Yalodina Tiko ga ena Lomamu Taucoko

“Au na muria na nomuni vosa dina: mo ni vakaduataka na lomaqu me rerevaka na yacamuni.”​—SAME 86:11.

1, 2. (a) Me vaka e volai ena Same 86:​2, 11, eda na yalodina vakacava vei Jiova nida vakatovolei se temaki? (b) Na gauna cava meda saga kina meda yalodina vei Jiova mai vu ni lomada?

ERA yalodina e so na lotu vaKarisito nira bala e valeniveivesu se ra vakacacani, ia e muri era qai dau sikalutu ina domodomoiyau. Na vuna? Ena vuku ni ivakarau ni lomadra. E vakaraitaka na ika86 ni Same ni sema tiko na yalodina kei na kena sega ni wase rua na lomana e dua na tamata. “Mo ni maroroya na yaloqu; ni’u sa yalododonu [“yalodina,” NW],” e masuta na Daunisame o Tevita. “Oi kemuni na noqu Kalou, mo ni vakabula na nomuni tamata sa vakararavi vei kemuni.” A masuta tale ga o Tevita: “Mo ni vakavulici au, Jiova, e nomuni sala; au na muria na nomuni vosa dina: mo ni vakaduataka na lomaqu me rerevaka na yacamuni.”​—Same 86:​2, 11.

² Kevaka eda sega ni vakararavi vei Jiova ena lomada taucoko, e so tale na ka eda cakava ena rawa ni vakavuna meda tawayalodina. Na noda dau nanumi keda ga e rawa ni vakatauvatani ina gasaukuro bulu ena sala e dau taubaletaki. E dina nida a rairai yalodina ni yaco e so na ituvaki dredre sara, ia eda na rawa ni sikalutu ina so na icori se dai i Setani. E bibi gona meda saga vakaukaua meda dau yalodina vei Jiova mai vu ni lomada ena gauna qo, nida bera ni vakatovolei se temaki! E kaya na iVolatabu: “Mo vakatawa vakavinaka sara na yalomu [“lomamu,” NW]; ni sa taka maikina nai vurevure ni bula.” (Vkai. 4:​23) Eda vulica e levu na ka yaga ena nona ivakaraitaki na parofita ni Juta a tala o Jiova vei Tui Jeropoami e Isireli.

“Ka’u na Solia Vei Iko e Dua na Ka-ni-Loloma”

3. Na cava e cakava o Jeropoami me baleta na itukutuku warumisa ni parofita ni Kalou?

³ Raitayaloyalotaka mada na ka e yaco. E se qai tukuna oti ga na parofita e dua na itukutuku warumisa vei Tui Jeropoami, ni a se qai tauyavutaka ga na sokaloutaki luve ni bulumakau ena tini na yavusa ena matanitu o Isireli. E cudru sara ga na tui. E vakaroti ira nona tamata mera vesuka na parofita. Ia e tokoni koya na dauveiqaravi qori o Jiova. E vakasauri ga na kena malai vakacakamana na liga ni tui a dodoka ena cudru, qai kavida se kasere na icabocabonisoro e vakayagataki tiko ena sokalou lasu. E veisau totolo o Jeropoami. E vakamasuti koya na tamata ni Kalou: “Mo vakamasuti Jiova mada na nomu Kalou, ka masulaki au, ka me’u lokia tale mai vei au na ligaqu.” E mani masu na parofita ya, qai vinaka tale na liga ni tui.​—1 Tui 13:​1-6.

4. (a) E vakatovolei vakacava na nona yalodina na parofita ena nona via soli iloloma na tui? (b) Na cava a qai kaya na parofita?

⁴ A kaya sara o Jeropoami vua na tamata ni Kalou: “Daru lako ki vale, mo vakacegu kina, ia ka’u na solia vei iko e dua na ka-ni-loloma.” (1 Tui 13:7) Na cava me na cakava na parofita? Me ciqoma beka na nona veisureti na tui, dina ni se qai tukuna oti ga vua na itukutuku me baleta nona lewai? (Same 119:113) Se me vakasuka, dina ni vaka e veivutuni na tui? E sega ni vakabekataki ni rawa ni solia o Jeropoami e so na iloloma e saulevu sara. Kevaka a sa domona lo tiko na iyau na parofita ni Kalou, ena temaki sara ga ena iloloma qori ni tui. Ia sa veivakaroti oti o Jiova vua na parofita: “Mo kakua ni kania na kakana se gunu wai, se lesu tale yani e na sala ko a lako kina.” E lomadei gona na parofita me kaya vua na tui: “Kevaka ko ni na solia vei au e dua nai wase ni nomuni vale ni sa wase rua, au na sega ni curu vata kei kemuni, se kania na kakana se gunu wai e na tikina [“vanua,” NW] oqo.” A qai muria na parofita e dua tale na sala ni biubiu mai Peceli. (1 Tui 13:​8-​10) Na cava eda vulica ena nona vakatulewa na parofita me baleta noda yalodina mai vu ni lomada?​—Roma 15:4.

