Me Yaga Vei Keda na Vuli e Vinaka Duadua!

NA IVOLATABU e tukuna ni Kalou o Jiova a bulia na ka kece, okati kina o keda na tamata. (Vakatekivu 1:27; Vakatakila 4:11) Me vaka ni Dauveivakavulici Levu tale ga, a vakavulici rau gona na imatai ni veiwatini o Atama kei Ivi, qai vakarautaki rau me rau bula ena were totoka mai Iteni. A nona inaki me na vakavulici rau tiko ga, qai solia vei rau na veika me rau bula kina me tawamudu. (Vakatekivu 1:28, 29; 2:15-17; Aisea 30:20, 21, NW) Vakasamataka mada na mataqali bula a dulaki tu me rau na rawata!

Ia, e ka ni rarawa ni rau a vakawalena na imatai ni veiwatini. Nodrau talaidredre e tekivu kina na ivalavala ca kei na vakaleqai ni yagoda na kawatamata. (Vakatekivu 3:17-19; Roma 5:12) Me baleti ira na bula ni oti ga e vica na itabatamata mai na gauna a bulibuli kina na Kalou, e kaya na iVolatabu: “A sa raica ko Jiova ni sa ka levu nai valavala ca ni tamata e vuravura, io sa ca walega e na veisiga kecega nai naki kecega kei na nanuma ni lomana.”—Vakatekivu 6:5.

Sa oti oqo e rauta ni 4,500 na yabaki na nona a vakadeitaka o Jiova ni dau malele na tamata ina ca, qai sa torosobu tiko ga edaidai na ituvaki ni kawatamata. Levu era sega ni maduataka nira lasu, butako, se ra cakava na itovo kaukaua vei ira na tani. Dua na ka na levu ni leqa e sotavi tu nikua, e sa sega tale ga na veikauaitaki. Sega li ni sa qai luluqa tiko ga na bula veimaliwai, wili kina na bula vakavuvale? Ia, me kua ni beitaki na Kalou ni vakavuna na ituvaki eda bula tu kina edaidai, se me nanumi ni sa sega ni kauai ena leqa eda sotava tu ena gauna oqo. O Jiova e dau kauaitaka e veigauna na veika e vauca na bula ni kawatamata, dau qai tu vakarau me vakavulici ira era gadreva na nona veidusimaki me rawati kina na bula marau. Rauta na 2,000 na yabaki sa sivi, a vakaraitaka o Jiova ni taleitaka me vakavulici ira era vinakata me yaga na nodra bula ena nona tala mai vuravura na Luvena, o Jisu Karisito. A kotora o Jisu e dua na ivakaraitaki ni vuli e uasivi, ni a vakavulici koya sara ga na Dauveivakavulici Levu ena loma ni vica vata na bilioni na yabaki.

Lotu Vakarisito Dina​—E Dua na Taba ni Vuli

O Jisu Karisito a tauyavutaka na lotu Vakarisito dina, e yavutaki ena loloma na kena ivakarau ni bula. Ni dua e lotu Vakarisito, na nona vakasama kei na nona ivalavala kece e dodonu me salavata kei na loma ni Kalou, ena inaki me dokai qai vakalagilagi kina na yacana. (Maciu 22:37-39; Iperiu 10:7) E tokona o Jiova na ivakavuvuli i Jisu me baleta na ivakarau ni bula oqori. Eda wilika gona ena Joni 8:29 na nona tokoni Jisu na Kalou: “Sa tiko vata kei au ko koya sa talai au mai: sa sega ni biuti au ko Tamaqu me’u tiko duaduaga: ni’u sa kitaka tikoga na ka sa vinakata ko koya.” Io, a tokoni Jisu o Tamana qai dusimaki koya tale ga ena nona cakacaka vakaitalatala. O ira na imuri i Jisu ena gauna e liu, era a dusimaki tale ga nira sotava na veika dredre ena nodra bula. A rawati oqori ena nona vakayagataka o Jiova na Luvena me vakavulici ira. Nodra muria gona na ivakavuvuli i Jisu kei na nona ivakaraitaki e yaco kina me veisau na nodra ivakarau ni bula. E dina tale ga oqori vei ira na tisaipeli i Jisu nikua.—Raica na kato “A Tara na Bula na iVakavuvuli i Jisu,” ena tabana e 6.

