O Rawa ni Lai Veivuke i Masitonia?

A RAICA e dua na raivotu na yapositolo o Paula ena ikelekele ni waqa mai Tiroa e Esia Lailai. A vakamasuti koya e dua na turaga ni Masitonia: “Lako mai Masitonia mo mai vukei keimami.” Ni oti ga nona raivotu o Paula, a kila o koya kei ratou nona itokani ni ‘vakaroti ratou tiko na Kalou me ratou lai vunautaka vei ira’ e Masitonia “na itukutuku-vinaka.” Cava a qai yaco? A yaco me ratou vakabauta na lewenivuvale i Litia ena korolevu o Filipai mai Masitonia. Ra yaco tale ga mera vakabauta eso e Roma.​—Caka. 16:9-15.

Nikua, e laurai tale ga na gugumatua va qori vei ira na iVakadinadina i Jiova. E levu vei ira na daukacivaka na itukutuku ni Matanitu ni Kalou era toki ina vanua e gadrevi vakalevu kina na vunau, ra qai sauma ga nodra ilakolako. Kenai ivakaraitaki, a vinakata o Lisa me vakalevutaka nona vakaitavi ena cakacaka vakaitalatala. E tiko mai Kenada qai toki i Kenya. Erau a gole i Malawi e dua na veiwatini mai Kenada o Trevor kei Emily, me rau lai vakarabailevutaka nodrau cakacaka vakaitalatala. Rau raica o Paul kei Maggie mai Igiladi ni nodrau cegu mai na cakacaka saumi e dua na gauna vinaka me rau vakarabailevutaka kina nodrau veiqaravi vei Jiova. Rau gole sara ena Tokalau kei Aferika. Vakacava, e tiko beka vei iko na yalo ni vakuai iko va qori? Rawa beka ni o toki ena vanua e vinakati kina na cakacaka? Na cava eso na ivakavuvuli vakaivolatabu kei na ivakasala yaga ena dusimaki iko mo rawata kina qori?

Vakalewa na Kemu iTuvaki

Vakasamataka mada na inaki ni nomu via cakava qori. E kaya o Jisu ni vunau levu duadua, oya: “Mo lomani Jiova na nomu Kalou ena lomamu taucoko, ena nomu bula taucoko, kei na nomu vakasama taucoko.” Koya gona, me inaki levu duadua ni nomu veiqaravi e vanuatani, oya nomu lomana na Kalou kei na nomu via cakava na ilesilesi ni veivakatisaipelitaki. E tomana o Jisu: “Na kena ikarua, ‘Mo lomana na kainomu me vaka nomu lomani iko.’ ” Ni o lomani ira na kainomu e vakaraitaka na veikauaitaki dina. (Maciu 22:36-39; 28:19, 20) Ena vinakati dina na sasaga kei na yalo ni vakauai keda nida veiqaravi e vanuatani. E sega ni vaka na gade. Ena gadrevi gona na loloma me uqeti iko. Erau tukuna o Remco kei Suzanne mai Necaladi, rau veiqaravi tiko ena gauna qo e Namibia, “Na loloma e uqeti keirau me keirau tiko ga eke.”

E kaya o Willie, e dua na ivakatawa ni tabacakacaka e Namibia: “O ira na gole mai vanuatani era sega ni namaka vei ira na mataveitacini mera qaravi ira. Era gole mai mera veiqaravi vata kei ira na mataveitacini ena vanua qo, mera veitokoni tale ga ena cakacaka vakavunau.”

Gauna o sa vakasamataka kina na inaki ni nomu veiqaravi, tarogi iko mada: ‘Na kila cava e tiko vei au ena yaga vakalevu ena veiqaravi e vanuatani? E vuavuaivinaka beka noqu cakacaka vakaitalatala? Na vosa cava au rawa ni vosataka? Au na tu vakarau meu vulica e dua na vosa vou?’ Dou veivosakitaka vakavinaka vakavuvale na tikina qo. Kere ivakasala vei ira na qase ni ivavakoso. Qai masulaka vei Jiova. Nida vakalewa va qo na keda ituvaki eda na kila kina se ganiti keda meda lai veiqaravi e vanuatani se sega.​—Raica na kato “Mo Kilai Iko Vinaka.”

