Au Tatadrataka Tu Meu Veituayaki

Talanoataka o ZOYA DIMITROVA

A yaco na ka au tatadrataka voli niu yabaki 15—au vakaitavi ena sakisi (circus) qai marautaka na veituayaki. Ia a yaco na leqa ena 4 Seviteba, 1970. Au soli ivukivuki vinaka tiko e macawa, ia e totolo ga na noqu lutu.

AU SUCU ena 16 Tiseba, 1952, au tiko vata kei rau na noqu itubutubu kei na tuakaqu e Sofia, Bulgaria. Na matanitu vakominisi a veiliutaki tiko ena gauna oya e sega ni uqeti ira na lewenivanua mera lewena e dua na lotu, ia e sega ni vakatabuya sara na lotu. E levu era sega ni vakabauta na Kalou, levu tale era vakabauta era sega ni via vakaraitaka e matanalevu. Keitou tukuna ni keitou lotu Orthodox, ia au sega ni vakavulici ena veika ni lotu, au sega tale ga ni kila na Kalou.

A kilai niu se gone niu dau taleitaka na veimataqali qito vakauasivi na gymnastic. Niu yabaki 13, e dua na turaga a mai vaqara e dua na goneyalewa ena neimami koronivuli me vakavulici ena soli ivukivuki ena sakisi. A mani tukuni au na noqu qasenivuli ni gymnastic. Sa dua na ka noqu marau niu vodo tu ena motoka ni Merika nei manidia meu lai vakatarogi, qai vakaraitaka na ka au kila vei ratou na dauveivakavulici. Au marau niu digitaki. Qo na itekitekivu ni ituvatuva ni vakaukauayago e lakovata kei na vakatatabu, vaka kina na vakatovotovo e sivia e rua na yabaki na kena dede. A oti na noqu vuli niu yabaki 15, au sa tekivu veituayaki tale ga ena sakisi. Taumada au veituayaki ena veivanua e Bulgaria, oti au qai lako ina veivanua ena Soviet Union makawa, Algeria, Hungary, kei Yugoslavia makawa.

Au marau voli me tolu na yabaki ni sa vakavatukana na ka au tatadrataka. Ia ena gauna au vakatasuasua tiko kina mai Titov Veles, Masitonia, a qai yaco na leqa e cavuti tiko ena itekivu ni ulutaga. Au soli ivukivuki tiko e macawa, e viritaki au e macawa o kequ ikarua e lili vuki sobu tu, me qai ciqomi au tale niu vakalutulutu mai. Au sirita na ligana, cagutu na wa e vesu tu e toloqu, au qai lutu me 6 na mita. Au cicivaki i valenibula, au qai kila ni ramusu e dua na ligaqu, vica na sui ni sarisariqu kei na noqu suitu. Au sega tu ni vakilai au me vica na siga, au sega tale ga ni nanuma rawa na ka e yaco. Niu vakilai au mai, au qai kila niu paralasi mai toloqu lako sobu. Ia niu se gone, au nuidei keu qaravi vakavuniwai se sele, au na rawa ni lako tale qai vakaitavi ena sakisi.

Au qaravi ena rua veimama na yabaki tarava ena vica vata na vanua ni vakabulabula, au nuitaka tiko ga niu na bula vinaka tale. Toso na gauna, meu sa na ciqoma ga ni sa na tini koso na noqu tatadra. Ia e lasa niu sa na vakamatauni au qo ena “veituayaki” e duidui sara mai na kena au a tatadrataka—au sa na veitosoyaki ena idabedabe qiqi.

iTekitekivu Vou

Ni levu na ka au dau cakava e liu, au nanuma niu na sega ni rawata na veisau qo. Au lomabibi ni sa seavu na noqu vakanuinui. Ia ena 1977 a mai sikovi au na cauravou o Stoyan. Au kacivi koya sara i vale niu kila ni rau veiganeni kei na dua na noqu itokani vakacakacaka e liu. Keirau sa veitalanoa tiko, a qai tarogi au ena noqu inuinui meu na bula vinaka tale. Niu yalolailai au rarawataka na kequ ituvaki, au mani tukuna vua ni sega na ka au vakanuinui kina. Ni tukuna ni rawa ni vukei au ga na Kalou, au sauma ena cudru: “Ke bula dina tiko na Kalou, na cava e yacovi au kina na ituvaki qo?”

