Vuna e Vakainaki Kina na Neitou Bula

NI SUCU oti ga na luvequ tagane o Gary ena 1958, au kidava sara ni dua na ka e leqa vua. Ia oti e tini na vula ratou sa qai kila na vuniwai na mate e tauvi koya, ratou vakadeitaka tale ga qori na kenadau mai Lodoni ni oti tale e lima na yabaki. Oti e ciwa na yabaki na nona sucu o Gary, a sucu na luvequ yalewa o Louise qai vakararawataki au dina ni bibi cake na kena mate mai vei Gary.

“Erau tauvi LMBB syndromea ruarua na luvemu qai ka ni rarawa ni sega na kena iwali,” era tukuna vakayalovinaka vei au na vuniwai. Na mate ni kawa qori e tu tu yadua me veitauvi, a se sega ni levu tale ga na kena itukutuku e kilai ena gauna oya. Qo eso na kena ivakatakilakila e kilai levu: e dau buawa na rai me yacova sara na mataboko, levulevu sivia, sivia na iwiliwili ni qaqalo ni liga kei na yava, berabera na tubu, sega ni yavala vinaka na veitikiniyago, matenisuka, sasala, e dau leqa tale ga na ivi. Qori na vuna ena dredre kina meu qaravi rau na luvequ. E laurai ena vakadidike e caka ena dua na gauna lekaleka sa oti ni rauta na 1 ena 125,000 na lewenivanua e Peritania e tauvi ira na mate qori, dina ga ni levu tale e sega ni kaukaua sara vei ira na mate ya.

NEITOU “ULUVATU” O JIOVA

Au veitalanoa kei na dua na iVakadinadina i Jiova niu vakamau oti ga, au raica rawa sara nira vakavulica na ka dina ena iVolatabu. Ia e sega sara ga ni bau kauai kina o watiqu. Ni keitou veitokiyaki tu ga ena vuku ni nona cakacaka, au sega ni dau tiko rawa kina ena soqoni vakaivavakoso. Ia e sega ni cegu na noqu wilika na iVolatabu kei na noqu masu vei Jiova. E veivakacegui dina na noqu wilika ni o ‘Jiova e nona uluvatu o koya e rarawa, e uluvatu ena gauna ni leqa,’ ena sega tale ga ni “biuti ira era sa vakasaqarai [koya]”!—Same 9:9, 10.

Ni buawa na nona rai o Gary, a mani kau ni se qai yabaki ono me lai vuli ena dua na koronivuli curuibure ena dua na baravi ena ceva kei Igiladi, e baleti ira sara ga era vakataki Gary. E dau qiriti au mai vakalevu me baleta na veika e dau lomaleqataka, au dau qai vukei koya me kila na yavu ni ivakavuvuli vakaivolatabu. Au tauvimate tale ga ni oti ga e vica na yabaki nona sucu o Louise, a tauvi au na mateniua kei na dua tale na mate e rawa ni paralasi kina e dua na yasa ni yago se yago taucoko. A lesu mai vale o Gary ni yabaki 16 ni oti na nona vuli. Ia e buawa tiko ga na nona rai, qai vakadeitaki ena 1975 ni sa mataboko. A biuti keitou o watiqu ena 1977.

Ni lesu ga mai o Gary, keitou sa vakaogai keitou sara ena ivavakoso era dauloloma na lewena, au qai papitaiso ena 1974. Dua na ka noqu marau ni vukei Gary e dua na qase me kila na veiveisau e yaco tiko e yagona ena nona bula vakaitabagone. Eso tale na mataveitacini era vukei au ena cakacaka ni vale. Ni toso na gauna, a saumi ratou e lima na mataveitacini na tabana ni veiqaravi raraba me ratou dau vukei keitou. Dua dina na veivuke levu qori!

A toso tiko ga vakayalo o Gary qai papitaiso ena 1982. Ni vinakata dina me painia veivuke, au mani nanuma meu tomani koya ena cakacaka qori qai vica vata na yabaki na noqu painia tiko. A marau vakalevu na luvequ tagane ni tarogi koya ena dua na gauna e muri na ivakatawa ni tabacakacaka: “Vakacava mo painia tudei Gary?” A gadreva sara tu ga o Gary na veiuqeti va qori, qai lesi me painia tudei ena 1990.

