Taro Na Dauwiliwili . . .

Era vakadonuya beka na iVakadinadina i Jiova mera qaravi vakavuniwai?

▪ A kaya o Jisu ni “sega ni yaga na vuniwai vei ira na bula vinaka, e yaga ga vei ira na tauvimate.” (Maciu 9:​12) E tukuna tiko ni sega ni vakacala na iVolatabu ke dua e qara na nodra veiqaravi na vuniwai. Nira vinakata mera bula vinaka, mera bula dede, era vakadonuya kina na iVakadinadina i Jiova na wainimate kei na veiqaravi e vakatura na vuniwai. Eso tale ga na iVakadinadina i Jiova era vuniwai me vakataki Luke na lotu vaKarisito ena imatai ni senitiuri.​—Kolosa 4:​14.

Ia era sega ni vakadonuya na iVakadinadina i Jiova na veiqaravi vakavuniwai e veisaqasaqa kei na ivakavuvuli ena iVolatabu. Me kena ivakaraitaki, era sega ni tauri dra ni vakatabuya na iVolatabu na laukana ni dra. (Vakatekivu 9:4; Vunau ni Soro 17:​1-​14; Cakacaka 15:​28, 29) E vakatabuya tale ga na veiqaravi e vakayagataki kina na “kaukaua vuni” se vakatevoro.​—Aisea 1:​13, NW; Kalatia 5:​19-​21.

E levu na dauveiqaravi vakavuniwai era taurivaka na veiqaravi e sega ni veisaqasaqa kei na ivakatagedegede ena iVolatabu. Na veiqaravi va qori era vakadonuya e levu na iVakadinadina i Jiova ni vinaka cake sara mai na kena e beci kina na ka e vinakata na Kalou.

Io, e levu tu na ivakamacala ni so na ka meda bulabula vinaka kina. Na veiqaravi ena rairai vinaka vua e dua ena sega beka ni yaga vua e dua tale. Qori na vuna ena rairai taro ivakasala kina o koya e tauvimate vua e dua tale na vuniwai me kila kina na veiqaravi kei na wainimate e ganita na kena mate.​—Vosa Vakaibalebale 14:15.

Ena duidui na veiqaravi e digia na iVakadinadina yadua. E sega gona ni vakacala na Vosa ni Kalou na duidui ni nodra lewaeloma na lotu vaKarisito ke sega ni beci kina na lawa ni iVolatabu. (Roma 14:​2-4) Ni vakaturi e dua na veiqaravi vakavuniwai ena dodonu me vaqaqa mada e liu, me kua ni vakaleqa na nona lewaeloma e vakavulici ena iVolatabu.​—Kalatia 6:5; Iperiu 5:​14.

Na nona vakatulewa e dua na iVakadinadina e vaka e dua na draiva e volekata yani na gaunisala e basoga vica qai osooso. Ke sega mada ni veiraiyaki qai muria tu ga yani na motoka e liu tiko, ena rawa ni yaco na vakacalaka. Ia na draiva yalomatua ena vakamalua, ena vakaraica tale ga na vo ni motoka ni bera ni draiva takoso. Ena va tale ga qori na nona vakatulewa e dua na iVakadinadina, ena sega ni vakariri me vakatulewa se muria wale tu ga vakamataboko na veiqaravi vakavuniwai era vakadonuya e levu. Ni bera nira vakatulewa era na vakalewa vinaka na ka mera cakava nira dikeva na ivakavuvuli ena iVolatabu.

Era vakavinavinakataka vakalevu na iVakadinadina i Jiova na nodra cakacaka vakaukaua kei na nodra dina na vuniwai ena nodra veiqaravi. Era marautaka tale ga na iwali ni tauvimate era vakatura.