iVukevuke Mera Nanumi Koya Kina na Dauveibuli na iTabagone

“NANUMI koya a Buli iko ni o se gone,” e vola na vuku o Solomoni ena 3,000 na yabaki sa oti. (Dauv. 12:​1, Today’s English Version) E vakarautaki vei ira na itabagone lotu vaKarisito e dua tale na ivukevuke mera cakava rawa kina qo. Na ivola Questions Young People Ask​—Answers That Work, Volume 2, a sevutaki ena Soqo ni Tikina ni iVakadinadina i Jiova, ena Me 2008 ina Janueri 2009. E kena usutu “Dusimaki ena Yalo ni Kalou.” Dina ni se bera ni vakadewataki na ivola qo ena vosa vakaViti, ia eso na ulutaga lalai era tiko kina e sa vakadewataki vakaViti ena ulutaga qo.

E volai toka e loma ni waqana, na nodratou ivola na iLawalawa Dauvakatulewa vei ira na itabagone. Ratou vola: “Sa neitou vakamamasu ni itukutuku e tabaki ena ivola qo, ena vukei iko mo vosota na idre ni veimurimuri kei na veitemaki era sotava tiko na itabagone nikua, qai vukei iko tale ga me salavata kei na inaki ni Kalou na nomu vakatulewa.”

Era vinakata dina na itubutubu mera tuberi luvedra ena “ivakavuvuli kei na ivakasala i Jiova.” (Efeso 6:4) Nira yacova yani na bula vakaitabagone e levu, e sega ni rawa nira vakatulewa vakataki ira. Ke o itubutubu, o rawa vakacava ni vukei luvemu me yaga vua na veika e tabaki ena ivola qo? Qo eso na vakatutu.

▪ Me dua nomu ivola, kila vinaka sara. Qo e sega ni okati ga kina na kena wiliki. Saga mo kila na vakasama e tiko kina. Na ivola qo e sega ni tukuna vei ira na itabagone na cava e donu kei na ka e ca, e uqeti ira ga mera “vakayagataka nodra vakasama.” (Iper. 5:14) E vakasalataki ira tale ga ena sala mera tokona kina na ka e dodonu. Me kena ivakaraitaki, ena Wase  15 (“Au na Vorata Vakacava na iDre ni Veimurimuri?”) e sega ni uqeti ira wale ga na itabagone mera vakuakua. E vakaraitaka tale ga na vakayagataki ni ivakavuvuli vakaivolatabu me wali kina na leqa, mera ‘kila kina na ka mera tukuna vua na tamata yadua.’​—Kolo. 4:6.

▪ Vakayagataka vinaka na iwalewale yaga e tiko ena loma ni ivola. Dina ni qo e baleti ira ga na itabagone, vakacava mo volavola ga ena vanua e veiganiti?a Me kena ivakaraitaki, nomu vakasamataka tiko na rua na taro e tiko ena tabana e 16 me baleta na veibuku, vakacava mo vakasamataka lesu nomu gauna vakaitabagone. O rawa ni vakalewena sara ga nomu isaunitaro ena vanua e lala toka, me vaka ga na nomu sauma na taro qori ena gauna o se itabagone kina. Oti mo na tarogi iko: ‘Sa veisau vakacava na noqu rai me baleta na ulutaga qo ni toso na gauna? Na cava au sa kila rawa mai na gauna au se itabagone kina, au na wasea vakacava vei luvequ?’

▪ Doka na ka e vola o Luvemu. So tale na iwalewale era tu ena ivola qo, e rawa ni uqeti luvemu me vola nona nanuma, me qai vakasamataka vakabibi. Me nomu inaki mo kila na ka e tu e lomana, sega ni ka e vola. Ena tabana e 3 ena ulutaga qo “Mera Nanuma na iTubutubu” e vakaturi kina: “Me uqeti o luvemu me vola ga na ka e nanuma, kua ni siova na veika e via cakava duadua. De rairai ena qai tukuna vakamalua vei iko eso na ka a vola.”

iVukevuke ena Sokalou Vakavuvale

Na ivola qo na Young People Ask, Volume 2, e ivukevuke vinaka duadua e rawa ni vakayagataki ena nomudou Sokalou Vakavuvale. Me vaka ni sega ni tiko na taro ena veiparakaravu, o na vakayagataka vakacava na ivola qo? Vakacava mo vakayagataka e dua na kena na iwalewale ena ganiti luvemu?

Me kena ivakaraitaki, eso na matavuvale era na rairai marautaka na kena vakatovotovotaki ena gauna ni nodra Sokalou vakavuvale na “Ka me Caka ni yaco na iDre ni Veimurimuri” e tiko ena tabana e 132 kei na 133. Ena uqeti luvemu na imatai ni taro me vakasamataka na veivakatovolei cava e dredre duadua vua. Na ikarua ni taro e vakaraitaka na vanua e rawa ni vakatovolei kina. Ni vakasamataka oti na ka ena sotava ke mani soro koso se vorata na veivakatovolei, ena vinakati vei luvemu me vakasamataka na sala matau me vakuakua kina, me gole tani se me vosa vakadodonu. Vukei luvemu me yalomatua qai vakarautaki koya me veiganiti na ka me tukuna qai lomavakacegu ni sauma ena doudou na ka e vakavulici kina.​—Same 119:46.

iVukevuke ena Veivosaki

Na Young People Ask, Volume 2, e uqeti ira na itabagone mera veivosaki kei nodra itubutubu. Me kena ivakaraitaki, na kato me vaka na “Rawa Vakacava ni Keirau Veitalanoa kei Ta se o Na me Baleta na Veiyacovi” (tabana e 63-64) kei na “Vosa vei rau Nomu iTubutubu!” (tabana e 189). E tiko kina eso na vakatutu yaga me veivosakitaki kina eso na ulutaga e sega ni dau veivosakitaki vakalevu. E vola e dua na goneyalewa yabaki 13, “Na ivola qo e uqeti au meu vakaraitaka vei rau noqu itubutubu na lomaqu​—so tale ga na ka au cakava.”

