O Veiqaravi Beka ena Dua na Gauna? Rawa Beka ni o Veiqaravi Tale?

O VEIQARAVI tu beka ena ivavakoso vaKarisito ena dua na gauna? De dua o dauveiqaravi ni ivavakoso se qase ni ivavakoso. Rairai o dau veiqaravi tu vakatabakidua. Sega ni vakabekataki ni o dau marautaka qai lomavakacegu ena itavi e lesi vei iko, ia mani yaco eso na ituvaki e vakavuna mo sega ni veiqaravi tale kina.

O rairai kere vakacegu mai na nomu itavi dokai qori mo qaravi ratou kina nomu vuvale. Ena yasana adua, e rairai vakavuna na bula vaqase se tautauvimate. Na vakatulewa va qori e sega ni kena ibalebale ni o sega ni qarava rawa na itavi e lesi vei iko. (1 Tim. 5:8) Ena imatai ni senitiuri, a veiqaravi vadaukaulotu o Filipi, ia a qai lai vakaitikotiko e Sisaria me qaravi ratou nona vuvale. (Caka. 21:8, 9) Ni sa qase o Tui Tevita e Isireli makawa a tuvanaka me kena isosomi na luvena o Solomoni. (1 Tui 1:1, 32-35) Ia, o Jiova e lomani rau qai taleitaki rau tiko ga o Filipi kei Tevita, erau dokai tale ga ena gauna qo.

De dua o vakacegui mai na nomu itavi. A vakavuna beka qori nomu a sega ni lewa vinaka nomu ivalavala? Se leqa beka vakavuvale? (1 Tim. 3:2, 4, 10, 12) O na rairai nanuma ni sega ni dodonu mo vakacegui mai na nomu itavi, o qai rarawataka tu me yacova mai na gauna qo.

O Rawa ni Veiqaravi Tale

Ena dredre beka mo veiqaravi tale? Sega. Mo rawa ni veiqaravi tale, ena vinakati me vu mai lomamu na nomu via veiqaravi. (1 Tim. 3:1) Na cava mo vinakata kina mo sauva na isausau qori? Qo e tautauvata ga kei na nomu yalataki iko vua na Kalou—⁠nomu lomani Jiova kei ira na qaravi koya. Ke o saga mo vakaraitaka na loloma qo, ena vakayagataki iko o Jiova ena vuku ni kila e tu vei iko ni bera ni o vakacegui mai na nomu itavi, vaka kina na ka o vulica ni oti nomu vakacegui.

Nanuma na veivakadeitaki i Jiova vua na matanitu o Isireli ena gauna a kauta laivi kina nodra itavi dokai ni veiqaravi. E kaya: “Koi au ko Jiova, ka’u sa sega ni veivukiyaki; o koya oqo, dou sa sega kina ni rusa oi kemudou na Jekope.” (Mala. 3:6) A lomani ira na Isireli o Jiova qai vinakata me vakayagataki ira tale. E vinakata tale ga o Jiova me vakayagataki iko ena veigauna e se bera mai. Na cava o rawa ni cakava ni o cegu tu mai na nomu veiqaravi? Na noda qarava na itavi vakayalo e vakatau ena noda bulabula vakayalo, sega ni taledi eda sucukaya mai. Koya gona, ni o sega ni vakacolati ena so tale na itavi ena ivavakoso, saga sara mo vaqaqacotaka nomu bula vakayalo.

Mo “gumatua” ena vakabauta, ena vinakati mo “vakasaqarai Jiova, kei na nona kaukauwa.” (1 Kor. 16:13; Same 105:4) Dua na sala o rawa ni cakava kina qo, oya na nomu masu mai vu ni lomamu. Ni o vakamacalataka na kemu ituvaki vei Jiova, me vu mai lomamu qai kerea na nona yalo tabu. Ni o cakava qori, o na volekati Jiova, ena qai vakaukauataki iko. (Same 62:8; Fpai. 4:6, 13) Dua tale na sala mo vaqaqacotaka kina nomu bula vakayalo, oya mo vakavinakataka nomu vulica na Vosa ni Kalou. Ni lailai na itavi o lesi kina ena gauna qo, o rawa ni vakalevutaka na gauna ni nomu vuli vakataki iko kei na vuli vakavuvale, de dua ena vakamuri vinaka tale na ituvatuva a dredre na kena vakamuri ena dua na gauna.

