Maqosa ni O Vakayagataka “Na iSeleiwau ni Yalo Tabu”

“Taura . . . na iseleiwau ni yalo tabu, ya na vosa ni Kalou.”​—EFESO 6:17.

1, 2. Na cava meda cakava ena kena vinakati vakalevu na dau kacivaka na Matanitu ni Kalou?

NONA raica o Jisu nodra gadreva na veika vakayalo e dua na ilala levu, e tukuna kina vei ratou na tisaipeli: “E levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.” A sega ni yala ga i kea na ka a cakava o Jisu. Oti ga nona cavuta na veivosa qori, “e kacivi iratou na nona tisaipeli lewe tinikarua” mani talai ratou me ratou gole ena vunau, se lai “tatamusuki.” (Maciu 9:​35-38; 10:​1, 5) Emuri, sa qai lesia o Jisu “e lewe vitusagavulu tale mera lako yarua” mera cakava tale ga na cakacaka ya.​—Luke 10:​1, 2.

² E vinakati tale ga vakalevu na gauna qo o ira na dau kacivaka na itukutuku ni Matanitu ni Kalou. Era le 18,168,323 na iwiliwili era tiko ena iVakananumi e vuravura raraba ena yabaki vakacakacaka ni 2009. Qo e sivia na 10 na milioni na keda iwiliwili na iVakadinadina i Jiova. Sa matua tu na were me na tamusuki. (Joni 4:​34, 35) O koya gona, e dodonu meda masulaka ena noda kerea me so tale na tamata cakacaka. Ena salavata vakacava na ka eda kerea kei na ka eda cakava? Meda dua na italatala gugumatua ena noda kacivaka na itukutuku vinaka ni Matanitu ni Kalou kei na noda veivakatisaipelitaki.​—Maciu 28:​19, 20; Mari. 13:10.

3. E yaga vakacava na yalo tabu ni Kalou ena noda dua na italatala maqosa?

³ Na ulutaga sa oti e veitalanoataki kina na yaga ni veidusimaki ni yalo tabu ni Kalou ena noda “tukuna na vosa ni Kalou ena doudou.” (Caka. 4:31) Na yalo vata ga oqori e uqeti keda meda dua na italatala maqosa. Dua na sala meda vakavinakataka kina noda cakacaka vakavunau, oya noda vakayagataka vinaka sara na iyaya ni cakacaka vinaka duadua e vakarautaka o Jiova​—nona vosa volai na iVolatabu. E vakavuna na yalo tabu na volai ni iVolatabu. (2 Tim. 3:16) E uqeti vaKalou na kena itukutuku. Noda vakayagataka vakamaqosa na iVolatabu ena noda cakacaka vakavunau e vakaraitaka ni dusimaki keda na yalo tabu. Ni bera noda dikeva se rawa vakacava qori, meda raica sara mada na kaukaua ni Vosa ni Kalou.

‘E Kaukaua na Vosa ni Kalou’

4. Ena veisautaka vakacava nona bula e dua na itukutuku ni Kalou ena iVolatabu?

⁴ E kaukaua na Vosa ni Kalou, se na itukutuku e tiko kina! (Iper. 4:12) Vakaivakatakarakara, na itukutuku ena iVolatabu e gata baleta ni suaka na uto ni noda sui, ia e mucu na iseleiwau e bulia na tamata. E tara na loma ni tamata na ka dina, uqeta na nona itovo kei na nona vakasama qai vakavotui kina na ivakarau dina ni lomana. Na ka dina qori ena rawa ni veisautaka nona bula e dua. (Wilika Kolosa 3:10.) Io, e rawa ni veisautaki keda na Vosa ni Kalou!

