Taro na Dauwiliwili
E kaya na Isikeli 18:20, “ena sega ni cudruvi na gone e na caka cala i tamana,” e veisaqasaqa beka qo kei na Lako Yani 20:5, ni o Jiova ena “sauma na nodra caka ca na qase vei ira na luvedra”?
E sega ni dua na ka e veisaqasaqa. Dua vei rau na tikinivolatabu e cake e baleta na noda dui vakatusai keda, kei na dua tale e baleta na veivakaleqai ni nona valavala ca e dua vei ira na vo ni nona kawa.
E vakabibitaki ena wase 18 ni Isikeli na noda dui vakatusai keda. E tukuni ena tikina e 4 “na yalo ga sai valavala ca ena mate.” Vakacava ni “sa yalododonu e dua na tamata, ka sa cakava na ka sa dodonu ka vinaka”? “Sa na bula vakaidina ga.” (Isik. 18:5, 9) Ni sa yacova e dua na yabaki ni bula e rawa ni saumitaro kina ena ka e cakava, ena lewai ‘me vaka na nona ivalavala.’—Isik. 18:30.
E kilai na dina ni ivakavuvuli qo ena nona ivakaraitaki o Kora, e dua na Livai. Nira veilakoyaki tiko ena vanualiwa a sega ni lomavakacegu o Kora ena itavi a lesia vua o Jiova. Nona vinakata na itavi vakabete, era duavata kina kei koya eso tale ena nodra vorati rau na matataki Jiova, o Mosese kei Eroni. Nira kocova na itutu e sega ni nodra—a vakamatei Kora kina kei ira nona ilala talaidredre o Jiova. (Tiko 16:8-11, 31-33) Eratou a sega ni duavata kei Kora na luvena tagane. A sega gona ni ratou saumitaro ena ivalavala ca i tamadratou. Eratou bula ni ratou yalodina vei Jiova.—Tiko 26:10, 11.
Ia vakacava na ivakaro ena iVunau e Tini ena Lako Yani 20:5? Raica mada na veitikina yavolita. O Jiova a cakava na veiyalayalati ni Lawa kei na matanitu o Isireli. Nira rogoca na ka e gadrevi ena veiyalayalati era tukuna na Isireli: “A ka kecega sa kaya ko Jiova keimami na cakava.” (Lako 19:5-8) Era veivolekati kei Jiova na lewe ni matanitu o Isireli. A volai vakatabakidua gona na Lako Yani 20:5 me baleti ira.
Era vakila na matanitu o Isireli na yaga ni nodra yalodina vei Jiova ra qai vakalougatataki kina. (Vunau 26:3-8) Era na vakila na kena veibasai ke ra sega ni yalodina. Na gauna era biuti Jiova kina ra qai golevi ira na kalou lasu, era sega ni vakalougatataki ra qai sega ni taqomaki, era sotava ga na rarawa. (Dvei. 2:11-18) Nira qaravi matakau na matanitu, era tiko ga eso era yalodina ra qai muria na ivakaro ni Kalou. (1 Tui 19:14, 18) Era vakila na dredre o ira na yalodina ena vuku ni valavala ca ni matanitu, ia a lomani ira tiko ga o Jiova.
Na veika torosobu era cakava na Isireli e beci kina na ivakavuvuli i Jiova, era beca tale ga kina na yacana na veimatanitu. Mani totogitaki ira o Jiova mera kau vakavesu i Papiloni. Na itotogi qo era okati yadua kina, vakailawalawa tale ga. (Jere. 52:3-11, 27) Na iVolatabu e vakamacalataka na levu ni nodra cala na matanitu o Isireli, e vakaleqai kina na ikatolu, ikava ni itabatamata, kena irairai ni levu tale era vakila na ca ni nodra ivalavala na tukadra, me vaka e tukuni ena Lako Yani 20:5.
E volaitukutukutaki tale ga ena Vosa ni Kalou ni rawa ni vakaleqai ira na lewe ni vuvale yadua na nodra caka cala na itubutubu. A vakacudrui Jiova na Bete Levu o Ilai ena nona vakatarai rau na luvena tagane erau “luve ni vu-ni-ca” rau qai dau veidauci, me rau veiqaravi tiko ga vakabete. (1 Sam. 2:12-16, 22-25) E dokai rau cake na luvena o Ilai, e sega ni dokai Jiova. E mani vakarota na Kalou me tagutuvi mai na nodratou kawa na itutu ni bete levu, qo e tekivu vei Epaiaca na makubuna vakatolu. (1 Sam. 2:29-36; 1 Tui 2:27) E vakamatatataki tale ga na ivakavuvuli ena Lako Yani 20:5 ena ivakaraitaki Kiesai. A vakayagataka vakatawadodonu nona itavi vakadauveiqaravi vei Ilaisa me rawaka kina ena gauna a vakabulai kina na Jenerali ni Siria o Neamani. A vakayagataki Ilaisa o Jiova me tauca nona lewa, nona tukuna: “Ena kabiti iko kina na vukavuka i Neamani, kei ira na nomu kawa ka tawa mudu.” (2 Tui 5:20-27) Era vakaleqai na vo ni kawa i Kiesai ena nona valavala ca.
A donu vinaka vei Jiova me lewa na itotogi e tau baleta ni Dauveibuli qai Vunibula. Na ivakaraitaki e cavuti mai cake e dusia ni rawa ni vakaleqai ira na gone se lewe ni vuvale na ca ni valavala ca ni nodra qase. Ia e ‘rogoca o Jiova na nodra tagi era sa rarawa,’ e rawa gona ni vakadonui ira na veivutuni dina, qai vakacegui ira.—Jope 34:28.
[iYaloyalo ena tabana e 29]
E sauti Kora kei ira nona ilala dautalaidredre na nodra ivalavala