Toro Voleka Vua na Kalou
E Kila “na Lomadra Kecega na Luve ni Tamata”
E DAU tarai keda kece na leqa, se vakacava? So na gauna ena rairai sega ni dua e kila dina na leqa eda sotava kei na mosi ni yaloda. Ia e tiko e dua e kila vinaka na lomada—na Kalou o Jiova. Ena vakacegui keda na vosa i Solomoni ena 2 Veigauna 6:29, 30.
A masu tiko o Solomoni ena gauna a vakatabui kina na valenisoro mai Jerusalemi ena 1026 B.S.K. A rairai tini na miniti na balavu ni nona masu, a vakalagilagi Jiova kina o Solomoni me Kalou e daurogoca na masu, e yalododonu ena ka kece e cakava, qai dau vakayacora na nona vosayalayala.—1 Tui 8:23-53; 2 Veigauna 6:14-42.
A kerea o Solomoni vua na Kalou me rogoca na nodra dui masu na sokaloutaki koya. (Tikina e 29) A cavuta tale ga o koya na veimataqali leqa (tikina e 28), e tukuna nira kila na dauveiqaravi yadua ‘na ca ni lomadra’ kei ‘na nodra rarawa.’ Na nona rarawa e dua ena rairai duidui sara mai na kena e sotava e dua tale.
Se mani ituvaki cava e sotavi, era na sega ni colata duadua na nodra rarawa o ira na daurerevaka na Kalou. A vakasamataki ira tale ga na dausokalou yadua o Solomoni ena nona masu nira na ‘dodoka yani na ligadra,’ nira masu vei Jiova mai vu ni lomadra.a De a nanuma tiko o Solomoni na lomabibi i Tevita na tamana, e kaya: “Mo biuta vei Jiova na nomui colacola bibi.”—Same 55:4, 22.
Ena rogoca vakacava o Jiova na nona kere veivuke e dua mai vu ni lomana? A vakamasuti Jiova o Solomoni: “Mo ni qai rogoca mai lomalagi, na yasana ko ni sa tiko kina, ia mo ni bokoca, ka mo ni solia vua na tamata yadua me vaka na nonai valavala kecega.” (Tikina e 30) E kila o Solomoni ni o koya e “daurogoca na masu” e sega ni kauaitaki ira ga vakailawalawa na nona dauveiqaravi, ia e kauaitaki ira yadudua tale ga. (Same 65:2) O Jiova e vakarautaka na veika mera vukei kina, e okati kina na vosoti ni nona ivalavala ca e dua me qarava tale na Kalou mai vu ni lomana.—2 Veigauna 6:36-39.
E vakadeitaka vakacava o Solomoni ni na rogoca o Jiova na nodra masu na nona tamata era veivutuni? A tomana o Solomoni ena nona masu: “Kemuni [Jiova] sa kila na lomana; (ni kemuni sa kila, koi kemuni duaduaga na lomadra kecega na luve ni tamata).” E kila vinaka o Jiova na ca ni lomana se na nona rarawa e dua na nona dauveiqaravi yalodina, e kauaitaka tale ga.—Same 37:4.
Na masu i Solomoni e rawa ni vakacegui keda. Era na rairai sega ni kila vinaka eso na lomada—na ‘ca ni lomada’ kei na ‘noda rarawa.’ (Vosa Vakaibalebale 14:10) Ia e kila vinaka na lomada o Jiova qai kauaitaki keda. Nida talaucaka gona na lomada vua ena masu, ena vakamamadataka na noda icolacola. E tukuna na iVolatabu: “Moni biuta vua na nomuni lomaocaoca kece, ni kauaitaki kemuni o koya.”—1 Pita 5:7.
[iVakamacala e ra]
a Ena gauna vakaivolatabu, e dua na iwalewale ni masu na ‘dodoki ni liga,’ oya na nona dodoka e dua na qeteqeteniligana i lomalagi.—2 Veigauna 6:13.