura e lewa tu o Setani, ena taleitaki keda o vuravura qai sega ni cati noda ivakarau. A vakarota kina o Jisu: “Dou na ca, ni sa vosavakavinakataki kemudou na tamata kecega! ni ra sa kitaka vakakina ko ira na nodra qase vei ira na parofita vakailasu.” (Luke 6:​26) Nomuni vakacacani baleta na nomuni qaravi Jiova e vakaraitaka ni sega ni taleitaki kemuni o Setani kei na vuravura e lewa tu. (Wilika Maciu 5:​11, 12.) Dodonu gona mo ni marau ni oni “vakasewasewani e na vuku ni yaca i Karisito.”​—1 Pita 4:​14.

14. Na ka vinaka cava ena yaco ke da yalodina tiko ga vei Jiova nida vakacacani?

¹⁴ Kevaka oni yalodina tiko ga vei Jiova ni oni tusaqati, ena rawa ni yaco e va na ka vinaka. Oni na vakadinadinataki Jiova kei Jisu. Na nomuni yalodina ena vakayaloqaqataki ira na tacimuni lotu vaKarisito. De dua era na uqeti mera mai kilai Jiova o ira na tawavakabauta era raica nomuni vosota. (Wilika Filipai 1:​12-​14.) Ni oni vakila na nona dau vakayaloqaqataki kemuni o Jiova mo ni vosota na veivakatovolei, oni na qai lomani koya ga vakalevu.

Dola tu Vei Kemuni “na Katuba Levu”

15. Na “katuba levu” cava a dola tu vua na yapositolo o Paula?

¹⁵ A vola na yapositolo o Paula me baleta nona cakacaka vakaitalatala e Efeso: ‘Sa dola tu vei au e dua na katuba levu ni cakacaka.’ (1 Kor. 16:​8, 9, VV) Na katuba ya e vakaibalebaletaka ga na nona rawa ni vunautaka vakalevu na itukutuku vinaka ni Matanitu ni Kalou kei nona tubera e so tale ena koro ya mera tisaipeli. Nona curuma gona o Paula na katuba ya e lai tubera kina e levu mera vulica na veika baleti Jiova, ra qai sokalou vua.

16. Ena 1919 era curu vakacava na vo ni lumuti ina ‘dua na katuba e dola tu’?

¹⁶ Ena 1919 a “dolava” vei ira na vo ni lumuti o Jisu Karisito “e dua na katuba.” (Vkta. 3:8) Era mani curu ina katuba qori ra qai gumatua sara ena kena vunautaki na itukutuku vinaka kei na veivakavulici ena ka dina ni vakatauvatani kei na veigauna sa oti. Na cava e rawati ena nodra cakacaka vakaitalatala? Sa vunautaki na itukutuku vinaka ena veiyasa i vuravura. Sa ra mai nuitaka kina e rauta ni vitu na milioni na bula tawamudu ena vuravura me vaka e yalataka na Kalou.

17. Oni na curu vakacava ina ‘katuba levu ni cakacaka’?

¹⁷ Se dola tiko ga vei ira na dau sokaloutaki Jiova ‘e dua na katuba levu ni cakacaka.’ Era marau vakalevu ra qai lomavakacegu o ira na curu tiko kina, ra sa qai vunautaka ga vakalevu na itukutuku vinaka. Kemuni ra gone oni qaravi Jiova tiko, oni mareqeta beka vakalevu nomuni itavi uasivi, oya mo ni tubera e so tale mera “vakabauta nai tukutuku-vinaka”? (Mari. 1:​14, 15) Oni bau vakasamataka tu mo ni painia tudei se painia veivuke? De dua, oni na rawa ni tara Kingdom Hall, veiqaravi e Peceli, daukaulotu, kei na so tale. Ni sa vakalekalekataki na gauna ena vuravura i Setani, sa qai bibi ga ena gauna qo meda vakaitavi ena cakacaka e vauca na Matanitu ni Kalou. Oni na curu beka ina “katuba levu” ya ni se vo na gauna?

