Qarai Ira na Didivara kei na Mataboko ena Nomu Yalava
1 E veisureti tiko o Jiova: Me “Lako mai . . . o koya sa vinakata, me mai gunuva walega na wai ni bula.” (Vkta. 22:17) Dua na iwiliwili levu ni didivara era sa rogoca na veisureti oqo. O koya gona, ena loma ni 13 na yabaki sa oti, e tauyavu kina e Mereke e 26 na ivavakoso ni didivara qai voleka ni 50 na iwasewase lalai.
2 Oqo e vakaraitaka meda kua vakadua ni guilecavi ira na didivara, mataboko se o ira e tu vakaca na yagodra. O sa bau tovolea mada mo vukea e dua e tu ena ituvaki oqo ena nomu yalava?
3 O na Veivuke Vakacava? E dina ni sega ni vakayagataki vakalevu na vosa vagalu ena noda yalava, ia e so na didivara era sa vakavulici mera kila na vosa vagalu. O sa bau raica e so mera matanataka na veivosaki vagalu? O bau kila e dua e nomu vanua ni cakacaka se nomu koronivuli e didivara tiko e dua ena nona vuvale se mataboko e dua na wekana? Qarai ira na didivara kei na mataboko ni o veitosoyaki tiko na cakava nomu cakacaka e veisiga. O na vakadeitaka vakacava me vunautaki vei ira na Matanitu ni Kalou?
4 Mo Vunau Vakacava Vei Ira? Na wilivola vakadomoilevu e sala vinaka ni nodra vukei na mataboko mera kila na ka dina. Ia eda na vukei ira vakacava na didivara mera kila na ka dina? Ke dua ena nomu ivavakoso e kila na veivosaki kei ira na didivara, ena rawa ni vukei iko o koya. E so na dautukutuku era vulica sara ga na Vosa Vagalu me laulau kina nodra veitaratara kei ira na didivara.—Caka. 16:9, 10.
5 Vakacava ke sega ni tiko voleka e dua me vukei ira vakayalo na didivara ena nomu itikotiko? O na veivuke vakacava? O rawa ni kerea e dua na wekana me vukei iko. Eratou dau veivosaki vakacava kei na wekadratou didivara? De ratou na tu vakarau me ratou vukei iko mo veivosaki kei koya e didivara. Nomu cakava oqo ena rawa tale ga vei iratou me ratou rogoca kina na ka dina. Vakacava mo veisikovi lesu qai vosa vua e dua na lewenivuvale e daliga rogo me vukei iko? Ena rairai tarai iratou tale ga na nomu kauaitaka na wekadratou mataboko se didivara.
6 Ni o qarai ira na didivara kei na mataboko ena nomu yalava, o sa na vakaitavi sara tiko ga ena nodra rawa ni mai gunuva wale na wai ni bula.—Maciu 10:11.