Mo Kila na iVolatabu

3. Ciqoma Nodra Veivuke na So

Ena nona ilakolako na daubutuvanua o Edward John Eyre ena vanualala ena buca o Nullarbor, era vakaraitaka vua na itaukei na vanua me tawana mai kina na mena wai, oya na veinuku kei na vunikau na eucalyptus. Nona ciqoma nodra veivuke o ira na kila vinaka na vanua oya a vakabulai koya.

NA IVAKARAITAKI qo e dusia ni dau vinakati nona veivuke e dua e kila vinaka cake, me rawa nida vakacavara kina e dua na ilesilesi dredre. E va tale ga oya na nomu tekivu wilika na iVolatabu.

E sega ni namaki ira na nona imuri o Jisu mera kila na iVolatabu ke sega kina na nodra veivuke na so. Ena dua na gauna, a ‘vakararamataka na lomadra o koya, mera kila rawa na ibalebale ni iVolatabu.’ (Luke 24:45) E kila o Jisu ni na vinakati mera vukei na dauwilika na iVolatabu mera kila vakamatata na kena ivakavuvuli.

O Cei me Veivuke?

O ira na imuri dina i Jisu. Ni bera nona lesu i lomalagi a vakarota: “Dou lako yani ka qisi ira me ra noqu tisaipeli na lewe ni veivanua kece ga, . . . vakavulici ira me ra muria na veika kece ga au sa vakarota tu vei kemudou.” (Maciu 28:19, 20, VV) Na veivakavulici e nodra cakacaka bibi duadua na lotu vaKarisito, qo e okati kina na vakamacalataki ni ivakavuvuli vakaivolatabu me bulataki ena veisiga. Era vukei ira tale na so na lotu vaKarisito dina mera vulica na iVolatabu.

Ni oti ga vakalailai nona vakaroti ira nona imuri o Jisu me baleta na veivakavulici, a yaco e dua na ka talei dina. E tukuni ena iVolatabu ni a wilika tiko na matanivanua ni Iciopea e dua na tikina ena parofisai i Aisea. A sega ni kila rawa na ka e wilika tiko ni tukuni kina: “Me vaka na sipi sa tuberi me la’ki vakamatei, ka vaka na lami sa galu e na mata i koya sa kotiva na vutina, sa vaka kina ko koya, ni sa sega ni tauca e dua na vosa. Sa vakamaduataki, ka sega ni tau vakadodonu vua na lewa. Ko cei e na bau tukuni ira na nona kawa? Ni sa kau tani mai vuravura na nona bula.”​—Cakacaka 8:32, 33, VV; Aisea 53:7, 8.

A tarogi Filipe na lotu vaKarisito e kila vinaka na iVolatabu na matanivanua, ni kaya: “Tukuna mada vei au, e tukuni cei tiko na parofita e na tikina oqo, ko koya ga, se dua tale?” (Cakacaka 8:34, VV) Sa qai lesu ga mai na sokalou e Jerusalemi na turaga yalodina ni Iciopea qo, rairai a masuta me dua e dusimaki koya. De a wiliwili sara tu ga ena nona via kila kei na nona yalomalumalumu. Ia a se sega tiko ga ni matata vua na tikina e vakawilika tiko. Ena yalomalumalumu, mani kerei Filipe me vukei koya. Na levu ni nona marautaka na nona ivakamacala o Filipe e uqeti koya sara ga me dua na lotu vaKarisito.—Cakacaka 8:35-39.

Era tomana tiko na iVakadinadina i Jiova na cakacaka a cakava o Filipe kei ira na lotu vaKarisito taumada, ena nodra vukei eso tale ena sivia na 235 na vanua mera kila na ka e kaya na iVolatabu. Era cakava qo ena nodra vulica vakaulutaga na iVolatabu. Na iwalewale qori e okati kina na kena vakadeuci na ka e kaya na iVolatabu me baleta e dua na usutu se ulutaga.a—Raica na kato “Veivakacegui na iSaunitaro Vakaivolatabu.”

“Saumi Kece Noqu Taro”

Eratou vulica na iVolatabu kei ira na iVakadinadina i Jiova o Steven, Valvanera, kei Jo-Anne, eratou cavuti ena imatai ni ulutaga. “Au kurabuitaka dina ena gauna au vakatauvatana kina eso na ivakavuvuli vakaivolatabu se na ka era yaco, na kedra isau e tiko ga ena iVolatabu,” e kaya o Steven. “Ni bera noqu vulica na iVolatabu, a sega ni bau dua e vakaraitaka vei au na kena icakacaka. E veivakacegui ni sauma vinaka na noqu taro, e sega ni vakavu veilecayaki na ka e tukuna na iVolatabu me baleta na Kalou.”

A duavata kina o Valvanera. E kaya “Era veisemati vinaka qai matata na veika kece au vulica, era dina kece, sega ni baleta wale ga ni vakavulici au kina ‘na lotu,’ ia e tiko na kedra ivakadinadina ena iVolatabu.” E kaya o Jo-Anne: “Au dokai koya vakalevu e vakavuna na volai ni iVolatabu ni saumi kece kina noqu taro—e kila rawa tu o Jiova na isau dodonu ni taro cava ga eda via taroga.”

O kila e dua na iVakadinadina i Jiova? Vakacava mo tarogi koya se dau caka vakacava na vulici ni iVolatabu? Ke o sega ni kila e dua na iVakadinadina i Jiova, yalovinaka volavola ina dua na itikotiko ena tabana e 4 ni mekesini qo. Ena veivuke ni yalo tabu ni Kalou, sega ni qiqo nomu rai, kei na nona veituberi e dua na qasenivuli maqosa ena iVolatabu, ena sega ni dredre na nomu kila na Vosa ni Kalou. E rawa ni o kila na iVolatabu!

[iVakamacala e ra]

[Kato/​iYaloyalo ena tabana e 18]

Veivakacegui na iSaunitaro Vakaivolatabu

Eso na ulutaga era dau vulica na iVakadinadina i Jiova ena nodra vuli iVolatabu:

• Na cava na inaki ni Kalou me baleta na vuravura?

• Era tu e vei na mate?

• Eda sa bula tu beka oqo ena “iotioti ni veisiga”?

• Na cava e vakalaiva kina na Kalou me yaco tiko ga na veika rarawa?

• Na cava meu cakava me marau kina noqu vuvale?

[iYaloyalo ena tabana e 17]

Mo kila na iVolatabu . . . kerea na yalo tabu ni Kalou, me kua ni qiqo nomu rai, ciqoma nodra veivuke na so