O Jiova e Lomani Ira na ‘Vua Tiko ena Vosota’

1, 2. (a) E uqeti keda vakacava na nodra ivakaraitaki na dau vunau ena yalava e sega ni vuavuaivinaka? (Raica na imatai ni iyaloyalo.) (b) Na cava e kaya o Jisu me baleta na vunau ena “nona vanua”? (Raica na ivakamacala e ra.)

RAU painia tiko na veiwatini o Sergio kei Olinda e Merika, rau sa yabaki 80 vakacaca. Dua tiko ga na gauna qo, dau dredre sara ga nodrau veitosoyaki ena momosi ni yavadrau. Ia me vaka ga rau sa cakava tiko mai ena vica vata na yabaki, rau dau taubale ena veimataka ena dua na vanua osooso e tauni ena vitu na kaloko. Tiko na vanua rau dau lai duri kina ena ikelekele ni basi me rau soli ivola vakaivolatabu vei ira na tavali. Levu era dau sega ni kauaitaki rau, ia rau duri toka ga e kea, rau matadredredre vei ira. Ni sa sigalevu tutu rau na taubale lesu i vale. Na mataka ga e tarava rau sa baci tiko tale ena vanua qori ena vitu na kaloko. Rau vakaitavi vakalevu na veiwatini yalodina qo ena vunautaki ni itukutuku ni Matanitu ni Kalou me tekivu na ono na mataka e veimacawa, rau qai cakava tiko qori ena veiyabaki.

² Me vakataki Sergio ga kei Olinda, levu na tacida yalodina e veiyasa i vuravura era vunau tiko me vica vata na yabaki ena yalava e sega ni vuavuaivinaka. Ke oni sotava tale tiko ga qori, oni vakavinavinakataki ena nomuni dauvosota.a Nomuni yalodina na qaravi Jiova e vu ni veivakayaloqaqataki vei ira e levu—vei ira mada ga na tacida era sa dede tu ena dina. Qo na ka era kaya eso na ivakatawa ni tabacakacaka: “Niu tomani ira na tacida yalodina ena cakacaka vakaitalatala, e uqeti au dina na nodra ivakaraitaki.” “E uqeti au na nodra yalodina meu dau vosota, meu yaloqaqa tale ga ena noqu cakacaka vakaitalatala.” “E vakamarautaki au nodra ivakaraitaki.”

3. Na tolu na taro cava eda na veivosakitaka?

³ Me rawa nida dei tiko ga ena noda sasaga meda vakacavara na cakacaka vakavunau e lesi keda kina o Jisu, meda dikeva mada na isau ni tolu na taro qo: Na cava eda dau yalolailai kina? Eda na rawa ni vua vakacava? Eda na vua tiko ga vakacava ena vosota?

NA CAVA EDA DAU YALOLAILAI KINA?

4. (a) Na cava nona rai o Paula ena nodra sega ni vakarorogo na Jiu? (b) Cava e va kina qori nona rai?

⁴ Ke o dau yalolailai ni o vunau tiko ena yalava e sega ni vuavuaivinaka, o na kila vinaka na ka e sotava na yapositolo o Paula. Ena nona cakacaka vakaitalatala me voleka ni 30 na yabaki, e vukea e levu mera tisaipeli i Karisito. (Caka. 14:21; 2 Kor. 3:2, 3) Ia a sega ni rawai ira e levu na Jiu mera dausokalou dina. Nira sega ga ni via rogoci koya, so tale era vakacacani koya. (Caka. 14:19; 17:1, 4, 5, 13) Ia na cava nona rai o Paula me baleti ira na Jiu qori? E vakatusa: “O yau na imuri i Karisito . . . niu rarawa vakalevu qai mosi tu ga na lomaqu.” (Roma 9:1-3) Cava e va kina qori nona rai o Paula? E vu mai lomana na nona cakacaka vakavunau. E vunau vei ira na Jiu ni kauaitaki ira dina. E rarawataka gona nira cata na yalololoma ni Kalou.

5. (a) Na cava ena uqeti keda meda vunau? (b) Cava eda dau yalolailai kina ena so na gauna?