Sa sele oti vakarua na dibi Gary, kena imatai ena 1999 kei na kena ikarua ena 2008, ia e bibi sara na kena mate o Louise. A sucu mataboko, au qai kila ni tauvi koya tale ga na LMBB syndrome niu raica ni sivia na iwiliwili ni qaqalo ni dua na yavana. Ni laurai vakavuniwai, e levu tale na nona gacagaca e loma e sega ni cakacaka vinaka tu. E levu na veisele lelevu e caka vua ena veiyabaki sa sivi, wili kina e lima na veisele ena nona ivi. E tauvi matenisuka tale ga me vakataki Gary.

E kila vinaka tu o Louise na leqa e rawa ni yaco ke gadrevi me caka na veisele, e dau veitalanoa kina kei ira na dauveisele, vuniwai era dauveivakamoceri kei ira na vakailesilesi ni valenibula mera kila rawa toka na vuna ena sega ni tauri dra kina. Qori e veimaliwai vinaka kina kei ira kece era dau qaravi koya vinaka ena nona tauvimate.

VAKAINAKI NEITOU BULA

E levu na ka keitou dau cakava e vale me baleta na neitou sokalou vei Jiova. Ni bera nira yaco mai na iyaya vovou, au dau vakayagataka e vica vata na aua meu wiliwili tu kina vei rau o Gary kei Louise. Qo keitou sa vakayagataka na CD, DVD, kei na katokatoni mai na www.pr2711.com ena gauna kece keitou vuli iVolatabu kina e veimacawa, keitou rawa ni vakamacala tale ga kina ena soqoni.

E dau wiligusutaka ena so na gauna o Gary na nona isaunitaro, e dau cavuqaqataka tale ga na nona ivakamacala ke vakaitavi ena Koronivuli ni Vuli Vunau. A lesi me dauveiqaravi ni ivavakoso ena 1995 qai dau ogaoga ena Vale ni Soqoni, e dau kidavaki ira na lewe ni ivavakoso qai dau veivuke ena qaravi ni misini ni vosa.

Sa dau vodo voli ena idabedabe qiqi o Gary ena vuku ni sasala, levu na gauna era dau biliga toka na nona idabedabe qiqi na mataveitacini era dau tomani koya ena cakacaka vakaitalatala. E dua na tacida e vukei koya me rau vuli iVolatabu kei na dua na tataleitaki. A vakayaloqaqataka tale ga e dua na yalewa lotu vaKarisito sa sega tu ni dautukutuku me 25 na yabaki. Erau sa tiko ruarua ena soqoni ena gauna qo.

Ni se qai yabaki ciwa o Louise, a vulica vei buna na taliwa, keirau qai vakavulici koya ena cula isulutali kei na dua tale e dau vukei keitou e vale. Ni se taleitaka tiko ga vakalevu na taliwa, e dau taliwataka kina na nodra itutuvi duiroka na gone kei ira na itabaqase ena ivavakoso. E dau cakava tale ga na kad ni vakanuinui vinaka era kabi tu kina na iyaloyalo. Era dau vakamareqeta na kad qori o ira era taura. A vuli taipa ni se itabagone o Louise. Sa vakayagataka tiko ena gauna qo e dua na kompiuta e rawa ni vosa me dau imeli kina vei ira na nona itokani. A papitaiso o Louise ni yabaki 17. Ni vakayacori eso na ituvatuva lavotaki ni cakacaka vakavunau, keirau dau marautaka na neirau veitomani ena painia veivuke. Me vakataki Gary, e dau wiligusutaka o Louise na veitikinivolatabu me vakaraitaka kina ni vakabauta na yalayala ni Kalou me baleta na vuravura ‘ena rai kina na matadra na mataboko’ qai ‘sega ni kaya e dua na lewenivanua: Au tauvimate.’—Aisea 33:24; 35:5.

Dua na ka neitou vakavinavinakataka na ka dina ena vosa uqeti i Jiova! Keitou vakavinavinakataka tale ga vakalevu na nodra dau veitokoni vakayalololoma na lewe ni ivavakoso. Ke sega na veitokoni qori, keitou na sega ni cakava rawa e levu na ka. E bibi sara ni vakainaki dina na neitou bula ena veivuke i Jiova.