Matanitu ni Kalou, Oya na iVakarau ni Lomana e Dua?

“Na Matanitu ni Kalou ena yaco mai ni talairawarawa na lomana e dua me ciqomi Jisu qai vakabauti koya,” e kaya na Tui Tabu o Benedict XVI ena nona ivola Jesus of Nazareth. So tale era kaya na Matanitu ni Kalou, oya na veisau e yaco ena lomana e dua me ciqomi Jisu qai vakabauti koya. Kena ibalebale beka ni Matanitu ni Kalou e vauca na nona veisau e dua, se ‘tiko ga e lomamu’?

IA VEI Jisu, e bibi dina vua na Matanitu ni Kalou. A “usutu bibi sara ga ni nona dau vunau o Jisu” e kaya na Tui Tabu o Benedict. Mai na gauna lekaleka a cakacaka voli kina vakaitalatala o Jisu, levu na gauna a lako e veivanua “me vunautaka na itukutuku vinaka ni matanitu ni Kalou.” (Maciu 4:23) E vakadinadinataka ena nona veivakavulici kei na nona cakamana ni Matanitu qo e sega ni vauci ga kina na nona ciqoma e dua na Kalou qai talairawarawa vua. E vauci tale ga kina na veiliutaki, lewadodonu, kei na veivakalougatataki e tawamudu.

Veiliutaki kei na Lewadodonu

Ena dua na gauna ni sa vo e vica na siga me cava na cakacaka vakaitalatala i Jisu, a lako yani vua na tinadrau o Jemesa kei Joni na tisaipeli eratou dau veivolekati kei Jisu qai kaya: “Ni vakadonuya mada me rau dabe ena nomuni matanitu na luvequ, e dua ena yasamuni imatau kei na dua ena yasamuni imawi.” (Maciu 20:21) E macala ni a sega ni tukuna tiko na tinadrau e dua na ka e tiko e lomadrau na luvena. E matata vua ni Matanitu qo e okati kina na veiliutaki vata kei Jisu, e vinakata gona me rau vakaitavi tale ga kina na luvena. A yalataka vei ira na 11 na nona yapositolo yalodina nira na dabe tale ga ena “idabedabe vakatui” ra qai “lewa” vata kei koya ena nona Matanitu. (Luke 22:30) Era kila gona na imuri i Jisu ni qo e dua dina na Matanitu—e tiko o koya e liutaka kei ira era vakarurugi kina.

Na cava mada na nodra rai o ira era bula ena gauna i Jisu? Era raica beka ni Matanitu qo e vakaibalebaletaka ga na nona veisau e dua, se so tale na ka e vauci kina? Ni bera na Lakosivia ena 33 S.K., ni vodo tiko ena asa o Jisu ena nona ilakolako i Jerusalemi, era kacivaka na ilawalawa levu: “Keimami masulaka me vakabulai na Luvei Tevita!” (Maciu 21:9) Na cava era kacivaka kina oya? Kena irairai nira sa qai kila ni o Jisu na Mesaia yalataki ena solia vua na Kalou na Matanitu ena veiliutaki tawamudu, “na idabedabe vakatui i Tevita na tamana.” Era gadreva na veivakabulai, na sautu kei na lewadodonu ena kauta mai na Matanitu qori.—Luke 1:32; Sakaraia 9:9.

Veivakalougatataki Tawamudu

O ira sara mada ga era sega soti ni kauai ena cakacaka vakaitalatala i Jisu era kila na veika a vakavulica me baleta na Matanitu. A kerei Jisu e dua na dau basulawa a rube tu e yasana: “Jisu, qai nanumi au ni oni sa tiko ena nomuni matanitu.” Na cava a kaya vua o Jisu? A vakadeitaka vua, “daru na tiko vata mai Parataisi.”—Luke 23:42, 43.

E vakabauta na dau basulawa oya ni gauna ena vakaturi kina sa na veiliutaki o Jisu ena dua na Matanitu. Ena sega wale ga ni tu vua na kaukaua me veivakaturi qai veisautaka na dau basulawa kei ira na le milioni tale—ia e vinakata sara ga me cakava vaka kina. Io, ni sa veiliutaki tiko mai lomalagi, ena vakalougatataka tale ga na tamata ena vuravura taucoko me tawamudu ena vuku ni Matanitu.—Joni 5:28, 29.