5. E yaga vakacava vei keda na iVolatabu, na cava ena yaco kina?

⁵ E sega ni vakatauvatani rawa na vuku e tiko ena iVolatabu. E tiko kina na itukutuku yaga me baleta na sala meda bula kina ena vuravura veilecayaki qo. E sega wale ga ni vakararamataka na noda ilakolako na Vosa ni Kalou, ia e idusidusi yaga tale ga ina noda sala me baleta na gauna e se bera mai. (Same 119:105) Dau yaga vakalevu ena gauna eda sotava kina na leqa se noda vakatulewataka noda digi ira noda ilala, na ka ni veivakamarautaki, cakacaka, na isulu meda tokara, kei na vuqa tale. (Same 37:25; Vkai. 13:20; Joni 15:14; 1 Tim. 2:9) Noda muria na ivakavuvuli ena Vosa ni Kalou ena uqeta na veiyaloni. (Maciu 7:12; Fpai. 2:​3, 4) Nida vakalaiva na Vosa ni Kalou me vakararamataka na sala eda muria, eda na vakatulewa vakavinaka me baleta na noda gauna se bera mai. (1 Tim. 6:9) Na iVolatabu e tukuna tale ga na inaki ni Kalou me baleta na gauna se bera mai, meda digia kina na ivakarau ni bula e salavata kei na inaki qori. (Maciu 6:33; 1 Joni 2:​17, 18) Ena vakainaki dina na nona bula e dua ke vakalaiva na ivakavuvuli vaKalou me dusimaka nona bula!

6. E kaukaua vakacava na iVolatabu ena noda vala tiko vakayalo?

⁶ Vakasamataka tale ga na iyaragi kaukaua qo na iVolatabu ena noda vala tiko vakayalo. E vakatoka o Paula na Vosa ni Kalou me “iseleiwau ni yalo tabu.” (Wilika Efeso 6:​12, 17.) Ni laulau na kena vakayagataki, ena sereki ira na tamata era bobula tu vakayalo vei Setani. Qo na iseleiwau ni veivakabulai, sega ni veivakarusai. Sega li ni dodonu meda maqosataka noda vakayagataka?

Wasea Vakadodonu

7. Na cava e bibi kina meda vulica na noda vakayagataka vakavinaka sara “na iseleiwau ni yalo tabu.”?

⁷ Ena yaga wale ga nona lave iyaragi e dua na sotia ke sa vulica qai vakatovotovotaka na kena ivakavakayagataki dodonu. E va tale ga qori na noda vakayagataka “na iseleiwau ni yalo tabu” ena noda vala tiko vakayalo. E vola o Paula: “Gumatua sara mo vakaraitaka ena mata ni Kalou ni ganiti iko na nona veivakadonui, na tamata cakacaka e sega ni dua na ka e maduataka, e wasea vakadodonu na ivakavuvuli dina.”​—2 Tim. 2:15.

8, 9. Me matata vei keda na ka e kaya na iVolatabu na cava meda cakava? Tukuna e dua na kena ivakaraitaki.

⁸ Ena rawa vakacava meda “wasea vakadodonu na ivakavuvuli dina” ena noda cakacaka vakavunau? Ni bera nida vota yani na ka e kaya na iVolatabu, e vinaka me matata tiko mada e liu vei keda. Bibi gona meda dikeva vinaka e dua na tikinivolatabu kei na veitikina yavolita.

⁹ Me matata vei keda e dua na tikinivolatabu, e vinakati meda raica eso tale na tikina e toka volekata ga na tikina eda wilika. Na kena ivakaraitaki na nona vosa o Paula ena Kalatia 5:13. E vola: “Kemuni na taciqu, oni sa kacivi moni galala; ni kua ni taurivaka nomuni galala moni rawai kina ena gagadre vakayago, ia ni veivukei ga ena loloma.” Na galala cava e tukuna tiko e ke o Paula? E kaya tiko beka na galala mai na ivalavala ca kei na mate, na bobula ena ivakavuvuli lasu, se dua tale na ka? E macala mai na veitikina yavolita, ni vosa tiko o Paula ena noda galala nida ‘sereki mai na cudru e vu mai na Lawa.’ (Kala. 3:​13, 19-24; 4:​1-5) E tukuna tiko na galala ena vakila e dua ni muri i Karisito. O ira na ciqoma na galala qori e yavutaki nodra veiqaravi ena loloma. O ira na sega ni vakaitovotaka na loloma e nodra cakacaka ga na kakase kei na veiba.​—Kala. 5:15.

