Sa Tawase na Matanitu

O KILA se cava e dresulaka tiko kina na nona kote na turaga oqo? A kaya sara ga vua o Jiova. Oqori o Eaija, na parofita ni Kalou. E dau tukuna e liu na Kalou vei ira na parofita na veika ena qai yaco emuri.

Erau veivosaki tiko oqo o Eaija kei koya a lesia mai o Solomoni me liutaka e dua na ilawalawa dautaravale. Na yacana o Jerepoami. Ni rau veivosaki tiko a kidacala o Jeropoami ni sa luvata nona kote vou o Eaija qai dresulaka vaka 12. E kaya o Eaija: ‘Taura tiko me nomu e 10 na tikina.’ O kila na ibalebale ni nona solia ga e 10 na tikina vei Jerepoami?

E vakamacalataka o Eaija ni na kauta tani o Jiova na matanitu mai vei Solomoni, qai solia vei Jeropoami e 10 na yavusa me lewa. Kena ibalebale oya ni sa na qai vo wale ga vei Riopoami, na luve i Solomoni, e rua na yavusa me liutaka.

A vakacudrui Solomoni sara ga nona rogoca na ka a tukuna o Eaija vei Jeropoami. E via vakamatei Jeropoami kina, mani dro o koya i Ijipita. Sega ni dede sa mate o Solomoni. A veiliutaki tiko vakatui me 40 na yabaki, ia oqo sa sosomitaki koya o Riopoami na luvena. Rogoca sara o Jeropoami mai Ijipita ni sa mate o Solomoni mani lesu tale mai i Isireli.

E sega ni tui vinaka o Riopoami. E dau vakalolomataki ira na lewenivanua. Sa qai lai kerei koya yani o Jeropoami kei na so na turaga me bau caka vinaka mada. Ia a sega ni vakarorogo o Riopoami qai toro cake ga na nona ca. E keri tale ga era sa buli Jeropoami kina na 10 na yavusa me nodra tui. Ia o Riopoami e se nodra tui tiko ga na yavusa e rua o Penijamini kei Juta.

E sega ni vinakata o Jeropoami mera lai sokaloutaki Jiova na nona tamata ina valenisoro e Jerusalemi. Sa qai bulia e rua na bulumakau koula mera sokalou kina na 10 na yavusa. Sega ni dede sa levu na basulawa kei na itovo kaukaua ena nodra vanua.

E tubu tale ga na leqa vei ira na yavusa e rua. Ni bera ni oti e lima na yabaki na veiliutaki i Tui Riopoami, sa mai valuti Jerusalemi na tui Ijipita. E kauta e levu na iyau talei mai na valenisoro i Jiova. O koya gona a lekaleka wale na ituvaki vinaka ni valenisoro mai na gauna a tara kina.