“Me da Lomavinaka” ena Ka Sa Tu Vei Keda

5. Ena vakatovolei vakacava na noda yalodina ke da domodomoiyau?

⁵ Eda na rairai nanuma ni na sega ni vakaleqa na noda yalodina na domodomoiyau. Ia e sega. Vakacava, eda dau vakararavi beka ina yalayala i Jiova me vakarautaka na veika eda gadreva? (Maciu 6:​33; Iper. 13:5) Eda rawa beka ni vakuai keda mai na rawati ni iyaya isaulevu e sega na kena ikolo, dina ni na toroya cake noda ivakarau ni bula? (Wilika Filipai 4:​11-​13.) Eda temaki beka meda vakuai keda ena so na itavi e okati ena noda qaravi Jiova, eda qai guta ga meda rawata na veika eda vinakata? Vakacava, eda vakaliuca tiko noda qaravi Jiova ena yalodina? Na noda isaunitaro ena vakatau ena noda qaravi Jiova mai vu ni lomada. E vola na yapositolo o Paula, “Sai yau levu na lotu kei na lomavinaka [“ena ka sa tu vei keda,” NW]. Ni sa sega na ka eda sa kauta mai ki vuravura, a sa dina sara ni sa sega na ka eda na kauta tani rawa. Ia kevaka sa tu vei keda na kakana kei nai sulu, me da lomavinaka kina.”​—1 Tim. 6:​6-8.

6. Na “iloloma” cava ena rairai vinakati me soli vei keda? Na cava e vinaka meda cakava ni bera nida vakatulewa kina?

⁶ Kena ivakaraitaki, ena rairai tukuna na noda boso me na tosoi cake noda itutu vakacakacaka, e saulevu, qai so tale na ka eda na rawata kina. De dua eda nanuma ni na levu cake noda ilavo ke da lai vaqara cakacaka ena dua tale na vanua, se dua tale na yasa i vuravura. Taumada eda na rairai nanuma ni veivakalougatataki i Jiova na veika qori. Ia ni bera nida vakatulewa kina, ena vinaka meda vakalewa mada na noda inaki. Na taro bibi duadua e dodonu meda vakasamataka qo, “Ena vakacava na noqu veiwekani kei Jiova ena vuku ni vakatulewa qo?”

7. Na cava e bibi kina meda cavuraka laivi na gagadre ni domodomoiyau?

⁷ E uqeta tiko ga na vuravura i Setani na domodomoiyau. (Wilika 1 Joni 2:​15, 16.) E inaki ni Tevoro me vakacacana na lomada. E dodonu gona meda kila da qai qarauna sara na veika ena uqeti kina na lomada meda domodomoiyau, meda qai cavuraka laivi mai lomada. (Vkta. 3:​15-​17) E sega ni lomalomarua o Jisu ena nona vorata na veitemaki i Setani, oya na nona via solia vei Jisu na matanitu kece i vuravura. (Maciu 4:​8-​10) E veivakasalataki kina: “Ni yadra tiko ka qarauni kemuni mai na veivalavala kocokoco kece ga, ni sa sega ni vakatau na bula ni tamata e na levu ni ka e tu vua.” (Luke 12:​15, VV) Ke da yalodina vei Jiova, eda na dau vakararavi vua da qai sega ni nuitaki keda ga.

‘Lasutaki Koya’ e Dua na Parofita Qase

8. A vakatovolei vakacava na nona yalodina na parofita ni Kalou?

⁸ Ena taqomaki na nona bula na parofita ni Kalou kevaka a tomana tiko ga na nona ilakolako lesu ina nona vale. Ia a qai vakatovolei tale. E kaya na iVolatabu: “A sa tiko mai Peceli e dua na parofita qase; a sa lako na luvena ka tukuna vua” na veika a yaco ena siga ya. Ni rogoca oti na itukutuku qori, a vakarota sara me vakarautaki na asa me lai tavaka kina na parofita ni Kalou. Oti ga vakalailai a sotava sara na parofita ni vakacegu tiko ena ruku ni dua na vunikau levu, qai kaya vua: “Daru lako ki noqu vale, ka kania na kakana.” Ena gauna a vakasuka kina na veisureti qori na tamata ni Kalou, a mani sauma na qase: “Au sa parofita talega koi au me vakataki iko: a sa vosa vei au e dua na agilose e na vosa i Jiova, ka kaya, Mo vakalesui koya mai vei iko ki na nomu vale, me kania na kakana ka gunu wai.” Ia e qai kaya na iVolatabu: “Sa lasu ga vua ko koya.”​—1 Tui 13:​11-​18.