A se qai iVakadinadina i Jiova ga o Stoyan ena nona vakaitavi voli ena sakisi mai Merika, a yavutaka sara ena ka au tukuna na nona ivakamacala me baleta na inuinui totoka ni gauna se bera mai e tukuni ena iVolatabu. Au marau niu kila ni sa voleka ni parataisi na vuravura. E tara sara ga na lomaqu na yalayala, “sa na sega tale na mate, na lolosi, na tagiyaso, kei na mosi.” (Vakatakila 21:4) Au vinakata sara ga meu bula vinaka tale! Au mani vakadonuya meu vulica e veimacawa na iVolatabu. Qori e itekitekivu vou ena noqu bula. Au sa qai kila na yavu ni inuinui dina!

Au dau vakanamata ena noqu vuli iVolatabu e veimacawa. Keirau vuli e liu kei Stoyan, oti sa qai vakavulici au e dua na iVakadinadina dauveikauaitaki o Totka. Ena nona veivuke, e totolo sara na noqu kila e levu na ka dina ena iVolatabu au qai yalataka na noqu bula vua na Kalou o Jiova. A sega ni dua e Sofia e rawa ni papitaisotaki au ena gauna oya, au mani waraka na nona veisiko mai e dua na iVakadinadina tagane mai Masitonia. Ni oti e dua na yabaki na noqu vulica na iVolatabu, au qai papitaiso ena tavu ni sisili ena noqu rumu ena 11 Seviteba, 1978. Dua na ka na noqu marau niu sa papitaiso meu iVakadinadina i Jiova, sa vakainaki tale ga na noqu bula.

E vaka ga na bukawaqa e lomaqu na ka dina au vulica. Au dau gumatua ni tukuna vei ira kece era lako mai vale na inuinui au sa vulica. Ia e ka ni rarawa nira sega ni taura vakabibi na ka au tukuna nira rairai nanuma ni vakaleqai au na noqu mavoa.

Cala Bibi

A vakatabui tu ena gauna oya na nodra cakacaka na iVakadinadina i Jiova e Bulgaria, era le lailai wale ga ena vanua taucoko. E sega ni dua na soqoni vakaivavakoso au rawa ni lako kina, e sega tale ga ni levu na gauna meu veimaliwai kina kei ira keimami vakabauta vata. Na noqu sega ni dau soqoni kei na noqu sega ni kila na rerevaki ni veitokani voleka kei ira era sega ni muria na ivakatagedegede ena iVolatabu, au lai cakava kina e dua na cala bibi.

A vakararawataki au tu ga na noqu lewaeloma, au vakila tale ga na mosimosi ni noqu yawaka na Kalou o Jiova. Niu bibivoro qai madua, au talaucaka na lomaqu vei Jiova au kerea me vosoti au. Ena nodra veivuke na qase ni ivavakoso dauloloma, au vakavinakataka na noqu veiwekani kei Jiova, au marautaka tale na noqu qaravi koya. Au vakamareqeta dina na noqu rawa ni qaravi Jiova ena lewaeloma vinaka, au qai lewena na nona isoqosoqo savasava!

Yalani na ka au Cakava, ia au Marau

Na noqu mavoa ena 40 na yabaki sa oti e vakaseva sara ga na noqu tatadra meu vakaitavi ena sakisi qai veituayaki, sa vakadaberi au tu vakadua ena idabedabe qiqi. Ia au sega ni dau rai lesu ena rarawa se veivutuni, vaka sara ga e tawayaga na noqu bula. Au liaca ena noqu vulica na ka dina ena iVolatabu ni marau se rawaka au tatadrataka tu ena sakisi e wili ena veika ena sega ni yaga tawamudu. Au sa raica tale ga na levu ni nodra rarawa na noqu itokani vakacakacaka e liu era sega ni biuta na sakisi. Ena yasana adua, na iyau talei duadua au kunea, na noqu veiwekani kei na Dauveibuli, na Kalou o Jiova. Na marau levu au vakila kina ena sega vakadua ni rawati ena sakisi.

Au marautaka tale ga na noqu raica na nodra vulica e levu tale na ka dina ena iVolatabu ra qai yalataka na nodra bula vua na Kalou dauloloma o Jiova. Niu tekivu vulica na iVolatabu ena 1977, era se lailai ga na iVakadinadina i Jiova e Bulgaria. Ena icavacava mada ga ni 1991 ni vakalawataki na nodra cakacaka na iVakadinadina i Jiova ni kasura na veiliutaki vakominisi, a sivia ga vakalailai na duanadrau na iVakadinadina ena vanua taucoko. Au marau dina niu raica na tubu tiko ga ni iwiliwili ni dautukutuku ni Matanitu, sa lai yacova sara na iwiliwili levu duadua e voleka ni 1,800!