“Tovolea Mada ka Raica ni sa Yalovinaka ko Jiova”

18, 19. (a) Na cava e uqeti Tevita me qaravi Jiova mai vu ni lomana? (b) Eda kila vakacava ni sega ni bau veivutunitaka o Tevita nona qaravi Jiova?

¹⁸ A uqeti vakalou na daunisame me sureta e so tale mera “tovolea mada ka raica ni sa yalovinaka ko Jiova.” (Same 34:8) Ni se gone o Tui Tevita e Isireli makawa, a taqomaki koya o Jiova mai vei ira na manumanu kila ena gauna a vakatawa sipi tiko kina. A tokoni koya na Kalou ena gauna a vala kina kei Kolaiaci, taqomaki koya tale ga ena levu tale na gauna a donumaka kina na leqa. (1 Sam. 17:​32-​51; Same 18, ivakamacala taumada) Uqeti koya sara ga na yalololoma i Jiova, mani vola kina: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami: e dredre me wiliki vakadodonu vei kemuni.”​—Same 40:5.

¹⁹ Ni toso na gauna sa qai lomani Jiova ga vakalevu o Tevita, qai vinakata me vakacaucautaki Jiova mai vu ni lomana, kei na nona vakanananu kece. (Wilika Same 40:​8-​10.) Sega vakadua ni bau veivutunitaka o Tevita nona qarava vakatabakidua na Kalou dina. E ka talei dina vua nona sokalou, qai sega ni vakatauvatani rawa na levu ni nona marau. A qai vola o koya ena gauna sa qase kina: “Ni sai kemuni ga, na Turaga Jiova, ka’u sa nuinui tiko kina: oi kemuni ga ka’u a vakararavi kina ni’u a cauravou ka yacova na gauna oqo. Oqo talega, ni ka’u sa qase ka sika mai, mo ni kakua ni laivi au na Kalou.” (Same 71:​5, 18) Ena gauna mada ga sa malumalumu kina o Tevita, sa qai dei ga nona nuitaki Jiova, rau sa qai veivolekati ga vakalevu.

20. Na cava e bula vinaka duadua kina na noda qaravi Jiova?

²⁰ E vakadinadinataki ena nodratou bula o Josua, Tevita kei Timoci ni bula vinaka duadua na noda qaravi Jiova. Ke da qara na cakacaka vinaka qai saulevu ena vuravura qo, eda na rawaka kina ia ena sega ga ni dei. Ena yasana adua, ena yaga tawamudu na noda ‘qaravi Jiova ena lomada kei na yaloda taucoko.’ (Josua 22:5) Ke da se bera ni yalataki keda vei Jiova ena masu, e vinaka meda taroga, ‘Na cava au se sega tiko kina ni iVakadinadina i Jiova?’ Ke da sa papitaiso oti qai qaravi Jiova tiko ena gauna qo, eda vinakata beka me vakaikuritaki na marau eda vakila tiko? Meda vakarabailevutaka gona noda cakacaka vakaitalatala, meda qai toso tiko ga vakayalo. Ena qai vakamacalataki ena ulutaga e tarava na sala meda na cakava kina na veika qori ena noda vakatotomuria na ivakaraitaki ni yapositolo o Paula.

O na Sauma Vakacava?

• Vakamacalataka e rua na vuna meda qaravi Jiova kina.

• Na cava e uqeti Timoci me vakatulewataka me qaravi Jiova?

• Cava meda dei tiko ga kina ke da vakacacani?

• Na tabana ni veiqaravi cava vei Jiova oni na rawa ni vakaitavi kina?

[iYaloyalo ena tabana e 18]

E bula vinaka duadua na qaravi Jiova

[iYaloyalo ena tabana e 19]

Oni rawa beka ni sauma na taro me baleta na nomuni vakabauta?