Toro Voleka Vua na Kalou
A “Vakamasuti Jiova”
“AU NANUMA ni tawayaga na noqu bula,” e tukuna e dua na tagane sa sega ni muria na ivakatagedegede ni Kalou a vakavulici kina ni se gone. Ni saga me veisautaka na ivakarau ni nona bula, e nanuma ni sa na sega tu ga ni vosoti koya na Kalou. Ia a vakacegui na tagane a veivutunitaka nona cala ena itukutuku me baleti Manasa e volai ena 2 Veigauna 33:1-17. Ke o nanuma ni o tawayaga ena vuku ni cala o cakava e liu, ena rairai uqeti iko tale ga na ivakaraitaki i Manasa.
A tuberi ena dua na vuvale e qarava na Kalou o Manasa. Na tamana o Esekaia, e dua vei ira na tui vinaka duadua e Juta. A sucu o Manasa ena rauta na tolu na yabaki ni oti nona vakaikuritaka vakacakamana o Jiova na bula nei Esekaia na tamana. (2 Tui 20:1-11) E raica votu o Esekaia ni luvena qo e nona isolisoli na Kalou yalololoma, qai saga me vakavulici luvena me taleitaka na sokalou savasava. Ia sega ni o ira kece na gone e qaravi Kalou na nodra itubutubu era na muria na nodra ivakaraitaki. Qo sara ga na ka a cakava o Manasa.
Ni se yabaki 12 o Manasa sa takali o tamana. E rarawataki dina nona sa tekivu “caka ca e na mata i Jiova” o Manasa. (Tikina e 1, 2) Era vakamua beka na tui gone qo na daunivakasala era sega ni kauaitaka na sokalou savasava? E sega ni tukuna na iVolatabu. Ia e tukuna ga ni a goleva o Manasa na qaravi kalou lasu qai tawayalololoma. A vakaduria na nodra icabocabonisoro na kalou lasu, a cabori ira sara mada ga na luvena me isoro, dau vakatevoro, qai vakaduria e dua na matakau ceuceu ena valenisoro i Jiova mai Jerusalemi. Ena nona yalokaukaua a sega ni via rogoca na ivakaro i Jiova, na Kalou a vakavuna na nona sucu ni a vakaikuritaka vakacakamana na bula nei tamana.—Tikina e 3-10.
A mani vakatara gona o Jiova me vesu ena sinucodo o Manasa ni kau yani i Papiloni. Ni tu vakavesu e kea a liaca tale kina o Manasa na nona ivalavala. A raica rawa beka ni sega vei ira na matakau na kaukaua mera taqomaki koya? E vakasamataka tale beka na veika a vakavulica vua o tamana ni se gone? Se mani cava e vakasamataka ena gauna oya, a veisau na ivakarau ni lomana. E kaya na kena itukutuku: “Sa vakamasuti Jiova na nona Kalou, ka vakamalumalumutaki koya vakalevu . . . Ka sa masu [tiko ga] kivei koya.” (Tikina e 12, 13) Ia e rawa beka vua na Kalou me vosota e dua e vakayacora na ivalavala torosobu va oya?
E tarai Jiova sara ga na nona veivutuni dina o Manasa. E rogoca na nona vakamamasu me vosoti “ka kauti koya . . . ki Jerusalemi ki na nona matanitu” me liutaka tale. (Tikina e 13) A vakadinadinataka na nona veivutuni o Manasa ena nona vakarusa na matakau mai na nona itikotiko qai uqeti ira na nona tamata “me ra qaravi Jiova.”—Tikina e 15-17.
Ke o nanuma ni sega ni ganiti iko na veivosoti ni Kalou ena cala o cakava eliu, ena vakacegui iko na ivakaraitaki i Manasa. Na kena itukutuku e okati ena Vosa uqeti ni Kalou. (Roma 15:4) E macala ni vinakata o Jiova meda kila ni “tu vakarau me veivosoti.” (Same 86:5, NW) E kauaitaka gona o Jiova na ivakarau ni lomai koya e cala, sega ni valavala ca e cakava. Ni masu ena veivutuni dina, e biuta na nona itovo ca, qai cakava na ka e dodonu ena rawa kina ni ‘vakamasuti Jiova,’ me vaka a cakava o Manasa.—Aisea 1:18; 55:6, 7.
Wili iVolatabu e Vakatututaki ena Janueri: