Taro na Dauwiliwili

E Tiko Beka e Lomada na Matanitu ni Kalou?

Levu nikua era nanuma ni vaka kina. Kena ivakaraitaki, e kaya na Catholic Encyclopedia: “Na matanitu ni Kalou e kena ibalebale . . . na lewa ni Kalou e lomada.” Era vakavuvulitaka vakalevu na iliuliu ni lotu na vakasama oqo. E kaya beka na iVolatabu ni tiko e lomada na Matanitu ni Kalou?

So era nanuma ni a tekivuna ga o Jisu ena nona kaya: “Na Matanitu ni Kalou sa tu ena kemudou maliwa.” (Luke 17:​21, NW) E so tale na ivakadewa okati kina na iVolatabu vakaViti e kaya: “Sa tu e lomamudou na Matanitu ni Kalou.” Oya beka na ka e vakaibalebaletaka o Jisu? A kaya beka ni tiko e lomada na Matanitu ni Kalou?

Kena imatai, vakasamataka mada na lomada. Ni vakayagataki ena iVolatabu, e vakaibalebaletaki ina ka e sega ni laurai, okati e ke na noda vakasama, noda rai, kei na ka eda galeleta. E rogo vinaka ni tukuni ni tiko e lomada na Matanitu ni Kalou me veisautaki keda ina vinaka, ia nida vakasamataka, e rawa dina beka ni tiko e lomada na Matanitu oya?

E kaya na iVolatabu: “Sa ka dauveivakaisini duaduaga na yalo ni tamata, ka sa dredre ni vinaka.” (Jeremaia 17:⁠9) O Jisu mada ga a kaya: “Ni sa dau lako mai loma, mai na yalo ni tamata, na veivakanananu ca, na dauyalewa, na daubutako, na daulaba, na veibutakoci, na kocokoco, na i valavala velavela.” (Marika 7:​20-​22, VV) Vakasamataka mada: Levu na leqa eda sotava tu nikua e vu mai na lomada ivalavala ca. Ena rawa gona vakacava me tiko e lomada na Matanitu uasivi ni Kalou? Na loma ni tamata e sega ni rawa ni vuataka na Matanitu ni Kalou me vaka ga na kena sega ni rawa ni vuataka na lolo na soni.​​—⁠Maciu 7:​16.

Kena ikarua, vakasamataki ira mada na rogoci Jisu tiko ena gauna a cavuta kina na vosa ena Luke 17:21. Na tikina e 20 e kaya: ‘Nira tarogi koya na Farisi, se na yaco ninaica na matanitu ni Kalou,’ a sauma na nodra taro. Era meca i Jisu na Farisi. A tukuna o Jisu nira na sega ni curu ina Matanitu ni Kalou nira dauveivakaisini. (Maciu 23:13) Koya gona, ke ra sega ni curu ina Matanitu ni Kalou, me qai tiko vakacava e lomadra na Matanitu? Sa sega tu ga! Na cava e vakaibalebaletaka o Jisu?

Ni vakadewataki na vosa oqo i Jisu, e so na ivakadewa ni iVolatabu era vakayagataka e so na vosa e via tautauvata kei na ivakadewa ni New World Translation. So era kaya ni “tiko ena kemudou maliwa” na Matanitu se “tiko vata kei kemudou.” E tiko vakacava na Matanitu ni Kalou ena kedra maliwa na tamata ena gauna oya, wili kina o ira na Farisi? Na Kalou o Jiova a lesi Jisu me Tui ni Matanitu. A tiko sara ga ena kedra maliwa na Tui Digitaki, vakavulici ira ena veika me baleta na Matanitu ni Kalou, a cakamana tale ga me vakaraitaka na veika ena vakayacora na Matanitu oya. Ena vakasama oqori, sa tu dina ena kedra maliwa na Matanitu ni Kalou.

E sega ni vakamacalataki ena iVolatabu ni tiko e lomada na Matanitu ni Kalou. Ia, e dua dina na matanitu, ena veisautaka sara ga na ituvaki e vuravura me vaka ga era tukuna tu mai vakailiu na parofita.​​—⁠Aisea 9:​6, 7; Taniela 2:​44.