E Veisautaka na Bula na iVolatabu

NA CAVA e uqeta me veisautaka na nona bula e dua na sotia e dau saqata na matanitu e liu, a daubutako tale ga? Na cava a veisautaka kina na nona isausau e dua na dau karate? A vakalougatataki vakacava e dua na tama ena nona sega ni guilecavi luvena tagane? Wilika mada na kedratou italanoa.

“E liu au dau vakayacora tu e levu na ivakarau ca qai sega ni lomavakacegu, ia au sa marau ena gauna qo.”—GARRY P. AMBROCIO

YABAKI: 47

VANUA: YATU FILIPAINI

KA E KILAI KINA: SOTIA E DAU SAQATA NA MATANITU

NOQU BULA E LIU: Au cavutu mai na dua na taoni lailai o Vintar. Keitou vakaitikotiko ena vanua buca, qai wavokita na veiulunivanua drokadroka, uciwai savasava, e bulabula tale ga na kena cagi. E totoka na vanua keitou tiko kina, ia keitou se vakila ga na drakidrakita ni bula. E butakoci na neitou manumanu kei na neitou vale.

Niu se itabagone au dau gunu vakalevu kei ira na noqu ilala, vakatavako, au butako tale ga meu volia kina na veika qo. Au a butakoca mada ga eso na iyaya talei nei buqu. Era kasamitaki au na mataivalu niu lewena e dua na ilawalawa e saqata na matanitu e vakatokai na New People’s Army (NPA), ra qai dau buturaki au. Na ka era cakava qori a vakavuna meu lewena na ilawalawa oya. E lima na yabaki na noqu bula vata tu kei ira ena veiulunivanua. Sa bau dredre dina. Keimami dau veitokiyaki mera kua ni toboki keimami na mataivalu ni matanitu. Lakolako au sa oca mai na vuni voli ena veiulunivanua, au mani soro kina vua na kovana ni Ilocos Norte. E turaga yalovinaka ni a vukei au me dua na noqu cakacaka veiganiti. Ia au sega ga ni muduka na noqu itovo ca, na butako e veivale kei na noqu dau veivakarerei.

VEISAUTAKI AU NA IVOLATABU: E dua na marama ena noqu vanua ni cakacaka o Loida, e iVakadinadina i Jiova. Ena vukuna keirau veikilai kina kei na dua na turaga o Jovencio, a mani vakavulici au ena iVolatabu. Ia e se dredre tiko ga meu muduka na noqu itovo makawa. Au dau vakatavako rawa ni bera ni yaco mai o Jovencio me keirau vuli, vaka kina na noqu se cakava tiko ga eso na ka e tabu vakalawa. Era toboki au ena dua na siga na ovisa niu basulawa, au mani bala e valeniveivesu me 11 na vula. Niu tu e valeniveivesu au masuti Jiova, qai kerea na nona veivuke. Au kerea na nona veivosoti kei na yalona tabu me dusimaki au, me vakaukauataki au tale ga.

Ena dua na siga a sikovi au yani e valeniveivesu e dua na iVakadinadina i Jiova, qai solia vei au e dua na iVolatabu. Au dau vakawilika, au vulica kina ni Kalou o Jiova e dauveivosoti, qai yalololoma. Au raica rawa ni lomani au o Jiova, e solia tale ga vei au na gauna meu vulici koya kina. Au kerea na nona veivakaukauataki meu biuta na noqu itovo ca. E uqeti au dina na Vosa Vakaibalebale 27:11. Niu wilika na tikinivolatabu qo e vakasara ga e vosa tiko vei au o Jiova. E tukuna: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.”

Niu suka mai valeniveivesu, au vuli iVolatabu tale kei ira na iVakadinadina, veimaliwai vata kei ira ena gauna ni soqoni, au bulataka tale ga na ivakavuvuli vakaivolatabu. Ena veivuke i Jiova au muduka rawa kina na noqu itovo ca, au mani yalataki au sara vua.

KENA YAGA: E liu au dau vakayacora tu e levu na ivakarau ca qai sega ni lomavakacegu, ia au sa marau ena gauna qo. Au a bobula tu ena itovo ca, ia sa vinaka cake sara na noqu bula ena gauna qo. (Kolosa 3:​9, 10) Au raica nikua me ka dokai na noqu veimaliwai kei ira na iVakadinadina i Jiova, kei na noqu vukei ira tale eso mera kilai Jiova na Kalou kaukaua duadua.

“Au via matataki Brazil ena qito na Olympic.”—JULIANA APARECIDA SANTANA ESCUDEIRO

YABAKI: 31

VANUA: BRAZIL

KA E KILAI KINA: KENADAU ENA KARATE

NOQU BULA E LIU: Au susu mai Londrina. E levu ena neitou yasayasa era dravudravua, ia e itikotiko savasava qai vakilai kina na veiyaloni. Niu se yabaki tini, a uqeti au o ganequ qase meu tomani koya ena dua na mataqali karate na tae kwon do. Ni rogoca o tamaqu a sega sara ga ni taleitaka, ia a vakatara.

