E Veisautaka na Bula na iVolatabu

A VEISAU vakacava na nona bula e dua na bameti (barmaid) yalewa e dau vosavosaca, gunu vakasivia, vakayagataka tale ga na wainimate gaga? A mai italatala ni lotu vakacava e dua na daunipolitiki e liu e sega ni dau taleitaka na lotu? Na ivakarau ni yalo cava a saga me valuta e dua na qasenivuli vakaovisa ni Rusia me dua kina na iVakadinadina i Jiova? Wilika mada na ka eratou tukuna.

“Keirau sa veimaliwai vinaka tale kei tinaqu.”​—NATALIE HAM

SUCU: 1965

VANUA: OSITERELIA

KA E KILAI KINA: DAUVAKAYAGATAKA NA WAINIMATE GAGA

NOQU BULA E LIU: Au a susu ena dua na taoni lailai e levu kina na gonedau mai Robe, e Sauca Ositerelia. Ena itikotiko va qo e nodra isotasota na lewenivanua na otela. Levu gona na gauna era dau tu e kea na itubutubu, era sa lai vulica kina na luvedra na gunuvi vakasivia ni alakaolo, vosavosaca kei na vakatavako.

Au tekivu vakatavako niu se qai yabaki 12, e levu na vosa ca au kila, keirau dau veivala tale ga kei tinaqu. Rau a veibiu na noqu itubutubu niu yabaki 15, oti tale e 18 na vula au biubiu mai vale. Au dau gunu vakasivia, vakayagataka na wainimate gaga, qai muria tale ga na ivakarau ni bula vakasisila. Au cudru qai veilecayaki. E lima na yabaki na noqu vulica na nodra taqomaki na marama kei na karate, au nanuma kina niu sa rawa ni qaravi au ga. Niu tiko duadua e dau tarai au na rarawa, au mani masuta kina na Kalou me vukei au. Au kerea vua “me kua ga ni tukuna meu lai lotu.”

Dua na gauna e muri, a solia vei au e dua na iVolatabu na noqu itokani e vakabauta, ia e sega ni lewena e dua na isoqosoqo lotu. E dau vakayagataka tale ga na wainimate gaga me vakataki ira na vo ni noqu itokani. Ia e kaya ni vakabauta dina na Kalou qai vakauqeti au meu papitaiso. A lai papitaisotaki au ena dua na drano ena yasayasa e kea. Me tekivu mai na gauna oya, au nanuma niu sa veiwekani vinaka kei na Kalou. Ia e sega na gauna meu wilika kina na iVolatabu.

VEISAUTAKI AU NA IVOLATABU: Ena 1988, erau a lako yani i vale e rua na iVakadinadina i Jiova. A tarogi au e dua vei rau, “O kila na yaca ni Kalou?” Mani wilika sara na Same 83:18 ena nona iVolatabu, e kaya: “Me ra kila ko ira na tamata ni sai kemuni na yacamuni ga ko Jiova, sa Cecere sara duaduaga e vuravura taucoko.” Dua na ka noqu kurabui! Ni rau sa lako, au draiva sara ina dua na sitoa ni ivola ni lotu e 56 na kilomita meu raica ena vakadewa ni so tale na iVolatabu na yaca ni Kalou, au raica tale ga na kena ibalebale ena dua na ivolavosa. Niu sa vakadeitaka ni yaca ni Kalou o Jiova, au vakasamataka se cava tale au sega ni kila.

A tukuna vei au o tinaqu nira duatani na iVakadinadina i Jiova. Na lailai ni ka au kila me baleti ira, au nanuma ni dua tu ga nodra rai ra qai sega ni taleitaka na marau. Nira lako mai i vale au dau vakanomodi me vaka ga au sega ni tiko. Yaco na gauna me veisau noqu rai. Au vakacurumi ira, tekivu sara na vuli iVolatabu.

Ni oti e dua na vuli au dau wasea na ka au vulica vei Craig na noqu itau. Na levu ni nona sosa, a dreta e ligaqu na noqu ivola qai wilika. Ena loma ni tolu na macawa a vakadeitaka o koya ni sa kila na ka dina me baleta na Kalou. Keirau muduka na vakayagataka na wainimate gaga kei na gunu vakasivia, au biuta tale ga na noqu cakacaka. Me salavata na neirau bula kei na ivakatagedegede ena iVolatabu, keirau mani vakatulewataka me keirau vakamau.

KENA YAGA: Keirau sa voleka sara tu ga ni veibiu ena gauna keirau tekivu vulica kina na iVolatabu kei ira na iVakadinadina i Jiova. Ia ena gauna qo sa vinaka sara na ivakarau ni bula i Craig na watiqu, qai rua na luvei keirau totoka. Keirau marautaka tale ga na neirau itokani vakabauta vata.

