Rawa ni Qaravi Vakavuniwai na Lotu vaKarisito?

Kena iSau Vakaivolatabu

Io. E tukuna o Jisu ni rawa nira qara na nona imuri na veiqaravi vakavuniwai ena gauna e cavuta kina “e sega ni yaga na vuniwai vei ira na bula vinaka, e yaga ga vei ira na tauvimate.” (Maciu 9:12) Na iVolatabu e sega ni ivola vakavuniwai, ia na kena ivakavuvuli e yaga vei ira na via vakamarautaka na Kalou.

Qo e vica na taro mo vaqaqa

1. Vakacava, au kila na veiqaravi vakavuniwai e vakaturi? E veivakasalataki na iVolatabu meda qara na itukutuku nuitaki, meda kua ni “na vosa kece.”—Vosa Vakaibalebale 14:15.

2. Vakacava, meu taroga tale e rua se tolu na vuniwai? E yaga dina ni “levu na daunivakasala,” vakabibi ke leqataki na kemu ituvaki.—Vosa Vakaibalebale 15:22.

3. Vakacava na veiqaravi qo, ena beci kina na ivakaro vakaiVolatabu “me tabu . . . na dra”?—Cakacaka 15:20.

4. E vauci ena veiqaravi qo na qaravi tevoro? E vakacala na iVolatabu na “qaravi tevoro.” (Kalatia 5:19-21) Mo kila ke vauci kina na qaravi tevoro, vakasamataka mada e vica na taro qo:

• Vakacava o koya e veiqaravi, e kilai me dau vakatevoro?

• Vakacava, e yavutaki na ka e cakava ena kena vakabauti ni qori e mate baubau, se vu ena nodra cudru na qase (se kalou vu), se vu mai na vakadraunikau?

• Vakacava na kena vakarautaki na wainimate kei na kena vakayagataki, e cabori eso na kena isoro, cavuti eso na vosa me vakamanamanataki kina, se so tale na ka va ya?

5. Au leqataka vakasivia na kequ mate? E veivakasalataki na iVolatabu: “Me kilai na nomuni yalorawarawa vei ira na tamata kece ga.” (Filipai 4:5) Ni o yalorawarawa o na vakasamataka “na veika era bibi sara,” me vaka na veika vakayalo.—Filipai 1:10; Maciu 5:3.