E Rau Sega Tale ni Rerevaka na iCavacava

E RAU vakadeitaka o Gary kei Karen ena 1970 ni sa voleka na icavacava kei vuravura. Rau mani toki ena dua na vanua ena taudaku ni siti. Ni rau via bula, e rau vakatulewataka kina me rau vakarautaka ga vakataki rau na ka kece rau gadreva, me rau kua ni vakararavi ina isoqosoqo vakatamata.

E rau voli ivola, rau tiko ena so na vuli kei na semina, rau veitalanoa tale ga kei ira e levu ena ka me rau cakava. E rau tea e dua na loga kakana draudrau kei na 50 na kauvuata leleka, rau maroroya tale ga vakalevu na sorenikau kei na iyaya ni cakacaka. E rau vulica na teitei kei na maroroi kakana. A vakavulici rau e dua na nodrau itokani ena vakamate manumanu kei na iwalewale me maroroi dede kina na lewena. A vulica o Karen me kila na kau kei na wakana me rau kania ke oti koso na kakana. O Gary a vulica me caka waiwai sila, me cakava e dua na sitovu buka kaukamea, me tara tale ga e dua na vale e tiko kece kina na ka e rau gadreva.

E kaya o Karen, “ena torosobu ni ituvaki kei vuravura ena gauna oya, au nanuma kina ni sa voleka ni cava na ka kece e vuravura.” O Gary e kaya: “Me vakataki ira na vo ni itabagone, au cuqena vakalevu na sasaga me muduki na veivakaduiduitaki, na ivalu mai Vietnam, kei na cakacaka vakailawaki. Ia e totolo ga noqu yalolailai. Au nanuma ni na vakarusai koya ga na tamata ke sega ni veisau na ituvaki.”

E tomana o Gary: “Ni sega ni levu na ka au cakava ena dua na bogi, au mani taura na iVolatabu au wilika na Maciu ina Vakatakila. E va na bogi veitaravi noqu cakava tiko qori. Oti oya, au tukuna sara vei Karen: ‘Daru sa bula tu qo ena iotioti ni veisiga. Sa vakarau yavala na Kalou me vakasavasavataka na vuravura. E bibi me daru vaqarai ira na bula.’” E rau goleva na duidui lotu o Gary kei Karen ni rau vaqarai ira era via vakavakarau ina icavacava.

Sega ni dede a sikovi rau yani e dua na iVakadinadina i Jiova, tekivu sara na vuli iVolatabu. E nanuma lesu o Karen: “Dua na ka noqu marau ni sa qai vakamacalataki vei au na iVolatabu. Au sa qai kila na ka dina au dau vaqaqa voli me baleta na gauna ni ivakataotioti. E dei na inuinui ni veigauna se bera mai. Ia koya e bibi sara, au sa veitokani kei na Tamaqu vakalomalagi, na Dauveibuli e Kalou ni lomalagi kei vuravura.”

E kaya o Gary: “Sa qai vakainaki dina na noqu bula. Ni tekivu rawa ga noqu vuli iVolatabu, au vinakata meu sa vuli tu ga. Niu wilika na parofisai ena iVolatabu au dikeva na ivakadinadina nira sa yaco dina tiko, au sa qai vakadeitaka ni sa voleka ni cakava e dua na ka na Kalou. Au qai vakasamataka, ‘E dodonu mera vakavakarau na lewenivanua, sega ni baleta na leqa, ia mera vakarautaki ira ena bula e vinakata na Kalou meda marautaka.’ ” Sa qai donu nodrau rai o Gary kei Karen me baleta na veigauna se bera mai. E rau sega tale ni rerevaka na icavacava kei vuravura, e rau nuidei ga ni na vakaotia na Kalou na leqa e vakararawataki keda tu qai vakalesuya mai na parataisi e vuravura.

Sa oti qo e 25 na yabaki, na cava e rau cakava tiko o Gary kei Karen? E kaya o Karen: “Au vakatitobutaka tiko ga na noqu lomana na Kalou o Jiova au vakaukauataka tiko ga na noqu vakabauti koya, au veivuke tale tiko ga mera cakava qori eso tale. Keirau veitokonitaka kei Gary me dei tiko ga na neirau vuvale, me keirau duavata tiko ga ni qarava na Kalou. Keirau saga me tuvanaki matau tiko ga na ka keirau cakava, me rawarawa tiko ga na neirau bula me keirau vakaliuci ira kina na kena vo kei na ka era gadreva.”

E tomana o Gary: “Au dau masuta me yaco mai na Matanitu ni Kalou me vakacegui ira na le milioni vakacaca. Au dau masuta ena gauna kece au lai vunautaka kina na itukutuku vinaka meu vukea mada ga e dua me ciqoma na inuinui ena iVolatabu. Ena yalovinaka i Jiova, sa 25 vakacaca qo na yabaki nona sauma tiko na noqu masu. Keirau vakabauta kei Karen ni sa voleka ni cakava o Jiova na veiveisau lelevu e vuravura, ia keirau sa sega ni rerevaka na icavacava.”​—Maciu 6:​9, 10; 2 Pita 3:​11, 12.

[iYaloyalo ena tabana e 9]

E rau marautaka tiko o Gary kei Karen nodrau vukei ira eso tale mera ciqoma na inuinui ena iVolatabu