Au dau gumatua ena tereni qai winitaka e levu na qito lelevu ena yasana o Parana. Au a qaqa tale ga ena dua na sotasota levu ni matanitu. Ena 1993 e tukuni kina niu sa jabeni ni tae kwon do e Brazil. Ia au via vakaitavi tale ga ena sotasota ni veimatanitu. Ni keitou dravudravua e sega na ilavo me saumi kina na noqu ilakolako e vanuatani.

Au dau diva tu me caka tale ga na tae kwon do ena Olympic, a qai vakadonui me caka. Au via matataki Brazil ena qito na Olympic, au gumatua gona ena tereni qai rawata kina na veivuke ni kena vakailavotaki na noqu ilakolako meu vakaitavi ena qito e Varanise, Vietnam, Sauca Korea, Japani, kei Saucamerika. Na noqu isausau tarava meu vakaitavi ena qito ni Pan American, ni vinaka na ivakatagedegede ni noqu qito au mani digitaki kina kei na rua tale me keitou lai vakaitavi ena dua na sotasota e Santo Domingo, mai na Dominican Republic, ena 2003.

VEISAUTAKI AU NA IVOLATABU: Ena 2001, keirau sotavi ira na iVakadinadina i Jiova kei na noqu itau, keirau vulica vata kei ira na iVolatabu. A sega ni lomaqu sara na vuli ena imatai ni gauna. Au dau sosovu ni vakacagau tiko na vuli ena levu ni noqu wawale. E dina ni va qori, ia na ka au vulica e tara sara ga na lomaqu​—e laurai qori ena dua na qito levu tarava.

Niu a digitaki meu lewe ni timi e lai vakaitavi ena qito ni Pan American, era kaya na dauniveivakavulici meu vakaitavi ena dua na sotasota ni bera niu gole. Na gauna meu vakaitavi kina, au duri tu ga ena buturara qai sega ni cakava e dua na ka​—sa oti vakadua na noqu taleitaka na qito qo. Au vakasamataka ni sega ni dodonu mera veivala na lotu vaKarisito​—ena qito mada ga! E vakarota na iVolatabu: “Mo lomana na kainomu me vaka nomu lomani iko.” (Maciu 19:19) Au biubiu sara ga mai, au sega ni vakasama tale vakarua. Era kidroa na sarasara.

Niu yaco i vale, au vakasamataka vakabibi na ka au na cakava ena noqu bula. Au taura e dua na ivola e tabaka na iVakadinadina i Jiova, e vakamacalataka na ka e vinakata na Kalou vei keda. Au wilika kina na ka e tukuna o Jiova ena Same 11:​5, “[O] koya sa vinakata nai valavala kaukauwa, sa cati koya na yalona.” Na vosa ni daunisame qo e uqeti au meu biuta na tae kwon do.

Eratou sega ni taleitaka na noqu dauniveivakavulici na noqu vakatulewa. Eratou vinakata meu vakasamataka tale, ratou kaya niu dauqito vinaka duadua ena vanua oya sa voleka tale ga niu yacova na noqu isausau na Olympic. Ia au sa vakadeitaka meu kua ni qito tale.

Ena gauna oya keirau sa vakamau kina kei na noqu itau. E sa dau salavata voli kei ira na iVakadinadina ena cakacaka vakavunau. Ni lesu mai e dau marau ni talanoataka na ka e yaco. Au kila ni na vinakati meu veisautaka na noqu ivakarau ni bula keu via vakaitavi tale ga ena cakacaka oya. Au mani kere vakacegu mai na noqu lotu qai rawata tale ga na ivakatagedegede meu papitaiso meu iVakadinadina i Jiova.

KENA YAGA: Keirau marau qai duavata vakaveiwatini ni keirau bulataka na ivakavuvuli vakaivolatabu. Au marau ni tokoni watiqu ena nona veiqaravi ena ivavakoso keirau lewena. Au a rawa ni rogo keu a saga me dua na noqu metali koula. Ia e sega ni dua na ka ena vuravura ca qo e vakatauvatani kei na itavi dokai ni noqu qarava na Kalou o Jiova.

“A sega ni guilecavi au o tamaqu.”​—INGO ZIMMERMANN

YABAKI: 44

VANUA: JAMANI

KA E KILAI KINA: SIKIURITI NI VALENIDANISI

NOQU BULA E LIU: Au sucu ena dua na vuvale e duidui na neitou vakabauta, ena dua na taoni ni keli koala e Gelsenkirchen. E iVakadinadina i Jiova o tamaqu. E dau saga me vakavulici au, tuakaqu kei rau na ganequ, ia e dau cata o tinaqu. O tamaqu e dau draiva lori, qai dau cakacaka tu me tini na aua se sivia ena dua na siga. Ena tekivu ena rua se tolu na kaloko ena mataka. E dau vakavulici keitou me vinaka na neitou veiwekani kei na Kalou. Ia au sega ni dau taleitaka na nona sasaga.

Au dau lako ena soqoni, ia niu sa yabaki 15 e sa vakavucesa vei au na soqoni e dau vinakata o tamaqu meu lako kina, au mani vakau yaloqu. Ni oti e dua tale na yabaki, au lewena e dua na kalavo ni veivacu. Ena rua na yabaki tarava a leqataka vakalevu o tamaqu na noqu ivalavala. Au biubiu mai vale niu se yabaki 18.