E se levu tu na ka me caka e Bulgaria. Era se vaqara tiko e levu na ka dina ena Vosa ni Kalou. Qori e laurai ena iwiliwili vakasakiti ena gauna ni iVakananumi ni mate i Karisito ena yabaki 2010 era tiko kina e 3,914. Au dau marau niu vakasamataka ni vakadinadinataka oya na nona vakalougatataka o Jiova na veika lalai a tauyavu kina na cakacaka e Bulgaria. Au vakadinadinataka sara ga na parofisai ena Aisea 60:22, “ko koya sa lailai” sa tubu me “matanitu kaukauwa.”

E dua tale na ka e vakavu marau, e ka marautaki duadua ena noqu bula, na sevutaki ni New World Translation of the Holy Scriptures ena vosa vakaBulgaria. A sevutaki mai Sofia ena Okosita 2009, ena soqo siga tolu e kena usutu, “Yadra Tiko!” Na sevutaki ni iVolatabu qo ena noqu vosa e dua tale na noqu tatadra e vakayacori! E sega ni vakatitiqataki ni na yaga sara ena nodra vukei e levu tale mera kila na ka dina ena iVolatabu e Bulgaria.

Ena vuku ni kequ ituvaki, e vakaiyalayala ga na ka au rawa ni cakava ena vunautaki ni itukutuku vinaka ni Matanitu ni Kalou. Ia au marautaka vakalevu na noqu tukuna na ka dina ena iVolatabu vei ira keimami tiko veitikivi kei ira era lako mai na noqu vale. Ena dua na siga ni tasivi e dua keirau tiko veitikivi, au kacivi koya sara i vale. A lako mai au qai vakamacalataka vua eso na vakasama veivakauqeti ena iVolatabu, a vakadonuya tale ga me vulica na iVolatabu ena gauna au sureti koya kina. Dua na ka na noqu marau ni a mai papitaiso me dua na taciqu lotu vaKarisito. Au kalougata dina niu bau vukea e le va me ratou yalataka nodratou bula vei Jiova.

Na noqu tiko wasoma ena soqoni vaKarisito kei ira e sivia na duanadrau na mataveitacini era vaka ga na lewe ni noqu vuvale, e veivakayaloqaqataki, e vakavu marau vakalevu tale ga vei au. Ni sega ni vakarautaki ena noqu vanua na sala ni veilakoyaki me baleti ira na qase kei ira e vakaleqai na yagodra, e dau dredre kina na noqu sasaga meu lako ena neimami soqoni. Ia au vakavinavinakataka vakalevu na nona veikauaitaki e dua na cauravou keirau vakabauta vata. Ena gauna kece ni soqoni e dau keveti au mai na noqu vale ina nona motoka, mai na motoka ina Kingdom Hall, ena cakava tale ga qori ni suka na soqoni. Au vakavinavinaka vei Jiova niu lewe ni dua na vuvale vakayalo era veilomani!

Niu rai lesu, na veika e yaco ena noqu bula e duidui vakalevu sara mai na veika au tatadrataka niu se gone. Na noqu qaravi Jiova e vakamarautaki au vakalevu duadua ena gauna qo, au vakanuinui rawa tale ga kina ena veika totoka ena gauna se bera mai. Au vakamareqeta na yalayala ni Kalou nira na “ladelade na lokiloki me vaka na me kila” ena parataisi e vuravura. (Aisea 35:6) Au vakanamata ena nuidei ena siga au sa na lade kina mai na noqu idabedabe qiqi, sa na taucoko na noqu bula au qai gonegone tale.

[Tikina bibi ena tabana e 30]

“Na noqu tiko wasoma ena soqoni vaKarisito, e veivakayaloqaqataki, e vakavu marau vakalevu tale ga vei au”

[Tikina bibi ena tabana e 31]

“E ka marautaki duadua ena noqu bula, na sevutaki ni New World Translation of the Holy Scriptures ena vosa vakaBulgaria”

[iYaloyalo ena tabana e 29]

Au tekivu vakaitavi ena sakisi niu yabaki 15