Era Yalorawarawa​—Mera Gole i Taki

DUA na ka nodra sasaga na lotu vaKarisito ena imatai ni senitiuri mera vunautaka “na itukutuku vinaka qo ni Matanitu ni Kalou” vei ira e levu. (Maciu 24:14) Eso era gole mada ga ena vanua era sega ni kila. Me kena ivakaraitaki e gole na yapositolo o Paula ena vanua sa vakatokai ena gauna qo me o Taki qai vunau kina vakalevu ena nona ilakolako vakaulotu.a Ni oti tale e 2,000 na yabaki, ena 2014 e laurai me vanua e vinakati kina vakalevu na vunau o Taki. Na cava me tuvanaki kina na cakacaka vakavunau qori? O cei e vakaitavi kina?

“DUA NA KA E YACO TIKO E KE?”

Sa sivia na 2,800 na dautukutuku e Taki, ia era tiko kina e 79 na milioni na lewenivanua. Kena ibalebale qo ni kedra iwiliwili na dautukutuku ni vakatauvatani kei ira na lewenivanua e rauta ni 1 ina veiya28,000. Vakasamataka mada na kedra le lailai na dautukutuku mera vosa vei ira e le vica vata ena vanua qo. Na inaki ni kena tuvanaki na cakacaka vakavunau ena vanua qo, oya mera rogoca kina e levu na itukutuku vinaka ena loma ni dua ga na gauna lekaleka. E rauta ni le 550 na mataveitacini era vosa vakaTaki era gole mai na veiyasa i vuravura mera lai tomani ira na mataveitacini ena vanua ya ena vunau. Na cava e rawati kina?

E tete na vunau. E vola mai e dua na ivavakoso e Istanbul: “Nira raici keimami na tamata era na taroga: ‘Dua na nomuni soqo lavotaki e caka e ke? Keimami raici kemuni na iVakadinadina i Jiova e veivanua kece ga!’” E vola e dua na ivavakoso ena koro o Izmir: “Dua na turaga e cakacaka tiko ena dua na ikelekele ni teksi, e gole vua e dua na qase ni ivavakoso e kea qai taroga, ‘Dua na ka e yaco tiko e ke? Sa vakalevutaki na nomuni cakacaka?’” Io, e vakilai na levu ni noda cakacaka vakavunau.

Era marautaka vakalevu na vulagi yani na nodra cakacaka vakavunau. E kaya o Steffen mai Denmark: “Ena veisiga kece au vunau kina, au na vosa vua e dua e se sega ni bau rogoca na yaca i Jiova. E vaka sara ga au sa qai tukuna tiko vei ira na yacana.” E vola o Jean-David mai Varanise: “Keimami na vunau tiko ena dua ga na tolo ni gaunisala ena loma ni vica na aua. E totoka dina! Levu era sega ni kilai keda na iVakadinadina i Jiova. Voleka ni vale kece ga keimami na vosa kina, vakaraitaki na vidio, qai soli na ivola vei ira na itaukeinivale.”

Vei ira kece na le 550 era vakaitavi, keimami solia rawa e 60,000 na ivola ena loma ga ni rua na macawa! Io e tete dina na cakacaka vakavunau.

Gugumatua tiko ga ena cakacaka vakaitalatala. Dua na ka nodra uqeti na mataveitacini ena vanua e lai caka kina na vunau. Levu era vakasamataka sara mera veiqaravi vakatabakidua. E laurai ni tubu na iwiliwili ni painia tudei e Taki ena 24 na pasede ena loma ni 12 na vula tarava.

Era vakaraitaka tale ga na vakaitavi ni vinaka cake na nodra cakacaka vakaitalatala nira lesu tale ena nodra vanua. E vola o Şirin, e dua na tacida yalewa mai Jamani: “Era doudou na vunau tawalokuci na mataveitacini e Taki. Au dau madua na vunau tawalokuci. Ia au vakavinavinakataka na kena tuvanaki na cakacaka vakavunau qo ena nodra ivakaraitaki na mataveitacini kei na nodra dau masu, au doudou kina ni cakava na ka au sega ni dau rawata tu eliu. Au vunau qai soli tikidua sara mada ga ena salaniqiqi e cici e lomaniqele (subway)! Ena gauna qo au sa sega ni qai madua.”

E kaya o Johannes mai Jamani: “Au vulica sara ga e levu na ka meu vakavinakataka ena noqu cakacaka vakaitalatala. Dua na ka nodra via vakalevutaka na mataveitacini e Taki na nodra cakacaka vakaitalatala. Era na vunau ena veigauna kece ga. Qori tale ga na ka au qai cakava niu lesu i Jamani. Ena gauna mada ga qo dua na ka na levu ni tamata au vunau kina.”

E tukuna o Zeynep mai Varanise: “E uqeti au sara ga na tuvanaki ni cakacaka vakavunau qo. E vukei au meu doudou, meu nuitaki Jiova tale ga vakalevu.”

Era veivolekati na dautukutuku. E guiguilecavi dredre na nodra duavata kei na nodra veilomani na mataveitacini era gole mai na veivanua. E tukuna o Jean-David sa cavuti oti mai: “Keimami ‘tovolea’ se vakila nodra veikauaitaki na mataveitacini.” E tomana: “Era ciqomi keimami me keimami veitokani, keimami vuvale vata tale ga. Era dolava vei keimami na nodra vale. Au kila ni keimami lewe ni mataveitacini e vuravura raraba; qori na ka au dau wilika ena noda ivola. Ia qo au sa qai vakadinadinataka sara tu ga. Dua mada ga na ka noqu sakitaka niu dua vei ira na tamata i Jiova, au vakavinavinakataki koya tale ga ena itavi dokai qo.”