Ni rogoca o tinaqu niu sa veimaliwai tiko kei ira na iVakadinadina i Jiova, a cudru baleta ni sega ni kila na ka era vakabauta. Ia keirau sa veimaliwai vinaka tale kei tinaqu. Au sa sega tale ni galili. Qo sa qai vakainaki na noqu bula, noqu gadreva meu veiwekani kei na Kalou sa mai vakacegui tale ga.​—Maciu 5:3.

“Au kurabuitaka na levu ni ka au kila e vakavulica na iVolatabu.”​—ISAKALA PAENIU

SUCU: 1939

VANUA: TUVALU

KA E KILAI KINA: DAUNIPOLITIKI

NOQU BULA E LIU: Au sucu mai Nukulaelae, e dua na yanuyanu ena Pasifika, e wili e Tuvalu ena gauna qo. Era lewa tu na bula ena yanuyanu qo na italatala era vuli mai na koronivuli ni lotu mai Samoa. Nodra itavi na lewenivanua me qaravi ira na italatala kei na nodra vuvale, ra vakarautaka nodra itikotiko ra qai solia tale ga vei ira na ka vinaka kece mera bula kina. Ke mani lailai sara mada ga na kedra kakana vakavuvale, era na vakarautaka ga na kedra na italatala.

E cicivaka na koronivuli ena noqu yanuyanu na italatala qai vakavulici kina na lotu, fika kei na lesoni ni vakadidike me baleta na vuravura kei na veika era tu kina. Au nanuma niu a raica nona mokuta vakaca e dua na gonevuli na italatala. Sega ni dua a bau kudruvaka, o rau sara mada ga na nona itubutubu. Era dokai na italatala me vaka era Kalou.

Au lai vuli ena koronivuli ni matanitu e tiko ena dua tale na yanuyanu niu se yabaki tini. Ni oti noqu vuli au lai cakacaka sara vakamatanitu. Na gauna oya, a qali tu kina o Gilbert kei Ellice Island ina matanitu o Peritania. Au cakacaka ena vica na tabana ni matanitu ni bera niu mai edita ni tabana ni itukutuku ni matanitu. A toso vinaka na noqu cakacaka me yacova noqu tabaka na nona ivola e dua na dauwiliwili a vakalewa na ilavo a vakayagataki ena nona veisiko mai na ravouvou ni Bolatagane. A lasutaka na yacana o koya e vola na ivola, qai vinakata na noqu iliuliu me kila na yacana dina. Au sega ni via tukuna vua, mani tete na itukutuku ni ka a yaco qo.

Ni oti oya, au biuta na cakacaka vakamatanitu meu curu ena politiki. Au qaqa ena veidigidigi e Nukulaelae, qai lesi meu Minisita ni Veivoli kei na iYaubula. E muri ni sa tugalala na yanuyanu o Kiribati (Gilbert e liu) kei Tuvalu (Ellice e liu) a lesi au na kovana meu liutaka na cicivaki ni matanitu e Tuvalu. Ia au sega ni vinakata meu vakaitavi ena veiliutaki vakoloni. Au mani vakasuka na ilesilesi oya, qai duri ena veidigidigi meu dua na minisita ni matanitu e sega ni veitokoni kina na kovana. Au druka ena veidigidigi. Keirau lesu tale vakaveiwatini ina noqu yanuyanu, keirau nanuma me keirau lai bula rawarawa ga e nakoro.

VEISAUTAKI AU NA IVOLATABU: Era daudoka mai yanuyanu na Sigatabu me Siga ni Vakacecegu, ia o yau na kena veibasai. Qori na noqu siga ni vakatasosoko kei na siwa. Au sega ni vinakata me kilai niu daulotu. E tukuna o tamaqu ni rarawataka o koya kei ira tale eso na noqu ivalavala. Ia au saga me kua ni rawai au o lotu.

Ena dua na gauna niu lako i Funafuti na koroturaga kei Tuvalu, a sureti au o taciqu ina dua na nodra soqoni na iVakadinadina i Jiova. A solia kina vei au e dua na daukaulotu iVakadinadina e dua na ibinibini Watchtower kei na Awake! meu wilika. A solia tale ga vei au e dua na ivola e vakavotuya na ivakavuvuli ni lotu butobuto era vakavulica e levu na lotu era kaya nira lotu vaKarisito. Au wilika vakavica na ivola qo. Au kurabuitaka na levu ni ka au kila e vakavulica na iVolatabu, okati kina na noqu mai kila ni sega ni dodonu mera vakatabuya na lotu vaKarisito na Siga ni Vakacecegu.a Au wasea qo vei watiqu, qai muduka nona dau lai lotu.

Au a bubuluitaka niu na sega ni via okati ena veika vakalotu. Ia sa voleka ni oti e rua na yabaki au sega ni guilecava na veika au wilika. Au mani volavola vua na daukaulotu e Funafuti, au tukuna vua niu vinakata meu veisau. A sega tale ni lokuyara ni sa vodo mai ena waqa me mai vakavulici au ena iVolatabu. Dua na ka na cudru nei tamaqu ni sa kila niu vinakata meu dua na iVakadinadina i Jiova. Ia au tukuna vua niu vakatulewataka qori ena levu ni ka au vulica ena iVolatabu vei ira na iVakadinadina i Jiova.

