Toro Voleka Vua na Kalou

“Ko na Kunei Koya”

1 VEIGAUNA 28:9

O KILA na Kalou? Eda na kaya ni rawarawa na isaunitaro qori, ia e sega ni vaka kina. Baleta na noda kila dina na Kalou e vauci kina na noda kila vinaka na nona inaki kei na nona itovo. Na veiwekani voleka kei koya ena vakilai sara ga ena ivakarau ni noda bula kece. E rawa beka nida veivolekati va qori? Ke vaka kina, na cava meda cakava? E kune na kena isau ena ivakasala i Tui Tevita vei Solomoni na luvena ena 1 Veigauna 28:9.

Raitayaloyalotaka mada qo. A liutaki Isireli voli o Tevita ena rauta ni 40 na yabaki, era vakila na bula sautu na matanitu qo ena nona veiliutaki. Ena sosomitaki koya o Solomoni, ia e se gone sara. (1 Veigauna 29:1) Sa voleka ni mai takali o Tevita, na ivakasala cava ena tauca vei luvena?

E vosa o Tevita mai na veika a sotava sara ga ena nona qarava voli na Kalou, e tekivuna: “Solomoni na luvequ, mo kila na Kalou i tamamu.” E vakaibalebaletaka eke o Tevita ni sega ni rauta wale ga na nona kila o Solomoni eso na ka me baleta na Kalou. Ni o Solomoni e sa qaravi Jiova tiko na Kalou i tamana. E sa volai oti tale tu ga ena gauna qori e dua na ikatolu ni iVolatabu vakaIperiu, e macala gona ni kila tu o Solomoni na ka e tukuna na iVolatabu me baleta na Kalou. E dua na vuku ni iVolatabu e kaya ni vosa vakaIperiu e vakadewataki me “kila,” e vakaibalebaletaka “na veiwekani e voleka sara.” Io, o Tevita e vinakati luvena me saga na veiwekani e dau vakamareqeta​—na nona veiwekani voleka kei na Kalou.

Na veivolekati va qori ena veisautaka na ivakarau ni rai i Solomoni, vaka kina na nona bula. E vakaroti luvena o Tevita: “Qaravi koya [Kalou] e na yalo dina, kei na loma e marautaka.” E macala ni dodonu vei Solomoni me kila mada eliu na Kalou ni bera ni muri na ivakaro qori. Na nona kila vinaka na Kalou o Solomoni ena uqeti koya me qarava na Kalou. Ia me kua ni caka ena dela ni veivakaisini se lomalomarua. (Same 12:2; 119:113) A vakamasuti luvena o Tevita me vu sara ga mai lomana na nona qarava vakatabakidua na Kalou.

Na cava e uqeti luvena kina o Tevita me vinaka na inaki ni nona sokalou kei na ivakarau ni nona rai? E vakamacalataka o Tevita: “Sa vakatovolea na yalo kece ko Jiova, ka kila kece na nanuma ni lomada.” E sega ni dodonu vei Solomoni me qarava ga Kalou me vakamarautaki tamana kina. Ni Kalou e vakasaqarai ira e lomadra dina mera qaravi koya.

Ena muria beka o Solomoni na ivakaraitaki i tamana ena nona toro voleka vei Jiova? Ena vakatau ga qori vei Solomoni. E tukuna o Tevita vei luvena: “Kevaka ko na vakasaqarai koya, ko na kunei koya; ia kevaka ko sa biuti koya, ena biuti iko ko koya ka tawa mudu.” Me dua na dau sokalou e veiwekani voleka kei na Kalou, ena dodonu vei Solomoni me saga vagumatua me kilai Jiova.a

Me vaka e dua na tama dauloloma, na ivakasala i Tevita e vakadeitaka vei keda ni o Jiova e vinakata meda volekati koya. Me rawa nida veivolekati, e dodonu meda “vakasaqarai koya” ena noda vakekeli ena iVolatabu meda kilai koya vinaka. Nida cakava qo ena uqeti keda meda qaravi koya vakatabakidua mai vu ni lomada. E vinakata o Jiova meda qaravi koya va qori, ni dodonu ga vei ira na sokaloutaki koya mera cakava vaka kina.​—Maciu 22:37.

[iVakamacala e ra]