Nanuma tiko ni o se matataki Jiova tiko ga, o dua na nona iVakadinadina. (Aisea 43:10-12) Na itavi dokai duadua eda lesi kina oya meda “daucakacaka vata kei koya na Kalou.” (1 Kor. 3:9) Na noda vakaitavi vakalevu ena cakacaka vakavunau, e sala vinaka meda vakatitobutaka kina noda bula vakayalo kei na nodra bula vakayalo na noda itokani eda cakacaka vata ena cakacaka vakaitalatala.

Lewai Iko Vakamatau

Ena rawa ni vakavu madua se rarawa ke o vakacegui mai ena itavi ni veiqaravi ena ivavakoso. O na rairai vinakata mo vakaraitaka ni a sega ni cala na ka o cakava. Ia, vakacava ke ra rogoci iko na qase ni ivavakoso qai nanuma tiko ga ni sa sega ni ganiti iko na itavi dokai o lesi kina? Ena rairai tuburi iko na yalo ca qai vakavuna nomu sega ni via veiqaravi tale se rairai ena dredre mo vuli mai na cala o cakava. Meda vakasamataka mada na veika ratou a sotava o Jope, Manasa, kei Josefa me ratou valuta na yalolailai.

A matataka eso tale o Jope vei Jiova, e qase qai turaganilewa ena vanua era vakalevulevui kina vakalevu na turaga. (Jope 1:5; 29:7-17, 21-25) Mani yaco e dua na gauna dredre ena nona bula, a vakayalia nona iyau, ratou mate na luvena, qai tauvimate tale ga. Ena vuku ni ka qo, era sega ni dokai koya kina eso tale. “Era sa vakalialiai au,” e kaya o Jope, “ko ira era gone vei au.”​—Jope 30:1.

A kila o Jope ni sega nona cala qai vinakata me vakaraitaka vakadodonu vua na Kalou. (Jope 13:15) Ia, a waraki Jiova ga mani vakalougatataki kina. E kila ni dodonu me vakadodonutaki, vakauasivi na ka a nanuma ena vuku ni veivakatovolei a sotava. (Jope 40:6-8; 42:3, 6) Na nona yalomalumalumu o Jope e lai vakalougatataki koya kina vakalevu na Kalou.​—Jope 42:10-13.

Ke o vakacegui mai na dua na itavi ni o cakacala, o na rairai vakasamataka ke sa vosoti iko o Jiova kei ira na tacimu lotu vaKarisito, ra qai guilecava na ka o cakava. Vakasamataka mada na Tui Juta o Manasa. E ‘cakava na ka ca e vuqa ena matai Jiova qai dau veivakacudrui.’ (2 Tui 21:6) Ia, a veiqaravi tiko ga vakatui qai tamata yalodina me yacova sara nona mate. Na cava na vuna?

A qai talairawarawa ina ivakasala o Manasa. Ia, ni sega ni rogoca na ivakasala, a vakavuna o Jiova mera vala kei koya na kai Asiria, era vesuki koya ena sinucodo qai kauti koya vakavesu i Papiloni. E kea sa qai “vakamalumalumutaki koya vakalevu e na mata ni nodra Kalou na nona qase. Ka sa masu [tiko ga] kivei koya.” Nona veivutuni mai vu ni lomana o Manasa e laurai sara ga ena ka e cakava, mani vosoti kina.​—2 Vei. 33:12, 13.

Ni vakacegui mai nona itavi e dua, ena taura toka na gauna me qai vakalesui vua na itavi kece. Ni toso na gauna ena rairai soli vakalailai na itavi mo qarava. Ni o ciqoma qai solia kina nomu vinaka taucoko, o na vakacolati tale ena so na itavi. E sega ni kena ibalebale qo ni na rawarawa na kena rawati. Eso na ka ena rairai vakadredretaka qori. Ia na nomu yalorawarawa kei na nomu vosota ena lai tini vinaka.

