“Na Kalou, O Koya sa Vakatubura”!

“Sa qai ka wale kina ko koya sa tea, kei koya sa vakasuasuataka; ia sa levu duaduaga na Kalou, o koya sa vakatubura.”​—1 KOR. 3:7.

1. Eda ‘cakacaka vata kei na Kalou’ ena sala cava?

‘EDA sa cakacaka vata kei na Kalou.’ Qori sara ga na ka e vakamacalataka na yapositolo o Paula me baleta na itavi dokai eda rawa ni marautaka kece. (Wilika 1 Korinica 3:​5-9.) Oya na cakacaka ni nodra vakavulici o ira na so tale mera tisaipeli. E vakatauvatana o Paula ina kena kaburaki qai vakasuasuataki na sorenikau se itei. Ia, eda na gadreva na veidusimaki i Jiova me vuavuaivinaka kina na noda cakacaka. E kaya o Paula meda nanuma tiko ni na qai ‘vakatubura ga na Kalou.’

2. Na noda kila ni na ‘vakatubura ga na Kalou,’ ena uqeti keda vakacava me donu tiko ga noda rai me baleta na cakacaka vakaitalatala?

² Na noda kila na itavi ni Kalou ena uqeti keda me donu tiko ga na noda rai me baleta na cakacaka vakaitalatala. De dua eda na gumatua sara ena vunau kei na veivakavulici, ia ena tini lagiti duadua ga o Jiova ena tubu e rawati kina. Na vuna? Eda sega ni kila na veika e okati ena nona tubu vakayalo e dua me lai tisaipeli sara, eda sega tale ga ni lewa, dina nida na rairai saga ena noda igu kece meda kila. Vola kina o Tui Solomoni: “Ko sa sega ni kila na cakacaka ni Kalou ko koya sa bulia kecega.”​—Dauv. 11:5.

3. Erau tautauvata vakacava na tei ni sorenikau kei na nona tuberi e dua me tisaipeli?

³ E vakatuburarawa beka noda cakacaka nida sega ni kila na veika e okati ena nona tubu vakayalo e dua? Sega. Ena veiuqeti ga qai veivakurabuitaki. Kaya o Solomoni: “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco, se na ka oqo se na ka ko ya, se na vinaka vakatautauvata ruarua.” (Dauv. 11:6) E dina taucoko qori, nida tea e dua na sorenikau eda na sega ni kila ke na tubu se sega, kei na vanua ena tubu kina. Eda na sega ni lewa rawa na veika e dau yaco. E vaka tale ga ya na noda tuberi ira e so mera tisaipeli. E vakamacalataka qori o Jisu ena rua na ivakatautauvata ena ika4 ni wase ni Kosipeli i Marika. Meda vuli mada ena rua na ivakatautauvata qo.

Duidui Qele

4, 5. Vakamacalataka vakalekaleka na ivakatautauvata i Jisu me baleta na dauteitei e kaburaka na sorenikau.

⁴ E vakamacalataka o Jisu ena Marika 4:​1-9, [VV] nona kaburaka na dauteitei na sorenikau ena duidui vanua: “Ni rogoca mada! E a la’ki kabukaburaki e dua na dauteitei. Ni sa kabukaburaki voli, e a qai lutu e so na sore ni kau e na tutu ni sala, ka ra lako mai na manumanu vuka ka kania. Era a lutu e so tale e na vanua veivatu, ka sega soti ni levu kina na qele, ka ra sa tubu cake sara vakatotolo, ni sega soti ni vavaku na kena qele. Ni sa cabe na siga era sa malai mai, ia ni sa sega na wakadra era sa raqosa sara. E a lutu e so tale e na maliwa ni veiwavakavotona, ka ra sa tubu cake na veiwavakavotona ka vakaruguti ira, ka ra mani sega kina ni vua. Ia a lutu e so tale e na qele vinaka, era a tubu cake me levu mai ka mani yaco me ra vua, ka sa vua i tolusagavulu e so, ka onosagavulu e so, ka mani drau sara e so.”

