Veivosaki kei Taukeinivale​—E Kalou o Jisu?

ERA dau marau na iVakadinadina i Jiova mera veivosakitaka kei ira na itaukeinivale na iVolatabu. E tiko e dua na taro vakaivolatabu o dau lomatarotarotaka? O dau vaqaqa na ka era vakabauta se na nodra ivakarau ni sokalou na iVakadinadina i Jiova? Ke vaka kina, vakaraitaka qori vei ira nira veisiko tale yani ena dua na gauna. Era na marau mera veivosakitaka kei kemuni na ka oni dau lomatarotarotaka.

Qo e dua na ivakaraitaki ni ka e rawa ni veivosakitaka kei taukeinivale e dua na iVakadinadina i Jiova. Kaya mada e gole yani ina vale nei Savaira, o Keresi e dua na iVakadinadina.

Oni Sega Dina ni Vakabauti Jisu?

Savaira: E tukuna na neimami talatala ni oni sega ni vakabauti Jisu na iVakadinadina i Jiova. E dina ya?

Keresi: Sega, keimami vakabauti Jisu. Keimami vakabauta ni bibi meda vakabauti Jisu meda rawata kina na bula.

Savaira: Au vakabauta tale ga qori.

Keresi: Kena ibalebale, qori e dua na ka daru tautauvata kina. Isa daru veikilai mada. Na yacaqu o Keresi.

Savaira: Oi o yau o Savaira.

Keresi: Vinaka Sava, o na rairai lomatarotarotaka tiko, ‘Ke keimami vakabauti Jisu dina na iVakadinadina i Jiova, na cava ga era tukuna kina eso ni keimami sega ni vakabauti koya?’

Savaira: Io, au dau vaqaqa tale ga qori.

Keresi: E levu na ka au rawa ni vakamacalataka. Ia vakalekaleka sara, dina ni keimami vakabauti Jisu, keimami sega ga ni vakabauta na ka kece era tukuna eso tale me baleti koya.

Savaira: O rawa ni tukuna vei au e dua na kena ivakaraitaki?

Keresi: Sa donu. Era tukuna eso ni o Jisu e dua wale ga na turaga vinaka. Keimami sega ni duavata ena vakasama qori.

Savaira: O yau tale ga.

Keresi: Oya e dua tale na ka daru tautauvata kina. Keimami sega tale ga ni vakabauta na ivakavuvuli e veisaqasaqa kei na ka a tukuna sara ga o Jisu me baleta na nodrau veiwekani kei Tamana.

Savaira: Au sega ni taura rawa na ka o tukuna tiko.

Keresi: Oi, e levu na lotu era vakavuvulitaka ni Kalou o Jisu. De dua ya tale ga na ka o vakavulici kina.

Savaira: Io, e tukuna na neimami talatala ni rau tautauvata ga na Kalou kei Jisu.

Keresi: Ia vakacava o nanuma ni vinaka mo raica sara ga na ka e tukuna o Jisu mo kila kina na ka dina me baleti koya?

Savaira: Io.

Cava e Kaya o Jisu?

Keresi: Daru raica mada na Joni 6:38, qai vakasamataka toka na ka daru na wilika kina. A kaya o Jisu: “Au sega ni lako sobu mai lomalagi meu cakava ga na lomaqu, na loma i koya ga e talai au mai.” Ena veicalati toka qori ke Kalou o Jisu.

Savaira: Au sega ni taura rawa na ka o tukuna tiko.

Keresi: A tukuna o Jisu ni a sega ni lako sobu mai lomalagi me cakava ga na lomana.

Savaira: Io, a kaya ni lako mai me cakava na loma i koya e talai koya mai.

Keresi: Ke Kalou o Jisu, o cei a talai koya mai lomalagi? Cava e vakamalumalumu kina vua e talai koya mai?

