E Rawa Beka Mo Vakarabailevutaka Nomu Loloma?

ENA vinakati me kaukaua vinaka na sinucodo e vesu toka kina na ikelekele me kua kina ni ciri na waqa. Ena rawa ga oqo kevaka e kaukaua vinaka na isema yadua ni sinucodo. Ke sega, ena cavuka na sinucodo.

E rawa tale ga ni vaka kina na ivavakoso vakarisito. Me rawa ni kaukaua qai bulabula vinaka tiko ga na ivavakoso, ena vinakati mera sema vinaka ra qai duavata na lewena. Na cava e semai ira vata? Na loloma, baleta e isema vinaka duadua ni duavata. Sa rauta me tukuna o Jisu Karisito vei ira nona tisaipeli: “[A]u sa solia vei kemudou e dua na i vakaro vou, mo dou veilomani. Me vaka au sa lomani kemudou, mo dou veilomani tale ga vaka kina. Na ka oqo era na kila kina na tamata kece ga ni dou sa noqu tisaipeli, ’oya kevaka dou sa dau veilomani.” Na nodra veilomani na lotu Vakarisito dina e uasivia na veikilai wale tu ga kei na veidokai. Era vakuai ira ga ena veika e so me rawa kina nira veilomani.​—Joni 13:​34, 35, VV.

Rokovi Ira Eda Vakabauta Vata

Era lewe ni levu na ivavakoso na duidui matatamata e duidui na nodra yabaki ni bula, duidui na nodra itovo vakavanua, qai duidui tale ga na vosa era vakayagataka. E duidui na ka era taleitaka kei na ka era sega ni taleitaka, na veika era nuitaka kei na ka era rerevaka, qai duidui tale ga na nodra icolacola, e so era tautauvimate se dravudravua. Na duidui oqo e rawa ni vakaleqa na duavata ni lotu Vakarisito. Na cava gona e rawa ni vukei keda meda vakarabailevutaka na noda loloma me rawa kina nida duavata tiko nida duidui vaka oya? Na noda rokovi ira dina na lewe ni ivavakoso ena vukei keda meda veilomani tiko ga.

Eda rokova vakacava e dua? E kaya na New Shorter Oxford English Dictionary nida rokova ena noda kauaitaka, noda doka da qai vakavinavinakataki koya. Kevaka eda rokovi ira eda vakabauta vata, eda na kauaitaka na veika era gadreva, eda na vakamareqeti ira, dokai ira, da qai vakavinavinakataki ira nira mai sokalou vata kei keda. Oqo ena vakavuna meda dau lomani ira vakalevu. Ena vukei keda meda veilomani vakalevu na noda raica vakalekaleka na ka e vola na yapositolo o Paula vei ira na kai Korinica ena imatai ni senitiuri.

Ra ‘Sogota na Yalodra’ na Kai Korinica

A vola na imatai ni nona ivola vei ira na kai Korinica o Paula ena 55 S.K. kei na kena ikarua ena yabaki e tarava. Na ka e vola e vakaraitaka ni so vei ira na kai Korinica era sega ni rokovi ira e so era vakabauta vata. E vaka oqo na ivakamacala i Paula: “Kemuni na kai Korinica, keitou sa vosa vakasavasava sara ga vei kemuni. Keitou sa dolava tale ga na yalo i keitou vei kemuni. Keitou sa sega ni sogota na yalo i keitou vei kemuni; ia ko i kemuni ko ni sa sogota ga na yalomuni vei keitou.” (2 Korinica 6:​11, 12, VV) Na cava na ibalebale ni nona tukuna o Paula nira ‘sogota na yalodra’?

E tukuna tiko ni qiqo na yalodra ra qai sega ni lomasavu. E kaya e dua na vuku ni iVolatabu ni nodra lomani Paula na kai Korinica e “tarovi ena vuku ni so na ituvaki dredre e sega ni yavutaki vinaka . . . kei na nodra nanuma cala ni caka vei ira na ka e sega ni dodonu.”

E tomana o Paula: “Au sa vosa vei kemuni me vaka ko ni sa luvequ; . . . Ni dolava vakalevu na yalomuni.” (2 Korinica 6:​13, VV) E uqeti ira na kai Korinica o Paula mera vakarabailevutaka na nodra loloma vei ira na vakabauta vata. Me uqeti ira na rai dodonu kei na veinanumi, mera kua ga ni rai cala, se ra kauai ena so na cala lalai.

Vakarabailevutaki ni Loloma Nikua

E veivakauqeti dina na noda raici ira na dausokalou dina nira saga vakaukaua mera dau vakarabailevutaka na nodra loloma. Sega ni vakabekataki ni gadrevi kina na sasaga vakaukaua. E sega ni ka me vakasamataki wale tu ga. Me kua ni muri na nodra itovo na sega ni bulataka na ivakatagedegede ena iVolatabu. O ira vaka oqo era sega so ni dau veirokovi. Era sega ni dau veikauaitaki, era tawaveidokai ra qai dau veivakalialiai. Me kua mada ga ni uqeti keda na itovo vaka oya. Sa na bau rarawataki dina kevaka e vakarairai wale tiko ga na noda loloma da qai sega ni veinuitaki, me vaka ga era cakava na kai Korinica. Ena rawa ni yaco oqo kevaka e dau totolo ga noda raica na nodra cala na tacida, ia eda vakalecalecava na nodra itovo vinaka. Ena yaco tale ga oqori nida sogota na yaloda vua e dua baleta ni duidui matatamata qai duatani na nona itovo vakavanua.