⁵ Ena gauna vakaivolatabu e dau kaburaki ga yani ina qele na sorenikau ni caka na teitei. Ena ologa na sorenikau ena ilobi ni nona isulu o koya na dauteitei se tawana ena dua na bilo, oti qai kaburaka yani. Ena ivakatautauvata qo, e sega ni digia na qele me lai kaburaka kina na sorenikau. Ia a kakaburaki ga ena duidui vanua.

6. E vakamacalataka vakacava o Jisu na ivakatautauvata me baleta na dauteitei?

⁶ E sega ni gadrevi meda vatavatairalagotaka na ibalebale ni vakatautauvata qo. E vakamacalataka o Jisu ena Marika 4:​14-​20, [VV] na kena ibalebale: “Sa kaburaka na vosa ni Kalou na dauteitei. E so na tamata era vaka na sore ni kau ka kaburaki e na tutu ni sala; ni ra sa rogoca oti, sa qai lako sara mai ko Setani ka kauta tani na vosa ka a kaburaki vei ira. E vaka kina na kena ka ra kaburaki e na vanua veivatu, ni ra sa rogoca na vosa era sa vakabauta sara e na reki; ia me vaka ni sega na wakadra e lomadra, era mani tu dei vakalailai ga. Ia, ni sa qai tubu na rarawa se na veivakacacani e na vuku ni vosa, era sa tarabe sara. E so tale ka kaburaki e na veiwavakavotona sa i ira ka ra rogoca na vosa, ia sa qai curu yani na lomaocaoca ni vuravura oqo, na domona na i yau, kei na veimataqali gagadre tale e vuqa, ka vakaruguta na vosa ka sega kina ni vua. Ia na kena ka ra kaburaki e na qele vinaka, sa i ira ka ra sa rogoca na vosa, ka vakabauta, ka ra la’ki vua sara; e tolusagavulu e so, ka onosagavulu e so, ka mani drau sara e so.”

7. E vakaibalebaletaki ina cava na sorenikau, kei na duidui qele?

⁷ Sega ni tukuna o Jisu ni duidui na sorenikau a kaburaki se tei. Ia a tukuna ni dua ga na mataqali itei e kaburaki ena duidui qele, duidui tale ga na ka e yaco kina. Na imatai ni qele e kaukaua se vavaku vinaka, na kena ikarua e mamare, kena ikatolu e tubu tu kina na wavakavotona, ia e qele vuavuaivinaka sara na kena ikava. (Luke 8:8) E vakaibalebaletaki ina cava na sorenikau se itei? Qori na itukutuku me baleta na Matanitu, e kune ena Vosa ni Kalou. (Maciu 13:19) E tukuni cei tiko na duidui qele? E vakaibalebaletaki vei ira na tamata kei na duidui ituvaki ni lomadra.​—Wilika Luke 8:​12, 15.

8. (a) O cei na dauteitei? (b) Na cava e duidui kina na ka ra cakava na tamata nira rogoca na vunautaki ni Matanitu?

⁸ O cei na dau kakaburaki se dauteitei? E vakaibalebaletaki qori vei ira na cakacaka vata kei na Kalou, era ogataka na vunautaki ni Matanitu ni Kalou. Era tea ra qai vakasuasuataka tale ga, me vakataki rau ga o Paula kei Apolosa. Dina nira cakacaka vakaukaua, ia a sega ga ni tautauvata na ka e yaco. Na vuna? Ni duidui na ituvaki ni lomadra na rogoca na itukutuku vinaka. Ena ivakatautauvata qori a sega ni lewa rawa na dauteitei na veika a qai yaco. E veivakacegui dina qo, vakauasivi vei ira na mataveitacini yalodina era veiqaravi voli ena dua na gauna balavu, e so ena vicasagavulu sara na yabaki, ia kena irairai ni vua ga vakalailai nodra cakacaka!a Cava beka na vuna?