Dua na ka e kilai tani kina na ivakavuvuli ni lotu Vakarisito dina, oya ni veika e vulici e tara na vakasama kei na loma ni tamata, e uqeta sara ga me veisau na bula. (Efeso 4:23, 24, VV) Taura mada e dua na kena ivakaraitaki, dikeva na ivakavuvuli i Jisu me baleta na nona dina e dua vei watina: “Dou sa rogoca sa kainaki vei ira eliu, Mo kakua ni dauyalewa [“veibutakoci,” NW]: ia koi au, ka’u sa kaya vei kemudou, O koya yadua ena raica na yalewa me dodomo kina, sa dauyalewa [“veibutakoci”] oti kaya e lomana.” (Maciu 5:27, 28) Laurai ena veivosa oqori, ni a vakavulica o Jisu vei ira na nona tisaipeli ni dodonu me savasava na lomadra. Ke sega, ena rawa ni sotavi na leqa mosimosi e vu mai na vakasama kei na gagadre tawakilikili, e dina ni sega beka ni lai vakavatukanataki sara. Sega li ni o vakadinata ni vakasama ca e rawa ni tini vakayacori kina na ivalavala e vakacudruya na Kalou, ra qai sotava kina na tani na rarawa?

O koya gona, na iVolatabu e solia na ivakasala: “Ni kakua ni vakaitovotaki kemuni e na veimataqali i tovo ni vuravura oqo. Ia ni vakadonuya ga vua na Kalou me vakavouya taucoko sara na nomuni vakasama ka me veisautaki kina na nomuni bula e loma. Ko ni na qai kila rawa kina na loma ni Kalou, ka kila tale ga na ka yaga, ka vinaka, ka uasivi sara.” (Roma 12:2, VV) O na rairai taroga: ‘E rawa beka ni vakavouya na noqu vakasama na veika au vulica?’ Na kena vakavoui e vauci kina na noda veisautaka na ivakarau ni noda vakasama, ena noda vakatawana ena ivakavuvuli kei na veidusimaki e yavutaki ena Vosa ni Kalou. Rawa wale ga oqo ena noda ciqoma na veivakavulici e vakarautaka na Kalou ena nona Vosa.

E Uqeti Keda Meda Veisau

“Sa bula ka kaukauwa na vosa ni Kalou.” (Iperiu 4:12) E kaukaua, se cakayaco tiko ga na vosa ni Kalou ena bula ni tamata yadua, e ivakadinadina ni sega ni madra. Rawa tale ga ni uqeta e dua me veisautaka na nona bula, yaco me dua na lotu Vakarisito dina, qai dua na tamata vinaka cake. Na veivakaraitaki e koto oqo e ivakadinadina ni yaga na vulici ni iVolatabu.

E kaya o Amelia, na marama a cavuti ena imatai ni ulutaga: “A sega ni rauta na noqu sasagataka duadua voli meu vakavinakataka na ituvaki e vale. Niu tekivu vuli iVolatabu kei ira na iVakadinadina i Jiova, au vakila ni rawa ni vakavinakataki na neitou bula, au sa tekivu veisautaka sara ga na noqu rai. Au vulica meu dau vosota, meu kua tale ga ni dau cudrucudru. Yaco na gauna, a tomani au o watiqu ena vuli iVolatabu. A sega ni ka rawarawa vua me muduka na nona daugunu, ia a yaco na gauna me biuta. Oqo e dolava e dua na sala me keirau vakavinakataka kina na neirau bula vakawati. Nikua keirau sa dua na lotu Vakarisito mamarau, keirau sa tugana tale tiko ga vei ratou na luve i keirau na ivakavuvuli vakaivolatabu.”—Vakarua 6:7.