Na ivola qo e vakaraitaka eso tale na sala e rawa ni caka kina na veivosaki. Ena iotioti kece ni veiwase ena tiko kina e dua na kato e kena ulutaga “Cava o Nanuma?” Me kua ni railesuvi ga kina na ka o wilika, ia rawa sara ga ni dou veivosakitaka. Ena icavacava ni veiwase kece e tiko tale ga kina e dua na kato e kena ulutaga “Ka me Caka!” Na kato qo e uqeti ira na itabagone mera vola kina na ka mera cakava kei na ka era vulica. Na iotioti ni ka e tukuni ena kato: “Na ka au na via tarogi rau kina na noqu itubutubu ena ulutaga qo . . . ” Qo ena uqeti ira na itabagone mera kere ivakasala vei ira nodra itubutubu.

Uqeta na Lomadra!

Ni o dua na itubutubu, e nomu inaki mo uqeti luvemu. E rawa ni ivukevuke yaga na Young People Ask, Volume 2, mo cakava vaka kina. Wilika mada na ka e cakava e dua na tama ni vakayagataka na ivola qo, me veivosaki vinaka kina kei luvena yalewa.

“E tiko na vanua keirau dau taleitaka kei Rebekah me keirau dau taubale kina, vodo basikeli vata se draiva kina. E dau rawarawa sara ni tukuna na lomana ni keirau gole ena vanua qo.

“Na imatai ni ka keirau wilika, ya na ivola mai vei ratou na iLawalawa Dauvakatulewa kei na ‘Mera Nanuma na iTubutubu.’ Me vaka ga na vakasama e tiko ena tabana e 3, au vinakati luvequ yalewa me kila, ni rawa ni vola nona nanuma ena nona ivola. Au na sega tale ga ni raica na veika e vola.

“Au vakalaiva me digia o Rebekah na wase e via veivosakitaka. Na imatai ni wase a digia, ‘Meu Qitora Beka na Qito ena Vidio se Kompiuta?’ Au sega sara ga ni bau tadra ni na digia ya! Ia a tiko na vuna a digia kina. Levu vei ira na nona icaba era qitora tiko e dua na qito vakadomobula. Au sega ni kila ni bini tu kina na itovo kaukaua kei na vosavosa ca! Au qai kila ga qo ena gauna keirau veivosakitaka kina na “Ka me Caka!” ena tabana e 251. Na kato qo e vukei Rebekah ena ka me tukuna ke dua e tukuna vua me qitora na qito qo.

“Ni keirau veivosakitaka qo, sa sega tale ni tu suka o Rebekah me tukuna na ka e vola. E taladrodro neirau veivosaki ena gauna ni neirau vuli. Keirau veivuketaka na wiliwili, qai voleka ni ka kece e via vakamacala kina, wili kina na itaba kei na kato. Au dau tukuna vua noqu rai ena gauna au se gone kina vakataki koya, oti sa qai tukuna o koya na ka e vakilai tu ena gauna qo. E levu na ka e via veivosakitaka!”

Ke o dua na itubutubu, sega ni vakabekataki ni o marautaka sara ga na ivola qo ena gauna a sevutaki kina. Sa kena gauna qo mo vakayagataka vinaka sara. E nuitaka na iLawalawa Dauvakatulewa ni ivola qo na Questions Young People Ask​—Answers That Work, Volume 2, ena yaga vakalevu ena vuvale. Me yaga mada ga vei keda kece​—vakauasivi vei ira na itabagone​—mera “lako tiko ga ena yalo tabu.”​—Kala. 5:16.

[iVakamacala e ra]

[Kato ena tabana e 30]

Na Ka Era Tukuna Eso na iTabagone

“E dua dina na ivola ena vinakati kina me tiko e dua nomu penikau, mo qai wilika, salavata kei na nomu vakasamataka vakatitobu. E vaka e dua na dairi, o rawa ni raica lesu kina na kemu ituvaki qai saga me vinaka tiko ga nomu ivakarau ni bula.”​—Nicola.

“Au dau temaki vakalevu meu dau veibuku, vei ira mada ga era itovo vinaka. E uqeti au na imatai ni wase ni ivola qo meu vakadeitaka ni se bera na kena gauna meu veibuku kina, veitalia se cava era kaya eso.”​—Katrina.

“Na kato ‘O Nakinaki Tiko mo Papitaiso?’ e vukei au meu raica vakabibi noqu papitaiso. E uqeti au meu raica lesu na ivakarau ni noqu dau vuli vakataki au kei na noqu masu.”​—Ashley.

“Dina ni rau vakavulici au noqu itubutubu lotu vaKarisito ena gauna au se gone kina, ia e vakavure vakasama dina na ivola qo ena ka meu cakava ena noqu bula. E vakarawarawataka tale ga meu dau veivosaki kei rau noqu itubutubu.”​—Zamira.

[iYaloyalo ena tabana e 31]

Ni o itubutubu saga mo kila vinaka sara na ivola qo

[iYaloyalo ena tabana e 32]

Me nomu isausau mo uqeta na loma i luvemu