Vakalevutaka na Nomu Kilaka Dodonu ena “Loma e Vinakata Sara”

EDA dau vinakata kece na veivakadonui i Jiova. Ena rawa qori ke da vaqaqacotaka noda vakabauta, da qai gumatua ena veiqaravi tabu. Ia e vakaraitaka na yapositolo o Paula e dua na leqa a yacovi ira na Jiu ena nona gauna, ena rawa tale ga ni yaco ena gauna qo: “Ni ra sa dau gumatua dina sara e na nodra qarava na Kalou, ia e sega ga ni maucokona vinaka sara na nodra kila me dodonu kina na nodra veiqaravi.” (Roma 10:​2, VV) E matata vakasigalevu ni sega ni dodonu me yavutaki ga ena noda vakanananu na noda vakabauta kei na noda sokalou. E vinakati na kilaka dodonu me baleta na Dauveibuli kei na nona inaki.

Ena so tale na nona ivola, e semata o Paula na ivalavala e vakadonuya na Kalou kei na gumatua me rawati na kilaka dodonu. Ni masu me baleti ira na imuri i Karisito, a kerea mera ‘vakasinaiti ena nodra kila na lomana ena yalomatua kei na vuku vakayalo kece ga,’ mera ‘ia kina na ivalavala e kilikili kei ira sa nona na Turaga, me vakadonui ira kina o koya, nira vua tiko ena cakacaka vinaka kece ga, qai tubu cake tale ga na nodra kilaka dodonu me baleta na Kalou.’ (Kolo. 1:​9, 10) Na cava e bibi kina me tiko vei keda na ‘kilaka dodonu’? Na cava meda vakalevutaka kina na kilaka qori?

Na Yavu ni Vakabauta

Na noda vakabauta e yavutaki ena kilaka dodonu me baleta na Kalou kei na nona inaki me vaka e volai ena iVolatabu. Ke sega ni yavutaki dei na noda vakabauta ena kilaka nuitaki qori, ena vaka ga na vale e tara ena imau veva. Ni yavalati ga vakalailai ena kasura. E uqeti keda o Paula meda dau “vakasamataka vinaka na ka” nida veiqaravi tabu vei Jiova, meda ‘vakavouya tale ga na noda vakasama.’ (Roma 12:​1, 2, NW) Ena yaga noda cakava qori nida vulica wasoma na iVolatabu.

E vakadinadinataka o Ewa, e dua na painia tudei e Poladi: “Keu sega ni dau vulica na Vosa ni Kalou, ena yalani koso na noqu kilaka dodonu me baleti Jiova. Ena luluqa na noqu bula vaKarisito kei na noqu vakabauta na Kalou, au na tini vakayalia kina na iyau talei duadua​—na noqu veiwekani kei na Kalou.” Me kua mada ga ni yacovi keda qori! Vakasamataka na nona ivakaraitaki e dua na turaga a vakalevutaka na nona kilaka dodonu me baleti Jiova, qai marautaka nona veivakadonui na Kalou.

“E Bibi Dina Vei Au na Nomuni Lawa!”

Ena iVolatabu, na serekali e vakatokai me Same 119 e vakaraitaka na nona rai na daunisame me baleta na lawa, ivakasala, ivakaro, veivakadreti, kei na vakatulewa dodonu i Jiova. A vola: “Au na reki sara e na vuku ni nomuni vunau . . . A nomuni tukutuku talega na ka ka’u sa marautaka.” E kuria: “E bibi dina vei au na nomuni lawa! Au dau kauaitaka e veisiga.”​—Same 119:​16, 24, 47, 48, 77, 97 (NW).

Na rua na vosa na “reki” kei na “kauaitaka” erau dusia na kena vakasamataki vakatitobu na Vosa ni Kalou, kei na kena marautaki. E vakabibitaki gona ena rua na vosa qori na nona dau taleitaka na daunisame me vulica na lawa ni Kalou. Qori e sega ni vu mai na vakanananu wale ni lomana. Ia a lomana dina me “kauaitaka” na lawa me kila kina na veika titobu ena vosa i Jiova. E macala ena nona ivakarau ni bula ni a vinakata me kila na Kalou kei na nona inaki ena kena levu e rawata.

E matata vakasigalevu ni vu mai lomana na nona taleitaka na Vosa ni Kalou. Eda rawa ni taroga: ‘E titobu tale ga va ya na noqu taleitaka na Vosa ni Kalou? Au dau marautaka beka na wilika qai vakasamataka vakatitobu e dua na wase ni iVolatabu ena veisiga? Au dau wilika beka vagumatua na Vosa ni Kalou, salavata kei na masu ni bera niu wiliwili?’ Ke da va io ena tolu na taro qori, e sa rairai ‘tubu cake na noda kilaka dodonu me baleta na Kalou.’

E kaya o Ewa: “Au dau saga meu vakavinakataka na ivakatagedegede ni noqu vuli vakataki au. Me tekivu mai na gauna a dua kina na noqu brochure na ‘Raica na Vanua Vinaka’ au dau vakayagataka qori ena levu na gauna ni vuli. Au vakalevutaka noqu vakekeli ena Insight on the Scriptures kei na so tale na ivola me salavata kei na veika au vulica.”