⁵ Me vakataki Paula, eda vunau tale ga nida kauaitaki ira dina na lewenivanua. (Maciu 22:39; 1 Kor. 11:1) Na vuna? Eda sa vakadinadinataka na nodra vakalougatataki vakalevu o ira na vakatulewataka mera qaravi Jiova. Nida vakasamataki ira gona na tiko ena noda yalava, eda na kaya lo ga, ‘Au diva meu vukei ira mera raica na veika talei qo!’ Eda na uqeti ira tiko ga mera vulica na ka dina me baleti Jiova kei na nona inaki vua na kawatamata. Eda sa kaya sara tiko ga vei ira eda vunau kina: ‘Qo e dua na nomuni iloloma totoka. Nuitaka ni oni na taleitaka.’ Nira cata na iloloma qori, sa rauta meda “rarawa vakalevu.” Sega ni kena ibalebale ni lailai noda vakabauta, ia e vakavotuya ga ni vu sara tiko ga mai lomada na noda cakacaka vakavunau. Nida yalolailai gona eda na vosota tiko ga. Eda na duavata kei Elena, sa painia tu me sivia ni 25 na yabaki ena nona kaya: “E dredre na cakacaka vakavunau. Ia qo ga na cakacaka au via cakava.”

EDA NA RAWA NI VUA VAKACAVA?

6. Na taro cava eda na dikeva, eda na veivosakitaka vakacava?

⁶ Na cava eda kaya kina ni rawa ni vuavuaivinaka na noda cakacaka vakaitalatala se mani yalava cava eda vunau kina? Meda sauma na taro bibi qori, meda dikeva mada e rua na nona vosa vakatautauvata o Jisu, e vakamacalataki kina ni bibi meda “vua.” (Maciu 13:23) Kena imatai e baleta tiko na vaini.

7. (a) E dusi cei tiko na “ivakatawaniwere,” “na vaini” kei na “tabana”? (b) Na taro cava me saumi?

⁷ Wilika Joni 15:1-5, 8. Dikeva mada na ka e tukuna o Jisu vei ratou na nona yapositolo: “E vakalagilagi o Tamaqu ke dou vua tiko ga vakalevu, dou qai vakaraitaka ni dou noqu tisaipeli.” E kaya o Jisu ni o Jiova e “ivakatawaniwere,” o ira nona tisaipeli mera “tabaqu”b qai tukuna ni o koya “na vaini dina.” Na cava gona mera vuataka na imuri i Karisito? Ena ivakatautauvata qo, e sega ni tukuna o Jisu na ka ena vuataki, ia e vakamacalataka ga e dua na itukutuku bibi eda na kila kina na kena isau.

8. (a) Ena vosa vakatautauvata eda sa raica mai, na cava e sega ni dusi ira kina na tisaipeli vou na ka e vuataki? (b) Ena yavutaki ena cava na nona veivakadonui o Jiova?

⁸ Ni vakamacalataki Tamana tiko o Jisu, e kaya: “Na tabaqu kece e sega ni vua e kauta laivi o koya.” Kena ibalebale, o Jiova ena qai vakadonui keda ga meda nona dauveiqaravi ke da vua. (Maciu 13:23; 21:43) Ena ivakatautauvata gona qori, na ka e dodonu meda vuataka e sega ni dusi ira tiko na tisaipeli vou e rairai noda itavi dokai meda vakavulici ira. (Maciu 28:19) Ke dina qori, ena tukuni ni o ira na tacida yalodina era sega ni kunea e levu na tataleitaki ena yalava e sega ni vuavuaivinaka, era vaka na tabanikau e sega ni vua ena ivakatautauvata i Jisu. Ia qori na rai cala! Na vuna? Nida sega ni rawa ni vakasaurarataka e dua me tisaipeli. Ni Kalou yalololoma, ena yavutaki nona veivakadonui ena ka eda rawa ni cakava. Ena lesi keda ga o Jiova meda cakava na ka e kila nida na rawata.—Vkru. 30:11-14.

9. (a) Na cakacaka cava e laurai kina nida vua tiko ga? (b) Na vosa vakatautauvata cava eda na dikeva, na vuna?

⁹ Na cava gona na ka meda vuataka? Matata vinaka ni qo e dusia tiko na cakacaka eda rawa ni dui cakava. Na cakacaka cava e laurai kina nida “vua” tiko ga? Na vunautaki ni itukutuku vinaka ni Matanitu ni Kalou.c (Maciu 24:14) E vakadeitaka qori na vosa vakatautauvata i Jisu me baleta na dauteitei. Meda dikeva mada na ikarua ni vakatautauvata.