Na ivakavuvuli ni lotu Vakarisito dina ena rawa ni sereki keda mai na malumalumu e vakabobulataki keda tu, kei na ivakarau ni bula tawakilikili. A vakadinadinataka oqo o Manueli.a Ni se qai yabaki 13, a dro mai nodratou, e lai tekivu vakayagataka sara na mariwana. Yaco na gauna, sa tekivu vakayagataka tale ga na wainimate gaga na heroin. E dau veiyacovi kei ira na tagane, vaka tale ga kina kei ira na yalewa me rawata kina na ilavo kei na vanua ni moce. So na gauna, e dau butakoca na nodra iyau na tani me rawa ni bula kina. Voleka ni veigauna ena mateni tu o Manueli ena wainimate gaga. E curusuka e valeniveivesu ena vuku ni nona itovo voravora. Dua na gauna, a bala i valeniveivesu me yabaki va, qai lai coko tu ena nona volitaka butako na iyaragi. Ni sa vakamau oti o Manueli, e se sotava voli ga na ca ni nona ivalavala. A kaya: “Keirau lai vakaitikotiko sara ena dua na banitoa makawa. Au se nanuma vinaka tiko na gauna e dau vakasaqa kina o watiqu ena matadravu e buli ena biriki. Ena levu ni veilecayaki ni neirau bula, era tini uqeti watiqu kina o ira na wekaqu me biuti au.”

Na cava a vakavuna na nona veisau? Kaya o Manueli: “Dua keirau veikilai a lako mai i vale me mai wasea na veika e tukuna na iVolatabu. Au ciqomi koya ga ena noqu vinakata meu vakaraitaka vua ni sega ni bula tiko na Kalou e dau veikauaitaki. Au okata na kequ ituvaki me kena ivakadinadina. Au a kurabuitaka na nona vosota kei na nona veidokai na iVakadinadina, au mani vakadonuya meu lako ena soqoni ena Kingdom Hall. So vei ira na tiko ena soqoni era kila vinaka na noqu bula, ia era a kidavaki au ena yalomamarau. Era ciqomi au me vaka niu dua ga vei ira, e vakacegui au dina. Na kena cakayaco e uqeti au sara ga meu muduka na noqu vakaitavi ena veika e vauca na vakayagataki ni wainimate gaga, au qai saga me dua na noqu cakacaka saumi e sega kina na veidabui. Au mani tekivu vuli iVolatabu, ni oti ga e va na vula au sa vakadonui meu lako ena cakacaka vakavunau. Ni oti tale e va na vula, au sa papitaiso meu dua na iVakadinadina i Jiova.”

E tarai iratou vakacava o Manueli kei na nona vuvale na nodratou yaco me ratou lotu Vakarisito dina? “Keu a sega ni vuli iVolatabu, au vakabauta au sa mate ena vica na yabaki sa oti. Niu taurivaka na ivakarau ni bula e vakavulica o Jisu, e vakaduavatataki keitou sara ga vakavuvale. Rau na sega ni sotava kina na luvequ na ituvaki au a sotava niu se itabagone. Dua na ka na noqu marau kei na noqu vakavinavinaka levu vei Jiova ena qaqaco vinaka ni neirau veiwekani vakaveiwatini. So sara mada ga keimami veikilai era vakacaucautaki au, ra qai kaya ni sala au sa muria tiko oqo e uasivi duadua.”

Ia, na ivakarau ni bula ni lotu Vakarisito e sega ni vinakati ga kina na ivalavala savasava, e gadrevi tale ga na savasava vakayago. A vakadeitaka na tikina oqori o Jone, e vakaitikotiko ena dua na yasayasa dravudravua sara mai Sauca Aferika. E vakamacalataka: “So na gauna ena sega tu ni sili o luve i keirau yalewa me dua na macawa, ia keirau sega ni kauaitaka.” Kaya o watina ni dau duka qai sakuca tu ga na nodratou vale. Ia ni ratou sa vakavulici ena veika e vauca na lotu Vakarisito, sa veisau sara na nodratou ituvaki. Sa muduka o Jone na nona dau veitokani kei ira na ilawalawa daubutako motoka, qai sa kauaitaki iratou vakalevu cake na nona vuvale. “Keitou vulica nida lotu Vakarisito e dodonu me savasava na yagoda, me savasava tale ga na noda isulu. Au taleitaka na ka e tukuna na 1 Pita 1:16, e vakauqeti keda meda savasava ni o Jiova e Kalou savasava. E dina ni sega ni vinaka sara na neitou vale, ia keitou dau saga ena gauna oqo me savasava qai tuvanaki vakamaqosa.”

