Taro na Dauwiliwili

E tukuna na yapositolo o Paula nira na “vakabulai ko ira kecega na Isireli.” (Roma 11:26) E tukuna tiko beka nira na tavuki kece na Jiu mera lotu vaKarisito?

Sega, a sega ni tukuna tiko qori o Paula. Vakamatanitu, era cakitaka na kawa i Eparama ni Mesaia o Jisu. Ni mate oti o Jisu sa qai matata nira na sega ni tavuki kece na Jiu mera lotu vaKarisito. Ia, e se dina tiko ga na ka a kaya o Paula nira na “vakabulai ko ira kecega na Isireli.” Ena sala cava?

A tukuna o Jisu vei ira na iliuliu ni lotu Jiu ena nona gauna: “Na kau tani mai vei kemudou na matanitu ni Kalou, ka me soli ki na dua na matanitu e vuataka mai na vuana.” (Maciu 21:​43, VV) Ni a sega ni taleitaki Jisu na matanitu o Isireli, mani digitaka tale o Jiova e dua na matanitu vou era lumuti ena Yalo Tabu na lewena. E vakatokai ira o Paula mera “Isireli ni Kalou.”​—Kala. 6:​16.

So tale na ivakamacala ena iVolatabu vaKirisi vaKarisito e vakadeitaka nira lewe ni “Isireli ni Kalou” o ira na lotu vaKarisito lumuti era le 144,000. (Roma 8:​15-​17; Vkta. 7:4) Na ilawalawa qori ra okati tale ga kina na sega ni Jiu, vakadeitaki qori ena Vakatakila 5:​9, 10, VV, nira gole “mai vei ira kece ga na veiyavusa, duivosavosa, kei na veimatanitu” o ira na lotu vaKarisito lumuti. Era digitaki vakatabakidua na Isireli vakayalo mera “dua na matanitu vakabete . . .  ka ra na veiliutaki e vuravura.” Dina ni sa sega ni vakadonui ira na Isireli o Jiova mera matanitu digitaki, ia se rawa tiko ga ni vakadonui ira yadudua. Qori sara ga na sala era digitaki kina na yapositolo kei na levu tale na lotu vaKarisito taumada. E macala gona ni gadrevi mera voli tale ga ena dra talei i Jisu Karisito o ira na Jiu qori me vakataki keda ga.​—1 Tim. 2:​5, 6; Iper. 2:9; 1 Pita 1:​17-​19.

E dina ni levu na Jiu vakayago ena imatai ni senitiuri era sega ni vakalougatataki mera lai veiliutaki kei Jisu, ia a sega ni vakaseva na inaki taumada ni Kalou. Ena sega ni vakadaroi na inaki i Jiova, ni a tukuna vei Aisea nona parofita: “Ena vaka talega kina noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u tala kina.”​—Aisea 55:11.

Salavata qori kei na nona inaki na Kalou mera lai veiliutaki kei luvena i lomalagi e le 144,000. Vakamatatataka na iVolatabu ni na lumuti ira kece na 144,000 na Kalou. Era na tiko kece!​—Vkta. 14:​1-5.

Koya gona, ni vola o Paula nira na “vakabulai ko ira kecega na Isireli,” a sega ni parofisaitaka tiko nodra tavuki kece na Jiu mera lotu vaKarisito. Ia, a tukuna tiko ga kena vakayacori na inaki ni Kalou ena nodra digitaki na 144,000 na Isireli vakayalo mera lai veiliutaki kei na luvena, o Jisu Karisito, e lomalagi. Ena nona gauna lokuci, era na vakabulai na iwiliwili kece​—“ira kecega na Isireli”—era veiqaravi vakatui, ra bete tale ga ena Matanitu vakaMesaia.​—Efeso 2:8.

[iYaloyalo ena tabana e 28]

Era digitaki “mai vei ira kece ga na veiyavusa, duivosavosa kei na veimatanitu” o ira na lumuti