10. (a) Ena ivakatautauvata qo, na cava e dusia na itei kei na qele? (b) Na cava ena vuataka na vuniwiti?

¹⁰ Wilika Luke 8:5-8, 11-15. Ena vosa vakatautauvata ni dauteitei, na itei se sorenikau e vakaibalebaletaki ina “vosa ni Kalou,” se itukutuku ni Matanitu ni Kalou. Na qele e dusia na loma ni tamata. Na itei e lutu ena qele vinaka, e kadre, vua sara me dua na vuniwiti. Oti e “qai vuaidrau.” Ia na cava e dau vuataka na vuniwiti? E vuataka na vuniwiti lalai? Sega, na itei vou ga, ena qai tubu me vuniwiti. Na ivakatautauvata gona qo, ni dua na itei e rawa ni drau na vuana. E yaga vakacava na ivakatautauvata qori ena nomu cakacaka vakaitalatala?

11. (a) E yaga vakacava na ivakatautauvata ni dauteitei ena noda cakacaka vakaitalatala? (b) Eda na vuataka vakacava na itei vou ni Matanitu ni Kalou?

¹¹ Eda rawa ni vakatauvatana va qo, kaya mada nira vunautaka vei keda na itukutuku vinaka me baleta na Matanitu ni Kalou eso na iVakadinadina se o ira na noda itubutubu lotu vaKarisito. Era na marau nira raica ni taleitaka na lomada na itukutuku ni Matanitu qori e vaka na itei. Me vaka ga ni dei toka na itei ena qele vinaka ena vosa vakatautauvata i Jisu, e va tale ga qori noda ciqoma na itukutuku vinaka. E kadre sara na itukutuku qori qai tubu me vaka e dua na vuniwiti, toso na gauna ena vua. Me vaka ga na vuniwiti ni sega ni vuataka na tabana vou, ni vuataka ga na itei vou. Eda na vuataka tale ga na itei vou ena Matanitu ni Kalou,d sega ni tisaipeli vou. Eda na vuataka vakacava na itei vou ni Matanitu ni Kalou? Na gauna kece eda vunautaka kina na itukutuku ni Matanitu, e vaka ga nida kaburaka tiko na itei ni ka dina a tei e lomada. (Luke 6:45; 8:1) Eda vulica gona ena ivakatautauvata qo, ke da vunautaka tiko ga na itukutuku ni Matanitu, eda na ‘vua tiko ga ena vosota.’

12. (a) Na cava eda vulica ena vosa vakatautauvata i Jisu me baleta na vaini kei na dauteitei? (b) E uqeti iko vakacava?

¹² Na cava eda vulica ena ivakatautauvata i Jisu me baleta na vaini kei na dauteitei? E uqeti keda meda kila ni sega ni vakatau tiko na noda vua ena nodra vakarorogo se sega na itaukeinivale ena yalava. Ia e baleta sara ga na noda yalodina. E tukuna tale ga qori o Paula ena nona kaya: “Ena vakaicovitaki na tamata yadua me vaka na ka e cakava.” (1 Kor. 3:8) Na icovi oya na ka eda cakava, sega ni ka e rawati ena cakacaka qori. E kaya o Matilda, sa 20 na yabaki nona painia voli: “E veivakacegui niu kila ni o Jiova e dau vakaicovitaka na noda sasaga.”

EDA NA VUA TIKO GA VAKACAVA ENA VOSOTA?

13, 14. Me vaka e tukuni ena Roma 10:1, 2, cava e sega ni soro kina o Paula vei ira na sega ni via rogoca na itukutuku vinaka ni Matanitu ni Kalou?

¹³ Na cava ena vukei keda meda vua tiko ga ena vosota? Me vaka eda sa raica mai, a yalolailai o Paula nira sega ni via rogoca na Jiu na itukutuku vinaka ni Matanitu ni Kalou. Ia a sega ni soro. Dikeva mada na ka e kaya ena nona ivola vei ira na lotu vaKarisito e Roma me baleti ira na Jiu qori: “Au gadreva dina mai lomaqu kei na noqu masuta na Kalou ena vukudra na Isireli, oya mera bula. Niu kila nira yalogu dina ena nodra qarava na Kalou, ia e sega ni salavata kei na kilaka dodonu.” (Roma 10:1, 2) Na cava e tukuna o Paula ni vu ni nona sega ni soro ena cakacaka vakaitalatala?