O Rawa ni Kunea na Vuli Vinaka Duadua

Na vakasavuirogorogo era sa cavuti oti oqori e sega ni ka vou. Ena vuku ni veivakavulici e yavutaki ena iVolatabu, e vica vata na udolu na tamata era sa vukei mera vakavinakataka na nodra bula. Na nodra dau dina kei na nodra dau cakacaka, e vakacaucautaki ira kina na nodra boso ni cakacaka. Era itokani vinaka, ra veimaliwai vinaka tale ga kei ira era tiko veitikivi nira dau veikauaitaki. Ra vakadeitaka nira na valuta na gagadre ca vakayago kei na malumalumu e vakabobulataki ira tu, me rawa nira bulabula vakayago, qai vinaka tale ga kina na lomadra kei na nodra vakasama. Era vakayagataka na nodra iyau ena veika me yaga vei ira kei na nodra vuvale, sega ni veika e vakabobulataki ira tu. (1 Korinica 6:9-11; Kolosa 3:18-23) Macala gona, ni veika e sotavi ena vuku ni kena bulataki na ivakavuvuli e virikotora tu o Jiova ena iVolatabu, e ivakadinadina ni sala vinaka duadua me muri, oya na bulataki ni ivakavuvuli ni lotu Vakarisito dina. Oqo sara ga na vuli vinaka duadua. Me baleta e dua e salavata na nona bula kei na lawa ni Kalou, e kaya na iVolatabu: “Na ka kecega sa cakava ko koya ena yaco.”—Same 1:3.

E veivakayaloqaqataki dina na noda kila ni Kalou Kaukaua Duadua o Jiova, e tu vakarau me vakavulici keda. A tukuna: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova.” (Aisea 48:17) Io, o Jiova e sa vakaraitaka na sala meda muria ena ivakaraitaki kei na ivakavuvuli i Luvena o Jisu Karisito. E cakayaco dina na ivakavuvuli i Jisu ena nodra bula e levu era kilai koya ena nona bula e vuravura. Ra vakadinadinataka tale ga oqori e levu era bulataka tiko na nona ivakavuvuli nikua. Vakacava mo solia na gauna mo vulica kina na ivakavuvuli oqori? Era na marau na iVakadinadina i Jiova era vakaitikotiko ena nomuni yalava, mera vukei kemuni mo ni rawata na vuli vinaka duadua oqo.

[iVakamacala e ra]

[Kato/iYaloyalo ena tabana e 6]

A Tara na Bula na iVakavuvuli i Jisu

A vutuniyau o Sakiusa ena nona vakayagataka na nona itutu ni daukumuni vakacavacava me rawailavo kina, oya na nona dau butakoci ira na lewenivanua. Ia, a yaco me veisau ena nona bulataka na ivakavuvuli i Jisu.—Luke 19:1-10.

O Saula na kai Tarisu, a muduka na nona dau vakacacani ira na lotu Vakarisito qai yaco me tavuki, mani veisau kina me yapositolo o Paula.—Cakacaka 22:6-21; Filipai 3:4-9.

So vei ira na lotu Vakarisito e Korinica era ‘daudara, dausoro ina matakau, dauyalewa, viavia vaka na yalewa, daubutako, daukocokoco, daumateni, dauveivakasewasewani, kei na daukovekove.’ Ia, nira sa vulica na veika e vauca na lotu Vakarisito dina, era ‘sa sili, vakasavasavataki’ ra qai ‘vakadonui, ena yaca ni nodra Turaga o Jisu Karisito.’—1 Korinica 6:9-11.

[iYaloyalo ena tabana e 7]

Na iVolatabu e rawa ni vukei iko me yaga vinaka sara na nomu bula