O se Nanuma Tiko?

O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• O rawa ni kila vakacava na iVolatabu?

Kerea ena masu nona veivuke o koya e vakavuna na iVolatabu. Me raba nomu wilika na iVolatabu, saga mo kila vinaka sara na itukutuku marautaki e vinakata o koya mo kila. Ciqoma nodra veivuke na lotu vaKarisito era maqosa ena iVolatabu.​—Julai-Sepiteba, tabana e 4-7.

• Na Lesoni cava eda rawa ni vulica mai na nona veivakabulai o Jisu ena gauna a tekivu dromu kina o Pita? (Maciu 14:28-31)

Kevaka eda raica ni lailai nona vakabauta e dua na tacida, eda rawa ni vukei koya me vaqaqacotaka tale nona vakabauta.​—9/15, tabana e 8.

• Na cava a cakava o Jiova meda vakabulai kina?

E vosota na vakararawataki ni Luvena kei na nona vakalialiai. Me vaka na nona yalorawarawa o Eparama ena nona cabori luvena, e tautauvata tale ga na nona vosota o Jiova na nona vakamatei o luvena me vaka e dua na daubasulawa.​—9/15, tabana e 28-29.

• Na cava mera cakava na itubutubu me vuavuaivinaka kina na sokalou vakavuvale?

Lokuca e dua na siga kei na gauna ena yakavi mo dou Sokalou Vakavuvale kina, mo dei tale ga ena ituvatuva qori. Ena vuku ni veika tawanamaki e dau yaco, de vinaka me dau loku eso tale na gauna mai na kena dou sa dei tu kina.​—10/15, tabana e 29.

• Na lesoni cava e vulici mai na Vosa Vakaibalebale 24:27 me baleta na nomu “tara na nomu vale”?

Na tagane e via vakawati me vakarautaki koya vinaka ena itavi qori. E okati kina nona vakavakarau vinaka ena vakarautaki ni veika vakayago ni matavuvale kei na nona liutaka na vuvale ena ka e vauca na sokalou.​—10/15, tabana e 12.

• E rawa vakacava ni ‘ti na wakada’ qai ‘vakataudeitaki noda vakabauta’?

Dua na sala bibi oya noda vulica vagumatua na Vosa ni Kalou. E vinakata o Jiova meda ‘kila, na cava na kena raraba, kei na kena balavu kei na kena titobu kei na kena cecere’ na ka dina. (Efeso 3:18) Ia e vinakati tale eso na ka. Meda “kila tale ga na loloma i Karisito, na loloma e uasivia na vuku.” (Efeso 3:19) Noda vulica na iVolatabu ena noda lomani Jiova kei na noda taleitaka na ka dina, ena vakatitobutaka noda kilaka vakaivolatabu, ena vaqaqacotaka na noda vakabauta.​—10/15, tabana e 26-28.

• Na cava e dau vakavu veiba kina na ilavo ena vakawati kei na cava e rawa ni vukei rau?

E dau vakavuna vakalevu na veibataki ni ilavo ni sega na veinuitaki kei na kena lomaleqataki na vakayagataki ni ilavo, vaka kina na duidui ni nodrau isususu na veiwatini. E tiko e va na vakatutu yaga: Saga mo kua ni cudru ni drau veivosakitaka na ilavo, me tautauvata nomudrau rai me baleta na kemudrau isau, vola na ka drau lalawataka, qai drau veivosakitaka na nomudrau dui itavi.​—Okotova-Tiseba tabana e 27-29.

• E rau ivakaraitaki ni itovo vinaka vakacava vei keda o Jiova kei Jisu?

Dina ni cecere o Jiova, ia e dau lomani keda na kawatamata qai dau veidokai. Ni vosa vei rau o Eparama kei Mosese, e dau cavuta e dua na vosa vakaIperiu e veisautaka na veivakaroti me kerekere. (Vkte. 13:14; Lako 4:6) E dau vakarogoci keda tale ga na Kalou. (Vkte. 18:23-32) E cakava vaka tale ga kina o Jisu, ena nona dau tu vakarau me vukei ira na tu volekati koya qai vakalevu nona cavuta sara ga na yacadra.​—11/15, tabana e 25.