Taro na Dauwiliwili
O Mosese a cudruvi rau na luvei Eroni, o Eliesa kei Icama, ni rau vakamatei oti ga na tuakadrau o Netapi kei Epaiu. Na cava na vuna? A qai oti vakacava na cudru nei Mosese?—Vunau 10:16-20.
Ni oti ga vakalailai na nodra lumuti na bete mera veiqaravi ena valeniveitavaki, a vakamatei rau na luvei Eroni o Netapi kei Epaiu o Jiova ni rau cabora vua na isoro e sega ni vakadonui. (Vunau 10:1, 2) A vakaroti rau kina na luve i Eroni erau se bula tiko o Mosese me rau kua ni osivaka na nodrau mate na tuakadrau. Oti tale vakalailai, a cudruvi rau o Eliesa kei Icama o Mosese ni rau sega ni kania na me e isoro ni valavala ca. (Vunau 9:3) Na cava a cudru kina o Mosese?
Na lawa a solia o Jiova vei Mosese e dusia vakamatata ni o ira na bete era cabora na isoro ni ivalavala ca mera kania e dua na iwase ni isoro ena rara ni valeniveitavaki. E raici qori me sa sorovaki kina na nodra ivalavala ca o ira na kauta yani na isoro. Ia ke kau eso na dra ni soro e cabori ina Tikina Tabu, qori na imatai ni rumu ena valenisoro, ena vakamai ga na ka e cabori ena sega ni laukana.—Vunau 6:24-26, 30.
Kena irairai ni oti ga na ituvaki vakaloloma a yaco, a raica o Mosese ni bibi me vakadeitaki ni sa muri vinaka kece na ivakaro i Jiova. Na gauna e kila kina ni sa vakamai na me e isoro ni ivalavala ca, a cudru o Mosese qai tarogi rau o Eliesa kei Icama na vuna erau sega ni kania kina me vaka e vakaroti, ni a se bera ni cabori vei Jiova na kena dra ena Tikina Tabu.—Vunau 10:17, 18.
A qai sauma na taro nei Mosese o Eroni, ni o ira na vo ni bete era muria tiko ga na ka e vakarota. A se qai vakamatei ga e rua na luvena, a rairai vaqaqa tiko o Eroni ke rawa ni ratou kania vakaveitamani ena lewaeloma vinaka na isoro ni ivalavala ca ena siga e cabori kina. De dua a nanuma ni na sega ni marautaka o Jiova na nodratou kania na isoro, ke sega mada ga ni bale vei ratou na nodrau cala o Netapi kei Epaiu.—Vunau 10:19.
E bibi sara ni a rairai vakasamataka tiko o Eroni ni dodonu me ratou a se qaqarauni vinaka ga na nona lewenivuvale ni ratou se qai tekivu veiqaravi vakabete, me ratou vakamarautaki Jiova ena nodratou cakava na ka kece e vakarota. Ia erau vakarogorogocataka na yaca i Jiova o Netapi kei Epaiu, mani cudruvi rau kina na Kalou. Kena irairai ni nanuma o Eroni ke kune na cala ena dua na vuvale vakabete, e sega ni dodonu mera kania na isoro tabu na lewenivuvale qori.
A rairai vakadonuya o Mosese na ka a tukuna o tuakana, ni tukuni ena kena ivolatukutuku: “Ni sa rogoca ko Mosese, sa vakadonuya.” (Vunau 10:20) A rairai lomavakacegu tale ga o Jiova ena ivakamacala i Eroni.