Sa Vagauna na Ka Kece Ga

“Sa dui vagauna na ka kecega, ka sa dui vakasiga na ka kece sa caka e ruku i lomalagi,” e kaya na iVolatabu. E kuria na tui vuku o Solomoni a vola na vosa qori ni tiko na siga e sucu qai mate kina e dua, na siga e tara kei na siga e basu kina na vale, na siga ni veilomani kei na siga ni veicati. Ia e tinia: “A cava na kena yaga vua na tamata daucakacaka na ka sa dauoca kina ko koya?”​—Dauvunau 3:1-9.

NIDA wilika na tikinivolatabu qori, era kaya eso ni vakavuvulitaka dina na iVolatabu na kena sa vagaunataki tu mai na ka kece, era nanuma ni tokona na iVolatabu na vakabauta ni sa lewai oti tu na ka ena yaco ena noda bula. E dina beka ya? E tokona na iVolatabu na vakasama ni veika kece ena yaco ena noda bula sa lewai oti tu mai? Ni ‘vakavuna na iVolatabu kece ga na Kalou,’ na ka eda wilika ena dua na wase e dodonu me salavata kei na wase tale eso. Koya gona, meda raica mada se cava e tukuna na vo ni wase ni iVolatabu me baleta na vakasama qo.​—2 Timoci 3:16.

Gauna kei na Veika Tawanamaki

E tomana o Solomoni ena Dauvunau: “Au a qai lesu, ka kunea e ruku ni mata-ni-siga, ni ra sa sega ni tauca na cere ko ira na daucici, ka ra sega ni gumatua e nai valu ko ira na qaqa, a ra sa sega talega ni kana ko ira na vuku, a ra sa sega talega ni vakaiyau ko ira na yalomatua, ka ra sa sega talega ni vinakati ko ira na matai.” Baleta? E vakamacalataka: ‘Na gauna kei na rarawa [“veika tawanamaki,” NW] e yaco vei ira na tamata kece ga.’​—Dauvunau 9:11.

E sega ni vakaibalebaletaka tiko o Solomoni ni sa lewai oti tu na ka kece ena yaco ena noda bula, ia e kaya tiko ga ni sega ni rawa ina tamata me tukuna vakailiu na macala ni ka era na cakava, baleta ‘na gauna kei na rarawa [“veika tawanamaki,” NW] e yaco vei ira na tamata kece ga.’ Vakavuqa, me yaco na leqa vakacalaka vua e dua ni veitaudonui kei na gauna se vanua e tu kina.

Me kena ivakaraitaki: “Sa sega ni tauca na cere ko ira na daucici.” O na rairai nanuma se sa wilika oti na italanoa me baleta na veitaucici vakairogorogo ni goneyalewa na 3000 na mita, a vakayacori ena Olympic ena 1984 e Los Angeles, Kalifonia e Mereke. Rau a nuitaka na daucici ni Peritania kei Mereke me rau taura na koula. Ia erau coqa ni veimama na veitaucici. E dua vei rau e sega tale ni qai cici, na kena ikarua e lai kavitu sara ena levu ni nona yalolailai.

A sa lewai oti tu me na yaco ya? Rairai era na duavata kina eso. Ia erau lusi ruarua ni rau coqa—⁠sega ni dua a kila rawa tu ni na yaco ya. A sa lewai oti tu mai me rau na coqa? Rairai era na tukuna tale eso ni vaka kina. Ia o ira na kacikacivaki era tukuna ni o rau na goneyalewa daucici qo, erau vakasa vinaka ena kaukaua kei na kila. Me vaka e kaya na iVolatabu, ‘na gauna kei na rarawa [“veika tawanamaki,” NW] e yaco vei ira na tamata kece ga.’ Ke da mani vakavakarau vinaka sara mada ga, ena tiko ga eso na ka tawanamaki ena vakaleqa noda sasaga, e sega ni dua na ka sa lewai rawa tu mai.

Na cava e vakaibalebaletaka na iVolatabu ni kaya: “Sa dui vagauna na ka kecega”? E dua na ka e rawa nida cakava me baleta noda bula se bera mai?

Gauna Vinaka Duadua

A sega ni tukuna tiko o Solomoni na kena sa lewai oti tu mai na ka ena yaco ena nona bula e dua, ia e vakamacalataka tiko ga na inaki ni Kalou kei na kena yaga ina bula ni kawatamata. Eda kila vakacava? Ena ka e tukuna na veitikina yavolita. Ni cavuta oti o Solomoni “sa dui vagauna na ka kecega,” sa qai tomana: “Au sa raica oti na oca sa vota na Kalou vei ira na luve ni tamata me ra vakaogai kina. Sa cakava na ka kece me rairai vinaka e na kena gauna.”​—Dauvunau 3:10, 11.