9. Na itukutuku veivakacegui cava rau a vakabibitaka o Paula kei Jisu?

⁹ Na nona yalodina e dua na dauteitei ena sega ni vakatau ena ka e rawata ena nona cakacaka. Tukuna o Paula: “E na dui taura na tamata yadua na kena i sau me vaka na nona cakacaka.” (1 Kor. 3:​8, VV) Na kena isau ena vakatau tiko ena ka e cakava sara ga, sega ni ka e rawata ena cakacaka ya. Qori tale ga na ka a vakabibitaka o Jisu vei ira nona tisaipeli nira lesu mai ena dua na ilakolako vakavunau. Dua na ka nodratou marau ni ratou vakamalumalumutaki ira na timoni ena yaca i Jisu. Dina ni veiuqeti na ka e yaco, ia e kaya ga vei ratou o Jisu: “Mo ni kakua ni reki e na ka oqo, ko ya e na nodra sa gu ce vei kemuni ko ira na yalo, ia mo ni reki ga ni sa volai tu na yacamuni mai lomalagi.” (Luke 10:​17-​20, VV) Kevaka mada ga e raica na dauteitei ni sega ni levu na ka e rawata, sega ni kena ibalebale ya ni a vakawaletaka nona cakacaka, se ni lailai nona vakabauta ni vakatauvatani kei ira na so tale. Na ka e rawati ena vakatau tiko vakalevu ena ituvaki ni lomadra na vakarorogo. Ia ena qai vakatubura ga o Jiova!

Nodra iTavi na Rogoca na Vosa

10. Ena kilai vakacava ke vaka na qele vinaka o koya e rogoca na vosa?

¹⁰ Vakacava mada o ira na vakarorogo? Sa lewai oti beka na ivakarau ni nodra vakarorogo? Sega. Ena vakatau sara ga vei ira na nodra via vaka na qele vinaka se sega. Ena rawa ni veisau na ivakarau ni lomana e dua. (Roma 6:​17) Kaya o Jisu ena nona ivakatautauvata ‘ni oti ga nodra rogoca’ na vosa, a qai kauta tani o Setani. Ia sega ni dodonu me yaco qori. Era uqeti na lotu vaKarisito ena Jemesa 4:7 mera “vorata na tevoro,” ena qai drotani o koya. Vakamacalataka tale ga o Jisu nira a taleitaka taumada na vosa e so, ia era tarabe tale ni ‘sega ni vakawakana e lomadra.’ Ena yasana adua, era uqeti na dausokaloutaki Jiova mera “vakawakana ka tauyavutaki” mera kila kina na “kena raraba, kei na kena balavu, kei na kena titobu, kei na kena cecere: ka mo dou kila na loloma i Karisito, o koya sa uasivi cake e na ka e kilai rawa.”​—Efeso 3:​17-​19; Kolo. 2:​6, 7.

11. Ena valuti vakacava na kena lai vakaruguta na vosa, na lomaocaoca kei na domona na iyau ni vuravura qo?

¹¹ E so tale era rogoca na vosa, ia e lai vakaruguta na vosa na nodra oga ena “lomaocaoca ni vuravura oqo, na domona na i yau.” (1 Tim. 6:​9, 10) Era na valuta vakacava na leqa qori? E sauma na yapositolo o Paula: “Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya, Au na sega sara ni biuti iko, se vakalaivi iko.’ ”​—Iper. 13:5.