Vakasamataka tale ga na nodrau ivakaraitaki o Wojciech kei Małgorzata. E levu na ka erau qarava ena nodrau vuvale. E dina ni rau veiwatini osooso, na cava erau cakava me rau dau vulica kina vakataki rau na iVolatabu? “Keirau dau tikica na gauna me keirau dui vulica kina na Vosa ni Kalou. Oti, keirau qai veivosakitaka e so na tikina bibi e talei se veiuqeti ena vuli vakavuvale, se ni keirau veitalanoa e veisiga.” Erau marau vakalevu ena nodrau dau vulica vakataki rau na veika titobu, qai yaga qori ena kena ‘vakalevutaki na nodrau kilaka dodonu.’

Yalorawarawa mo Veisau ni o Vuli Tiko

Eda vakabauta na lotu vaKarisito ni inaki ni Kalou mera “bula na tamata kecega, ka mai kila sara nai vakavuvuli dina.” (1 Tim. 2:​3, 4) Na ka dina qori e vakabibitaka na yaga ni wili iVolatabu kei na sasaga me ‘kilai sara’ na kena ibalebale. (Maciu 15:​10, VV) Ena rawa qori ke da yalorawarawa meda veisau ena gauna eda vuli tiko kina. Era vakaraitaka na rai qori na kai Peria makawa, ni tukuna vei ira o Paula na itukutuku vinaka: “Ni ra sa vakarogoca na vosa e na loma e vinakata sara, a ra sa dauvakasaqaqara e nai Vola Tabu e na veisiga, se sa vakakina na ka oqori, se segai.”​—Caka. 17:11.

O dau vakatotomuri ira beka na kai Peria ena gauna o vuli iVolatabu kina, qai sega ni ciri yawa nomu vakanananu ina so na ka e tawayaga? E rawa vua e dua na lotu vaKarisito me vakatotomuri ira na kai Peria, dina ni a sega beka ni dau taleitaka eliu na vuli. E so era dau vakalailaitaka nodra vuli kei nodra wilivola ni toso tiko nodra yabaki ni bula, ia e sega ni dodonu me va qori na lotu vaKarisito. Se da qase se gone, e rawa nida saga me kua ni ciri yawa noda vakanananu. Ni o wiliwili tiko, vakaraica e so na itukutuku mo na tukuna vei ira e so tale. Me kena ivakaraitaki, e rawa beka ni o tukuna vei watimu, se dua nomu itokani vaKarisito na veika o wilika se kila ena nomu dau vuli vakataki iko? Ke o cakava qori, ena kasa ena nomu vakasama kei na lomamu na veika o vulica, qai yaga vei ira e so tale.

Ni o dau vuli vakataki iko, muria na ivakaraitaki i Esera, na tamata yalodina ni Kalou, ena nona dau “vakarautaka . . . na lomana . . . me vakasaqaqara e na vunau i Jiova.” (Esera 7:​10) O na cakava vakacava? Mo vakarautaka e dua na vanua veiganiti mo vuli kina vakataki iko. Oti, qai kerea na veidusimaki i Jiova kei na vuku ena masu. (Jeme. 1:5) Tarogi iko, ‘Na cava beka au na vulica ena gauna ni vuli qo?’ Ni o wiliwili, vakasaqara na vakasama se tikina bibi. De dua o na via vola na veitikina qori se makataka na tikina o na via nanuma. Vakasamataka na sala mo na vakayagataka kina na tikina qori ni o cakacaka vakavunau, vakatulewa, se vakayaloqaqataka e so na tacimu vakayalo. Ni voleka ni oti e dua na gauna ni vuli, railesuva vakalekaleka na veika o vulica. Ke o cakava qori, o na sega ni guilecava na veika o vulica.

A vakamacalataka o Ewa na iwalewale ni vuli e vakayagataka: “Niu wili iVolatabu, au dau raica tale ga na cross-references, na Watch Tower Publications Index, kei na Watchtower Library ena CD-ROM. Au dau vola tale ga e so na tikina meu na vakayagataka ena cakacaka vakaitalatala.”

E so e sa vakayabaki na nodra dau marautaka na vulica vakataki ira na veika titobu me baleta na Kalou. (Vkai. 2:​1-5) E levu na itavi era qarava, qai dredre na nodra tikica na gauna mera vuli kina. Ke va qori na kemu ituvaki, e rawa ni veisautaki vakacava na nomu ituvatuva?

Meu Lalawataka Vakacava na Gauna?