Sa Tiko Maliwai Kemudou na Matanitu ni Kalou

Sega beka ni a tukuna o Jisu: “Sa tiko maliwai kemudou na matanitu ni Kalou”? Io, a kune qori ena Luke 17:21. Ia eso na ivakadewa ni iVolatabu e lavetaka na tikinivolatabu qo “sa tu e na lomamudou na matanitu ni Kalou,” so tale e lavetaka “e tiko ena kemudou maliwa.” (Me kena ivakaraitaki, raica na ivakadewa ni King James Version kei na New English Bible.) Na cava e vakaibalebaletaka o Jisu ni tukuna qori?

E vakamacalataki ena veitikina yavolita ni a cavuta o Jisu na vosa qori vei ira na ilawalawa dauveitusaqati era lotu Jiu era vakatokai me Farisi. E tiko na ka era nanuma me baleta na Mesaia kei na nona Matanitu. Era nanuma gona ni o koya na Mesaia ena lako mai ena “o kei lomalagi” me vaka na Tui lagilagi ena vakabulai ira na Jiu mai na ligadra na kai Roma, qai vakasuka tale mai na matanitu o Isireli. (Taniela 7:13, 14) A vakadodonutaka o Jisu na nodra nanuma cala ni kaya: “Ena sega ni laurai levu sara na yaco mai ni matanitu ni Kalou.” E tomana: “Sa tiko maliwai kemudou na matanitu ni Kalou.”—Luke 17:20, 21.

E vakadinadinataki ena veika e vakavulica o Jisu kei na nona cakamana ni o koya ga na Tui ni Matanitu a yalataki tu, ia sa ra qai cati Jisu ga vakalevu na Farisi ni ca na lomadra qai sega vei ira na vakabauta dina. Era cakitaka ni o Jisu na Mesaia. Sa qai tukuna vakadodonu vei ira: Na Matanitu, e matataka na kena Tui digitaki, e ‘tiko maliwai ira.’ A sega ni tukuna tiko o koya mera digova na lomadra.a Ni a duri tu e matadra o Jisu kei ira na nona tisaipeli. E kaya: “E tu sara ga qo kei kemuni na Matanitu ni Kalou.”—Luke 17:21, Contemporary English Version.

Me Bibi Vei Keda na Matanitu ni Kalou

E sega ni tiko e lomada na tamata ivalavala ca na Matanitu ni Kalou, ia e dodonu me bibi vei keda. A saga o Jisu ena nona veivakavulici kei na nona cakamana me vukei ira na vakarorogo mera vakabauta mai vu ni lomadra e dua na matanitu ni yalododonu ena kauta mai na sautu kei na bula vakacegu. E vinakata tale ga mera bucina na vakabauta ena vakavinakataka cake na nodra bula. A vakavulica mera masuta: “Tamai keimami mai lomalagi, me dokai na yacamuni. Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:9, 10) E levu era rogoci Jisu e tarai ira na ka e tukuna ra qai vakabauta. Qo e uqeti ira mera muri Jisu ena qarai ni veivakalougatataki ni Matanitu ni Kalou.

O vinakata na vakabauta va qori? Na cava mo cakava me va kina oya na nomu vakabauta? Nanuma na idola ni nona iVunau ena Ulunivanua o Jisu: “Era marau o ira na kila nira gadreva na Kalou, nira na wili mera lewe ni matanitu vakalomalagi.” (Maciu 5:3) O na vakadonuya beka ke sureti iko na iVakadinadina i Jiova e solia vei iko na mekesini qo mo vulica na iVolatabu? Ke o vakadonuya, o sega wale ga ni vakanuinui ina nona veisau e dua, o vakanuinui tale ga ena dua na veiliutaki e vinaka qai dau lewadodonu—na Matanitu ena kauta mai ina kawatamata kece na bula vakacegu kei na sautu.

[iVakamacala e ra]

[Tikina bibi ena tabana e 11]

A tiko beka e lomadra na meca i Jisu era domoqa qai daulaba na Matanitu ni Kalou?