12. Na cava e duidui kina na ka era rawata o ira na vaka na qele vinaka?

¹² Sa qai vakamacalataka o Jisu ni o ira era kaburaki ena qele vinaka era “vuai tolusagavulu eso ka onosagavulu eso, ka mani drau eso.” E so era taleitaka na vosa era rogoca, vinaka tale ga na ituvaki ni lomadra ra qai vua, ia e duidui na ka era rawa ni cakava ena nodra vunautaka na itukutuku vinaka, qai vakatau ena kedra ituvaki. Kena ivakaraitaki, ena rairai lailai ga na nodra cakacaka vakavunau o ira na itabaqase, se o ira na malumalumu ena vuku ni tauvimate. (Vakatauvatana Marika 12:​43, 44.) Me vakataki koya ga na dauteitei, ena sega ni cakava rawa kina e dua na ka, ia e marau ni raica nona vakatubura o Jiova.​—Wilika Same 126:​5, 6.

Na Dauteitei e Moce

13, 14. (a) Vakamacalataka vakalekaleka na ivakatautauvata i Jisu me baleti koya e kaburaka na sorenikau. (b) O cei na dauteitei? E vakaibalebaletaki ina cava na sorenikau?

¹³ Dua tale na ivakatautauvata me baleta na dauteitei e tukuni ena Marika 4:​26-​29, [VV]: “Na matanitu ni Kalou sa vaka e dua na tamata e kaburaka na sore ni kau e na nona tiki ni qele. Sa la’ki moce ena bogi ka yadra ka veilakoyaki voli e na siga, ia e na gauna kece ko ya sa rovu ka tubu tiko ga kina na kau, ia na kena yaco tiko na ka oqo e sega ni kila ko koya. Ni sa vakavuna ga vakai koya na qele me tubu ka vua na kau: e na liu taumada na drauna, ka tarava na sena, qai muri na vuana. Ia ni sa matua mai na vuana, sa vakayagataka sara ko koya na kena i sele, ni sa gauna ni tatamusuki.”

¹⁴ O cei na dauteitei qo? So na lewe ni lotu ni Veivanua vaKarisito era vakabauta ni tukuni tiko e ke o Jisu. Ia, rawa vakacava ni tukuni ni moce o Jisu qai sega ni kila se tubu vakacava na sorenikau? Macala ga ni na kila vinaka o Jisu na veika e okati ena kena tubu tiko! Na dauteitei qo e vakataki koya ga a tukuni taumada, e vakaibalebaletaki ira yadudua na dautukutuku ni Matanitu ni Kalou, era gumatua na kaburaka na itei​—oya na Matanitu​—ena nodra cakacaka vakavunau. Na sorenikau e kaburaki ena qele e vakaibalebaletaka na vosa era vunautaka tiko.b

15, 16. Na cava e vakamacalataka o Jisu ena ivakatautauvata ni daukakaburaki, me baleta na tubu ni sorenikau kei na nona tubu vakayalo e dua?

¹⁵ E kaya o Jisu ni “la’ki moce ena bogi ka yadra ka veilakoyaki voli e na siga” na dauteitei. E sega ni kena ibalebale ya ni vakawelewele na dauteitei, ia na ka ga e tukuna tiko o Jisu ni qori na bula sa ra matau tu kina e levu. E vakaraitaki ena vosa e vakayagataki e ke ni sa kena ivakarau tu ga mera dau yadra tiko nira cakacaka ena siga, ra qai moce ena bogi. A vakamacalataka o Jisu na veika e yaco ena gauna qori. E kaya, ‘Sa rovu ka tubu tiko ga na sorenikau.’ Mani tukuna tale o Jisu: “Na kena yaco tiko na ka oqo e sega ni kila ko koya.” E vakabibitaki gona e ke ni tubu ga “vakai koya” na sorenikau.c

¹⁶ Na cava na ibalebale ni vosa i Jisu? E vakabibitaka o koya na kena tubu na kau kei na veitaravi ni ka e yaco. “Ni sa vakavuna ga vakai koya na qele me tubu ka vua na kau: e na liu taumada na drauna, ka tarava na sena, qai muri na vuana.” (Mari. 4:​28, VV) E tubu gona vakamalua, qai veitaravi na ka e yaco kina. E sega ni rawa ni vakatotolotaki na ivakarau ni kena tubu. E va tale ga qori na tubu vakayalo. Era veitaravi na ivakatagedegede me na rawata e dua ena gauna e vakatubura tiko kina o Jiova na ka dina, ena lomadra era vinakata na bula.​—Caka. 13:48; Iper. 6:1.