Kena ivakaraitaki o Josefa na luvei Jekope. Ni se yabaki 17, ratou a volitaki koya vakatawadodonu na tuakana me bobula. (Vkte. 37:2, 26-28) A sega ni namaka o koya me ratou cakava qo na tuakana dina. Ia a yalorawarawa ena ituvaki qo qai vakalougatataki koya o Jiova, ‘a sa lewa tiko [o Josefa] na vale ni nona turaga na kai Ijipita.’ (Vkte. 39:2) E muri, a biu i valeniveivesu o Josefa. Ia a yalodina tiko ga qai dau tiko vata kei koya o Jiova, mani lesi kina me qarava na veika e baleta na valeniveivesu.​—Vkte. 39:21-23.

A sega ni kila o Josefa ni vakainaki na ka kece a sotava. A tomana tiko ga na ka e rawa ni cakava. E vakayagataki koya o Jiova me rawa ni vakabula na yatukawa ena basika kina na Kawa yalataki. (Vkte. 3:15; 45:5-8) Dina nida na sega ni vakataki Josefa ena itavi levu a qarava, ia na iVolatabu e vakaraitaka ni o Jiova e solia na itavi dokai vei ira nona dauveiqaravi. Saga mo vakatotomuri Josefa.

Vuli Mai na iTuvaki Dredre

Eratou sotava na ituvaki veivakayalolailaitaki o Jope, Manasa, kei Josefa. Eratou a ciqoma na veika a vakatara o Jiova, ratou qai vulica kina eso na ka bibi. Na cava o na vulica kina?

Raica na ka e vinakata o Jiova mo vuli mai kina. Ni bikai Jope na yalolailai, a kauaitaki koya ga, lai vakawalena kina na veika bibi. Ena vuku ni veivakadodonutaki vakayaloloma i Jiova e kilai yalona tale, a qai kaya: “Ka’u a cavuta kina na ka ka’u a lecava.” (Jope 42:3) Ke o rarawa ena vuku ni nomu vakacegui mai na dua na itavi, ‘mo kua ni dokai iko ga me vaka sa sega ni dodonu mo dokai iko; me yalomatua ga na nomu nanuma.’ (Roma 12:3) Ena rairai saga tiko o Jiova me veisautaki iko ena sala o sega ni kila.

Ciqoma na veivakadodonutaki. E rairai nanuma o Manasa ni a sega ni ganiti koya na nona vakadodonutaki. Ia, a ciqoma ga, veivutuni qai vakanadakuya nona sala ca. Se mani vakacava na nomu rai me baleta na nomu vakadodonutaki, ‘vakamalumalumutaki iko ena mata ni Turaga [o Jiova], ena qai laveti iko cake o koya.’​—1 Pita 5:6; Jeme. 4:10.

Mo dau yalovosovoso qai yalorawarawa. Na veika a sotava o Josefa a rawa sara ga ni vakavuna me cati ratou na tacina qai veisosomitaka na ca. Ia, e yalomatua ga qai yalololoma. (Vkte. 50:15-21) Ke o rarawa vakalevu, vosota ga. Mo yalorawarawa ni vakavulici iko o Jiova.

O dau veiqaravi tu ena ivavakoso vaKarisito? Mo vakarawarawataka vei Jiova me na lesi iko ena itavi dokai. Qo ena nomu vaqaqacotaka nomu bula vakayalo. Saga mo dau yalovosovoso qai yalomalumalumu. Tu vakarau mo qarava na itavi e lesi vei iko. Mo nanuma tiko ni na “sega ni bureitaka e dua na ka vinaka [o Jiova] vei ira era sa lako vakadodonu.”​—Same 84:11.

[Tikina bibi ena tabana e 30]

Gumatua ena vakabauta ena nomu masu mai vu ni lomamu

[iYaloyalo ena tabana e 31]

Noda vakaitavi vakalevu ena cakacaka vakavunau, e sala vinaka meda vakatitobutaka kina noda bula vakayalo

[iYaloyalo ena tabana e 32]

Mo vakarawarawataka vei Jiova me na lesi iko ena itavi dokai