E “Dua na iVakatawa Vinaka, e Dua Tale ga na iTokani Dredre”

ENA mataka ni Vakarauwai, na ikava ni Tiseba, 2010, a mai vakacavara kina na nona veiqaravi e vuravura o John (Jack) Barr, e dua a lewena tu na iLawalawa Dauvakatulewa ni iVakadinadina i Jiova. A se qai yabaki 97. E kilai ni “dua na ivakatawa vinaka, e dua tale ga na itokani dredre.”

A sucu o Brother Jack Barr e Aberdeen mai Sikoteladi, e gone duadua vei ratou na tolu na veitacini. Erau lumuti ruarua na nona itubutubu. E dau marautaka o Brother Barr me talanoataka na nodratou bula vakavuvale ena gauna e se gone kina, e vakavinavinakataka tale ga na nodrau ivakaraitaki vinaka vua na nona itubutubu.

Na gauna e se itabagone kina, e dau dredre vua me vosa vei ira e sega ni kila. Ia e dau saga me vakavinakataka na leqa qori. Ena dua gona na yakavi ni Sigatabu ena 1927, ni se qai yabaki 14, e tukuna vei tamana ni sa rawa ni tomani koya ena cakacaka vakavunau. Qori sara ga na itekitekivu ni nona qaravi Jiova tu mai vakadede. Me tekivu mai na gauna oya me yacova na nona mate, e gugumatua tiko ga o Brother Barr me vunautaka na itukutuku vinaka.

A voleka sara ni mate o tinana ena dua na vakacalaka, qori a vakavuna me vakasamataka kina vakabibi na inaki ni bula. E mani yalataki koya vei Jiova ena 1929, qai papitaiso ena 1934. Ena 1939, a dua kina na lewe ni vuvale e Peceli e Lodoni mai Igiladi. Qo na itekitekivu ni nona veiqaravi vakatabakidua me 71 taucoko na yabaki.

Ena ika29 ni Okotova, 1960, a vakamautaki Mildred Willett, e dua na painia gugumatua, e dua tale ga na daukaulotu. E vakatoka na gauna qo o Brother Barr ni “dua dina na veiwekani talei.” Erau kilai o Brother kei Sister Barr ena nodrau ivakaraitaki vinaka, erau veiwatini yalodina, erau qai cakava tiko ga qori me yacova ni vakaotia na nona veiqaravi e vuravura o Mildred ena Okotova ni 2004. Ena nodrau bula vakawati, erau dau wilika vata e dua se vica na iwasewase ni iVolatabu e veisiga.

O ira na kilai koya, na yaca Jack Barr era na lai nanuma kina ni o koya e dua na turaga e dau momona na nona ivakasala​—e dau veiraurau, e dau tau ena yalovinaka, qai yavutaki ena iVolatabu. E dau cakacaka, e veinanumi, e ivakatawa dauloloma qai dua tale ga na itokani yalodina. Na nona ivakamacala, na nona ivunau, kei na nona masu e vakaraitaka na nona kaukaua vakayalo kei na nona veiwekani veivolekati kei Jiova.

Dina ni sa yali ena keda maliwa na tacida lomani o Brother Barr, ia eda marau vata ni sa rawata na isolisoli ni bula tawamate rawa​—na itavi dokai a dau vakanamata tu kina qai wewenigusuna voli. Qo ga na gagadre bibi duadua ni lomana.​—1 Kor. 15:​53, 54.a

[iVakamacala e ra]