10. Me matata vei keda na iVolatabu, na cava soti meda vaqaqa, eda na cakava vakacava?

¹⁰ Na “veitikina yavolita se na ikotokoto” e tiko e dua tale na kena ibalebale. Dua tale na vosa e rawa ni vakaisosomitaka na vosa “veitikina yavolita se ikotokoto” oya na “itukutuku ni veika e yaco, na vanua, . . . ituvaki.” Me kilai vakamatata e dua na tikinivolatabu, e dodonu meda kila na kena itukutuku matailalai, me vaka o koya e vola, na gauna e volai kina, kei na ituvaki vakacava a volai kina na ivola. Ena yaga tale ga meda kila na inaki ni kena volai na ivola, ke rawa meda kila tale ga na nodra itovo vakavanua, ivakarau kei na nodra sokalou o ira na bula ena gauna ya.a

11. Na cava meda qarauna nida vakamacala ena iVolatabu?

¹¹ E levu tale na ka e okati ena noda “wasea vakadodonu na ivakavuvuli dina” me kilai kina na ka dina vakaivolatabu. Meda qarauna me kua ni vakayagataki na iVolatabu meda veivakarerei kina. Dina nida na vakayagataka na iVolatabu me tokona na ka dina vaka ga a cakava o Jisu ena gauna a temaki koya kina na Tevoro. Ia meda kua ga ni vakayagataka na iVolatabu meda usuraka kina noda vakabauta. (Vkru. 6:16; 8:3; 10:20; Maciu 4:​4, 7, 10) Meda muria na nona ivakasala na yapositolo o Pita ena nona kaya: “Moni dokai Karisito e lomamuni me vaka ni Turaga, moni qai vakarau tu ena gauna kece moni vakamacalataka nomuni inuinui vei ira kece era taroga, moni vakayacora qo ena yalomalua kei na veidokai dina.”​—1 Pita 3:15.

12, 13. Na cava “na veika e sa vakawakana tu” ena talaraka na Vosa ni Kalou? Tukuna e dua na kena ivakaraitaki.

¹² Ni vakayagataki vakadodonu, na cava ena cakava na ka dina ni Vosa ni Kalou? (Wilika 2 Korinica 10:​4, 5.) Na ka dina vakaivolatabu e rawa ni talaraka “na veika e sa vakawakana tu,” ya, na vakatakilai ni ivakavuvuli lasu, na ivalavala e dauveivakaleqai, kei na ivakavuvuli vakatamata e laurai ga kina na vuku ni tamata ivalavala ca. Eda rawa ni vakayagataka na iVolatabu me cavuraka laivi na vakasama “e vakacerecerei me sabaya na vuku ni Kalou.” Na ivakavuvuli vakaivolatabu e rawa ni uqeti ira eso tale mera veisautaka nodra vakasama me salavata kei na iVolatabu.