Vanua mo Veiqaravi Kina

A tukuni vei Paula ena raivotu me gole e Masitonia. Nikua sa sega ni vakayagataka o Jiova na kaukaua va qori me veidusimaki kina. Nira wilika gona na mekesini kei na ivola vakaivolatabu na tamata i Jiova, era kila na vanua e gadrevi vakalevu kina na veivuke. Koya gona, tekivu ena nomu vakavola eso na vanua va qo. Ke o se sega ni tu vakarau mo vulica e dua na vosa vou se na sega ni vakadonui mo lai tiko dei e vanuatani, veiqaravi mada ga ena vanua o sa kila rawa tu na kena vosa. Qai vaqaqa e muri, na veika me baleta na visa, sala ni veilakoyaki, ituvaki ni vanua, bula vakailavo kei na draki. Ena rairai yaga sara ke o tarogi ira era sa cakava oti qori. Masulaka na ka o sasagataka tiko. Vakasamataki Paula kei ratou nona itokani, a “sega ni vakatara na yalo tabu me ratou tukuna na vosa ena yasana o Esia.” Dina ni ratou saga me ratou gole i Picinia, “a sega ni vakatara qo o Jisu ena veidusimaki ni yalo tabu” me ratou cakava ya. Koya gona, ena rairai taura toka na gauna me qai vakadeitaki na vanua ena vinakati vakalevu mo veiqaravi kina.​—Caka.16:6-10.

Ena gauna qo, o sa na rairai kila na ka mo cakava. Ke o vinakata mo lai veiqaravi e vanuatani, volavola ina valenivolavola ni tabana ni iVakadinadina i Jiova o vakasamataka tiko mo veivuke kina. Vola na kemu itukutuku vakayalo kei na itavi o vakacolati kina, vaka kina eso na ka o dau rairai lomatarotarotaka me vaka na isau ni iyaya, vale o na rawa ni tawana, na veiqaravi vakavuniwai, kei na cakacaka saumi o na rawa ni cakava. Me qai soli na ivola vei ratou na komiti ni cakacaka ena ivavakoso o lewena. Eratou na vola nodratou vakatutu, ena qai vakau ina valenivolavola ni tabana e qarava na vanua o via veiqaravi kina. Ni saumi mai na nomu ivola o na kila na vanua ena yaga kina nomu veiqaravi.

O Willie, sa vakamacalataki oti e tukuna: “O ira na marautaka nodra veiqaravi, era na sikova mada eliu e dua na vanua era nanuma nira na marautaka kina nodra veiqaravi. Rau raica rawa e dua na veiwatini ni na dredre na veiqaravi ena vanua ribayawa. E rau mani vakaitikotiko ga ena dua na taoni lailai a vinakati vakalevu kina na veiqaravi, rau marautaka tale ga na ivakatagedegede ni bula ena vanua ya.”

Vakilai eso na iTuvaki Dredre

Macala ga ni dau dredre toka meda toki ina dua na vanua vou. E kaya o Lisa, sa vakamacalataki oti, “Au dau galili sara ga.” Na cava a vukei koya? E volekati ira na lewe ni ivavakoso qai saga me kila na yacadra kece. Me rawata qo, e dau yaco totolo yani ina soqoni me rawa ni veimaliwai kei ira na mataveitacini vaka kina ni sa suka. E dau tomani ira na so tale ena cakacaka vakaitalatala, sureti ira ena nona vale, qai levu nona itokani vou. E kaya: “Au sega ni veivutunitaka na sasaga kece au cakava . E vakalougatataki au dina o Jiova.”

Ni oti nodrau veisusu o Paul kei Maggie, rau biuta na vale rau a vakaitikotiko kina me 30 na yabaki. E tukuna o Paul: “Sega ni rawarawa neirau biuta tu mai na ka keirau taukena. Sa bau dredre dina na veitalatala kei na wekai keirau, sega sara ni keirau namaka me lai tini va qo. Keirau sega ni cegu na tagi ena waqavuka. E dau nanumi tu ga ni, ‘Eda na sega ni cakava rawa.’ Ia keirau nuitaki Jiova. Neirau veitokani gona kei ira na ka vovou, e uqeti keirau me keirau tomana tiko ga kina na cakacaka qo.”