Levu na cakacaka e vakarautaka na Kalou meda cakava—eso gona e vola o Solomoni. E solia tale ga vei keda na galala ni vakatulewa meda digia na ka eda via cakava. Ia me vuavuaivinaka na cakacaka yadua, e tiko na kena gauna dodonu me vakayacori kina. Me kena ivakaraitaki ena Dauvunau 3:2, e tukuna o Solomoni ni tiko “na siga [gauna] me ia kina na teitei, kei na siga [gauna] me cavuta kina na ka sa tei.” Era kila na dauteitei na gauna vinaka mera teitei kina. Ke dua e teitei ena gauna se na vula cala qai sega ni vuavuaivinaka na ka e tea, e dodonu beka me beitaka ni sa lewai oti tu mai me na va ya? E sega! A sega ga ni teitei ena kena gauna donu. Ena vuavuaivinaka na ka e tea ke a muria na ituvatuva sa vakarautaka tu na Dauveibuli.

Koya gona, a sega ni lewa oti tu na Kalou na ka ena yaco ina bula ni tamata yadua se na ka kece e caka, ia e tiko na ivakavuvuli e salavata kei na nona inaki meda muria. Me yaga na noda sasaga, e dodonu meda kila na inaki ni Kalou kei na gauna e tuvanaka me caka kina. E sega ni veisautaka rawa na tamata na ka e nakita na Kalou me na cakava. Ena gusu i Aisea na parofita, e kaya o Jiova: “Na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”​—Aisea 55:11.

Na “vosa” cava ni Kalou ena “yaco” me baleta na vuravura kei na kawatamata?

Cakava na Kalou Nona iNaki ena Nona Gauna

Ni tukuna oti o Solomoni, “Sa cakava [Kalou] na ka kece me rairai vinaka e na kena gauna,” e tomana, “sa vakatikora ki lomadra na gauna ena sega ni mudu, sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.”​—Dauvunau 3:11.

Levu na ka e vakaibalebaletaka na tikinivolatabu qo. Ia so na gauna eda lomatarotarotaka na inaki ni bula kei na kena itinitini. Ena itukutuku ni bula ni kawatamata e dredre meda ciqoma ni sa ivakarau ga ni noda bula meda cakacaka vakaukaua da mate. Ni vakatauvatani kei na veika bula tale eso eda ibulibuli vakasakiti, ni sega wale ga nida vakasamataka na noda bula qo ia na bula tale ga se bera mai. Eda bau diva sara mada ga meda bula tawamudu. Cava na vuna? E kaya na iVolatabu, na Kalou “sa vakatikora ki lomadra [tamata] na gauna e sega ni mudu.”

Me yaco ya, era lomatarotarotaka kina e levu se rawa nida bula tale nida mate. Era tukuna eso nida mate e bula tale tiko e dua na ka. So tale era vakabauta nida na veisau ina dua tale na ka ena gauna eda mate kina. Ia eso tale era nanuma ni sa kilai oti tu se lewa oti tu na Kalou na ka kece ena yaco ena noda bula, sega gona nida na cakava rawa kina e dua na ka. E ka ni rarawa ni sega ni dua na ivakamacala qori e veivakacegui. E tukuna na iVolatabu, ena nodra sasaga ga na tamata era na ‘sega kina ni kunea rawa na cakacaka e cakava na Kalou mai na ivakatekivu me yacova na iotioti.’

E dua na ka era leqataka voli na vuku ena veitabagauna, na nodra via kila kei na nodra sega ni kunea na kena isau. Ia ni vakatikora e lomada na Kalou na gagadre qori, e dodonu beka meda na gole ga vua? E tukuna sara ga na iVolatabu me baleti Jiova: “O ni sa dedeka na ligamuni, ka vakamamautaka na ka bula kecega e na ka era gadreva.” (Same 145:16) Nida vulica na iVolatabu, eda na kila kina na ivakamacala veivakacegui me baleta na bula kei na mate, na inaki tawamudu ni Kalou me baleta na vuravura kei na kawatamata.​—Efeso 3:11.

[Tikina bibi ena tabana e 15]

“Sa sega ni tauca na cere ko ira na daucici.”​—Dauvunau 9:11

[Tikina bibi ena tabana e 16]

Ke sega ni teitei ena kena gauna dodonu na dauteitei, e dodonu beka me beitaka ni sa lewai oti tu me na vuavuaica na nona itei?

[Tikina bibi ena tabana e 17]

Eda vakasamataka na veika me baleta na bula kei na mate, ni Kalou ‘sa vakatikora i lomada na gauna e sega ni mudu’