Au dau taleitaka na qito, au dau tereni vakaono ena dua na macawa​—au tekivu vuli veivacu qai tini sara ena lave ka bi. Ena muanimacawa au dau lakovata kei ira na noqu itokani ena valenidanisi. Dua na gauna au a vacuka e dua na turaga momoqaqa ena valenidanisi, ia au mani vakadrukai koya. Ni raica qo na itaukei ni valenidanisi, a vinakata sara meu sikiuriti e kea. Au mani vakadonuya ni sau vinaka.

Au dau duri tu ena katuba ni valenidanisi ena muanimacawa, e vakatau vei au o koya e curu kei koya e sega. E dau osodrigi, dau yacova sara na 1,000 era lako yani, au osooso vakalevu. Dau yaco vakalevu e loma na vala. Era vakarerei au eso ena dakai kei na qanitavaya. Eso au dau vakatalai ira i tuba se au sega ni vakacurumi ira e valenidanisi, era dau waraki au e tuba mera sauma na ka au cakava. Au se qai yabaki 20 ena gauna qori, au nanuma ni sega ni dua e rawati au. Ia na kena dina ga niu sega ni lewai au rawa​—au yalokaukaua, dokadoka, qai via rogo.

VEISAUTAKI AU NA IVOLATABU: A sega ni guilecavi au o tamaqu, e nuitaka ni dua na siga au na veisau. E mani tuvanaka me vakau yani ena noqu itikotiko Na Vale ni Vakatawa kei na Yadra!a Era mai bini tu ga ena noqu rumu, au sega ni bau wilika. Ia ena dua na siga au mani wilika na ivola qori. Au wilika e dua na ulutaga me baleta na kena sa vakarau cava na veika vakapolitiki, veika vakailavo kei na ituvaki ni veika vakalotu, e uqeti au na ka au wilika au mani qiriti ganequ. Erau iVakadinadina i Jiova kei watina, erau tukuna me rau vakavulici au ena iVolatabu, au mani vakadonuya.

Na ivakavuvuli ena Kalatia 6:7 a uqeti au meu veisautaka na noqu bula. Au kila ni ka au cakava, tukuna se vakatulewataka ena gauna qo ena yaga ena noqu bula ena veisiga nimataka. E vakayaloqaqataki au tale ga na veisureti ena Aisea 1:​18, e tukuna: “ ‘Dou mada mai, me tou veivosaki vata, sa kaya ko Jiova; ke sa vaka na ka kulakula na nomudoui valavala ca, sa na vulavula me vaka na uca-vulavula; ke sa damuvakula sa na vaka na vutika ni sipi.’ ” E vukei au na tikinivolatabu qo niu se qai tekivu vuli iVolatabu meu kua ni datuvu se vakasamataka niu na sega ni rawa ni veisau.

Ena ono na vula e veisau vakalevu na noqu bula, ia e ka ni sasaga toka qori. Ena gadrevi meu kua ni lakova na vanua lolovira au dau lasama, meu biuti ira tale ga na noqu itokani voravora. Au dau tukuna vei ira niu vuli iVolatabu tiko, au vakamacalataka tale ga na ka au vulica. Era sevaki au ra qai va kacivi au talatala. Ena veivuke i ganequ au kunea kina e dua na cakacaka veiganiti.

Au sa lako tale ena soqoni, au lako ena Kingdom Hall erau soqoni kina o ganequ kei watina e 30 na kilomita mai na vanua au vakaitikotiko kina. Ia e toka voleka ga ena vanua au vakaitikotiko kina e dua na Kingdom Hall, au leqataka deu na sotava kina eso era kilai au vinaka. Au rere tale ga na lai vunau e veivale ena noqu yasayasa. Vakacava keu sotava e dua au a sega ni vakacuruma e valenidanisi, se dua au a solia vua na wainimate gaga? Ia e dua na ka au vulica ena noqu vakaukaua yago​—na kena e dredre duadua oya na kena e dodonu sara ga mo cakava. Niu sa rawata gona na ivakatagedegede meu vunau au sega tale ni lokuyara.

E dua tale na ka meu na cakacaka kina​—au sega ni dau taleitaka na wilivola se vuli. Ia au kila me dei na noqu vakabauta, ena vinaka meu vakamatauni au ena vakekeli meu kila na ka dina ena iVolatabu. Me vaka ga e dua na dau lave ka bi, ena vinakati na sasaga mo kaukaua tiko ga kina.

KENA YAGA: Au marau niu se bula tiko ga ena gauna qo! Au saga tiko ga meu vorata na noqu malumalumu. Ia au marautaka na noqu bula vakavuvale kei na itovo totoka vaKarisito nei watiqu. Niu maliwai ira na iVakadinadina i Jiova au kunea kina na itokani dina era nuitaki tale ga. Ni bera ni takali o tamaqu ena lima na yabaki sa oti, e marau ni sa lesu tale mai o luvena.

[iVakamacala e ra]