“Se Sega ni Kena Gauna Meu Mate”

E dua na draiva ni lori levu ni benu a sega ni lewa rawa na cici ni nona lori. E ceba yani na lori ena sala simede, coqa e dua na veiwatini kei na dua na cauravou yabaki 23 eratou taubale tiko. E kaya e dua na ripote ena niusipepa ni New York City, ni rau mate na veiwatini ena gauna ga rau coqa kina, ia o cauravou e sega sara ga ni vakilai koya. Ena gauna e vakilai koya tale kina, na imatai ga ni ka e vakasamataka: ‘Au sega ni tadra na ka e yaco qo. Yalovinaka kemuni na Kalou meu bula.’ E tomana, “Se sega ni kena gauna meu mate.”

DE DUA o sa rogoca oti na italanoa va ya. Ni dua e dro bula mai na leqa tubukoso, era dau tukuna eso, ‘se sega ni nona gauna,’ ia ni dua e mate ena vakacalaka, e dau tukuni ga, ‘Sa nona gauna me mate’ se ‘Sa lewa ni Kalou.’ Ke ra nanuma ni ka e yaco sa lewai oti tu mai, e ka ni kalougata, se inaki ni Kalou, e tautauvata tiko ga na ka era vakabauta. Levu era vakabauta ni ka e yaco ena nodra bula sa vagaunataki tu, ena sega gona nira cakava rawa kina e dua na ka. Na rai va qori a se tekivu makawa sara, sega ni baleta ga na gauna e mate kina e dua se ni yaco na vakacalaka.

Kena ivakaraitaki, era vakabauta e Ijipita makawa ni bula ni tamata e dusimaki ena nodra veitosoyaki na kalokalo. Oya na vuna era vakaraica kina na lomalagi ena ivakatakilakila me dusimaki ira. Ia o ira na kai Kirisi kei Roma era sokaloutaka na kalouyalewa ni matanifika, era vakabauta ni nona kaukaua ena kilai kina na nona kalougata kei na nona kalouca e dua, so na gauna ena rairai vakaseva sara ga na nodrau inaki na kalou iliuliu, o Seusi kei Jupita.

Ena vanua vakaEsia, era vakabauta na lotu Idu kei na lotu Buda ni veika e sotava tiko e dua ena gauna qo, e vu mai na ka a cakava ena nona bula e liu, kei na veika ena sotava ena bula se bera mai ena vakatau ena veika e cakava tiko ena gauna qo. Eso tale na matalotu, oka kina e levu na lotu ni veivanua vaKarisito era vakabauta tale ga na ivakavuvuli ni kena sa lewai oti tu na ka kece ena yaco ena noda bula.

E sega gona ni kurabuitaki ena noda gauna ni o ira sara mada ga era kaya ni yavutaki nodra vakabauta ena itukutuku dina, era se vakabauta ga ni ituvaki ni nodra bula, na ka ra rawata, kei na ka ena yaco mai muri sa lewai oti tu, era na sega ni cakava rawa kina e dua na ka. O vakabauta tale ga ya? Sa lewai oti tu mai na ka e yaco ena noda bula, noda rawaka, na ka da lekata​​—⁠na noda sucu kei na noda mate? E sa lewai rawa tu mai na nomu bula? Meda raica mada na kena isau vakaivolatabu.

[iTaba ni Credit Line ena tabana e 13]

Ken Murray/​New York Daily News