17. O cei ena marau ni vua na sore ni ka dina?

¹⁷ Ni sa ‘matua na vuanikau,’ ena vakaitavi vakacava na dauteitei ena kena tamusuki? Ena gauna e uqeta kina o Jiova me tubu na sore ni ka dina ena lomadra na tisaipeli vou, era na qai lomani koya, ra yalataka vua nodra bula. Era na vakaraitaka qori ena nodra papitaiso. Era na qai vakacolati ena so na itavi ena ivavakoso o ira na tacida tagane era toso tiko ga vakayalo. Ena tamusuka gona na vua ni Matanitu ni Kalou o koya a teitei se kakaburaki taumada, kei na so tale na dautukutuku, dina nira a rairai sega ni vakaitavi ena kaburaki ni sorenikau. (Wilika Joni 4:​36-​38.) E macala ga ni rau na marau se ‘reki vata o koya e kaburaka kei koya e tamusuka.’

Na Ka Eda Vulica Nikua

18, 19. (a) E uqeti iko vakacava na kena railesuvi na ivakatautauvata e cavuta o Jisu? (b) Na cava ena veivosakitaki ena ulutaga e tarava?

¹⁸ Na cava eda sa vulica nida railesuva na rua na ivakatautauvata ena Marika wase 4? E matata vakasigalevu ni tiko na noda itavi​—oya meda kakaburaki. Me kua mada ga ni tarova na noda cakacaka na ituvaki dredre e dau yaco, se dua tale na iulubale. (Dauv. 11:4) Eda kila tale ga na itavi dokai eda vakalougatataki kina meda cakacaka vata kei na Kalou. E vakavuna na tubu vakayalo o Jiova ni vakalougatataka na noda gumatua kei na nodra sasaga na tataleitaki. Eda kila tale ga nida sega ni rawa ni vakusa nona toso vakayalo e dua. Meda kua ni yalolailai ke berabera nona toso vakayalo e dua se lekata e so na ka. E veivakacegui dina noda kila ni bibi ga meda yalodina vei Jiova kei na itavi dokai ni kena vunautaki “na i Tukutuku Vinaka ni matanitu . . . me i vakadinadina ki na veivanua kece ga.”​—Maciu 24:​14, VV.

¹⁹ Na cava tale e vakavulica o Jisu me baleta na nodra tubu se toso vakayalo na tisaipeli vou kei na vunautaki ni Matanitu ni Kalou? Ena saumi na taro qori ena ivakatautauvata era volai tu ena Kosipeli. Eda na qai veivosakitaka ena ulutaga e tarava.

[iVakamacala e ra]

O se Nanuma?

• Na cava so erau tautauvata kina na kaburaki ni sorenikau kei na vunautaki ni itukutuku ni Matanitu ni Kalou?

• E raica vakacava o Jiova na nona yalodina e dua na dauvunau ni Matanitu ni Kalou?

• Me vaka e vakabibitaka o Jisu, erau tautauvata vakacava na tubu vakayago kei na tubu se toso vakayalo?

• Erau “reki vata” vakacava “ko koya sa kaburaka kei koya sa tamusuka”?

[iYaloyalo ena tabana e 13]

Na cava e vakatauvatana kina o Jisu, e dua na dauvunau ni Matanitu ni Kalou ina daukakaburaki sorenikau?

[iYaloyalo ena tabana e 15]

Na qele vinaka e vakaibalebaletaki ira na vunautaka na Matanitu ni Kalou ena nodra igu kece, qai vakatau ena kedra ituvaki

[iYaloyalo ena tabana e 16]

E vakatubura tiko ga na Kalou