¹³ E dua na kena ivakaraitaki me baleta e dua na marama yabaki 93 e tiko mai Idia. Ena gauna se gonelailai kina a vakavulici ena ivakavuvuli ni bula e dewa ina dua tale na bula (reincarnation). Ni tekivu vulica na iVolatabu ena nodrau dau veivolavolai kei luvena tagane e tiko mai vanuatani, a totolo nona ciqoma na ka e vulica me baleti Jiova kei na nona vosa ni yalayala. Ia sa vakawakana tu ena nona vakasama na ivakavuvuli ni bula e dewa ina dua tale na bula, a sega ni taleitaka na gauna a vola kina vua o luvena na kedra ituvaki dina na mate. E kaya: “Au sega ni raica rawa na ka dina ni nomu iVolatabu. Era vakavuvulitaka na lotu kece ni sega ni mate rawa e dua na ka e tiko e lomada. Au dau vakabauta tu ga ni gauna e mate kina na yago, e dua na ka tawarairai e dewa ina dua tale na bula qai veisau tiko me 8,400,000 na gauna. E sega ni dina vakacava na tikina qo? Era cala beka e levu na lotu?” Ena rawa beka ni talaraka laivi na ivakavuvuli sa vakawakana tu na “iseleiwau ni yalo tabu”? Ni veitalanoataki oti na ulutaga qo ena kena dikevi eso na tikinivolatabu, a qai vola ni oti tale e vica na macawa: “Au sa qai kila na kedra ituvaki dina na mate. E ka ni marau vei au noqu kila ni gauna e yaco kina na veivakaturi, eda rawa ni sota tale kei ira na wekada lomani. Au nuitaka me yaco totolo mai na Matanitu ni Kalou.”

Me Veiuqeti

14. Na cava na kena ibalebale meda rawai ira na vakarorogo?

¹⁴ Eda na sega ni cavuqaqataka ga na tikinivolatabu ena cakacaka vakaitalatala ke da vinakata me laulau noda vakayagataka na iVolatabu. O Paula e dau “veiuqeti” na nona vosa, meda va tale ga ya. (Wilika Cakacaka 19:​8, 9; 28:23.) Na “veiuqeti” e kena ibalebale noda “rawai koya.” O koya e uqeti ena “vakabauta sara ga e dua na ka.” Nida uqeta e dua me ciqoma na ivakavuvuli vakaivolatau, eda sa rawai koya me nuitaka na ivakavuvuli ya. Me rawa qori, ena vinakati meda vakadeitaka vua e rogoci keda ni dina na ka eda kaya. Eda rawa ni cakava qori ena vica na sala e volai toka qo e ra.

15. O na vakamua vakacava e dua me doka na iVolatabu?

¹⁵ Veivakamuai ena iVolatabu me rawa ni dokai kina. Ni o vakamacalataka e dua na tikinivolatabu, mo vakabibitaka na kena kilai na rai ni Kalou ena ulutaga o vosa tiko kina. Ni oti nomu taroga na taro kei na nona ivakamacala na itaukeinivale, o na rawa ni tukuna, ‘Daru raica sara mada se cava e kaya na Kalou ena tikina qo.’ Se o na rairai taroga, ‘Na cava e kaya na Kalou me baleta na ituvaki qo?’ Nomu vakamacalataka va qo na tikinivolatabu, ena kilai kina ni iVolatabu e nona na Kalou, o koya e vakarogoci iko ena raica tale ga vakabibi. E bibi sara na tikina qo nida vunau tiko vua e dua e vakabauta na Kalou, ia e sega ni matata vei ira na ka e vakavuvulitaka na iVolatabu.​—Same 19:​7-10.

16. O na vakamacalataka vinaka vakacava na tikinivolatabu?

¹⁶ Vakamacalataka na tikinivolatabu, kua ni wilika ga. E nona ivalavala o Paula me dau ‘vakadinadinataka na ka e volai.’ (Caka. 17:3) E dau levu na tikina eda rawa ni vakamacalataka me baleta e dua na tikinivolatabu. De dua o rawa ni vakabibitaka na ivakamacala e ganita na tikina o vakamacala tiko kina. O na rawa ni cakava qo ena nomu lesuva eso na vosa e vakavure vakasama se taroga eso na taro me kila o itaukeinivale na tikina bibi. Oti mo qai vakamacalataka na kena ibalebale na tikinivolatabu ya. Ni o cakava oti qori, uqeti koya na vakarorogo me raica se sala cava e yaga kina vua na tikinivolatabu.