9. Na cava e kaya na iVolatabu me baleti ira na dauveivakaisini? Era dau vakaleqai cei?

⁹ Se mani cava na nona inaki na parofita qase, e sa lasu ga. De dua a parofita yalodina tu i Jiova ena dua na gauna. Ia sa veivakaisini na nona ivalavala ni donuya na ituvaki qori. E sega sara ga ni vakadonui na ivalavala va qori ena iVolatabu. (Wilika Same 5:​6.) O ira na dau veivakacalai se veivakaisini era na vakaleqa na kedra ituvaki vakayalo, kei na nodra bula vakayalo e so tale.

“Sa Qai Lesu Vata Kaya” na Qase

10. Na cava a cakava na parofita ni Kalou me baleta nona veisureti na qase? Na cava na kena itinitini?

¹⁰ A dodonu sara ga me kidava na parofita ni Juta na nona ilawaki qaseqase ni veivakacalai na parofita qase ya. A rawa ni vaqaqa, ‘Ena tala beka o Jiova na nona agilosi vua e dua tale na parofita me solia kina e so na idusidusi vou meu na muria?’ A rawa tale ga ni kerei Jiova me vakamatatataka na idusidusi ya, ia e sega ni kaya na iVolatabu ni a cakava vaka kina. E kaya ga ni “qai lesu vata kaya [na qase], ka kania na kakana ka gunu wai, e na nona vale.” A sega ni marau kina o Jiova. Ena gauna a tomana kina nona ilakolako lesu i Juta o koya na parofita a vakacalai, a vakamatei koya e dua na laioni. Sa mai tini kina vakaloloma na nona ilesilesi vakaparofita!​—1 Tui 13:​19-​25.a

11. Na cava e ivakaraitaki vinaka kina o Eaija?

¹¹ Ena yasana adua, a yalodina tu ga na parofita o Eaija​—a talai ena dua na gauna me lumuti Jeropoami me tui. Ena gauna sa qase qai mataboko kina o Eaija, a qai talai watina yani o Jeropoami me tarogi koya me baleta na bula i luvedrau tagane a tauvimate tiko. A sega ni rere o Eaija na tukuna ni na mate na luve i Jeropoami. (1 Tui 14:​1-​18) E bau dua gona na ka e vakalougatataki kina o Eaija oya ni bau vakayagataki na ka e vola ena Vosa uqeti ni Kalou. Ena sala cava? A vakayagataka o Esera na veika a vola tu o Eaija me yavutaka kina na nona ivola.​—2 Vei. 9:​29.

12-14. (a) Na cava eda vulica ena ka e yaco vua na parofita ni Juta? (b) Vakamacalataka mada na bibi ni kena vakasamataki vakatitobu na nodra ivakasala vakaivolatabu na qase ni ivavakoso, salavata kei na noda masu.

¹² E sega ni kaya na iVolatabu na vuna a sega ni kerea kina na veidusimaki i Jiova na parofita ni Juta ni bera ni lai kana kei na parofita qase. De dua, a tukuna na parofita qase na ka sara ga a via rogoca. Na cava eda vulica ena ivakaraitaki qori? E dodonu meda vakadeitaka sara ga e lomada ni dodonu vakaoti na ivakaro i Jiova. Meda qai nakita dei meda muria, se mani cava e yaco.

¹³ E so era dau digidigi nira vakasalataki​—era muria ga na ivakasala era taleitaka. Kena ivakaraitaki, a rairai tukuni vua e dua na dautukutuku na cakacaka ena lailai kina na gauna e vakayagataka me baleta nona vuvale kei na veika vakayalo. De dua ena lai kere ivakasala vua e dua na qase ni ivavakoso. Taumada, ena rairai kaya na qase ni sega ni nona itavi me tukuna vua na tacida na sala me na qarava kina nona matavuvale. Oti erau na rairai veivosakitaka e so na leqa e rawa ni yaco ena nona bula vakayalo na tacida ke vakadonuya na cakacaka ya. Vakacava, ena nanuma beka ga na tacida na veika a tukuna taumada na qase se na kauaitaka tale ga e so tale na nona ivakasala? E macala ni dodonu me vakatulewataka na tacida na ka ena yaga duadua ina nona bula vakayalo.

¹⁴ Vakasamataka mada e dua tale na ituvaki. Ena rairai taro ivakasala vua e dua na qase ni ivavakoso e dua na tacida yalewa me baleta na nona sa via veibiu kei na watina e tawavakabauta. E macala ni na vakamacalataka na qase ni vakatulewa qori me baleta na veibiu e nona sara ga na tacida yalewa. De dua ena kaya na qase me railesuvi na ivakasala ena iVolatabu me baleta na ituvaki ya. (1 Kor. 7:​10-​16) Ena kauai beka na tacida yalewa ena veika e tukuna na qase ni ivavakoso? Se sa vakatulewataka oti me na biuti watina ga? Ni vakatulewa, e ka vakavuku me vakasamataka na ivakasala ena iVolatabu, me masu tale ga.