O na rairai vakadinata ni dau rawarawa meda lalawataka na gauna meda cakava kina na veika eda dau taleitaka. E levu era vakadinadinataka ni yaga nodra tekia na isausau era rawa ni sauva, me vaka na wiliki tasevu ni iVolatabu. De dua ena rairai dredre na wiliki ni iyatukawa balabalavu, ivakamacala matailalai ni valenisoro makawa, se na parofisai vereverea e rairai veiyawaki sara kei na noda bula e veisiga. Saga mo cakava e so na ka mo na rawata kina na nomu isausau. Kena ivakaraitaki, ni bera ni o vulica e dua na wase ni iVolatabu ena rairai dredre vei iko, e vinaka mo wilika rawa na veika e baleta na ituvaki ena gauna ya, se na veitikina bibi ena wase qori. O na rawa ni vakayagataka na ivola “All Scripture Is Inspired of God and Beneficial,” e tabaki ena rauta na 50 na vosa.

Ena yaga mo vakasamataka na ka o wilika ena iVolatabu. Qo ena uqeti iko mo raitayaloyalotaki ira na tamata ena gauna ya kei na ituvaki a yaco. De dua na nomu vakayagataka e so na vakatutu qori ena vakavuna mo taleitaka nomu vuli, qai yaga tale ga. Ke vaka kina, ena lomamu dina mo lalawataka na gauna mo vuli kina. Ena qai rawarawa cake mo dau wilika na iVolatabu ena veisiga.

Na vakatutu era volai qori e rawa ni yaga vei keda yadudua, ia na cava e rawa ni cakava na vuvale osooso? Vakacava mo dou veivosakitaka vakavuvale na yaga ni vuli? Ni dou veivosaki va qori, ena rairai so kina na vakatutu yaga, me vaka na nomudou yadra vakatotolo ena veimataka, se ena so ga na siga, me veivosakitaki kina e dua na iwase ni iVolatabu. De dua ena laurai ni gadrevi me veisautaki na nomudou ituvatuva vakavuvale. Kena ivakaraitaki, era raica e so na matavuvale ni yaga mera veivosakitaka na tikinivolatabu ni veisiga, se mera wilika e dua na iwase ni iVolatabu ni cava e dua na gauna ni kana. Ni bera ni maroroi na iyaya ni kana se caka e dua tale na ka, ena vakayagataki e 10 se 15 na miniti me veivosakitaki kina na iVolatabu, se wiliki na tikinivolatabu ni macawa ya. Taumada ena rairai ka ni bolebole toka qori, ia ni toso na gauna sa na matau kina na vuvale, ena marautaki tale ga.

Erau vakamacalataka o Wojciech kei Małgorzata na veika e yaga ina nodrau vuvale: “Eliu keirau dau vakasabusabutaka na gauna ena kena dau vakayacori tu e so na ka e sega ni bibi. Ia keirau sa vakatulewataka me vakalailaitaki na gauna e vakayagataki ena e-mail. E vakalailaitaki tale ga na gauna ni veivakamarautaki kei na gade, keirau qai lalawataka e dua na siga kei na gauna me vulici kina na veika titobu ena iVolatabu.” Erau sega ni veivutunitaka na veisau rau a cakava. E rawa ni va tale ga qori na bula ni nomu vuvale.

Yaga Dina na Vakalevutaki ni Kilaka Dodonu!

Na vulici ni veika titobu ena Vosa ni Kalou e rawa ni vakavuna na ‘vua ena cakacaka vinaka kece ga.’ (Kolo. 1:​10) Ni yaco qori ena nomu bula, ena laurai levu na nomu toso vakayalo. O na tubu kina vakayalo qai titobu na nomu kilaka me baleta na ka dina ena iVolatabu. Ena veiraurau na nomu vakatulewa, qai tauci vakamatau na nomu ivakasala se veidusimaki, ena sega ni sivia tale se lailai sara me vaka na nodra ivakasala na lecaika. Kena ilutua, o na toro voleka kina vei Jiova. Ena titobu na veika o kila me baleta na nona itovo, qai matata qori ni o tukuna na veika me baleti koya vei ira e so tale.​—1 Tim. 4:​15; Jeme. 4:8.

Se o qase se gone, se mani vakacava na levu ni ka o sa sotava mai, mo saga sara vakaukaua mo marautaka na Vosa ni Kalou, qai yalorawarawa mo veisau ni o vulica na veika titobu e tiko kina. Mo nuidei ni na sega ni guilecava o Jiova na nomu sasaga. (Iper. 6:​10) Ena qai vakalougatataki iko vakalevu o koya.

[Kato ena tabana e 13]

NI ‘VAKALEVUTAKI NA NODA KILAKA DODONU’. . .

Ena qaqaco na noda vakabauta na Kalou, eda na qai muri Jiova vinaka.​—Kolo. 1:​9, 10

Eda na vuku, eda na rawa ni vakayagataka na noda kilaka qai vakatulewa vakamatau.​—Same 119:99

Eda na marau vakalevu nida tubera e so tale mera volekati Jiova.​—Maciu 28:​19, 20, VV

[iYaloyalo ena tabana e 14]

Ena ka ni bolebole toka noda kunea e dua na vanua veiganiti meda vuli kina, ia e yaga qori

[iYaloyalo ena tabana e 15]

Era dau wilika vata e dua na iwase ni iVolatabu e so na matavuvale nira kana oti