E tukuna o Claire mai Varanise: “Ke o gole mai Denmark, Varanise, Jamani se Taki, keimami lewe ga ni dua na vuvale. Vaka ga ni bokoca laivi na Kalou na ivakatakilakila ni iyalayala ni vanua.”

E tomana o Stéphanie mai Varanise: “Keimami vulica ena cakacaka vakavunau qo ni sega ni vakaduavatataki keimami na neimami itovo vakavanua se vosa, ia na neimami lomani Jiova sara ga.”

E YAGA SARA GA VAKALEVU

Levu era gole yani i Taki era sa lai vakasamataka mera lai veivuke ena levu ni cakacaka e se vo me caka. Eso sara mada ga vei ira qori era sa toki kina. Eda vakavinavinakataki ira dina na tu vakarau mera lai veivuke ena vanua e vinakati kina vakalevu na dautukutuku.

Me kena ivakaraitaki e dua na iwasewase lailai ena vanua tu yawa era le 25 ga na kena dautukutuku. E vica vata na yabaki e dua tu ga na kena qase. Vakasamataka mada nodra marau na dautukutuku ena vanua qo nira gole yani ena 2015, e ono na dautukutuku mai Jamani kei Necaladi mera lai veitokoni kina!

MEDA VAKAITAVI SARA GA KINA

Na cava era tukuna na dautukutuku era lai veivuke e Taki? E sega ni rawarawa ena so na gauna, ia era vakaicocovitaki nira lai veivuke ena vanua e vinakati kina vakalevu na dautukutuku. Dikeva mada qo na ka era tukuna eso:

E tukuna o Federico e dua na tacida tagane vakawati e sa yabaki 40 vakacaca e toki mai Sipeni: “Au vakila na galala ni sega ni levu na noqu iyau, au rawa kina ni vakasamataka tiko ga na veika e bibi cake.” Vakacava ena vakatututaka o koya na veiqaravi va qo? “Io, me cava tale!” e kaya. “Ke o toki e vanua tani mo lai veivuke mera mai qaravi Jiova na tamata, o sa biuti iko sara tiko ga ena liga i Jiova. Ena sega ni vakatauvatani rawa nona kauaitaki iko o Jiova.”

E tukuna o Rudy e dua na tacida tagane vakawati mai Necaladi e sa yabaki 50 vakacaca: “Dua na ka noda lomavakacegu nida liu sara ga ena cakacaka qo, da qai wasea na ka dina vei ira e levu era se sega vakadua ni bau rogoca. E talei nida raica nodra marau na tamata nira ciqoma na ka dina.”

E tukuna o Sascha, e dua na tacida tagane vakawati e yabaki 40 vakacaca e gole mai Jamani: “Ena veigauna kece au gole kina ena cakacaka vakaitalatala, au sotavi ira na se qai rogoca vakadua na ka dina. E veivakacegui dina noqu vukei ira qo mera kilai Jiova.”

E tukuna o Atsuko, e dua na tacida yalewa vakawati e yabaki 30 vakacaca e gole mai Japani: “E liu au dau vinakata sara ga me yaco mai vakatotolo na Amaketoni. Ia niu toki mai Taki, au vakavinavinakataki Jiova ni se vosovoso tiko ga. Na levu ga ni noqu raica nona veidusimaki o Jiova, na levu tale ga ni noqu via volekati koya.”

E kaya o Alisa, e dua na tacida yalewa e se qai yabaki 30 vakacaca e gole mai Rusia: “Niu veiqaravi vei Jiova ena cakacaka vakaitalatala va qo, au tovolea kina na veika vinaka kece e vakarautaka o koya.” (Same 34:8) E tomana: “O Jiova e Tamaqu, e noqu itokani voleka tale ga, au qai kilai koya vinaka sara ga ena duidui ituvaki au sotava. E levu na ka marautaki au vakila, irogo vinaka, kei na veivakalougatataki vakayalololoma!”

“RAICA NA WERE”

Era rogoca sara e levu na itukutuku vinaka ena kena tuvanaki na cakacaka vakavunau qo i Taki. Ia se levu tale tiko ga na vanua e se bera ni caka kina na vunau. Era toki i Taki e veisiga o ira na via vakalevutaka na nodra cakacaka vakaitalatala mera lai sotavi ira na se sega sara ga ni rogoca na itukutuku me baleti Jiova. Vakacava o na taleitaka mo lai veiqaravi ena yalava va qo? Ke vaka kina oni uqeti moni: ‘Tacake moni raica na were, ni sa matua vinaka tu me tamusuki.’ (Joni 4:35) O rawa ni lai veivuke ena vanua e “sa matua vinaka tu me tamusuki”? Ke rawa, mo lalawataka sara ga ena gauna qo mo sauva na isausau qori. Dua na ka eda rawa ni vakadeitaka: Eda na vakalougatataki vakalevu nida vakaitavi vakalevu ena wasei ni itukutuku vinaka ina “veivanua yawa sara!—Caka. 1:8.