Kena iMatai

Lomana na Tamata, Kua ni Lomana na iLavo kei na iYau

NA CAVA E KAYA NA IVOLATABU? E “levu sara na ka ca e vu mai na lomani ni ilavo.”​—1 Timoci 6:10.

NA CAVA E VAKADREDRETAKA QO? Eda vakamuai vakalevu ena itukutuku ni veivoli meda kua ni lomavakacegu ena veika e tu vei keda. Na kena inaki meda cakacaka e veigauna me rawa nida volia na iyaya vovou se na kena e vinaka cake, se na iyaya lelevu. E icori na ilavo, ena rawarawa tale ga meda lomana vakalevu. Ia e vakarota na iVolatabu ke dua e lomana na iyau ena sega ni lomavakacegu. E kaya kina na tui o Solomoni: “O koya sa lomana na siliva ena sega ni mamau e na siliva; se ko koya sa lomana nai yau e na kenai kuri.”​—Dauvunau 5:10.

NA CAVA O RAWA NI CAKAVA? Mo vakatotomuri Jisu, qai vulica mo lomana vakalevu na tamata sega ni iyau. A yalorawarawa o Jisu me solia na ka kece e tu vua​—na nona bula sara mada ga​—ni lomani ira na nona itokani. (Joni 15:13) A tukuna o Jisu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Ke da vakamatauna meda vakayagataka na noda gauna kei na noda iyau ena vukudra eso tale, era na cakava tale ga qori vei keda. E kaya o Jisu: “Moni dau soli ka, ena qai soli vei kemuni.” (Luke 6:38) O ira era dau qara na ilavo kei na iyau era vakavuna ga na nodra rarawa kei na mosi. (1 Timoci 6:​9, 10) Ena yasana adua, na lomavakacegu dina e vu mai na noda lomani ira eso tale ra qai lomani keda tale ga.

Ia vakacava mo vakalewa mada na kemu ituvaki mo bula rawarawa ga? E rawa beka mo vakalailaitaka na nomu iyau se na ka o vinakata mo volia? Ke o cakava qori, ena levu kina na gauna kei na kaukaua mo vakayagataka ena veika e bibi sara ena nomu bula​—na nodra vukei eso tale kei na nomu qarava na Kalou e solia na veika kece o taukena.​—Maciu 6:24; Cakacaka 17:28.

[iYaloyalo ena tabana e 4]

“Moni dau soli ka, ena qai soli vei kemuni”