17. Ena veiuqeti vakacava nomu yavutaka nomu ivakamacala ena iVolatabu?

¹⁷ Me veiuqeti nomu yavutaka nomu ivakamacala ena iVolatabu. Ni vu dina mai lomana qai momona na ivakamacala i Paula, a vakadeitaka me ‘veivosakitaka na iVolatabu’ kei ira tale na so. (Caka. 17:​2, 4) Me vakataki koya ga, saga me tara na lomadra na vakarorogo na nomu ivakamacala. “Takiva mai” na ka e tu kina ena nomu vakatarogi koya me kila kina ni o kauaitaki koya dina. (Vkai. 20:5) Kua ni veibeci nomu vosa, me matata qai vinaka na nomu ivakamacala. Me tokona tale ga na kena ivakadinadina matata. Me yavutaki ena iVolatabu na ka o tukuna. E vinaka cake meda vakayagataka vinaka e dua na tikinivolatabu nida vakamacalataka na vakasama bibi e tiko kina, me kua ga nida wilika e rua se tolu na tikinivolatabu vaka na kana uvi katakata. Vakayagataka tale ga eso na ivakadinadina ena rawa ni ‘kuria na vakavulici [veiuqeti, NW] ni tebenigusumu.’ (Vkai. 16:23) Me ikuri ni nomu ivakamacala, ena vinaka ena so na gauna mo vakekeli. O koya na marama yabaki 93 a cavuti mai liu, e via kila se cava na vuna e rui takalevu kina na ivakavuvuli ni tawamate rawa ni yalo (se spirit). Na kena kilai na vanua e tekivu mai kina na ivakavuvuli ya kei na sala era vakabauta kina e vuqa na veimatalotu, e veiganiti vinaka kina vua me ciqoma na ka e kaya na iVolatabu.b

Mo Maqosa Tiko Ga

18, 19. Na cava meda maqosa tiko ga kina na vakayagataka “na iseleiwau ni yalo tabu”?

¹⁸ “Sa veisau tiko o vuravura,” e kaya na iVolatabu. Qai toro cake tiko ga na torosobu ni tamata ca. (1 Kor. 7:31; 2 Tim. 3:13) Koya gona, meda talaraka tiko ga “na veika e sa vakawakana tu” ena noda vakayagataka “na iseleiwau ni yalo tabu, ya na vosa ni Kalou.”

¹⁹ Eda marau ni tiko vei keda na Vosa ni Kalou na iVolatabu, da qai vakayagataka na kena itukutuku me cavuraka laivi na ivakavuvuli lasu, ra qai rogoca na yalomalumalumu! E sega ni dua na ka me vakawakana tu me kaukaua cake mai na itukutuku qori. O koya gona meda solia na noda maqosa kece ni vakayagataka na “iseleiwau ni yalo tabu,” ena noda itavi lesi vakalou na kena vunautaki na itukutuku vinaka ni Matanitu ni Kalou.

[iVakamacala e ra]

Na Cava o Vulica?

• E vakacava sara mada na kaukaua ni Vosa ni Kalou?

• Ena rawa vakacava nida ‘wasea vakadodonu na ivakavuvuli dina’?

• Na cava e cakava na itukutuku ena iVolatabu ena “veika e sa vakawakana tu”?

• Ena veirawai vakacava na nomu cakacaka vakaitalatala?

[iYaloyalo ena tabana e 12]

Sala me Veiuqeti Kina Nomu Vakayagataka na Vosa ni Kalou

[iYaloyalo ena tabana e 12]

▪ Uqeta me dokai na iVolatabu

▪ Vakamacalataka

▪ Vakadeitaka, me tara sara na lomadra na vakarorogo

[iYaloyalo ena tabana e 11]

Vulica mo vakayagataka vakadodonu “na iseleiwau ni yalo tabu”