Savaira: Au sa taura rawa na ka o kaya tiko, ia au sega ni vakabauta ni tikinivolatabu duadua ga qori e vakadinadinataka ni sega ni Kalou o Jisu.

Keresi: Ia raica mada na ka a tukuna o Jisu ena dua tale na gauna. E tautauvata kei na ka daru sa raica oti mai ena Joni wase 6. Toso ga vakalailai i liu, kerekere wilika mada mai na Joni 7:16.

Savaira: Sa donu. “E sauma vei ira o Jisu: ‘E sega ni noqu na ka au vakavulica, e nei koya ga e talai au mai.’”

Keresi: Vinaka. Vakacava e tukuni ena tikinivolatabu qori ni a lewa ga o Jisu na ka e vakavulica?

Savaira: Sega, a kaya ni ka e vakavulica e nei koya ga a talai koya mai.

Keresi: E dina qori. Eda na rairai taroga: ‘O cei a talai Jisu mai? O cei a vakatakila vua na ka dina me vakavulica?’ Ena uasivi Jisu o koya qori, ni o koya e veitalai e cecere vua e talai.

Savaira: Ka vou vei au na tikinivolatabu qori niu se bera ni wilika vakadua.

Keresi: Daru raica tale mada na ka e tukuna o Jisu ena Joni 14:28: “Dou rogoca niu a kaya vei kemudou, au na lako, au na lesu tale mai vei kemudou. Ke dou lomani au, dou na marau niu lako vei Tamaqu, ni cecere sara vei au o koya.” Ena tikinivolatabu qori, a raica vakacava o Jisu na nodrau veiwekani kei Tamana?

Savaira: A tukuna ni cecere vua o Tamana. Kena ibalebale e kila o Jisu ni uasivi koya na Kalou.

Keresi: Donu vinaka. Daru raica tale mada qo na ka e tukuna o Jisu vei ratou na nona tisaipeli ena Maciu 28:18. E tukuni kina: “Sa soli vei au na lewa kece mai lomalagi kei vuravura.” A tukuna beka o Jisu ni sa tu rawa vua na lewa kece?

Savaira: Sega, a tukuna ni a soli vua na lewa.

Keresi: Ia ke Kalou o Jisu, na cava me soli tale kina vua na lewa? O cei a solia vua na lewa?

Savaira: Sega mada ni macala.

A Vosa Tiko Vei Cei?

Keresi: Ke Kalou dina o Jisu, e dua tale na ka e lomatarotarotaki.

Savaira: Na cava ya?

Keresi: Na ka e tukuni me baleta na nona papitaiso. Raica mada na ka e volai ena Luke 3:21, 22. Kerekere wilika mada mai.

Savaira: “Nira papitaiso tiko na lewenivanua, e mai papitaiso tale ga o Jisu. Ena gauna e masu tiko kina o koya, e tadola na lomalagi qai lako sobu vua na yalo tabu me vaka na ruve, qai rogo mai lomalagi e dua na domo e kaya: ‘O iko na Luvequ lomani, au vakadonui iko.’”

Keresi: Na cava a cakava o Jisu ena gauna a papitaiso kina?

Savaira: A masu tiko.

Keresi: Io. Eda na rairai taroga, ‘Ke Kalou o Jisu, a masu tiko vei cei?’

Savaira: Taro vinaka qori. Meu tarogi neimami talatala mada.

Keresi: Dua tale na ka meda vakasamataka. Ni lamata mai wai o Jisu, a vosa mai lomalagi e dua. Na cava e tukuna?

Savaira: A kaya ni Luvena o Jisu, e lomani koya, e vakadonui koya tale ga.

Keresi: Dina. Ke Kalou o Jisu, o cei ga a vosa mai lomalagi?

Savaira: Au sega ni bau vakasamataka va qori.