Erau tiko e Kenada o Greg kei Crystal, rau qai toki i Namibia baleta ni rau kila na vosa vakavavalagi, na vosa e vakayagataki vakalevu ena vanua ya. Erau qai kila emuri ni na yaga sara ke rau a vulica na vosa ni vanua ya. “Keirau dau yalolailai ena so na gauna. Ni keirau vulica na nodra vosa, keirau sa qai kila na nodra itovo. Ni keirau veimaliwai voleka kei ira na mataveitacini, e qai matau ga kina vei keirau na bula ena vanua qo.”

Na yalomalua kei na mamakutu ena yaga vakalevu vei ira na mataveitacini. A nanuma vinaka tu o Jenny, e dua na vuvale a toki i Ailadi na vanua a susugi mai kina. “Eratou dau veikauaitaki dina,” e kaya. “Ratou gole dina mai me ratou mai veiqaravi sega ni mai qaravi. Ratou dau mamarau qai gugumatua, au via veiqaravi sara ga vakataki ratou.” Ena gauna qo rau sa daukaulotu tiko e Gambia o Jenny kei watina.

Na Veivakalougatataki i Jiova e “Veivakavutuniyautaki”

A vakalougatataki dina o Paula ena nona tiko e Masitonia! Ni oti toka e 10 na yabaki, a volavola vei ira na tacina e Filipai: “Dua na ka noqu dau vakavinavinaka vua na noqu Kalou ena gauna kece au nanumi kemuni kina.”​—Filipai 1:3.

E tautauvata tale ga qori kei na ka rau tukuna o Trevor kei Emily, rau a veiqaravi taumada e Malawi ni bera ni rau gole ina kalasi ni Watchtower Bible School of Gilead. “So na gauna keirau dau vakasamataka ke sa donu tiko na ka keirau cakava, ia keirau marau ga. Keirau veivolekati vakaveiwatini qai vakila na veivakalougatataki i Jiova.” Erau kaya o Greg kei Crystal, sa tukuni oti mai, “Qo ga na ka keirau na via cakava.”

Eda sega ni rawa ni veiqaravi kece e vanuatani. Eso era na rairai veiqaravi ga ena nodra vanua, ena dua na itikotiko e vinakati vakalevu kina na cakacaka. So tale e rawa ni nodra isausau mera veiqaravi ena ivavakoso voleka. E bibi ga mera qaravi Jiova mai vu ni lomadra. (Kolo. 3:23) Koya gona, dina kina na Vosa ni Kalou: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”​—Vkai. 10:22.

[Kato/​iYaloyalo ena tabana e 5]

Mo Kilai Iko Vinaka

Dikevi iko mo kila kina se ganiti iko mo lai veiqaravi e vanuatani, vakasamataka na veitaro e toka e ra, masulaka qai raica ke ganiti iko dina mo toki. E ivukevuke yaga tale ga eso na itukutuku ena ilavelave makawa ni Vale ni Vakatawa.

• Au matua beka vakayalo?​—“Na Sala Me Rawati Kina Na Marau” (Okotova 15, 1997, tabana e 6)

• E vuavuaivinaka beka noqu cakacaka vakaitalatala?​—“How to Succeed in the Pioneer Ministry” (May 15, 1989, tabana e 21)

• Rawa niu yawaki ratou noqu vuvale kei ira noqu itokani?​—“Na iWali ni Vakanananu i Vale Nida Qarava na Kalou” (Me 15, 1994, tabana e 28)

• Rawa niu Vulica e Dua Tale na Vosa?​—“Veiqaravi ena iVavakoso e Duatani na Kena Vosa” (Maji 15, 2006, tabana e 17)

• Au na rawa niu sauma ga noqu ilakolako?​—“Sa Rawa li Mo Veiqaravi e Vanuatani?” (Okotova 15, 1999, tabana e 23)

[iYaloyalo ena tabana e 6]

Na yalomalua kei na nomu tu vakarau ni veivuke ena yaga vakalevu vei ira na mataveitacini

[iYaloyalo ena tabana e 7]

O ira na dau mai veiqaravi e dau vuavuaivinaka nodra cakacaka