KENA YAGA: Au papitaiso me iVakadinadina i Jiova ena 1986, qai papitaiso o watiqu ena yabaki tarava. Erau vulica tale ga na iVolatabu na luvequ yalewa rau qai vakatulewataka me rau iVakadinadina i Jiova.

Au marau niu lewena e dua na isoqosoqo lotu e vaka na lotu vaKarisito ena imatai ni senitiuri, e sega kina ni vakaduiduitaki na italatala kei ira na lewenilotu. (Maciu 23:​8-​12) Era yalomalumalumu tale ga ni vakatotomuri Jisu ra qai vunautaka na Matanitu ni Kalou. (Maciu 4:​17) Au vakavinavinaka vua na Kalou o Jiova ni vakatara meu vulica na ka dina me baleti koya, meu kilai ira tale ga na nona tamata!

“Era Sega ni Usuraka na iVakadinadina i Jiova na ka Meu Vakabauta.”​—ALEXANDER SOSKOV

SUCU: 1971

VANUA: RUSIA

KA E KILAI KINA: QASENIVULI VAKAOVISA

NOQU BULA E LIU:  Au sucu e Moscow, ena gauna oya a koroturaga tu ni Soviet Union makawa. A vakaitikotiko na neitou vuvale ena dua na vale levu, qai levu keimami tiko veitikivi e dua ga na vanua era cakacaka kina. Au vakasamataka tale na nodra dau vosavosa niu sega ni dau tiko vakamalua, ra qai tukuna niu na mate dole seu na tini e valeniveivesu. Niu qai yabaki tini sa tu na noqu kisi vei ira na ovisa.

Au a curu ina mataivalu niu yabaki 18, au qai lesi meu dau lai yadra ena iyalayala ni vanua. Ni oti tale e rua na yabaki au lesu i vale qai cakacaka ena dua na vale ni buli iyaya, ia e cakacaka vakavucesa. Au mani lewena na mataovisa ni veitaqomaki e Moscow au qai kena qasenivuli. E noqu itavi meu vesuki ira na basulawa e Moscow, au lako tale ga ina veivanua e dau yaco vakalevu kina na veivala. Na yalo ni taqaya au vakila e vaka na sivirigi kaukaua. Niu lesu mai i vale, keirau na dui mocemoce kei watiqu niu leqataka deu na vakamavoataki koya.

VEISAUTAKI AU NA IVOLATABU: Niu tekivu vulica na iVolatabu kei ira na iVakadinadina i Jiova, au kila kina ni ivalavala kaukaua e sega ni salavata kei na ivakavuvuli ena iVolatabu. Au vulica ni na vinakati meu biuta na vakatavako qai lewa vinaka tale ga na levu ni alakaolo au gunuva. Ia au vakasamataka ni sega ni rawa niu qara e dua tale na cakacaka ni qo ga na cakacaka au kila, meu vakania kina na noqu vuvale. Au nanuma tale ga niu sega ni rawa ni vunau e veivale me vaka era cakava na iVakadinadina i Jiova.

E dina ni va oya na noqu nanuma, ia au vakadeitaka ni donu na itukutuku ena iVolatabu. E vakacegui au na ka e kaya na Isikeli 18:​21, 22. E tukuna: “Kevaka ena saumaki mai na tamata ca mai na nonai valavala ca kecega sa kitaka . . .  Na nona talaidredre kecega ena sega ni cavuti vua.”

Au vakavinavinakataka nira sega ni usuraka na iVakadinadina i Jiova na ka meu vakabauta, era vakamatatataka ga na ka au vulica tiko. Au kauta e 40 na mekesini se sivia qai wilika ena tolu na macawa. Na veika au wilika au vakadeitaka kina niu sa kunea na lotu dina.

KENA YAGA: Niu se bera ni vulica na iVolatabu, keirau sa voleka ni veisere kei watiqu. Ia sa vinaka cake ena gauna qo na neirau bula vakawati. Ena gauna au sa vulica tiko kina na iVolatabu a tekivu vuli tale ga o watiqu, keirau mani veivosakitaka me keirau qaravi Jiova vata, e vakilai kina vakalevu na marau ena neirau vuvale. Au sa qai kunea tale ga e dua na cakacaka e sega ni veisaqasaqa kei na ivakavuvuli ena iVolatabu.

Niu se qai tekivu vunau e veivale, au dau taqaya​—oya na yalo au dau vakila ni bera niu lai vesuki ira na basulawa. Ia ena gauna qo au nuidei niu na sega ni yalototolo ke mani dua e vakacudrui au. Ni toso na gauna au vulica meu dau veivosoti. Au veivutuni niu a vakamaumautaka tu na noqu bula, ia ena gauna qo au vakila ni yaga dina. Au marau niu vakayagataka na noqu kaukaua meu qarava na Kalou o Jiova kei na noqu vukei ira eso tale.

[iVakamacala e ra]