Na Vuli ena Rawati Kina na Bula
1 E veivakacegui dina na noda raica nodra marau o ira na sa mai kila na ka dina ena Vosa ni Kalou! Io, e vakavu marau dina na noda vakavulici ira mera mai kilai Jiova kei na veika e nakita tu vua na kawatamata. Na vuli vaka oqo e rawa ni rawati kina na bula tawamudu.—Joni 17:3.
2 Vuna e Uasivi Kina: Dua na ka na veimataqali vuli sa caka tu nikua, kei na levu tale ga na veimataqali ulutaga e vulici. (Dauv. 12:12) Ia na vuku kece oqori e sega ni vakatauvatani rawa kei na ‘cakacaka veivakurabuitaki ni Kalou.’ (Caka. 2:11) Vakacava e vakavolekati ira beka na kawatamata vua na Dauveibuli kei na nona inaki na vuli e caka tu e vuravura? E sa vukei ira beka na tamata mera kila na ka e yacovi ira na sa mate, kei na vuna e sa rui levu kina na rarawa? E solia beka na inuinui vei ira na tamata? E sa vakavinakataka beka na bula vakavuvale? E sega. Na vuli duadua ga e vakarautaka na Kalou ena sauma na taro bibi e vauca na noda bula.
3 Na vuli e vakarautaka na Kalou e vulici kina e dua na ka e lekata sara ga vakalevu na vuravura nikua, oya na itovo savasava. Na Vosa ni Kalou e cavuraka laivi mai na lomadra o ira era ciqoma ra qai bulataka na kena ivakavuvuli mera kua ni veicati vakamatatamata se boletaki vanua se yavusa. (Iper. 4:12) E uqeti ira e so mera biuta na itovo kaukaua kece ga ra qai ‘vakaisulu ena tamata vou.’ (Kolo. 3:9-11, VV; Maika 4:1-3) E vukei ira tale ga e vica na milioni mera vakanadakuya vakadua na ivalavala dukadukali se na ivakarau ca e cata na Kalou.—1 Kor. 6:9-11.
4 Vuna e Bibi Kina Nikua: E vakasalataki keda na Dauveivakavulici Levu ena ibalebale ni gauna eda sa bula tu kina oqo. Na nona ivola e parofisaitaki tu kina na itukutuku butakatakata ni nona veilewai, e dodonu me vakarogoi e vuravura kece. (Vkta. 14:6, 7) E sa veiliutaki tu oqo mai lomalagi o Karisito, sa voleka ni vaqeavutaki na lotu lasu kece e vuravura. Na Matanitu ni Kalou tale ga sa vakarau vakarusa na veimatanitu kece e vuravura. (Tani. 2:44; Vkta. 11:15; 17:16) Oya na vuna e sa qai bibi ga kina mera vakadinata na tamata nona sa veiliutaki tiko na nona Tui na Kalou, mera dro tani mai vei Papiloni na Ka Levu, mera qai masuta ena vakabauta na yaca ni Kalou. (Same 2:11, 12; Roma 10:13; Vkta. 18:4) Meda solia gona noda vinaka taucoko ena noda vakavulici ira e so tale mera kila na ka dina era na rawata kina na bula tawamudu.