Dauvunau 3:11—“E Cakava na ka Kece me Rairai Vinaka ena Kena Gauna”

“E cakava na ka kece me rairai vinaka ena kena gauna. E biuta mada ga e lomadra na gauna e sega ni mudu, ia era na sega ni katuma rawa na tamata na ka e cakava na Kalou dina mai na kena itekitekivu me yacova na kena itinitini.”—Dauvunau 3:11, Vakadewa ni Vuravura Vou.

“Sa cakava na ka kece me rairai vinaka e na kena gauna: ia sa vakatikora ki lomadra na gauna ena sega ni mudu, sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.”—Dauvunau 3:11, New International Version.

iBalebale ni Dauvunau 3:11

“E cakava na ka kece me rairai vinaka ena kena gauna.” Na ivakadewa vakaIperiu ni vosa “rairai vinaka” e sega ni vauci ga kina na totoka ni irairai. E rawa ni vakadewataki tale ga me “tuvanaki vinaka,” “dodonu,” se “veiganiti.” (Dauvunau 3:11, ivakamacala e ra) Na rairai vinaka ni ka e cakava na Kalou e laurai ena ka e bulia, kei na ka e cakava me vakayacori kina nona inaki.—Taniela 2:21; 2 Pita 3:8; Vakatakila 4:11.

“E biuta mada ga e lomadra na gauna e sega ni mudu.” E buli keda na Kalou meda bula tawamudu. (Same 37:29) Macala ga ni biuta e lomada na gagadre ni bula tawamudu. Ia na nodrau talaidredre vua na Kalou na imatai ni veiwatini o Atama kei Ivi, e vakavuna me rau mate kei na nodrau kawa. (Vakatekivu 3:17-19; Roma 5:12) E yalataka na Kalou ni na “vakaceguya na veika era gadreva na kabula kece,” wili kina o ira na via bula tawamudu. (Same 145:16) E vakamacalataka na iVolatabu nona vakarautaka o Jiova na sala me rawa nira bula tawamudu tale kina.—Roma 6:23.

“Era na sega ni katuma rawa na tamata na ka e cakava na Kalou dina mai na kena itekitekivu me yacova na kena itinitini.” E titobu qai vakaitamera na vuku ni Kalou, e kaya kina na iVolatabu ni “sega ni katumi rawa.” (Roma 11:33) Ia e tu vakarau na Kalou me vakaraitaka na nona sala vei ira na via vakamarautaki koya dina.—Emosi 3:7.

Tikina Wavolita na Dauvunau 3:11

E vola na Dauvunau o Tui Solomoni e Isireli makawa. E turaga rogo ena vuku e solia vua na Kalou. E tu ena ivola qori na ivakasala e yaga ina noda bula kei na veika tawayaga. (Dauvunau 1:2, 3; 2:1, 17; 7:1; 12:1, 13) E vakamacalataka o Solomoni ena wase 3, ni tiki ni noda bula na mate. E tukuni tale ga kina e levu na veimataqali itavi. (Dauvunau 3:1-8, 10) E solia vei keda na Kalou na galala meda digia na itavi meda cakava kei na kena gauna. (Vakarua 30:19, 20; Josua 24:15) E vakamacalataka o Solomoni ke da tokona na inaki ni Kalou qai doka na nona ‘gauna’ se ituvatuva, eda na marautaka na vua ni noda cakacaka. E vakatoka qori o Solomoni me “isolisoli ni Kalou.”—Dauvunau 3:1, 12, 13.

Sarava na ivakamacala lekaleka ni ivola na Dauvunau.