¹⁴ Kena imatai, e tukuna na vuna e vunau tiko ga kina vei ira na Jiu. E kaya ni “gadreva dina mai loma[na].” Kena ibalebale ni vu sara ga mai lomana nona vinakata mera vakabulai eso na Jiu. (Roma 11:13, 14) Kena ikarua, e tukuna o Paula nona “masuta na Kalou ena vukudra.” Io, e masuti Jiova mera ciqoma na itukutuku vinaka ni Matanitu ni Kalou. Kena ikatolu, e tomana o Paula: “Nira yalogu dina ena nodra qarava na Kalou.” E raica na ka era vinaka kina na tamata. Ke ra dusimaki donu, ena rawa ni veisautaki ira mera tisaipeli yalogu i Karisito, me vaka e kila vinaka o Paula.

15. Eda na vakatotomuri Paula vakacava? Tukuna eso na kena ivakaraitaki.

¹⁵ Eda na vakatotomuri Paula vakacava? Kena imatai, eda na saga mai vu ni lomada meda qarai ira era “muria [tiko] na sala mera bula tawamudu kina.” Kena ikarua, eda vakamasuti Jiova me dolava na lomadra na lomadina. (Caka. 13:48; 16:14) E kaya o Silvana, sa voleka ni 30 na yabaki nona painia voli, “Niu bera ni lako ina dua na vale ena noqu yalava, au dau masu vei Jiova, au kerei koya me vukei au me donu tiko ga noqu rai.” Eda dau masuta tale ga na Kalou me rawa nira dusimaki keda na agilosi meda kunei ira na lomadina. (Maciu 10:11-13; Vkta. 14:6) E kaya o Robert, sa sivia na 30 na yabaki nona painia tiko, “Dau talei na cakacaka kei ira na agilosi era kila vinaka na ka era sotava tiko na itaukeinivale.” Kena ikatolu, eda saga meda raica ga na ka era vinaka kina. Tukuna o Carl, e dua na qase ni ivavakoso a papitaiso ena sivia na 50 na yabaki, “Au dau saga meu raica e dua mada ga na ka lailai e vakavotui kina nona lomadina e dua, de nona matadredredre, kena irairai, se ni taroga e dua na taro ni via kila dina na kena isau.” Io, me vakataki Paula eda rawa ni vua tiko ga nida vosota.

“ME KUA NI CEGU NA LIGAMU”

16, 17. (a) Na cava eda rawa ni vulica ena Dauvunau 11:6? (b) Vakamacalataka na kena tarai ira na vakararai tu na noda cakacaka ni kakaburaki.

¹⁶ Kevaka mada ga e sega ni tara na lomadra e levu na itukutuku ni Matanitu ni Kalou eda vunautaka tiko, meda kua ni raica vakamamada na yaga ni noda kakaburaki. (Wilika Dauvunau 11:6.) Levu era na sega ni rogoci keda, ia era dau vakararai tu. Era raica na rakorako ni noda isulu, noda itovo vinaka, kei na noda dau matadredredre. Toso na gauna na noda itovo ga era na rawa ni kila kina ni cala na ka e dau tukuni me baleti keda. Rau raica na veisau qori o Sergio kei Olinda, rau tukuni toka mai na itekivu ni noda ulutaga.

¹⁷ E kaya o Sergio: “Dua na gauna keirau a tauvimate, keirau mani sega ni lako ena vanua keirau dau lai duri tiko kina. Ni keirau lesu yani, era taroga na dau tavali e kea, ‘E dua na leqa? Keimami liaca ni drau sa yali tiko.’” E kaya tale ga ena matadredredre o Olinda: “Era yaloyalo mai vei keirau na draiva ni basi, so era kacivaka mai, ‘Vinaka na cakacaka!’ Era dau kerea tale ga na noda ivola.” Rau kidroa mada ga ni lako mai ena nodrau qiqi e dua na turaga kei na ivutu senikau, me vakavinavinakataki rau ena nodrau cakacaka.

18. Na cava mo vakadeitaka kina mo ‘vua tiko ga ena vosota’?

¹⁸ Io, ni “sega ni cegu na liga[da]” ni kaburaka tiko na itei ni Matanitu ni Kalou, e noda itavi dokai meda ‘vakadinadina ena veimatanitu.’ (Maciu 24:14) Kena ikuri, eda marau vakalevu nida kila ni vakadonui keda o Jiova, ni lomani ira kece na ‘vua tiko ga ena vosota’!