Vuna Erau Vaka Kina na “Tama” kei na “Luvena”

Keresi: E vinaka me vakasamataki tale ga qo: Daru sa wilika oti ni tukuna o Jisu ni Kalou e Tamana vakalomalagi. Ena gauna a papitaiso kina, a vosa mai lomalagi e dua qai tukuna ni Luvena o Jisu. O Jisu mada ga a tukuna ni Luve ni Kalou. Ke o via tukuna vei au ni rau tautauvata e rua, na veiwekani cava o rawa ni vakamacalataki rau kina?

Savaira: E rua na veitacini.

Keresi: Io, de dua erau drua. Ia a tukuna o Jisu ni Kalou na Tamana, o koya e Luvena. Na cava o nanuma ni vakaibalebaletaka tiko e keri o Jisu?

Savaira: Au taura rawa na ka o tukuna tiko. A tukuna tiko o Jisu ni dua e qase cake qai levu na nona lewa ni vakatauvatani kei koya kadua.

Keresi: Donu vinaka. Vakasamataka mada qo: Dua na vosa vakatautauvata totoka o vakasamataka ya, e rua na veitacini se drua. Ke Kalou o Jisu, e macala ga ni na vakasamataka tale ga na ivakatautauvata ya se dua tale ena vakamatatataka na nodrau veiwekani e rua erau tautauvata baleta ni Qasenivuli Levu.

Savaira: Io.

Keresi: Ia a cavuta o Jisu na vosa “Tamana” kei na “Luvena” me vakamacalataka na nodrau veiwekani kei na Kalou.

Savaira: Dua na vakasama vinaka qori.

Ka Era Tukuna na iMuri Taumada i Jisu

Keresi: Ni bera niu gole, au rawa ni vakamacalataka tale vei iko e dua na ka?

Savaira: Sa donu.

Keresi: Ke Kalou dina o Jisu, o nanuma ni ratou na tukuna sara ga qori na nona imuri?

Savaira: Io, eratou na rairai cakava qori.

Keresi: Ia eda sega ni bau wilika ena iVolatabu ni ratou vakavulica qori. A vola ga ena Filipai 2:9 na yapositolo o Paula e dua na imuri taumada i Jisu, na ka e cakava na Kalou ni oti na nona mate kei na nona vakaturi o Jisu: “E vakacerecerei koya [Jisu] kina na Kalou ena dua na itutu cecere qai solia vakayalololoma vua na yaca e uasivia na vo tale ni yaca.” Na cava e tukuni e keri ni cakava na Kalou vei Jisu?

Savaira: A vakacerecerei koya na Kalou ina dua na itutu cecere.

Keresi: Io. Ke rau tautauvata na Kalou kei Jisu ni bera ni mate qai vakacerecerei koya na Kalou ina dua na itutu cecere ena dua na gauna e muri, sa na cecere o Jisu vua na Kalou se vakacava? E tiko e dua e uasivia na Kalou?

Savaira: Sega.

Keresi: E dina qori. Ena ivakadinadina kece daru sa raica oti, e vakavulica beka na iVolatabu ni Kalou o Jisu?

Savaira: Sega. E tukuna na iVolatabu ni o Jisu e Luve ni Kalou.

Keresi: Donu vinaka. Nanuma tiko ga Savaira ni keimami dokai Jisu vakalevu na iVakadinadina i Jiova. Keimami vakabauta ni nona mate na Mesaia yalataki e rawa nira vakabulai kina o ira era yalodina.

Savaira: Au vakabauta tale ga qori.

Keresi: De dua o na vaqaqa, ‘Eda na vakaraitaka vakacava nida vakavinavinakataka na nona solia o Jisu na nona bula ena vukuda?’a

Savaira: Io, au dau vaqaqa sara ga qori.

Keresi: Au rawa ni lesuvi iko mai me daru veivosakitaka na kena isau vakaivolatabu. O na galala ena gauna vata ga qo ena macawa mai qo?

Savaira: Io, au na galala.

Keresi: Sa donu, daru qai mai sota tale e ke.

[iVakamacala e ra]