Yalomalumalumu mo Kua ni Vakararavi ina Nomu Vuku

15. Na cava eda vulica ena nona cala na parofita ni Kalou?

¹⁵ Na cava tale eda vulica ena nona cala na parofita ni Juta? E kaya na Vosa Vakaibalebale 3:5: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua.” Na parofita ni Juta a vakararavi ga ina nona vuku ena ituvaki ya, dina ni a dau vakararavi vei Jiova ena dua na gauna e liu. A tini mate ena vuku ni cala qori, a ca tale ga kina na kena irogorogo vei Jiova. Eda vulica gona ena nona ivakaraitaki ni bibi meda yalodina nida qaravi Jiova, meda kua tale ga ni vakararavi ga ina noda vuku!

16, 17. Na cava ena uqeti keda meda yalodina tiko ga vei Jiova?

¹⁶ Ena rawarawa sara meda vakacalai ena gauna e dau tuburi keda kina na yalo ni nanumi keda ga. “Sa ka dauveivakaisini duaduaga na yalo ni tamata, ka sa dredre ni vinaka.” (Jere. 17:9) Ke da vinakata meda yalodina tiko ga vei Jiova, e bibi meda saga tiko ga meda biuta laivi na noda itovo makawa, okati kina na viavialevu kei na noda dau vakararavi ga ina noda yalomatua. Meda bulataka tale ga na itovo vou e “caka me vaka na Kalou e na yalododonu kei na yalosavasava ni dina” se yalodina.​—Wilika Efeso 4:​22-​24.

¹⁷ E kaya na Vosa Vakaibalebale 11:2: “Sa tu vei ira na yalomalumalumu na vuku.” Kevaka eda yalomalumalumu qai vakararavi ga vei Jiova, eda na sega ni coko ena cala bibi. Kena ivakaraitaki, na yalolailai e rawa ni vakavuna meda sega ni vakatulewa vakavuku. (Vkai. 24:10) De dua eda sa oca na cakava e so na itavi vakayalo, eda nanuma kina ni sa rauta ga na veika eda cakava tu mai ena dua na gauna balavu, sa kena gauna qo mera colata na itavi qori e so tale. Se, da via bulataka na nodra ivakarau ni bula na tamata ni vuravura qo. Ia ena taqomaki na lomada kevaka eda “gumatua sara,” qai ‘vakaogai keda tiko ga ena cakacaka ni Turaga.’​—Luke 13:24; 1 Kor. 15:​58, VV.

18. Na cava meda cakava ke dredre tiko meda vakatulewa?

¹⁸ Ena so na gauna, ena dredre toka na vakatulewa e vinakati meda cakava, qai sega ni matata sara na sala meda muria. Vakacava, eda na temaki beka meda cakava ga na ka eda nanuma ni donu me wali kina na leqa? Ke yaco e so na ituvaki va qori, ena ka vakayalomatua meda masuta na veidusimaki i Jiova. E kaya na Jemesa 1:5: “Kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata.” Ena vakarautaka na Tamada vakalomalagi na yalo tabu meda vakatulewa vinaka kina.​—Wilika Luke 11:​9, 13.

Nakita Dei Mo Yalodina Tiko Ga

19, 20. Na cava meda nakita dei?

¹⁹ A vakatovolei sara ga na nodra yalodina na tamata ni Kalou ena gauna dredre e salamuria na nona vukitani mai na sokalou dina o Tui Solomoni. Era a tawayalodina kina e levu. Ia, e so era a yalodina tiko ga vei Jiova.

²⁰ Ena veisiga ni noda bula, ena vakatovolei na noda yalodina ena digidigi kei na vakatulewa ena gadrevi meda cakava. Eda rawa tale ga ni yalodina. O koya gona, meda yalodina tiko ga vei Jiova ena lomada taucoko, nuidei tale ga ni na sega ni cegu na nona vakalougatataki ira na nona tamata yalodina.​—2 Sam. 22:26.

[iVakamacala e ra]

O na Sauma Vakacava?

• Na cava meda cavuraka laivi kina mai lomada na domodomoiyau?

• Na cava ena uqeti keda meda yalodina tiko ga vei Jiova?

• E yaga vakacava na yalomalumalumu ina noda yalodina tiko ga vua na Kalou?

[iYaloyalo ena tabana e 9]

E dau dredre beka mo yalodina tiko ga ni o temaki?

[iYaloyalo ena tabana e 10]

O na masulaka beka qai vakasamataka vakabibi na ivakasala vakaivolatabu?