Ia na dauveiqaravi ni Kalou ena sega ni cakava na ka oqori, baleta ni rokovi ira dina na vakabauta vata, qai uqeti koya me vakarabailevutaka na nona loloma. E taleitaki ira vakalevu qai doka nodra dodonu, e kauaitaka tale ga na ka era gadreva. Kevaka mada ga e kudruvaka e dua na ka dodonu, ena tu vakarau me veivosoti, qai sega ni yaloca tale tiko. Ena sega ni tiko vua na nanuma cala me baleti ira na vakabauta vata. Na nona dau lomasoli ena vakaraitaka kina na loloma a tukuna sara tu mai liu o Jisu: “Na ka oqo era na kila kina na tamata kece ga ni dou sa noqu tisaipeli, ’oya kevaka dou sa dau veilomani.”​—Joni 13:​35, VV.

Mera Levu na Nomu iTokani

Na loloma dina ena uqeti keda me levu na noda itokani da qai qara na vakailala kei ira ena ivavakoso eda sega soti ni dau veitaratara. O cei beka era okati tiko e ke? Oqo e so na tacida tagane kei na yalewa lotu Vakarisito era mamadua, se tiko na vuna e vica wale ga kina na nodra itokani. De dua eda nanuma nida vakabauta vata ga, ia e duidui sara na ka eda taleitaka. Vakacava mada e so na veitokani era talanoataki tu ena iVolatabu, sega li nira duidui tale ga?

Kena ivakaraitaki o Ruci kei Neomai, erau sega ni yabaki vata, rau sega ni matatamata vata qai duidui na nodrau itovo vakavanua, vaka kina na nodrau vosa. Ia e sega ni vakalatilati na duidui oqori ena nodrau mai veitokani vinaka. Dua tale o Jonacani, a susugi me ravouvou, ia o Tevita e dua ga na ivakatawanisipi. E veisivi sara na nodrau yabaki ia na kedrau italanoa ena iVolatabu e ivakaraitaki vinaka ni veitokani voleka. E vu ni marau qai vakauqeti iratou kece vakayalo na nodratou veitokani oqori.​—Ruci 1:​16; 4:​15; 1 Samuela 18:3; 2 Samuela 1:​26.

Nikua mada ga, era dau veitokani voleka na lotu Vakarisito era sega ni yabaki vata, se duidui sara nodra ituvaki ni bula. Kena ivakaraitaki o Regina, e itubutubu le dua qai rua tiko na luvena itabagone.a Dau osooso qai sega na gauna me veilasamaki kina. O Harald kei Ute erau veiwatini itabaqase qai sega na luvedrau. Kena irairai ni ratou duidui sara vakalevu na rua na vuvale oqo. Ia, erau muria ga na ivakasala vakaivolatabu me rau vakarabailevutaka na nodrau loloma o Harald kei Ute. Rau dau okati Regina kei rau na luvena ena levu na ka, me ratou dau veitomani ena cakacaka vakavunau, vaka kina ena so tale na ka ni veivakamarautaki.

Rawa beka nida cakava tale ga oqori ena noda qara e levu tale na noda itokani? Vakacava mo veivolekati kei ira eda vakabauta vata da sega ni yabaki vata, ra duidui matatamata, duidui tale ga nodra itovo vakavanua?

Kauaitaka na Ka Era Gadreva e So Tale

Na noda dau lomasoli ena uqeti keda meda kauaitaka na ka era gadreva tu e so tale. Cava soti beka era gadreva tu? Mo rai mada ena loma ni ivavakoso lotu Vakarisito. Era gadreva tu na itabagone na veidusimaki, o ira na itabaqase na veivakaukauataki, vaka kina o ira e nodra cakacaka tudei na cakacaka vakavunau mera vakavinavinakataki ra qai tokoni, ra gadreva tale ga na yalolailai tu me bau dua e rogoci ira. O keda kece e tu na ka eda gadreva. Eda vinakata meda vakaceguya na gagadre oqori ena kena vinaka duadua eda rawata.

Noda vakarabailevutaka na noda loloma e kena ibalebale tale ga na nodra kauaitaki o ira e ca tu na ituvaki ni yagodra. O kila beka e dua e tautauvimate voli, se sotava tiko e so na ka dredre? Nomu vakarabailevutaka na nomu loloma kei na nomu dau lomasoli o na kauaitaki ira kina na vaka oqori, o na vukei ira tale ga ena ka era gadreva.

Ni sa voleka ni vakayacori na parofisai vakaivolatabu, ena yaga sara vakalevu na ivau dei ni duavata ena ivavakoso, mai na iyau, kaukaua se rawaka. (1 Pita 4:​7, 8) Eda rawa ni vakaitavi kece me vakaukauataki na ivau ni duavata oqori ena noda vakarabailevutaka na noda loloma vei ira eda vakabauta vata. Eda vakadeitaka ni na vakalougatataki keda vakalevu o Jiova nida muria na vosa i Luvena, o Jisu Karisito ena nona kaya: “Sa noqu vunau oqo, mo dou veilomani, me vaka ka’u sa lomani kemudou.”​—Joni 15:12.

[iVakamacala e ra]

[Tikina bibi ena tabana e 10]

Kevaka eda taleitaki ira eda vakabauta vata, eda na dokai ira, da rokovi ira, da qai kauaitaka na ka era gadreva